Ya panuksu kan Jesus
4
1 Pamakayari, impalêt Ispiritun Bapan Namalyari si Jesus sa kakyangan amên tuksun Satanas. 2 Baydun nag-ayunu si Jesus un apattapuy allu buy apattapuy yabi. Kabay inlayang ya. 3 Inlumatêng amêsên na mapanuksuy Satanas buy sinabi na kana, “Nu sikay Anak Bapan Namalyari, daygên mun kanên na mani batun ati.”4 Nuwa nakitbay si Jesus, “Idi sa kasulatan,
‘Alwan kay sa kanên mambumyay ya tawu nun a sa balang sabin Bapan Namalyari.’ ”a
5 Pamakayari, pikilaku yan Satanas sa têngêl templu sa Jerusalem 6 buy sinabi na kan Jesus, “Nu sikay Anak Bapan Namalyari, magnabu ka di. Ta idi sa kasulatan,
‘Iutus Bapan Namalyari ya mani ang-el na buy sal-un laka amên asê midumpul sa batuy bitis mu.’ ”b
7 Nakitbay si Jesus, “Idi sa kasulatan,
‘Agana mu subukun ya Panginuun mun Namalyari.’ ”c
8 Pamakayari, pikilaku yan Satanas sa sadyay katag-ayan bung-uy buy impakit kanay kaganawan kaarian sa babun luta buy pibandiyan mani ati. 9 Buy sinabin Satanas kan Jesus, “Ya kaganawan abiin, idin ku kamu, nu dukwan muku buy ulimênên muku.”
10 Nakitbay si Jesus, “Magtas kay, Satanas! Gawan idi sa kasulatan,
‘Kay Panginuun mun Bapan Namalyari ya ulimênên mu buy pagsuywan mu.’ ”d
11 Pamakayarin abiin, inlakwanan yan Satanas. Buy inlumatêng nga ang-el Bapan Namalyari buy naglingkud kan Jesus.
Ya pag-umpisan Jesus sa pandaygên na
12 Sên nabalitan Jesus ya nakasukul si Juan, nag-udung ya sa prubinsyan Galilea. 13 Nuwa a yina nanugêl sa balayan Nazaret nun a sa balayan Capernaum, sa agid dagat Galilea sa katganan Zebulun buy Neftali.e 14 Sa pakapakun baydu, natupad day sinabin Propeta Isaias,
15 “Ya lugal Zebulun buy ya lugal Neftali sabay ya dadanan papakun sa lawa ya idi sa lipay ilug Jordan.
Ya mani lugal abiin, sakup Galilea ya panugêlan mani alwan Judio.”
16 Mambumyay sa nadiglêm ya mani tawu baydu, nuwa makakit silan ayin kaparisuy sawang.
Agyan idi sila sa nadiglêm papakun sa kamatyan, masawangan na isip la.f
17 Paubat sabitun inlumatêng si Jesus sa Capernaum, nangaral ya. Sinabi na, “Pagsisyan buy itgên yuy panyag kasalanan, tagawan madani yanay pag-arin Bapan Namalyari.”
Binêg Jesus ya apat ta mandakêp kênan lanêm
18 Kaban mamita si Jesus sa agid lawan Galilea, nakitan nay mipatêl la silan Simon ya pambêgên Pedro buy si Andres. Mamisamwag silan dala ta ubra lay mandakêp kênan lanêm. 19 Sinabin Jesus kalla, “Kilaku kaw kangku ta daygên kataw mamipakadanin tawu kan Bapan Namalyari amên manampalataya sila kaparisun pandakêp yun kênan lanêm.” 20 Tambêng lan imbalag ga dala la buy nakilaku sila kan Jesus.
21 Kaban pan-isundun Jesus ya pamita na, nakitan nay mipatêl ya si Santiago buy si Juan ya idi sa bangka ya mamipakapalan dala la. Kaawyun la si Zebedeo ya bapa la. Binêg sila êt Jesus amên makilaku kana. 22 Kabay tambêng lan inlakwanan ya bangka la buy bapa la ta nakilaku sila kan Jesus.
Nangaral buy namaiyul si Jesus mani nagsakit
23 Inlakun Jesus ya buun prubinsyan Galilea buy sinumun ya sa mani balin pagtipunan mani Judio amên manuru. In-aral nay Mangêd da Balita tungkul sa pag-arin Bapan Namalyari. Pinaiyul na êt ta kaganawan magmikakalasi ya sakit buy dilag mangatanam. 24 Niwagaw wa balita tungkul kan Jesus sa buun prubinsyan Siria. Kabay gintan kanay kaganawan nagsakit buy mani magkasakit sa matanam la buy mani sinêdakan nadawak ka ispiritu buy mani tinugaw buy mani a kabita. Pinaiyul nay kaganawan abitu. 25 Kabay inlaybat yan sadyay lakên tawuy ubat sa prubinsyan Galilea, sa mani balayan sa Decapolis, sa balayan Jerusalem, sa prubinsyan Judea buy sa lipay Ilug Jordan.