Sɛnt-Ɛspri ganwʊrɛrɔ wɔɔ zibəə zaa
14
K'a a ka kʊ ŋʊarɛ ma paan…,
a a ka *Sɛnt-Ɛspri ganwʊrɛrɔ wɔɔ ma sɔ kan a heer kɩ haay,
an lɛ da bɩ,
k'a a ka wosolɛsinnɩsora meerbaa ganwʊrɛ bɩ ma.
2 Bala,
gʊaa k'a nɩ lemim y'a hʊnhɔ hɩm bɩ,
a hɩ bɛɛ a nawʊm kan gʊɔɔ kɩ y,
meer bɩ ba a nawʊm kan Woso kɩ.
Gɔsɩ bɩr hɔ k'a n'a hɩm bɩ jɩ marɛ y,
hɔɔ kʊ n y'a nyaakʊm da,
an nɩ ŋ hɩm Sɛnt-Ɛspri paŋŋa m.
3 Bɩ gʊaa k'a nɩ Woso lɛ sire an nɩ som la bɩ,
meer bɩ ba a nawʊm kan gʊɔɔ kɩ,
an nɩ ŋ paŋŋa dam la,
an nɩ ŋ heer yom,
an nɩ ŋ heer wʊtam.
4 Gʊaa k'a nɩ lemim y'a hʊnhɔ hɩm bɩ,
a mɩŋŋa paŋŋa an n'a dam la,
bɩ gʊaa k'a nɩ Woso lɛ sire an nɩ som la bɩ,
sokʊmagʊɔɔ wɔɔ an nɩ ŋ paŋŋa dam la.
5 Mɔɔ lɛ taa k'awɔɔ haay n bɩr lemim y'a hʊnhɔ hɩm,
bɩ mɔɔ n a ŋʊa an lɛ da bɩ,
k'awɔɔ ɩ Woso lɛ sire an nɩ som la,
bɩ m jɩra.
Gʊaa k'a nɩ Woso lɛ sire an nɩ som la bɩ,
a lɛ da gʊaa k'a nɩ lemim y'a hʊnhɔ hɩm bɩ m,
k'a maam lemim bɩ wusigə a ʊ,
sokʊmagʊɔɔ wɔɔ n a jɩ ma,
an ŋ paŋŋa da ra.
6 M danyɩnɔ,
k'a hɔɔn da a dɩga a.
Kʊ mɔɔ bʊr awɔɔ zi,
m nɩ leminno y'a hʊnhɔ hɩrɛ,
bɩ Woso n hɔ hɩnka mɔɔ m,
mɔɔ n a jɩ dɩnda awɔɔ nɩ y,
bɩ mɔɔ n awɔɔ hɔdɔrɛ da ra y,
bɩ mɔɔ n Woso lɛ si m so ra y,
bɩ mɔɔ n hɔ dɩnda awɔɔ nɩ y,
ncɩnaaʊ bɩ leminno y'a hʊnhɔ kʊ mɔɔ n'a hɩm bɩ nyɔɔdʊ y'awɔɔ ma ka?
7 A do m naa sɔ kan sarbarɛ mɔdrɔ kɩ.
Kɔnnɩ gɛɛ hir,
kʊ ŋ nyi bɩr bɔm mɩŋŋa,
gʊaa y'a bam lɔ k'a a tʊr ka kɔnnɩ bɩ,
gɛɛ hir bɩ ma?
8 Kʊ n huure hɛ kʊ gʊɔɔ n bɔ ŋnɩ ta yar ma,
kʊ huure bɩ nyi bɩr bɔm zore,
gʊɔɔ y'a bam lɔ ŋn'a dɔ ŋ ʊ,
a bir n nawʊm yarbarɛ ma,
k'a banka a ta?
9 A do m bɩ sɔ kan awɔɔ kɩ.
K'awɔɔ lemim y'a hʊnhɔ hɩ,
bɩ lemim bɩ do jɩ bɩr marɛ y,
ŋ y'a bam lɔ k'a hɔ k'awɔɔ n'a hɩm bɩ dɔ?
A bɔ kʊ ʊ,
ɩ ʊ,
meer awɔɔ n'a bam vam.
10 Leminno ɩ durnya naa ʊ gʊta ŋn'a hʊnhɔ,
bɩ ŋ woo… naa,
ŋ jɩ ta ʊ.
11 Bɩ,
kʊ mɔɔ bɩr lemim kʊ gʊaa n'a hɩm kan mɔɔ kɩ bɩ marɛ,
a zaa ɩ dɩgam mɔɔ ma saana kan a kɩ,
mɔɔ nɩ dɩgarɛ a zaa ma saana sɔ.
12 Ncɩnaaʊ bɩ,
k'awɔɔ nɩ Sɛnt-Ɛspri ganwʊrɛrɔ wɔɔ ŋʊam paan… bɩ,
k'a ka ganwʊrɛrɔ kʊ ŋ n'a kam kristagʊɔɔ sokʊma bɩ n ta lɛɛ sɩrakarɛ nɔ ʊ rɔ wɔɔ ma,
k'awɔɔ n ŋ yɩ gʊta.
