Nyɩnɔ kan a zɩrɔ kɩ mim
6
Nyɩnɔ wɔɔ k'a a zɩrɔ wɔɔ lɛ si,
amba Zuuba lɛ n taa bɩ m,
a ga a ʊ m.
2 Lɛɛkarɛ lɛ kʊ Woso ler bɔ an a na ma bɩ ba n nɩ:
‹Ɩ zɩ kan ɩ da kɩ da ʊ.
3 Maam bɩ,
ɩ mɩsɩrbaa nyɩnta yɩm,
ɩ meeyaa jintə yɩm tara burə ʊ.›
4 Awɔɔ k'a m nyɩnɔ wɔɔ zɩrɔ wɔɔ,
a bɩ nyɩnɔ wɔɔ da nɔmaa ma y,
bɩ k'a ŋ tʊr,
a ŋ bɔ zaa ʊ,
dʊndɔrɔ kʊ ŋ y'a to Zuuba zi m.
Lɔnnɔ kan a zuubɔɔ kɩ mim
5 Awɔɔ kʊ lɔnnɔ n a mɩ rɔ wɔɔ,
k'a zu a soʊrezannɔ wɔɔ lɛ ʊ daʊrɛ gʊta m,
kan a heer kɩ m haay,
amba awɔɔ nɩ yɛm Krista ma bɩ m.
6 A bɩ ŋ zi ba kʊ ŋ nɩ dundore awɔɔ zi bɩ tɔ ma y,
ɩ ʊ a ka awɔɔ nawʊm ma kʊ gʊɔɔ nɔ n yɩ a ra y.
Bɩ k'a ŋ zi bɩ ba,
kʊ Zuuba zibəənyɩnɔ n'awɔɔ m a n nɩ zum Woso hɔɔnhɔ ʊ bɩ tɔ ma.
7 K'a a zuubɔɔ wɔɔ zi ba kan a heer kɩ haay,
ɩ ʊ,
Zuuba zi awɔɔ n'a bam gʊɔɔ hɔ bɛɛ y.
8 Awɔɔ dɔ a ʊ,
zi mɩŋŋa kʊ gʊaa n'a bam haay,
Zuuba y'a zibəə bɩ nyɔɔdʊ karɛ a zaa ʊ,
baa k'a zaa bɩ lɔ m gɛɛ soamɩŋŋaʊzaa m.
9 Awɔɔ kʊ lɔnnɔ soʊrezannɔ n'awɔɔ n nɔ wɔɔ,
k'a ba maam sɔ a lɔnnɔ wɔɔ m,
a bɩ nyaa ba kan ŋ kɩ y.
Awɔɔ dɔ a ʊ,
awɔɔ kan a lɔnnɔ wɔɔ kɩ bɩ,
awɔɔ Zuuba bɩ deem an nɩ brama,
b'a bɩr gʊɔɔ jirə bɔrɛ y.
Sʊtaana bʊrla zaa
10 Meerbaa kʊ mɔɔ n'a nyambʊrm nɩ bɩ ba n nɩ:
k'a a paŋŋa da ra Zuuba zɛkʊra nɔ ʊ,
a paŋŋa gʊta bɩ nɔ ʊ.
11 K'a yarmɔdrɔ kʊ Woso nɩ ŋ karɛ a ʊ bɩ da a ma,
k'a a da ma a jɩm kɔɔkɔɔ Sʊtaana hɔɔnkarɛrɔ zibəə bɩ lɛ ʊ.
12 Gʊɔɔ bɛɛ wɔɔ nɩ yar bɩ bam kan ŋ kɩ y.
A ba wɔɔ nawʊm kan zinəro kɩ,
kan lɛɛzannɔ kʊ ŋ nɩ paŋŋa bam,
ŋ n'a so lɛɛrɔ ʊ,
ŋ n'a so durnya naa do kʊ monsigə n b'ʊ,
ŋ nɩ brama rɔ wɔɔ kɩ.
13 Naa tɔ ma bɩ,
k'a Woso yar mɔdrɔ wɔɔ da a ma.
K'a wɔ ʊ,
a jɩm kɔɔkɔɔ dɔmɩm bʊnyaa hinni ʊ,
a a da jɩm bɩ lɛ ʊ,
a yar ba paan… a a da ma,
k'a gɔɔta a jɩm a gam la.
14 K'a a banka a jɩm kɔɔkɔɔ.
K'a sɩra so a mɔr ʊ,
am hɔsoaʊ hɔ bɩ m,
k'a bɩr tɩrgabaa m,
goŋŋo kʊ n n'a dure a ma n bɩ,
k'a du a ma.
15 Lemim nyɩnta bɩ nɩ laafɩɩ kam,
k'a pa da kaarɛ-kaarɛ,
kʊsɔ n bɩ awɔɔ n'a daŋ ʊ.
16 K'a bɩr sɩrakarɛ m,
goŋŋo kʊ n n'a tarɛ a m n bɩ sɔ,
awɔɔ nɩ bʊnyaabarɛzaa bɩ karɔ kʊ sɛwurə n ta ŋ ma rɔ wɔɔ linlihim nɩ.
17 Bʊmbɔrɛ kʊ Woso a ka awɔɔ ʊ bɩ,
yarbarɛ firgə m,
k'a ku a mim ma.
K'a Woso lemim bɩ sa sɔ,
yarbarɛ kargʊ m Sɛnt-Ɛspri n'a karɛ awɔɔ ʊ.
18 K'a yaa da wakatɩ haay.
K'a yaadarɛ do haay da Sɛnt-Ɛspri daahan nɔ ʊ.
A bɩ kɔ kan yaa bɩ darɛ kɩ y,
k'a bɩr tam lɛɛ tee….
K'a yaa da wosogʊɔɔ wɔɔ haay tɔ ma sɔ.
19 K'a yaa da mɔɔ tɔ ma sɔ,
kʊ Woso n a lemim da m lɛ ʊ,
kʊ m a pa da kan heerkoodəbaa kɩ,
kʊ m hɔ k'a nyaakʊm da lemim nyɩnta nɔ ʊ bɩ hɩ fasɩ-fasɩ.
20 Mɔɔ bɔ Woso ʊ kʊ m lemim nyɩnta bɩ pa da,
baa kʊ mɔɔ nɩ lɔnnɔcɛ ʊ naa.
Naa minto bɩ,
k'a yaa da Woso m mɔɔ tɔ ma,
kʊ m lemim nyɩnta bɩ pa da amba a a ga m bɩ m.
Leersore
21 Tisikkɩ mɔɔ mim dɩndarɛ awɔɔ m,
k'awɔɔ n hɔ kʊ mɔɔ n'a bam bɩ dɔ.
Wɔɔ danyɩ m,
ʊ n'a ŋʊam,
an nɩ Zuuba zi bam mɩŋŋa.
22 A nyɔɔ mɔɔ nawʊrɛ awɔɔ ma tɔkkɛ,
k'an bɩ mɔɔ mim dɩnda awɔɔ m,
an awɔɔ heer yo.