Sɩrakarɛzannɔ mɩsɩrbaa
3
A hɩ sɩrakarɛzannɔ wɔɔ m haay,
ɩ ʊ,
ŋnɩ yɛ kʊ lɛɛzannɔ haay ma,
ŋnɩ ŋ lɛ si,
ŋnɩ bɩr zibəəro mɩŋŋɔɔ do haay barɛ ŋʊarɛ.
2 Ŋ bɩ gɔsɩ sʊnsɔ wʊ y,
ŋ bɩ nyaa ba y,
ŋnɩ bɩr mɩŋŋabaa bam,
ŋnɩ bɩr nyɩnta kan gʊɔɔ haay kɩ.
3 Bala,
wɔɔ nyɩnta biisi sɔ,
ʊ n nɩ hɔɔnwar zi bam,
ʊ m bayɛrɛzannɔ,
ʊ nyaam,
mɛsim lɛtaamarɔ do haay kan a hɔɔnhɔrɔ kɩ n'a so wɔɔ ʊ,
ʊ n nɩ bʊnyaabaa bam,
ʊ n n'ʊ kam ma k'ʊ yɩ am gʊɔɔ vantɔɔ m,
ʊ a ka gʊɔɔ m sɔ ʊ m,
ʊ sɔ kʊ m.
4 Bɩ,
Woso wɔɔ bʊmbɔrɛzaa bɩ,
k'a b'a mɩŋŋabaa kan a ŋʊarɛ k'an ta m gʊɔɔ haay tɔ ma bɩ hɩnka bɩ,
5 a wɔɔ bʊmbɔ vam,
a n wɔɔ bʊmbɔ zibəə tɩrga kʊ wɔɔ ba barɛ m tɔ ma y,
wɔɔ bʊmbɔ a ʊ,
k'awɔɔ cicir zɛ bɩ tɔ ma.
Wɔɔ bʊmbɔ a ʊ,
an wɔɔ mimbʊnyaarɔ sʊrgɔ,
*Sɛnt-Ɛspri n yɩrɛ daa ka wɔɔ ʊ,
an mɩsɩrbaa daa ka wɔɔ ʊ.
6 Bala,
Woso a ka Sɛnt-Ɛspri n zer wɔɔ ra gʊta wɔɔ bʊmbɔrɛzaa Yeezuu Krista tɔ ma.
7 A ba a ʊ ncɩnaaʊ,
k'awɔɔ ba tɩrga a mɩm ʊ,
a barka tɔ ma,
kʊ wɔɔ n yɩ mɩsɩrbaa k'a nyarɛ ba ʊ bɩ hɔjirlezannɔ,
wɔɔ taaheerlɛ bɩ m bɩ sɔ.
8 Meerbaa kʊ mɔɔ ba naa,
sɩra m,
mɔɔ lɛ taa k'ɩbɩɩ m bɩr a hɩm paan…,
ɩ bɩr som la,
kʊ gʊɔɔ kʊ ŋ sɩra ka Woso ʊ rɔ wɔɔ n bɩr a tʊntɔŋ ʊ ŋnɩ bɩr lɛɛ,
kan zibəəro mɩŋŋɔɔ barɛ kɩ tee….
Zi mɩŋŋa barɛ bɩ,
hɔ mɩŋŋa m,
a y'a dam gʊɔɔ han sɔ.
9 Bɩ,
ɩ bɩ yɛ bɩsɩkarɛ yaarsɩrɔ ma y,
yaabɔɔ tɔrɔ gaandarɛrɔ sʊʊrarɔ ma y,
Moyiisi lɛrɔ nyaabarɛ kan ŋ bakʊmarɛ rɔ wɔɔ kɩ y,
ŋ nyɔɔdʊ ba ʊ,
bɩ ŋ bɩr a dam gʊaa han sɔ y.
10 Kʊ gʊaa ɩ gʊɔɔ gʊngʊ kʊ ma zi bam,
k'ɩ həən si ma,
k'a gɔɔta an nɩ tam lɛɛ,
k'ɩ ɩ ya ɩ həən si ma,
k'a a gu an nɩ tam lɛɛ k'ɩ bɔ ɩ zi.
11 Ɩbɩɩ dɔ ɩ ʊ,
gʊɔɔ ncɩnaaʊ rɔ wɔɔ,
ŋ zaa tɩrga bɩ to,
ŋ mimbʊnyaarɔ wɔɔ nɩ ŋ nyaanlɛ hɩnkarɛ.
Leersore meerbaarɔ
12 Mɔɔ Artemas gɛɛ Tisikkɩ nyɔɔrɛ ɩbɩɩ zi.
K'a bɩ lee ku,
k'ɩ tɔ ʊ ɩ bʊr Nikopolis ʊ mɔɔ zi.
Bala,
kʊ bɩ do mɔɔ hɔɔn bɔ ʊ,
kʊ m nyɩnta ʊ nyɛɛm dɔmɩm ʊ.
13 Ɩ tɔ ʊ,
k'ɩ ɩ da lɛrɔ karɩnsaamba Zenas han,
kan Apolɔs kɩ,
kʊ hɔsɩ bɩ jɩra ŋ ma,
ŋ zaakʊrɛ bɩ dɔmɩm ʊ y.
14 Wɔɔ gʊɔɔ wɔɔ a ga m sɔ,
ŋnɩ bɩr a kam ma k'a bɩr lɛɛ kan zibəəro mɩŋŋɔɔ barɛ dɩndarɛ kɩ,
kʊ ŋ n'a da ma,
ŋn'a da gʊɔɔ kʊ hɔ jɩra ŋ ma rɔ wɔɔ han.
Ncɩnaaʊ bɩ,
ŋ bɩ mɩsɩrbaa k'a nyɔɔdʊ ba ʊ barɛ y.
15 Gʊɔɔ kʊ ŋ nɩ kan mɔɔ kɩ haay rɔ wɔɔ ɩ yaa darɛ ɩ m.
Yaa da gʊɔɔ kʊ ŋ nɩ wɔɔ ŋʊam sɩrakarɛ nɔ ʊ rɔ wɔɔ m.
Bɩ,
Kʊ Woso barka n bɩr kan awɔɔ haay kɩ.