Ci kʊ Pol a ba
GALASII ZANNƆ
ma
Pol ɩ yaa dam Galasii kristagʊɔɔ m
1
Mɔɔ mɩŋŋa Pol nɩ ci naa do bam,
kristazibəəzaa m mɔɔ m,
gʊɔɔ bɛɛ mɔɔ bɔ ʊ y,
bɩ gʊaa bɛɛ mɔɔ nyɔɔ sɔ y,
Yeezuu Krista mɩŋŋa,
kan Zɩ Woso k'a a mɩm bɔ ʊ gəəno bire ʊ bɩ k'ɩ mɔɔ bɔ ʊ.
2 Mɔɔ kan danyɩnɔ kʊ ŋ nɩ naa ʊ haay rɔ wɔɔ kɩ,
wɔɔ ɩ yaa darɛ awɔɔ m,
awɔɔ kʊ kristagʊɔɔ sokʊmarɔ n'awɔɔ m,
an nɩ Galasii kʊrɔ ʊ rɔ wɔɔ.
3 A yɛ mɔɔ nawʊm wɔɔ Zɩ Woso han,
kan Zuuba Yeezuu Krista kɩ han,
kʊ ŋ nɩ barka kan laafɩɩ kɩ ka awɔɔ ʊ.
4 Yeezuu mɩŋŋa ɩ yɛ an ga,
k'a wɔɔ bʊmbɔ ʊ mimbʊnyaarɔ nɔ ʊ,
k'a a da ma a wɔɔ yɔ durnya bʊnyaa naa do wɔ ʊ,
amba wɔɔ Zɩ Woso lɛ n taa bɩ m.
5 Woso tɔ n lɛbɔʊrɛ yɩ dɔmɩm haay.
Amina.
Lemim nyɩnta vanta ba ʊ y
6 A bɔ k'awɔɔ nawʊm Woso k'a awɔɔ bir k'awɔɔ n yɩ a gʊɔɔ Krista barka minto b'ʊ,
a ta k'a zu lemim nyɩnta vanta ʊ bɩ,
a a ka mɔɔ n zɛ kədə.
7 A bɩr yɩrɛ ɩ ʊ lemim nyɩnta vanta n ta ʊ wa,
a ɩ yɩrɛ ɩ ʊ,
gʊɔɔ n'awɔɔ warm kʊ ma,
ŋn'a kam ma k'a Krista lemim nyɩnta bɩ zaar ba.
8 Bɩ,
kʊ gʊaa lemim nyɩnta vanta dɩnda awɔɔ m,
an a hɔ kan lemim kʊ wɔɔ pa da awɔɔ m bɩ kɩ,
baa kʊ wɔɔ m,
baa kʊ malɛɛka y'a to arzana ʊ an bɩ naa ba,
kʊ Woso nɔmaa n a kərgu a zaa ra.
9 Mɔɔ lɛɛ ka m a hɩ,
bɩ mɔɔ yɩ m yarɛ m so ra,
kʊ gʊaa lemim nyɩnta vanta pa da awɔɔ m,
bɩ lemim k'awɔɔ si hɔɔ bɩ bɛɛ,
kʊ Woso nɔmaa n a kərgu a zaa ra.
10 Ncɩnaaʊ naa,
m ka mɔɔ nawʊm ma kʊ gʊɔɔ nɔ n yɩ kan m kɩ ra?
Gɛɛ,
kʊ Woso nɔ n yɩ kan m kɩ ra?
A ŋʊa mɔɔ nawʊm kʊ gʊɔɔ n m ŋʊa ra?
Ayy…,
kʊ m ka mɔɔ nawʊm ma kʊ gʊɔɔ nɔ n yɩ m la,
mɔɔ bɩ nyɩntam Krista zibəənyɩ dɔ y.
