Lʊsarɛ mim laakadarɛrɔ nyɩbɔʊrɛ
7
Kɛɛrɛ naa,
kʊ m minno k'awɔɔ mɔɔ lɩnlar ma ci ʊ rɔ wɔɔ nyɩ bɔ ʊ.
Awɔɔ ʊ:
«A mɩŋŋa kʊ gʊaa b'a zɔ lʊ ma y.»
2 Bɩ,
kʊ jaandarɛ n a ga m bɩ,
gʊaa biyəə a ga m an bɩr a mɩŋŋa lʊ m,
lʊ biyəə n bɩr a mɩŋŋa zim m.
3 Bɩ,
gʊaa yar b'a ga m an hɔ k'a lʊ b'a ga m bɩ ba a lʊ bɩ m,
lʊ bɩ maam sɔ,
a a ga m an hɔ k'a zim b'a ga m bɩ ba a zim bɩ m.
4 Bala,
lʊ bɩ bɛɛ y'a so a mɩŋŋa mɛ b'ʊ y,
a zim bɩ y'a so ʊ.
Gʊaa bɩ bɛɛ y'a so a mɩŋŋa mɛ b'ʊ sɔ y,
a lʊ bɩ y'a so ʊ.
5 A b'a gu kʊ ma y,
k'a maam kʊ awɔɔ ma,
k'a zɛkʊra da jɩm ʊ dɔmɩm poore nɔ ʊ,
k'a a da ma a toore yɩ a yaa da gʊta,
bɩ,
a b'a to dɔmɩm k'awɔɔ a zɛkʊra da jɩm ʊ bɩ n maasɩrɛ ba y.
K'a a ya,
a a bɔ a bɩr kan kʊ kɩ,
kʊ m bɛɛ m awɔɔ bɩ zɛm b'a da ma a bʊr a ma y,
bɩ Sʊtaana yom bɩ ma an awɔɔ makra ba k'awɔɔ n a do mimbʊnyaa nɔ ʊ.
6 Hɔ kʊ mɔɔ hɩ naa,
lɛ bɛɛ mɔɔ n'a karɛ awɔɔ ʊ y,
a ɩ yɩrɛ ɩ ʊ,
awɔɔ a da ma,
a naa ba.
7 Kʊ mɔɔ hɔɔnhɔ m,
kʊ gʊaa haay do m mɔɔ m,
bɩ,
Woso gan wʊ gʊaa biyəə ma a hʊnhɔ,
a a ka gʊaa niŋŋə nɩ lʊ m,
an a ka gʊaa vanta n'a dam ma,
an mɩsɩrbaa ba bazabaa nɔ ʊ.
8 Naa y'a ka mɔɔ ʊ kʊ m a hɩ gʊɔɔ kʊ ŋ lannɔ gɩnga rɔ wɔɔ m,
kan zonno wɔɔ kɩ m,
m ʊ,
ŋnɩ gɔɔta a deem maam amba mɔɔ m.
9 Bɩ,
kʊ ŋ b'a dam ma ŋnɩ bʊr a mɩŋŋɔɔ ma,
kʊ yaarɔ wɔɔ n lannɔ ka cɛ ʊ,
kʊ zonno wɔɔ n zino sa.
Kʊ ŋ y'a ba ncɩnaaʊ a jɩra,
kʊ lʊ gɛɛ zim yɩrɛ lɛtaama n a so ŋ ʊ,
an bɩr bɩrɛ am sɛ hɔ bɩ m.
10 Lɛ kʊ mɔɔ ʊ kʊ m a cɩnta lannɔzannɔ wɔɔ m kan zinzannɔ wɔɔ kɩ m bɩ ba n nɩ:
«Lʊ b'a gʊ a zim ma y.»
Mɔɔ mɩŋŋa bɛɛ lɛ bɩ cɩnta y,
Zuuba m.
11 Kʊ lʊ a gʊ a zim ma,
a b'a ya an zim sa y,
k'a lɛ taa zim ma k'an a bɔ an aa kʊ ma kan a zim bɩ kɩ,
an nyɩnta kan kɩ.
Lʊ zim n a ga m sɔ an la a lʊ ra y.
12 Kʊ gʊɔɔ kʊ ŋ gɔɔta rɔ wɔɔ nɩ,
mɔɔ nɩ meer bam kan ŋ kɩ,
Zuuba bɛɛ y,
hɔ kʊ mɔɔ ʊ kʊ m a hɩ ŋ nɩ bɩ ba n nɩ:
«Kʊ kristagʊaa ta lʊ m,
bɩ sɩrakarɛzaa bɛɛ m lʊ bɩ nɩ,
lʊ bɩ m bɔkarɛ an yɛ k'a nyɩnta kan kɩ,
a bɩ la lʊ bɩ ra y.»
