Ci kʊ Pol a ba
FILEMƆN
ma
Pol ɩ yaa dam Filemɔn m kan a dɔrɛrɔ kɩ m
1
Mɔɔ mɩŋŋa Pol,
mɔɔ kʊ m nɩ lɔnnɔcɛ ʊ Krista Yeezuu tɔ ma,
mɔɔ kan wɔɔ danyɩ Timote kɩ m nɩ ci bɩ bam.
A ba wɔɔ nawʊrɛ ɩbɩɩ ma,
Filemɔn,
wɔɔ gʊaasɩba n'ɩbɩɩ m,
wɔɔ zibəəkɔɔn n'ɩbɩɩ m sɔ.
2 A ba wɔɔ nawʊm kristagʊɔɔ sokʊma k'a n'a som kʊ ma ɩbɩɩ har ʊ bɩ ma sɔ,
kan wɔɔ danlʊ Apɩya kɩ ma,
kan lemim nyɩnta zoobarɛkɔɔn Arsip kɩ ma sɔ.
3 Bɩ kʊ wɔɔ Zɩ Woso kan Zuuba Yeezuu Krista kɩ n barka kan laafɩɩ kɩ ka a ʊ.
Filemɔn sɩrakarɛ kan a ŋʊarɛ kɩ mim
4 Filemɔn,
kʊ mɔɔ ɩ yaa dam Woso m,
bɩ mɔɔ ɩbɩɩ tɔ da m nɔ ʊ,
m n'a barka dam tee… ɩbɩɩ tɔ ma.
5 Bala,
mɔɔ ɩ ŋʊarɛ k'ɩbɩɩ n ta m wosogʊɔɔ wɔɔ haay tɔ ma bɩ mim mam,
kan sɩrakarɛ k'ɩbɩɩ n ta m Zuuba Yeezuu nɔ ʊ bɩ mim kɩ.
6 A yɛ mɔɔ nawʊm Woso han,
k'ɩbɩɩ sɩrakarɛ k'awɔɔ zɛ kʊ ra kan ɩbɩɩ kɩ bɩ n zi ba,
an hɔ mɩŋŋa haay kʊ wɔɔ n'ʊ dam ma ʊ a ba Krista zibəə tɔ ma bɩ hɩnka.
7 M danyɩ,
zi k'ɩbɩɩ ba ɩ ŋʊarɛ bɩ tɔ ma bɩ,
a mɔɔ heer nyɔɔ gʊta,
an mɔɔ heer wʊta,
bala,
ɩbɩɩ wosogʊɔɔ wɔɔ heer ba kookoo.
Pol y'a yɛm kʊ Filemɔn n Onezim si
8 Naa minto nɩ,
kʊ mɔɔ bɩ to m nɩ lɛ m Krista tɔ ma,
kʊ m lɛ ka ɩ ʊ,
k'ɩ hɔ kʊ mɔɔ lɛ n taa ɩbɩɩ gʊr zi bɩ ba bɩ,
9 kʊ mɔɔ hɔ bɩ do yɛ ɩbɩɩ han ŋʊarɛ tɔ ma,
a jɩra mɔɔ m lɛ kʊ mɔɔ n'a karɛ ɩbɩɩ ʊ bɩ m.
Ɩɩn… mɔɔ mɩŋŋa m Pol,
gʊaa gusire m mɔɔ m,
m nɩ lɔnnɔcɛ ʊ kɛɛrɛ,
Krista Yeezuu tɔ ma.
10 M wɔ mɔɔ n'a zɩnzɛrɛ ɩbɩɩ m,
Onezim tɔ ma,
a a ba mɔɔ nyɩnnɩ sɩrakarɛ nɔ ʊ lɔnnɔcɛ ʊ naa ʊ.
11 Biisi bɩ a zibəə ba ɩbɩɩ ma y,
bɩ kɛɛrɛ naa,
a zibəə ta ɩbɩɩ ma,
a zibəə n ta mɔɔ ma sɔ.
12 A da mɔɔ nawʊrɛ ɩbɩɩ m zaa ra,
a mɩŋŋa a ba hɔdeem kan mɔɔ kɩ kɛɛrɛ.
