Hen miyatlo way sorat
Juan
1
Haén ah Juan way ponò hen ommafurot, wat antoyan hen sorat-o an heay Gayo way laylaychê tot-owa.2 Hen chawat-on Apudyus heay sonod, wat ta amma-ammay-ayu koma ahna ya ammay koma agé hen cham man-ì-iwiyan way kaman chillu hen annay afurotno. 3 Anà ammag laylayad hen ummaliyan hen anchichay tapen hen sosnodtaaw way cha omafurot te henaphapetcha way cham epapate way mangchén hen anchi katot-owaan mepanggép an Apudyus way cham torachén. 4 Ya maid kasen mangemparaylayad an haén no faén hen anchi chà mangngaran way ammag totollachén hen a-anào hen anchi katot-owaan.
5 Ammag ammay paat hen cham ekamkaman way sonod, te cham mangiliyén hen anchichay sosnodtaaw way cha omafurot way tàén maid innilam an chichéén cham chillu torongan. 6 Te inumchahcha ahto hen anchichay nanchag-oh ah faréyyu yag henaphapetcha agé an chàni way cha ma-am-among ahto hen anchi empàilam way layadno an chicha. Wat yachi koma hen cham ekamakaman way manorong hen kaman hichi no mamfiyahicha te yachi chillu hen machayawan Apudyus. 7 Te chicha, lummigwatcha way maid kasen gagtàcha no faén yanggay hen manginwarawagancha hen mepanggép an Jesu Cristu. Ya achicha agé ammag omawat ah torong hen anchichay achi omafurot. 8 Wat hiyachi, chitaaw, masapor torongantaaw hen kaman an chicha, te yachi hen kaman chataaw metapyan hen chacha ammaan way minwarawag hen anchi katot-owaan.
9 Wacha hen anchi ihay sorat-o an chàyu way cha ma-am-among ahna, ngém ah Diotrefes, annag cha epasekat hen acharna ta hiya paat hen ma-afurot ah man-apoyu way annag achi changrén haén. 10 Wat no umaliyà, pelet way pafùnagê hen aminay chana enamma-ammaan way annag cha ustan chàni ya chana kapokapoton chàni. Ya kaskasen agé te annag achi cha paghépén hen anchichay sosnod way ommafurot no engwacha ahna. Yag chana agé epawa hen tapena way mangayag an chicha, ya anna agég cha epatpatna way mangemparyaw an chicha ta achicha mìyamong an chàyu.
11 Heay sonod way laylaychê, achitaaw cha torachén hen laweng ta hen torachéntaaw koma, wat hen anchi ammay yanggay. Te heno way mangamma hen ammay, ah Apudyus hen nangen-awa an hiya. Waman hen anchi cha mangamma hen laweng, maid angkay innilana an Apudyus.
12 Amin way tatagu, wat pahig ammay hen chacha aryén mepanggép an Demetrio. Ya hen manot-owaan hen ka-ammayna, wat hen chana manorachan hen tot-owa. Ya uray chàni, tàchéganni agé hiya, ya innilayu way chàni, tot-owa hen chani aryéaryén.
13 Chuar koma hen ifagà an hea ngém naligat no an esorat amin. 14 Wat hen ekat-o, achi mafayagat umaliyà ahna ta ammay hen mantagtagépfaranta way manhahagang.
15 Wat ta mapapanoh koma hen hamhamàtaaw amin. Ya aminay ifataaw ahto, chacha amin pakomostéén hea ya hea, pakomostaam agé amin hen annachay ifataaw ahna.
Haén ah Juan.