13 A n ta ʊ sɔ bɩ,
kʊ lʊ kʊ kristagʊaa m zim ta ʊ,
bɩ sɩrakarɛzaa bɛɛ y,
an bɔkarɛ an yɛ k'a nyɩnta kan lʊ bɩ kɩ,
lʊ bɩ b'a bɔ ʊ y.
14 Bala,
zim kʊ sɩrakarɛzaa bɛɛ b'a ba Woso hɔ a lʊ bɩ tɔ ma,
lʊ kʊ sɩrakarɛzaa bɛɛ b'a ba Woso hɔ sɔ a zim bɩ tɔ ma.
Kʊ ncɩnaaʊ bɛɛ,
bɔ an nawʊm kʊ ʊ,
ɩ ʊ,
ŋ nyɩnɔ wɔɔ,
dintim nyɩnɔ m Woso mɩm ʊ,
an bɔkarɛ ŋ y'a ba wosogʊɔɔ.
15 Kʊ basɩrakarɛzaa bɩ lɛ taa k'a gʊ a mim bɩ ma,
k'an a gʊ ma.
Zim kʊ kristagʊaa m bɩ,
gɛɛ lʊ kʊ kristagʊaa m bɩ,
a so a mɩŋŋa ʊ mim naa do nɔ ʊ.
A n bɔkarɛ,
Woso k'a awɔɔ bir bɩ,
awɔɔ bir a ʊ,
k'awɔɔ n mɩsɩrbaa ba laafɩɩ nɔ ʊ.
16 Bala,
lʊ,
ɩbɩɩ k'ɩ m kristagʊaa bɩ,
a a da ma ɩbɩɩ n a ka ɩ zim bɩ n bʊmbɔrɛ yɩ,
b'ɩbɩɩ y'a dɔm na?
Gʊaa yar bɩ,
ɩbɩɩ k'ɩ m kristagʊaa bɩ,
a a da ma,
ɩbɩɩ n a ka ɩ lʊ bɩ n bʊmbɔrɛ yɩ,
b'ɩbɩɩ y'a dɔm sɔ ra?
Gʊaa biyəə n jɩm hɔ kʊ Woso
a ka ʊ bɩ nɔ ʊ
17 Mɔɔ ʊ kʊ m hɔ vanta naa do hɩ awɔɔ m sɔ,
hɔ naa do mɔɔ n'a dɩndam kristagʊɔɔ sokʊmarɔ m lɛɛ haay ʊ,
a ɩ yɩrɛ ɩ ʊ,
gʊaa biyəə a ga m an mɩsɩrbaa niŋŋə kʊ Woso a ka ʊ dɔmɩm k'a a bir ma kan bɩ zu a ʊ bɩ ba.
18 Kʊ Woso gʊaa bir,
bɩ ma bɩ a zaa gasʊ baŋŋʊ ʊ,
a b'a baŋŋʊgasʊrɛ bɩ nyaakʊm da y.
Kʊ gʊaa vanta Woso a bir,
bɩ ma bɩ,
a zaa n gasʊ baŋŋʊ ʊ,
a b'a ka ma k'a gasʊ baŋŋʊ ʊ y.
19 Kʊ gʊaa gasʊ baŋŋʊ ʊ,
gɛɛ k'a n gasʊ baŋŋʊ ʊ,
hɔsɩ bɛɛ n bɩ y.
Woso lɛrɔ wɔɔ zuure n hɔ.
20 Gʊaa biyəə n gɔɔta mɩsɩrbaa kʊ Woso a ka ʊ,
a birle dɔmɩm ʊ bɩ m.
21 Kʊ nyɩnta ɩ ʊ lɔ,
dɔmɩm kʊ Woso ɩ bir ʊ bɩ ma,
ɩ bɩ ɩ hɔɔn kɔ a tɔ ma y,
bɩ kʊ zaa ta ʊ k'ɩ ɩ da ma ɩ bɔ lɔmbaa bɩ nɔ ʊ,
k'ɩ zaa bɩ do sa.
22 Bala,
lɔ kʊ Woso a bir k'an bɩ zu Zuuba ʊ bɩ,
a ba b'ʊ soamɩŋŋaʊzaa Zuuba nɔ ʊ.
Bɩ,
soamɩŋŋaʊzaa kʊ Woso a bir sɔ bɩ,
a ba b'ʊ Krista lɔ.
23 Woso hɔ bɔ gʊta an awɔɔ bʊmbɔ m,
a b'a ya a yɛ,
a a ba gʊɔɔ lɔnnɔ y.
24 M danyɩnɔ,
amba mɔɔ lɛɛ ka m a hɩ bɩ,
gʊaa biyəə a ga m,
an gɔɔta an bɩr mɩsɩrbaa kʊ Woso a ka ʊ dɔmɩm k'a a bir ʊ bɩ bam Woso mɩm ʊ.
