Ʊ kɔ kʊ ma
6
M danyɩnɔ,
k'awɔɔ gʊaa yɩ an nɩ mimbʊnyaa bam,
awɔɔ kʊ Sɛnt-Ɛspri nɩ karɛ a lɛɛ rɔ wɔɔ,
k'awɔɔ n dundo zi a bɔ zaa ʊ,
bɩ kʊ m a hɩ awɔɔ gʊaa biyəə m,
gʊaa biyəə n dundo a zi k'a bɩ gasʊ kʊrɔma bɩ do ʊ sɔ y.
2 K'a bɩr kɔm kʊ ma,
a bɩr a dam kʊ han,
k'awɔɔ y'a barɛ ncɩnaaʊ,
lɛ kʊ Krista a cɩnta b'awɔɔ nɩ zuŋ ʊ.
3 Kʊ gʊaa y'a hɔɔn darɛ a ʊ,
hɔsɩ n' a mɩ,
an bɔkarɛ hɔsɩ bɛɛ n'a zaa nɩ,
bra an n'a barɛ a mɩŋŋa m.
4 Bɩ kʊ gʊaa biyəə n a hɔɔn da a mɩŋŋa zibəə ma an dɩga a,
kʊ lɛbɔʊrɛ y'a nɔ ʊ,
k'a n'a heer nyɔɔ kan a mɩŋŋa kɩ,
b'a ba gɩnga gʊaa ma k'a heer nyɔɔ y.
5 Bala,
gʊaa biyəə n'a mɩŋŋa mim nyɩ bɔŋ ʊ Woso taa.
6 Gʊaa kʊ n nɩ Woso lemim dɩndam nɩ b'a ga m,
an hɔ haay k'an ta m bɩ bɔ ʊ an a ka hɔdɩndarɛzaa b'ʊ.
7 A bɩ bra bɩmba a mɩŋŋɔɔ nɩ y,
Woso bɩ yɛm gʊaa n yaa wʊ a ma y,
bala,
hɔ kʊ gʊaa a duu b'a n'a dam.
8 Kʊ gʊaa a mɩŋŋa lɛtaamarɔ bʊnyaarɔ zibəəro duu,
hɔ k'a n'a dam bɩ n zɛ m.
Bɩ gʊaa k'a nɩ Sɛnt-Ɛspri hɔɔnhɔ zibəəro duum bɩ,
hɔ kʊ Sɛnt-Ɛspri n'a kam bɩ an n'a yɩm,
mɩsɩrbaa k'a nyarɛ ba ʊ m.
9 Ncɩnaaʊ bɩ,
ʊ bɩ kɔ kan zi mɩŋŋa barɛ kɩ y,
ʊ bɩr tam lɛɛ tee…,
bala,
kʊ wɔɔ n kɔ y,
wɔɔ y'ʊ zibəə bɩ nyɔɔdʊ yɩm,
a dɔmɩm ʊ.
10 Naa tɔ ma bɩ,
kʊ wɔɔ nɩ toore n naa,
ʊ zi ba gʊaa haay daahan minto,
an lɛ da bɩ,
ʊ a mɩŋŋa ba ʊ danyɩnɔ sɩrakarɛzannɔ wɔɔ m.
Meerbaa nyambʊrlɛ kan leersore kɩ
11 Kɛɛrɛ naa,
mɔɔ nɩ gʊrsɩra bɩ barɛ m zim,
bɩ minto m gʊrsɩranyɩ bɩ n gʊta-gʊta.
12 Gʊɔɔ kʊ ŋ n'a hɩrɛ awɔɔ m,
ŋ ʊ,
a gasʊ baŋŋʊ ʊ rɔ wɔɔ,
a ka ŋ nawʊm ma kʊ gʊɔɔ n'a yɩ,
mɛsim hɔɔnhɔ tɔ ma.
Ŋ lɛ baa k'a fɩr yɩ Krista gɔdarkʊra bɩ pa darɛ tɔ ma y.
13 Bala,
gʊɔɔ kʊ ŋ nɩ gasʊm baŋŋʊ ʊ rɔ wɔɔ mɩŋŋɔɔ bɩr zum lɛrɔ wɔɔ ʊ y.
Ŋ nɩ bɔkarɛ,
ŋn'a ŋʊam k'awɔɔ n gasʊ baŋŋʊ ʊ,
k'a a da ma a a lɛ bɔ a mɩŋŋɔɔ ʊ k'awɔɔ yɛ a gasʊ baŋŋʊ ʊ.
14 Kʊ mɔɔ nɩ,
mɔɔ lɛbɔʊrɛ ba ʊ kʊ wɔɔ Zuuba Yeezuu Krista gɔdarkʊra bɩ bɛɛ y.
Kan mɔɔ kɩ durnya bɩ hɔgər m Krista gɔdarkʊra bɩ tɔ ma,
kan durnya bɩ kɩ sɔ,
gər m mɔɔ m Krista gɔdarkʊra bɩ tɔ ma sɔ.
15 Bala,
kʊ gʊaa gasʊ baŋŋʊ ʊ,
gɛɛ k'a n gasʊ baŋŋʊ ʊ,
hɔsɩ bɛɛ n bɩ y,
an lɛ da bɩ,
yɩrɛdaa kʊ Woso n'a kam bɩ m.
16 Gʊɔɔ kʊ ŋ nɩ zum hɔ kʊ mɔɔ hɩ naa do ʊ rɔ wɔɔ,
kan Woso gʊɔɔ wɔɔ haay kɩ,
kʊ Woso n laafɩɩ kan cicirzɛrɛ kɩ ka ŋ ʊ.
17 A n a sa naa ma,
gɔsɩ b'a ya an mɔɔ da kɔrɛ ma y,
bala,
mɔɔ ɩ fɩryɩrɛ jɩrɔ m m mɛ ma,
an n'a hɩnkarɛ a ʊ,
Yeezuu y'a so mɔɔ ʊ.
18 M danyɩnɔ,
bɩ kʊ wɔɔ Zuuba Yeezuu Krista barka n bɩr kan awɔɔ kɩ.
Amina.