Lɔnnɔ kan a soʊrezannɔ kɩ
6
Gʊɔɔ haay kʊ ŋ nɩ lɔmbaa kɔrɛ nɔ ʊ rɔ wɔɔ a ga m,
ŋn'a dɔ ŋ ʊ,
a soʊrezannɔ wɔɔ a ga daʊrɛ m.
Kʊ gʊɔɔ bɩ Woso tɔ zar y,
kʊ ŋ bɩ wɔɔ hɔdɩndarɛ bɩ tɔ zar sɔ y.
2 Lɔnnɔ kʊ ŋ soʊrezannɔ wɔɔ sɩrakarɛ zannɔ m nɔ wɔɔ,
ŋ b'a hɩ ŋ ʊ,
a hɔdeem kan ŋ kɩ Krista danyɩbaa nɔ ʊ,
ŋnɩ ŋ gore bɔ ʊ y.
A ga a ʊ m,
ŋnɩ ŋ zi ba mɩŋŋa-mɩŋŋa denter an lɛ da,
kʊ sɩrakarɛzannɔ m,
ŋ bɔɔ m ŋnɩ ŋ ŋʊam,
ŋn'ɩ ŋ zi bam bɩ tɔ ma.
Ŋʊaar hɔdɩndarɛzannɔ kan hɔnyɩ denter kɩ mim
Hɔ k'ɩbɩɩ ga m,
ɩ dɩnda gʊɔɔ m,
ɩ ŋ dʊndɔ m bɩ n naa.
3 Kʊ gʊaa ɩ hɔ vanta dɩndam,
a bɩr yɛm wɔɔ Zuuba Yeezuu Krista sɩra meerbaarɔ wɔɔ ma y,
b'a bɩr yɛm hɔdɩndarɛ k'a ga kʊ ʊ ba kan mɩsɩrbaa k'a Woso nɔ yɩ bɩ kɩ ma sɔ,
4 gʊaa bɩ do bɩ,
mɩŋŋabusurezaa m.
A n hɔsɩ dɔ y,
bɩsɩkarɛ waasɩ yaaba n ta m,
an n'a kam ma k'a nyaa ba meerbaanyɩrɔ tɔ ma.
Naa nɩ zɛm lɛtaama bʊnyaa m kan kʊmarɛwar kɩ,
kʊ tɔ zarlɛ kɩ,
hɔɔn da kʊ ma bʊnyaa kɩ m.
5 A ɩ gʊɔɔ kʊ ŋ hɔɔn m daŋŋada rɔ wɔɔ dam bɩsɩkarɛ jintoo ma,
bala,
ŋ n sɩra dɔ y,
ŋn'a gɩngarɛ ŋ ʊ,
sɩrakawosoʊ bɩ,
hɔnyɩ yɩrɛ zaa m.
6 Denter m,
sɩrakawosoʊ bɩ,
hɔnyɩ gʊta m,
k'a ɩ yɩrɛ ʊ,
ɩ y'ɩ zergam hɔ k'ɩ m ta m bɩ rɛ.
7 Bala,
bʊr kʊ wɔɔ ʊ durnya ʊ bɩ,
wɔɔ n bʊr hɔsɩ nɩ y,
wɔɔ y'ʊ bɔm sɔ ʊ wɔ m vam.
8 Naa tɔ ma bɩ,
kʊ wɔɔ ɩ hɔbɩrɛ m kan huu kɩ m,
naa a ga m,
an wɔɔ bɔ.
9 Bɩ,
gʊɔɔ kʊ ŋ n'a kam ma k'a ba hɔnyɩzannɔ wɔɔ,
a do ŋ nawʊm makra nɔ ʊ,
ŋn'ɩ gasʊm lɛtaamarɔ nɩbɩɩrɔ kʊ ŋ nɩ bʊnyaa baŋŋa nɔ ʊ.
Lɛtaamarɔ wɔɔ duro nɩ gʊɔɔ dam zaarbarɛ kan nyaanlɛ kɩ ma.
10 Bala,
mimbʊnyaarɔ do haay məsi m busoo ŋʊarɛ m.
Gʊɔɔ gɔsɩnnɔ a nyʊnnyɔɔ ŋn'a ba sɩrakarɛ ma laatʊ,
ŋn'ɩ fɩr do y'a hʊnhɔ yɩm a mɩsɩrbaa nɔ ʊ,
busoo ŋʊarɛ kʊ ŋ gasʊ ʊ bɩ tɔ ma.