13 Bɩ y'a ka,
gʊaa k'a nɩ lemim y'a hʊnhɔ hɩm b'a ga m,
an a yɛ Woso han,
kʊ Sɛnt-Ɛspri n leminno wɔɔ wusigəre ganwʊrɛ ka a ʊ sɔ.
14 Kʊ mɔɔ ɩ yaa dam Woso m lemim vanta m,
mɔɔ heer ɩ yaa bɩ darɛ nɔ ʊ,
bɩ mɔɔ bɩr hɔ kʊ mɔɔ n'a hɩm bɩ jɩ marɛ y.
15 Ncɩnaaʊ naa,
bɔ mɔɔ n n'a barɛ?
Mɔɔ yaa dam lemim y'a hʊnhɔ bɩ m,
bɩ mɔɔ yaa dam lemim kʊ gʊɔɔ n'a mam bɩ m sɔ.
Mɔɔ laa lɔm lemim y'a hʊnhɔ bɩ m,
bɩ mɔɔ laa lɔm lemim kʊ gʊɔɔ n'a mam bɩ m sɔ.
16 Bala,
k'ɩbɩɩ ɩ yaa dam Woso m barka lemim y'a hʊnhɔ nɩ,
gʊɔɔ kʊ ŋ nɩ nyɩntam sokʊmagʊɔɔ wɔɔ barla,
bɩ ŋ n hɔsɩ dɔ naa nɔ ʊ rɔ wɔɔ y'a bam lɔ k'a hɩ a ʊ «Amina» ɩ barka yaa bɩ darɛ ma?
Bala,
ŋ bɩr hɔ k'ɩbɩɩ n'a hɩm bɩ jɩ marɛ y.
17 A a da ma,
ɩbɩɩ barka yaa bɩ darɛ bɩ m bɩr mɩŋŋa gʊta,
b'a bɩr a dam gʊɔɔ vantɔɔ wɔɔ han sɩrakarɛ nɔ ʊ y,
kʊ ŋ bɩr hɔ k'ɩbɩɩ n'a hɩm bɩ mam bɩ tɔ ma.
18 Mɔɔ ɩ Woso barka dam,
kʊ mɔɔ n nɩ leminno y'a hʊnhɔ hɩm gʊta,
an cem awɔɔ haay han bɩ minto.
19 Bɩ,
kʊ mɔɔ ta m nɩ kristagʊɔɔ sokʊma barla,
kʊ mɔɔ meerbaanyɩ ba soor gʊɔɔ n a ma an a da ŋ han,
a jɩra kʊ mɔɔ n meer ba yɔɔgʊ lemim vanta m.
20 M danyɩnɔ,
a bɩ tɩr a hɔɔn da am nyɩnzɛɛnnyɩnɔ hɔ bɩ nɩ y,
k'a tɩr a hɔɔn da am gʊɔɔ burgurɔ hɔ bɩ m.
Bɩ kʊ mimbʊnyaa bɩncɛ nɩ,
k'a yɩ am nyɩnzɛɛnnyɩnɔ hɔ bɩ m.
21 N y'a gʊrsɩra ba Wosoci bɩ nɔ ʊ,
n ʊ:
Do k'a nɩ lemim vanta hɩm mɔɔ n'a sarɛ,
m meer ba kan Israyɛl do bɩ kɩ,
saanɔɔ mɔɔ nɩ ŋ sarɛ,
m meer ba kan ŋ kɩ,
baa kan naa kɩ haay ŋ b'a tʊr kam mɔɔ ma y.
22 Naa minto bɩ,
leminno y'a hʊnhɔ hɩrɛ bɩ,
makra a n'a hɩnkam basɩrakənno wɔɔ m,
a bɩr hɔsɩ hɩnkam sɩrakənno wɔɔ nɩ y,
bɩ,
wosolɛsinnɩsora meerbaa ganwʊrɛ bɩ,
makra a n'a hɩnkam sɩrakənno wɔɔ m,
b'a bɩr hɔsɩ hɩnkam basɩrakənno wɔɔ nɩ y.
23 K'awɔɔ a so kʊ ma haay,
a a da kʊ ʊ haay an nɩ lemim y'a hʊnhɔ hɩrɛ,
kʊ gʊɔɔ kʊ ŋ nɩ hɔsɩ dɔ a nɔ ʊ rɔ wɔɔ gɛɛ basɩrakənno bɩ gasʊ awɔɔ zi,
ŋ b'a hɩrɛ ŋ ʊ,
hɔɔzannɔ n'awɔɔ m na?
24 Bɩ k'awɔɔ haay ɩ Woso lɛ sire an nɩ som la,
kʊ basɩrakər,
gɛɛ gʊaa k'a n hɔsɩ dɔ naa nɔ ʊ bɩ,
gasʊ awɔɔ zi,
a y'a dɔrɛ a heer ʊ a ʊ,
a y'a bʊnyaa bam,
hɔ k'a n'a mam bɩ y'a karɛ an a dɔ a ʊ,
a kʊrɔ ma,
gʊaa haay n'a dʊdɔ yarm.
