Dʊndɔrɛ kristagʊɔɔ lɛɛzannɔ tɔ ma
5
Lɛɛzannɔ kʊ ŋ nɩ kan awɔɔ kɩ rɔ wɔɔ,
mɔɔ ʊ kʊ m ŋ dʊndɔ.
Lɛɛzaa m mɔɔ m sɔ am ŋ hɔ bɩ m,
bɩ Krista fɩryɩrɛrɔ wɔɔ kasɛtɩzaa m mɔɔ m sɔ,
mɔɔ nyɩntam lɛbɔʊrɛ k'a n'a hɩnkam b'ʊ sɔ.
Hɔ kʊ mɔɔ ʊ kʊ m a hɩ ŋ nɩ bɩ ba n nɩ:
2 K'a nyasʊ bakʊ kʊ Woso a da awɔɔ wɔ ʊ bɩ m mɩŋŋa.
A bɩ dɔ ma pakra nɩ y,
k'a dɔ ma heernyɩnta m,
amba Woso lɛ n taa bɩ m.
A bɩ dɔ bakʊ bɩ ma sɔ,
k'a busoo yɩ y,
bɩ k'a dɔ ma kan a heer kɩ haay.
3 A b'a so gʊɔɔ kʊ Woso ŋ da a wɔ ʊ rɔ wɔɔ ʊ paŋŋa nɩ y,
bɩ k'a a tɔ ʊ k'a hɔbaarɔ n bɩr mɩŋŋa,
kʊ gʊɔɔ n a da ma ŋnɩ ŋ sa.
4 K'awɔɔ ba ncɩnaaʊ,
kʊ dundonno jɩtaarɛ bɩ bɩ bʊr,
a y'a kam awɔɔ n nyɩnta a lɛbɔʊrɛ k'a bɩr a zarm bɩ nɔ ʊ.
Dʊndɔrɛ kristagʊɔɔ wɔɔ tɔ ma
5 Gʊɔɔ kʊ ŋ gɔɔta rɔ wɔɔ,
k'a yɛ lɛɛzannɔ wɔɔ ma.
Awɔɔ haay k'a bɩr mɩŋŋazerle m kan kʊ kɩ,
bala,
Wosoci b'a hɩ,
a ʊ:
Woso bɩr yɛm mɩŋŋabusurezannɔ wɔɔ ma y,
b'a y'a barka bɩ kam mɩŋŋazerlezannɔ ʊ.
6 K'a mɩŋŋɔɔ zer Woso taa,
a paŋŋa ɩ lɛ da haay,
maam bɩ,
a y'awɔɔ gore daŋ ʊ a dɔmɩm ʊ.
7 K'a minno kʊ ŋ n'awɔɔ kɔm nɔ wɔɔ haay da a wɔ ʊ,
bala,
a mɩŋŋa ɩ nyasʊrɛ awɔɔ m.
8 A b'a zu a ʊ y,
k'a dundo a zi.
Sʊtaana awɔɔ jɩm b'ɩ kumkum lɛɛ ma am poozaa hɔ bɩ m,
an nɩ baa dam,
an n'a kam gʊaa ma k'a nyasʊ a bɩ.
9 K'a a da a lɛ ʊ kɔɔkɔɔ,
sɩrakarɛ nɔ ʊ,
a dɔ a ʊ,
awɔɔ fɩryɩrɛrɔ wɔɔ y'awɔɔ danyɩnɔ yɩm sɔ durnya b'ʊ jilli.
10 Awɔɔ ɩ fɩr yɩm dɔmɩm poore nɔ ʊ,
bɩ,
Woso k'a a so barka do haay ʊ,
an awɔɔ bir,
k'awɔɔ n nyɩnta a lɛbɔʊrɛ k'a nyarɛ ba ʊ nɔ ʊ,
Krista zuure nɔ ʊ bɩ y'awɔɔ bankam fasɩ,
an awɔɔ paŋŋa da ra,
an a ka awɔɔ n jɩm kɔɔkɔɔ,
hɔsɩ b'a darɛ awɔɔ ma y.
11 A y'a so paŋŋa ʊ dɔmɩm haay.
Amina.
Meerbaa nyambʊrlɛ kan leersore kɩ
12 Wɔɔ danyɩ Silas mɔɔ da ʊ,
an ci poore naa gʊrsɩra ba,
kʊ m a nyɔɔ awɔɔ ma.
Mɔɔ ɩ dɩgam ma sɩrabarɛzaa sɩrakarɛ bɩ nɔ ʊ.
Ci bɩ ba mɔɔ ʊ awɔɔ ma,
kʊ m awɔɔ heer yo,
kʊ m a hɩ a m paan… m ʊ,
Woso barka denter b'awɔɔ n a nɔ ʊ naa,
k'a gɔɔta a nɔ ʊ kɔɔkɔɔ.
13 Gʊɔɔ kʊ Woso ŋ ba a gʊɔɔ rɔ wɔɔ sokʊma k'a nɩ *Babɩlɔnnɩ ʊ naa ʊ b'ɩ yaa darɛ a m.
Mɔɔ nyɩ Markɩ ɩ yaa darɛ awɔɔ m sɔ.
14 K'a yaa da kʊ m mɩŋŋa-mɩŋŋa danyɩbaa nɔ ʊ.
Bɩ,
kʊ Woso laafɩɩ n bɩr kan awɔɔ haay k'a nɩ Krista nɔ ʊ rɔ wɔɔ kɩ.