A bɩ wosobaawɔnnɔ da ʊ y
10
M danyɩnɔ,
mɔɔ lɛ taa k'awɔɔ n mim k'a wɔɔ zɩɩfʊrɔ,
wɔɔ yaabɔɔ yɩ,
dɔmɩm kʊ ŋ nyɩnta ʊ poo ʊ ŋn'ɩ zum Moyiisi ʊ bɩ tɔ da a nɔ ʊ.
Awɔɔ dɔ a ʊ,
Woso a ka warkʊ n dɔ ŋ ma jilli,
ŋ bra higʊta ma sɔ,
2 a bɔ kʊ ʊ ɩ ʊ,
ŋ haay batɛm si warkʊ bɩ kan higʊta bɩ kɩ ʊ,
k'a zu Moyiisi ʊ.
3 Ŋ haay hɔbɩrɛ k'a a to Woso zi bɩ bɩ.
4 Ŋ nɩ hi k'a a to Woso zi sɔ bɩ mi,
bala,
ci deem ɩ nyɩnta ʊ,
ci bɩ do hi ŋ y'a mi.
Ci bɩ,
Woso y'a ka ŋ ʊ,
an nɩ zure ŋ jɛ ʊ.
Bɩ,
ci bɩ do bɩ,
Krista m.
5 Baa kan naa kɩ haay,
ŋ gʊɔɔ nyɩnta ʊ gʊta Woso nɔ n yɩ ŋ la y,
bala,
ŋ gɩnga,
n ŋ bir poo b'ʊ.
6 Ba minno nɔɔn duro ʊ,
k'a hɔɔn dɩnda wɔɔ m,
kʊ wɔɔ bɩ nyɩnta hɔɔ bʊnyaarɔ lɛtaama nɩ,
amba ŋ nyɩntam bɩ nɩ y.
7 A bɩ yɩ wosobaawɔnnɔ daʊrɛzannɔ amba ŋ gʊɔɔ gɔsɩnnɔ nɩ y,
bala,
n y'a gʊrsɩra ba Wosoci ʊ,
n ʊ:
«Gʊɔɔ wɔɔ nyɩnta k'a hɔ bɩ,
k'a hɔ mi,
ŋnɩ bɩ wuti k'a sar ba.»
8 Amba ŋ gʊɔɔ gɔsɩnnɔ jaan da bɩ,
ʊ bɩ jaan da y.
Bala,
jaan bɩ darɛ a ka,
ŋ gʊɔɔ bam tisi-tisi buhɩra a yaa n kaakʊ n gɩnga hindeem taan… nɔ ʊ.
9 Amba ŋ gʊɔɔ gɔsɩnnɔ Zuuba makra ba bɩ,
ʊ bɩ Zuuba makra ba y.
Bala,
naa kʊ ŋ y'a ba b'a ka mɩnnɔ m sakʊ dɩnda ŋ ʊ,
ŋnɩ gɩnga.
10 Amba ŋ gʊɔɔ gɔsɩnnɔ kukur ba bɩ,
ʊ bɩ kukur ba y.
Bala,
naa kʊ ŋ y'a ba bɩ,
Woso malɛɛka k'a nɩ gʊɔɔ zɩnzɛ m bɩ,
bʊr an bɩ ŋ zɩnzɛ.
11 Minno nɔɔn duro wɔɔ yaabɔɔ wɔɔ yɩ,
k'an nyɩnta makra,
bɩ y'a ka n ŋ da ci ʊ,
kʊ wɔɔ m hɔɔn yɩ ʊ ŋ tɔ ma,
wɔɔ kʊ wɔɔ n'ʊ mɩsɩrbaa bam jɛ dɔmɩnnɔ ʊ rɔ wɔɔ.
12 Naa minto bɩ,
gʊaa k'a n'a hɔɔn darɛ a ʊ,
a b'a barɛ am ŋ hɔ bɩ m bɩ,
k'an dundo a zi k'a b'a do y.
13 Makrarɔ kʊ ŋ nɩ gʊɔɔ yɩm nɔ wɔɔ y'awɔɔ yɩ bɩ,
bɩ taalɛrazaa m Woso m,
a b'a tore awɔɔ n makra yɩ k'an cem awɔɔ paŋŋa han y.
Kʊ makra awɔɔ yɩ,
a y'a karɛ awɔɔ m bɔ ʊ,
k'a a da ma a bʊr la.
A b'a zɛ kʊ ra kan zinəro kɩ y
14 M danyɩnɔ,
naa minto bɩ,
k'a ba wosobaawɔnnɔ daʊrɛ ma laatʊ.
15 Mɔɔ dɔ mɔɔ ʊ,
hɔɔntaʊrɛzannɔ n'awɔɔ m,
bɩ tɔ ma m mɔɔ nɩ meer bam kan awɔɔ kɩ,
k'a a hɔɔn da hɔ kʊ mɔɔ hɩ bɩ ma a dɩga a.
16 Ba wɔɔ tɩr ʊ so kʊ ma kʊ Zuuba tɔdaanɔʊ hɔbɩrɛ bɩ bɩ bɩ,
wɔɔ tɩr barka hɔmire bɩ barka da ʊ,
ʊ a dɔ ʊ a mi,
barka hɔmire bɩ kʊ wɔɔ n'a mim bɩ,
wɔɔ ɩ zɛkʊra yɩm kan Krista kɩ a ma bɩ tɔ ma.
Kʊ wɔɔ bur bɩ jinjir ʊ a bɩ,
wɔɔ ɩ zɛkʊra yɩm sɔ kan Krista kɩ a mɛ bɩ tɔ ma.