25 Hɔ k'a n'a heer ʊ haay bɔm garga ra,
bɩ n a ka an kukurə zɛ Woso taa,
an Woso da ʊ,
an kasɛtɩ ka,
a ʊ,
Woso y'awɔɔ bire ʊ,
denter.
Hɔ haay a ga m an ba an a ga kʊ ʊ kristagʊɔɔ sokʊma nɔ ʊ
26 Bɔ y'a ga barɛ m kɛɛrɛ?
K'awɔɔ tɩr a so kʊ ma,
kʊ gʊaa ʊ k'a laa lɔ,
gʊaa vanta k'a hɔ dɩnda,
Woso n hɔ hɩnka gʊaa vanta m k'a n'a hɩ,
kʊ gʊaa vanta ɩ lemim y'a hʊnhɔ hɩrɛ m sɔ,
deem nɩ lemim bɩ wusigəre nɩ,
naa woo… naa,
a a ga m an ba sokʊmagʊɔɔ wɔɔ haay sɩrakarɛ talɛɛ tɔ ma.
27 K'awɔɔ tɩr meer ba lemim y'a hʊnhɔ nɩ,
kʊ gʊaa hɩɩya gɛɛ kaakʊ bala n meer bɩ ba lemim y'a hʊnhɔ bɩ m,
deem-deem,
kʊ gʊaa deem n a si an bɩr a wusigəre.
28 Kʊ gʊaa ba ʊ an nɩ lemim y'a hʊnhɔ bɩ wusigəm sokʊma bɩ nɔ ʊ,
kʊ lemim y'a hʊnhɔ hɩrɛ zannɔ wɔɔ n ze pi,
ŋnɩ bɩr a hɩrɛ a heer ʊ,
ŋnɩ bɩr meer bam kan Woso kɩ.
29 Kʊ wosolɛsinnɩsora meerbaa ganwʊrɛ bɩ nɩ,
kʊ gʊaa hɩɩya gɛɛ kaakʊ m Woso lɛ bɩ si,
ŋnɩ so ra.
Kʊ gʊɔɔ kʊ ŋ gɔɔta rɔ wɔɔ n a tʊr ka ŋ meerbaarɔ wɔɔ ma mɩŋŋa,
ŋnɩ dɩga a Woso meerbaarɔ m denter gɛ.
30 Kʊ Woso hɔ hɩnka gʊaa vanta m gʊɔɔ wɔɔ barla k'a n'a hɩ,
kʊ gʊaa k'a lɛɛ ka an nɩ meer bam bɩ n ze pi,
kʊ bɩ n a hɔ bɩ hɩ.
31 Awɔɔ a da ma a Woso lɛ si a so ra haay,
bɩ k'a bɩr a bam deem-deem,
kʊ gʊaa haay m daahan yɩ a nɔ ʊ,
ŋnɩ paŋŋa yɩ ŋnɩ ta lɛɛ.
32 Wosolɛsinnɩsorazannɔ wɔɔ a da ma,
ŋn'a da a mɩŋŋɔɔ ma,
33 amba kristagʊɔɔ sokʊmarɔ haay n'a bam bɩ m.
Bala,
Woso lɛ baa warkʊma ma y,
hɔ haay n ba laafɩɩ an a ga kʊ ʊ bɩ an n'a ŋʊam.
34 K'awɔɔ tɩr a so kʊ ma,
kʊ lannɔ wɔɔ n ze pi,
ŋ ba lɛ m k'a meer ba sokʊma nɔ ʊ y,
ŋnɩ nyɩnta sɩɩ… ŋnɩ bɩr a tʊr kam amba Moyiisi lɛrɔ a hɩ bɩ m.
35 Kʊ ŋ lɛ taa k'a laaka da hɔ niŋŋə ma k'a jɩ dɔ,
kʊ ŋ n'a to ŋn'aa laaka da a zino han har ʊ.
A bɩ zore kʊ lʊ m meer ba sokʊma nɔ ʊ y.*
36 A hɩ awɔɔ ʊ Woso lemim bɩ,
a to a ʊ,
awɔɔ zi ra?
Gɛɛ,
a gɩnga awɔɔ ʊ,
awɔɔ n ta m a minto ra?
37 Kʊ gʊaa y'a gɩngarɛ a ʊ,
wosolɛsinnɩsorazaa n a mɩ,
gɛɛ a ɩ mɩsɩrbaa bam Sɛnt-Ɛspri paŋŋa nɔ ʊ,
k'a n'a dɔ a ʊ,
hɔ kʊ mɔɔ gʊrsɩra ba awɔɔ ma naa,
Zuuba mɩŋŋa lɛ m.
38 Kʊ gʊaa a ʊ,
a bɩ yɛm hɔ kʊ mɔɔ hɩ naa ma,
k'a dɔ a ʊ,
Woso n a zaa dɔ Sɛnt-Ɛspri paŋŋa mɩsɩrbaa barɛ zaa y.