Dʊndɔ Timote minto
11 B'ɩbɩɩ,
Woso gʊaa n'ɩ mɩ,
ɩ ba laatʊ naa woo… ma,
ɩ ɩ tɔ ʊ kan tɩrgabaa zibəə kɩ,
mɩsɩrbaa k'a Woso nɔ yɩ kɩ,
kan sɩrakarɛ kɩ,
ŋʊarɛ kɩ,
tʊntɔʊrɛ kɩ,
nyɩntabaa kɩ.
12 Zoo mɩŋŋa kʊ sɩrakarɛ zoo m bɩ ba,
mɩsɩrbaa k'a nyarɛ ba ʊ bɩ nyasʊ kɔɔkɔɔ.
Ɩbɩɩ bir Woso ʊ bɩ tɔ ma,
ɩbɩɩ m nyɩnta ɩ yɛ ma,
ɩ ɩ sɩrakarɛ bɔ ɩ lɛ ma mɩŋŋa gʊɔɔ cir lɛɛ.
13 Kʊ m lɛ cɩnta ɩ m,
Woso k'a nɩ mɩsɩrbaa kam hɔ haay ʊ bɩ taa,
kan Krista Yeezuu kɩ taa,
bɩ nyɩnta an a sɩrakarɛ kasɛtɩ ka mɩŋŋa Pɔns Pɩlatɩ taa.
14 Lɛ kʊ mɔɔ n'a karɛ ɩbɩɩ ʊ bɩ ba n nɩ:
Zu hɔ kʊ mɔɔ hɩ ɩbɩɩ m haay b'ʊ,
ɩ nyasʊ m kʊ dintim b'a nɔ ma y,
kʊ minsi bɩ nyɩnta ɩ gʊr zi sɔ y,
kʊ wɔɔ Zuuba Yeezuu Krista n tolle ba an a bɔ an bʊr.
15 A zɛm dɔmɩm kʊ Woso a cɩnta k'an b'ʊr ma b'ʊ,
Woso mɩŋŋa ɩ lɛ da haay,
a y'a so heernyɔɔ ʊ,
a m cinno haay Cir,
a m zuubarɔ haay Zuuba,
16 a mɩŋŋa y'a deem taan… ɩ bɩr garɛ y,
lɛɛgure kʊ gɔsɩ b'a dam ma
an a zɔ ma nɔ an nɩ nyɩntaŋ ʊ,
gɔsɩ n a yɩ y,
bɩ gɔsɩ b'a dam ma an a yɩ y.
A y'a so lɛbɔʊrɛ ʊ
kan paŋŋa k'a nyarɛ ba ʊ kɩ!
Amina.
Dʊndɔ hɔnyɩzannɔ tɔ ma
17 A hɩ gʊɔɔ kʊ ŋ nɩ hɔ m durnya naa do nɔ ʊ rɔ wɔɔ m,
ɩ ʊ,
ŋ b'a mɩŋŋɔɔ busu,
bɩ ŋ bɩ yo hɔnyɩ ma y,
bala hɔ cenlezaa m.
Bɩ,
kʊ ŋ nɩ yo Woso ma,
a m nɩ hɔ woo… kam wɔɔ ʊ gʊta,
kʊ wɔɔ m bɩr ta ŋ nɩ,
ʊ ʊ heer nyɔɔ ŋ nɩ.
18 A hɩ ŋ nɩ ɩ ʊ,
ŋnɩ zi mɩŋŋa ba,
ŋn'a ba zi mɩŋŋa barɛzannɔ gʊtɔɔ,
ŋnɩ yɩ hɔkarɛzannɔ,
ŋn'a da gʊɔɔ vantɔɔ han a hɔnyɩ bɩ m.
19 Kʊ ŋ y'a barɛ ncɩnaaʊ,
hɔnyɩ mɩŋŋa k'a b'a zarlɛ,
ŋn'a cɩntarɛ a mɩŋŋɔɔ m booti hinni tɔ ma,
k'a bɩ mɩsɩrbaa paan… yɩ.
Leersore
20 Timote ra,
nyasʊ hɔ kʊ Woso a da ɩ wɔ ʊ bɩ m,
ɩ b'ɩ lɛ zu meerbaarɔ yaarsɩrɔ kʊ bɩsɩkawosoma meerbaarɔ m nɔ wɔɔ ʊ y,
kan bɩsɩkarɛ kʊ n n'a hɩm ma hɔdɔrɛ,
bɩ ŋʊaar hɔdɔrɛ m b'ʊ y.
21 Gʊɔɔ gɔsɩnnɔ sɩrakarɛ to ŋn'a nyʊnnyɔɔ,
kʊ ŋ ʊ,
a ta hɔdɔrɛ naa do m bɩ tɔ ma.
Bɩ,
kʊ Woso barka n nyɩnta kan ɩ kɩ!