13 Kʊ mɔɔ hɔɔnhɔ m,
mɔɔ ŋʊa k'an gɔɔta kan mɔɔ kɩ naa ʊ,
k'an bɩr mɔɔ ziro bam ɩbɩɩ bɩncɛ ʊ,
lɔnnɔcɛ kʊ mɔɔ n ta ʊ lemim nyɩnta bɩ tɔ ma naa nɔ ʊ.
14 Bɩ,
mɔɔ n a ŋʊa kʊ m hɔsɩ ba k'ɩbɩɩ n zaa ka y.
Mɔɔ lɛ baa k'ɩbɩɩ n zi mɩŋŋa ba mɔɔ m paŋŋa nɩ y,
mɔɔ lɛ n taa k'ɩbɩɩ n a ba ɩ hɔɔnhɔ ma.
15 A a da ma Onezim bɩ,
a gʊ a ʊ ɩbɩɩ ma dɔmɩm poore nɔ ʊ,
k'an b'a bɔ an bɩ gɔɔta kan ɩ kɩ dɔmɩm haay nɔ ʊ.
16 Dɩɩtaa naa,
lɔ bɛɛ m bala dɔ y,
a lɛ da lɔ m gʊta kɛɛrɛ,
a ba a ʊ wɔɔ danyɩ wɔɔ n'a ŋʊam karɩ paan….
Mɔɔ y'a ŋʊam gʊta paan…,
bɩ ɩbɩɩ ɩ ga m ɩ ŋʊa an lɛ da,
bala,
gʊaa m,
bɩ wɔɔ danyɩ m sɔ Krista nɔ ʊ.
17 K'ɩbɩɩ ɩ dɩgam mɔɔ ma ɩ danyɩ,
k'a maam k'ɩ si,
amba ɩbɩɩ nɩ mɔɔ sim bɩ m.
18 Bɩ,
k'a kʊrɔ ma kan ɩ kɩ,
gɛɛ ɩbɩɩ zɩm an ta m,
k'ɩ ba mɔɔ mɩŋŋa mim.
19 Mɔɔ mɩŋŋa Pol nɩ gʊrsɩra naa do bam:
«K'a zɩm bɩ wuti karɔ,
mɔɔ n n'a karɛ,»
bɩ pakra bɛɛ m kʊ m a hɩ ɩ m sɔ m ʊ,
mɔɔ zɩm ta ɩbɩɩ ra y,
ɩbɩɩ mɩŋŋa mɩsɩrbaa bɩ m.
20 Ɩɩn… m danyɩ,
m wɔ mɔɔ n'a zɩnzɛrɛ ɩ m,
naa ba m m denter Zuuba tɔ ma.
Mɔɔ heer ba kookoo Krista ŋʊarɛ bɩ tɔ ma.
21 Ci bɩ kʊ mɔɔ n'a barɛ ɩbɩɩ ma naa,
a dɔ mɔɔ ʊ paan… m ʊ,
ɩbɩɩ hɔ kʊ mɔɔ n'a yɛm bɩ bam,
bɩ mɔɔ dɔ sɔ m ʊ,
ɩbɩɩ y'a barɛ an cem hɔ kʊ mɔɔ n'a yɛm bɩ han.
22 Kʊ m a yɛ ɩ han lɛɛm k'ɩ cɛ banka ɩ cɩnta m m,
bala,
mɔɔ y'a gɩngam mɩŋŋa awɔɔ yaadarɛrɔ wɔɔ tɔ ma,
m ʊ,
n wɔ daam mɔɔ ma zɔɔ mɔɔ n bʊr awɔɔ zi b'ʊ.
Leersore yaadarɛ
23 Epafras ɩ yaa darɛ a m,
a du n y'a ʊ lɔnnɔcɛ ʊ naa ʊ kan mɔɔ kɩ Krista Yeezuu tɔ ma.
24 Mɔɔ zibəəkɔɔnrɔ,
Markɩ kan Aristarkɩ kɩ,
Demas kɩ,
Likki kɩ ɩ yaa darɛ a m sɔ.
25 Bɩ kʊ Zuuba Yeezuu Krista barka n bɩr kan a kɩ.