Krista ɩ lemim nyɩnta bɩ da Pol wɔ ʊ
11 M danyɩnɔ,
k'a dɔ a ʊ,
lemim nyɩnta kʊ mɔɔ pa da awɔɔ m bɩ n a to gʊɔɔ zi y.
12 Bala,
a ma bɛɛ mɔɔ ʊ gʊɔɔ zi y,
bɩ gʊɔɔ bɛɛ y'a dɩnda mɔɔ n sɔ y,
Yeezuu Krista mɩŋŋa y'a hɩnka mɔɔ m,
mɔɔ n a dɔ.
13 Nyɩnta kʊ mɔɔ ʊ hɔ niŋŋə biisi,
m nɩ zum zɩɩfʊrɔ wosozaa ʊ bɩ,
awɔɔ mim ma.
Awɔɔ dɔ a ʊ,
dɔmɩm bɩ do ʊ bɩ,
mɔɔ fɩr ka Woso gʊɔɔ sokʊma bɩ ma gʊta maam-maam,
kʊ m a zaar ba.
14 Zu kʊ mɔɔ nawʊm zɩɩfʊrɔ wosozaa b'ʊ bɩ,
mɔɔ cem m muno zɩɩfʊrɔ wɔɔ han zaa bɩ zuure nɔ ʊ gʊta,
m nɩ m yoŋ ʊ gʊta m lɛ da ŋ la,
m yaabɔɔ yɩnnɩbayɩrɔ wɔɔ zuure nɔ ʊ.
15 Bɩ Woso lɛɛ ka an mɔɔ bɔ ʊ a barka bɩ tɔ ma kʊ m a zi ba,
bɩ ma bɩ,
mɔɔ n yɩ cɩna y.
Ncɩnaaʊ nɩ,
an mɔɔ bir zibəə bɩ tɔ ma.
16 Bɩ k'a b'a ŋʊa kʊ mɔɔ n'a Nyɩ bɩ dɔ kʊ m a pa da do vantɔɔ gʊɔɔ m bɩ,
mɔɔ n m ka ma kʊ m gʊaa lar ma y,
17 mɔɔ n ta Zerizalɛm ʊ sɔ gʊɔɔ kʊ ŋ lɛɛ ka mɔɔ m ŋn'a ba kristazibəəzannɔ rɔ wɔɔ zi y,
m hʊr mɔɔ ʊ lɛɛm m ta Araabɩrɔ kʊ ʊ,
m m to b'ʊ,
m bʊr Damas kʊ ʊ.
18 Bɩ jɛ ʊ dɔɔraa kaakʊ kur bɩ,
mɔɔ n ta Zerizalɛm ʊ,
kʊ m aa Sefas* dɔ,
mɔɔ gɔɔta b'ʊ kan kɩ dɔmɩm bueeresoor.
19 Mɔɔ n zibəəzaa vanta yɩ kʊ *Zakkɩ bɛɛ y,
Zuuba danzaa bɩ.
20 Hɔ kʊ mɔɔ n'a hɩrɛ awɔɔ m ci b'ʊ naa,
Woso n mɔɔ kasɛtɩzaa,
ŋʊaar bɛɛ mɔɔ n'a barɛ y.
21 M hʊr kʊ mɔɔ ʊ Zerizalɛm ʊ bɩ jɛ ʊ,
ta mɔɔ ʊ Siiri kʊrɔ ʊ,
kan Silisii kʊrɔ ʊ kɩ.
22 Bɩ,
Zidee kʊrɔ wɔɔ kristagʊɔɔ sokʊmarɔ wɔɔ n mɔɔ yɩ deem y.
23 A ma ŋ y'a ʊ bala,
n n'a dɩndarɛ,
n ʊ:
«Gʊaa k'a nɩ fɩr kam wɔɔ ma biisi bɩ,
a ɩ Krista zaa k'a nyɩnta an n'a zaar bam bɩ pa dam kɛɛrɛ.»
24 Naa do n a ka,
ŋn'a lɛ bɔm Woso ʊ mɔɔ minto.