Busoo zɩnzɛkʊra n a ka Zerizalɛm kristagʊɔɔ ʊ
16
Kʊ busoo zɩnzɛkʊra n a ka kristagʊɔɔ ʊ bɩ bɩncɛ nɩ,
k'a hɔ kʊ mɔɔ hɩ Galasii kʊrɔ wɔɔ kristagʊɔɔ sokʊmarɔ wɔɔ m bɩ ba sɔ.
2 Hɔ k'awɔɔ n'a bam bɩ ba n nɩ:
Hatʊ hinni biyəə ʊ,
k'awɔɔ gʊaa biyəə n dɩga busoo k'an ta m ma an a bɔ ʊ an a cɩnta a hɔ,
k'an bɩr yɩrɛ ɩ ʊ,
kʊ mɔɔ bɩ lee ku,
k'awɔɔ b'a ya a ka ma k'a busoo zɩnzɛ kʊ ra y.
3 Kʊ mɔɔ bɩ lee ku,
mɔɔ ci bam m a ka gʊɔɔ k'awɔɔ nɩ ŋ bɔŋ ʊ kʊ ŋ nɩ ta a ganwʊrɛrɔ wɔɔ m ŋn'aa ŋ ka Zerizalɛm kristagʊɔɔ wɔɔ ʊ rɔ wɔɔ ʊ,
kʊ ŋ nɩ ta m kan busoo bɩ kɩ.
4 K'a bʊr an nɩ yɩrɛ ɩ ʊ,
a a ga m kʊ mɔɔ mɩŋŋa n ta,
ŋ tam kan mɔɔ kɩ.
Pol ɩ zaakʊrɛrɔ gɩngam
5 Ta mɔɔ nawʊm Masedʊan kʊ ʊ,
m a dɔ m lee ku awɔɔ zi,
bra mɔɔ nawʊm b'ʊ,
m bʊr awɔɔ zi.
6 A a da ma,
mɔɔ n nyɩnta awɔɔ zi b'ʊ poore,
gɛɛ m nyɩnta b'ʊ nyɛɛm dɔmɩm ʊ,
k'awɔɔ n a da mɔɔ han,
m zaa bɩ sarɛ ma,
baa kʊ ta mɔɔ nawʊm ka.
7 Naa do ma naa,
mɔɔ lɛ baa kʊ m dɩga awɔɔ ma cenle ma y,
mɔɔ lɛ taa kʊ m bɩ gɔɔta kan a kɩ poore,
kʊ Zuuba yɛ.
8 Bɩ,
mɔɔ gɔɔtam Efɛɛzɩ kʊ ʊ naa ʊ,
an ta an pantɩkɔtɩ cibsa dɔmɩm ku.
9 Bala,
Woso a ka mɔɔ nɩ m dam ma m zi ba naa ʊ gʊta,
bɩ jɩnnɔ wɔɔ gʊta sɔ.
10 Kʊ Timote bɩ lee ku awɔɔ zi b'ʊ,
k'a nyasʊ m mɩŋŋa,
k'a heer n nyɔɔ,
bala,
Zuuba zi an n'a bam sɔ am mɔɔ hɔ bɩ m.
11 Gɔsɩ b'a gore bɔ ʊ y.
K'a a da han k'an a bɔ an bʊr mɔɔ zi laafɩɩ,
bala,
mɔɔ y'a mɩm dam,
kan danyɩnɔ wɔɔ kɩ.
12 Kʊ wɔɔ danyɩ Apolɔs nɩ,
mɔɔ hɩ m gallɛm hɔka k'an bʊr awɔɔ zi kan ʊ danyɩnɔ wɔɔ kɩ,
b'a lɛ baa fɩɩgaa k'a ta awɔɔ zi b'ʊ dɩɩtaa y,
k'a bɩ toore yɩ,
a zɛm.
Meerbaa nyambʊrlɛ kan leersore kɩ
13 K'a dundo a zi,
a jɩm kɔɔkɔɔ sɩrakarɛ nɔ ʊ,
a bɩr heer koodə m,
a bɩr paŋŋa m.
14 K'a hɔ haay woo… ba ŋʊarɛ nɔ ʊ.
15 M danyɩnɔ,
awɔɔ dɔ a ʊ,
Stefanas kan a hargʊɔɔ kɩ ɩ lɛɛ ka ŋn'a ba sɩrakənno Akayii kʊrɔ wɔɔ ʊ.
Ŋ y'a tʊntɔ ʊ paan… ŋn'a da kristagʊɔɔ wɔɔ han Woso zibəə bɩ nɔ ʊ.
Mɔɔ ʊ kʊ m a hɩ a m,
16 k'a yɛ gʊɔɔ ncɩnaaʊ rɔ wɔɔ ma,
kan gʊɔɔ kʊ ŋ nɩ zi bam,
ŋn'ɩ kɔrɛ yɩm kan ŋ kɩ rɔ wɔɔ ma sɔ.
17 Mɔɔ heer ɩ nyɔɔm gʊta,
Stefanas k'a nɩ naa ʊ,
kan Fɔrtɩnatus kɩ,
Akayikus kɩ bɩ tɔ ma,
kʊ ŋ nɩ naa ʊ bɩ,
bɔ a ʊ kʊ ʊ ɩ ʊ,
awɔɔ nɩ kan mɔɔ kɩ.
18 Bala,
ŋ minto bɩ,
mɔɔ heer koodə yɩ,
ŋ y'awɔɔ heer ba kookoo sɔ.
Gʊɔɔ ncɩnaaʊ rɔ wɔɔ a ga daʊrɛ m paan….
19 Azii kʊrɔ wɔɔ kristagʊɔɔ sokʊmarɔ wɔɔ ɩ yaa darɛ awɔɔ m.
Akilas kan Priska kɩ ɩ yaa darɛ awɔɔ m danyɩbaa Zuuba nɔ ʊ minto.
Kristagʊɔɔ kʊ ŋ n'a som kʊ ma ŋ har ʊ rɔ wɔɔ ɩ yaa darɛ awɔɔ m sɔ.
20 Wɔɔ danyɩnɔ wɔɔ haay ɩ yaa darɛ awɔɔ m.
K'a yaa da kʊ m mɩŋŋa-mɩŋŋa kan daʊrɛ kɩ.
21 Mɔɔ mɩŋŋa Pol nɩ leersore naa do gʊrsɩra bam.
22 Kʊ gʊaa n Zuuba ŋʊa y,
Woso lerbɔrɛ bʊnyaa ɩ kan a zaa kɩ.
«Maranata» a jɩ k'a hɩ a ʊ,
Zuuba n bʊr.
23 A yɛ mɔɔ nawʊm kʊ Zuuba n'awɔɔ barka da ʊ.
24 Mɔɔ y'awɔɔ woo… ŋʊam Yeezuu Krista nɔ ʊ.