10
1 Mani mapatêl ku way, ya labay ku buy pan-ipanalangin ku kan Bapan Namalyari, abituy miligtas ta dayi ya mani kalayi kun Judio. 2 Magpapêtêg gakun labaylabay lan pagsuywan si Bapan Namalyari. Nuwa a la tanda nu parasaantuy pêtêg kapapaidu kan Bapan Namalyari. 3 Ta a la tanda nu parasaantun ituwad Bapan Namalyarin matinêk ka gisay tawu buy nanyag silayna man sarili lan paralan. Kabay a la sinunul la paralan Bapan Namalyari amên ituwad silan matinêk. 4 Ta a la tanday sabay si Cristuy katuparan Kautusan amên kaganawan ya manampalataya kana, ituwad dan Bapan Namalyarin matinêk.Ya kaligtasan para sa kaganawan
5 Paradi ya impasulat kan Moises tungkul sa tawuy pan-ituwad Bapan Namalyarin matinêk batay sa Kautusan, “Ya tawuy manunul sa kaganawan utus Bapan Namalyari, mabiyan yan biyay ya ayin katganan.”a 6 Paradi yaman ya idi sa kasulatan tungkul sa pangamatinêk sa kapamilatan panampalataya, “Agana mina sabin sa sarili muy ‘Sisabêt ta magdakêy sa langit’b amên lakwên si Cristun ipayêpa baydi buy magsabi ya nu parasaantu kitamun magin matinêk? 7 Buy agana mu êt sabin na kaylangan dilag pun maku sa lugal nangamamati”c amên ipaimata si Cristu. 8 Nun a pansabin Kasulatan,
“Ya sabin Bapan Namalyari, idi yana kamuyu.
Idi baysên sa bêkê yu buy pansabin bêbêy yu.”d
Ya sabin Bapan Namalyari, ayin kaatag nun a ya panampalatayay pan-ipangaral yan. 9 Nu ipapêtêg mu sa arapan mani tawuy “Si Jesus ya Panginuun” buy manampalataya kan buun bêkê ya inuman yan pinabyay Bapan Namalyari, miligtas ka. 10 Tagawan pan-ituwad Bapan Namalyarin matinêk ka tawuy manampalataya kana un buun bêkê buy pan-iligtas nay tawuy magpapêtêg sa arapan mani tawuy, “Si Jesus ya Panginuun.” 11 Gawan idi sa Kasulatan, “Asê mipakadêng-êy ya sisabêt man na manampalataya kana.”e 12 Ayin pamikaatag ga Judio sa alwan Judio. Gawan gigisay Panginuun kaganawan buy pagpalên nan sadyay lakê ya kaganawan mamêg kana. 13 Tagawan idi sa Kasulatan, “Nu sisabêt man na mamêg sa Panginuun, miligtas.”f
14 Nuwa parasaantu silan mamêg nu a sila pun manampalataya kana? Buy parasaantu silan manampalataya nu a la pun nalêngêy tungkul kana? Buy parasaantu silan makalêngê nu ayin mangaral kalla? 15 Buy parasaantun mangaral ya tawu tungkul kana nu asê in-utus? Ati ya idi sa Kasulatan tungkul sa mani in-utus na, “Mamangêd êlêwên na pallumatêng mamipatandan Mangêd da Balita.”g 16 Nuwa alwan kaganawan nakalêngên Mangêd da Balitay nanampalataya. Ta sabitun nuna pun, sinabin propeta Isaias, “Panginuun, paran ayin naniwala sa in-aral yan.”h
17 Kabay kay manampalatayay tawu nu malêngê nay mangaral Mangêd da Balita tungkul kan Cristu. Buy malêngê na nu dilag mangaral kana. 18 Dat paradi ya pan-isipin kaatag, “Pêtêg nayin asê pun nakalêngên Mangêd da Balitay mani Israelita?” Alwan pêtêg ga abiin! Nakalêngê silayna, tagawan idi sa Kasulatan,
“Nalêngê sa kaganawan lugal la tunuy la,
buy ya pansabin la, nilatêng nga angga sa katganan babun luta.”i
19 Dat paradi ya pan-isipin kaatag, “Ya mani Israelita, a la pun nayi yaman mapukatan na Mangêd da Balita tungkul kan Cristu?” Alwan pêtêg ga abiin! Tagawan ayun sa insulat Moises, sinabin Bapan Namalyari kallay
“Paimunun kataw sa mani alwan Israelita.
Patubagên kataw sa mani tawuy ayin tanda.”j
20 Buy buun pas-êy sinabin Isaias ya pan-ipasabin Bapan Namalyari tungkul sa mani alwan Judio,
“Nakitan nakun mani tawuy asê mangkap kangku.
Impakilala kuy sarili ku sa mani asê mamatang tungkul kangku.”k
21 Nuwa tungkul laman sa Israel, ati ya sinabin Bapan Namalyari,
“Nabuyut takinan mamêg buy mangêtêng sa gisay bansay nakdêy ya ulu
buy asê manunul kangku.”l