17 Kʊ bur bɩ n deem bɩ,
wɔɔ haay,
mɛ deem zannɔ wɔɔ m sɔ,
bala,
bur deem bɩ wɔɔ ʊ da kʊ ʊ haay ʊ n'a bɩm.
18 K'a dɩga Israyɛl gʊɔɔ wɔɔ ma,
ŋ tɩr hɔɔ zɩnzɛ k'a mannɩ ba ŋ nɩ Woso ma,
gʊɔɔ kʊ ŋ nɩ mannɩrɔ wɔɔ duro sim sʊm nɔ wɔɔ,
a zɛ ŋ nawʊm kʊ ra kan Woso kɩ.
19 Bɩ,
mɔɔ meerbaa bɩ jɩ n bɔ nɩ?
A hɩ mɔɔ ʊ,
hɔsɩ m wosobaawɔm kan a mannɩ sim kɩ n na?
20 Ayy…!
Mɔɔ ʊ kʊ m a hɩ m ʊ,
basɩrakənno wɔɔ,
mannɩrɔ wɔɔ ba ŋ nawʊm zinəro ma,
a ka bɛɛ ŋ nawʊm Woso ʊ y.
Mɔɔ lɛ baa k'awɔɔ n'a zɛ kʊ ra kan zinəro kɩ y.
21 A n a ga m,
k'awɔɔ n Zuuba hɔmire mi,
k'a a ya,
a zinəro hɔ mi y.
A n a ga m sɔ,
k'awɔɔ n Zuuba hɔbɩrɛ bɩ,
k'a a ya,
a zinəro hɔ bɩ y.
22 Gɛɛ,
a ŋʊa wɔɔ nawʊm k'ʊ Zuuba da nɔmaa ma ra?
A hɩ awɔɔ ʊ wɔɔ paŋŋa lɛ da m na?
Wosobaawɔnnɔ mannɩ sim
23 Gʊɔɔ gɔsɩnnɔ y'a hɩrɛ ŋ ʊ:
«Zaa ta ʊ,
k'ʊ hɔ haay ba.»
Denter m,
bɩ hɔ haay bɛɛ n'a dam wɔɔ han wa.
Kʊ ŋ bɩ to ŋn'a hɩrɛ ŋ ʊ:
«Zaa ta ʊ,
k'ʊ hɔ haay ba»,
kʊ ŋ n'a dɔ ŋ ʊ,
hɔ haay bɛɛ n'a kam wɔɔ n ta lɛɛ Woso zuure nɔ ʊ wa.
24 Kʊ gʊaa biyəə n bɩr a kam hɔ k'a n'a dam a mim han bɩ ma,
a b'a ka a mɩŋŋa daahan ma y.
25 Awɔɔ a da ma a hɔ haay k'a nɩ daasɩ ʊ si a bɩ,
b'a bɩ laaka da a mim ma y,
k'a b'a heer kɔ y.
26 Bala,
Zuuba y'a so tara burə ʊ kan hɔ haay k'a n a nɔ ʊ kɩ ʊ.
27 Kʊ basɩrakakristaʊzaa awɔɔ bir a har ʊ k'a bɩ hɔ bɩ,
k'awɔɔ yɛ a birle ma k'a ta,
k'a yaa lee ku,
kʊ bɔ n y'a ka a ʊ,
k'a bɩ bala,
a bɩ laaka da ma y,
a yaa n'a heer kɔ.
28 Bɩ kʊ gʊaa a hɩ a m,
a ʊ:
«Sim naa do mannɩ sim m»,
a ba sʊ y,
gʊaa k'a naa hɩ awɔɔ m bɩ minto,
kʊ heer kɔrɛ bɩ yɩ ʊ y.
29 Bɩ,
awɔɔ heer kɔrɛ bɛɛ mɔɔ n'a hɩm ma y,
gʊaa k'a sim bɩ mim hɩ awɔɔ m bɩ heer mɔɔ n'a hɩm ma.
Bala,
a n a ga m,
kʊ gʊaa vanta heer m mɔɔ dʊdɔ yar y.
30 Kʊ mɔɔ ɩ Woso barka darɛ m nɩ hɔ niŋŋə bɩrɛ,
bɔ m gʊaa vanta nɩ mɔɔ tɔ zarlɛ an bɔkarɛ mɔɔ Woso barka da,
m n'a bɩrɛ?
31 Ncɩnaaʊ bɩ,
kʊ hɔ awɔɔ n'a bɩrɛ,
gɛɛ hɔ awɔɔ n'a mire,
baa kʊ bɔ awɔɔ n'a barɛ,
k'a hɔ haay ba Woso lɛbɔʊrɛ minto.
32 A b'a ka,
k'awɔɔ tɔ ma kʊ gʊɔɔ n a do mimbʊnyaa nɔ ʊ y.
Kʊ zɩɩfʊ m,
gɛɛ grɛkkɩ m,
gɛɛ kristagʊɔɔ kʊ Woso y'a so ŋ ʊ rɔ wɔɔ m,
a b'a ka kʊ gɔsɩ n a do y.
33 Ncɩnaaʊ nɩ,
mɔɔ mɩŋŋa nɩ m yoŋ ʊ,
kʊ m yɩ mɩŋŋa gʊaa haay ma,
hɔ haay nɔ ʊ.
A ba kʊ mɔɔ nawʊrɛ ncɩnaaʊ bɩ,
mɔɔ bɩr m kam m mɩŋŋa daahan ma y.
M ka mɔɔ nawʊm ma kʊ gʊɔɔ cir gʊta n daahan yɩ,
kʊ ŋ nɩ bʊmbɔrɛ yɩ.