Bazanɔ kan nyɩmbɔnnɔ kɩ mim
25 Kʊ bazanɔ wɔɔ mim nɩ,
hɔ kʊ mɔɔ ʊ kʊ m a hɩ naa,
Zuuba bɛɛ y'a cɩnta a ʊ,
mɔɔ n a hɩ y,
m hɔɔndarɛ mɔɔ ʊ kʊ m a hɩ,
bɩ Zuuba barka ma bɩ,
gʊaa kʊ n n'a dam ma,
n n a mim si sɩra bɩ m mɔɔ m.
26 Mɔɔ yɩ m hɔɔn dam mɔɔ ʊ,
her-her dɔmɩm naa kɔrɛ minto bɩ,
a mɩŋŋa kʊ baza n gɔɔta maam.
27 K'ɩ ɩ jaan m sɔ,
ɩbɩɩ ka ma k'ɩ ɩ bɔ ʊ y,
k'ɩ ba jaan m,
ɩbɩɩ ka ma k'ɩ jaan zɛ y.
28 Bɩ,
k'ɩ ɩ jaan bɩ sa,
mimbʊnyaa bɛɛ ɩ ba y,
kʊ nyɩmbʊɛɛrɛ a jaan sa sɔ,
an mimbʊnyaa ba sɔ y.
Bɩ,
kʊ m a hɩ a m,
gʊɔɔ kʊ ŋ lannɔ ka cɛ ʊ,
kan nyɩmbɔnnɔ kʊ ŋ zino sa rɔ wɔɔ,
ŋ fɩr yɩrɛ a mɩsɩrbaa nɔ ʊ gʊta,
mɔɔ lɛ baa k'awɔɔ n fɩr bɩ do yɩ y,
bɩ minto m mɔɔ nɩ meerbaa naa do bam.
29 M danyɩnɔ,
kʊ m a hɩ a m denter,
dɔmɩm n gɔɔta wɔɔ m gʊta y.
Bɩ tɔ ma bɩ,
an a sa naa ma,
gʊɔɔ kʊ ŋ nɩ lannɔ m nɔ wɔɔ n a mɩsɩrbaa ba ɩ ʊ,
ŋ ba lannɔ nɩ y.
30 Gʊɔɔ kʊ ŋ nɩ nyi kam nɔ wɔɔ,
ɩ ʊ,
ŋ heer n a zar y.
Gʊɔɔ kʊ ŋ n'a heer nyɔɔm nɔ wɔɔ,
ɩ ʊ,
ŋ heer n nyɔɔ y.
Gʊɔɔ kʊ ŋ nɩ hɔ sim nɔ wɔɔ,
ɩ ʊ,
ŋ ba hɔsɩ nɩ y.
31 Gʊɔɔ kʊ ŋ nɩ durnya naa hɔ yɩm nɔ wɔɔ,
ɩ ʊ,
ŋ bɩr a yɩrɛ y.
Bala,
durnya naa do k'a nɩ yɩm naa,
cem an nawʊm naa.
32 Mɔɔ lɛ baa k'awɔɔ hɔɔn n bɩr kɔrɛ y.
Gʊaa k'a n lʊ sa bɩ,
a hɔɔn an n'a dam Zuuba hɔɔnhɔrɔ ma,
an n'a kam ma kʊ Zuuba nɔ n yɩ a ra.
33 Bɩ gʊaa k'a lʊ n ta ʊ bɩ,
a hɔɔn nɩ kɔm durnya minno ma,
a ka a nawʊm ma k'a laarɛ nɔ n yɩ a ra,
34 a hɔɔn m hɩɩya-hɩɩya.
Maam sɔ bɩ,
lʊ k'a ba zim nɩ y,
kan nyɩmbʊɛɛrɛ k'a n zim sa kɩ,
a hɔɔn ŋn'a dam Zuuba hɔɔnhɔrɔ ma.
Ŋ n'a kam ma kʊ Woso n a so a ʊ jilli,
a mɛ,
kan a nyi kɩ nɔ ʊ.
Bɩ lʊ k'a zim n ta ʊ bɩ,
a hɔɔn an n'a dam durnya minno ma,
a ka a nawʊm ma k'a zim nɔ n yɩ a ra.
35 Naa hɩ mɔɔ nawʊrɛ awɔɔ mɩŋŋɔɔ daahan minto.
M ka bɛɛ mɔɔ nawʊm ma kʊ m awɔɔ hɔɔn kɔ y.
A ŋʊa mɔɔ nawʊm k'awɔɔ m hɔ k'an mɩŋŋa an lɛ da bɩ ba,
k'a hɔɔn bɩ nyɩnta hɩɩya-hɩɩya y,
k'a kʊsɩ Zuuba ma bala.
36 Kʊ gʊaa jaan ta ʊ,
a hɔɔn nɩ gasʊŋ ʊ gʊta,
b'a bɩr a da ra a mɩŋŋa ma y,
an a hɔɔn da a ʊ,
a yaa a zɔ ma an yɩ mim,
a a da ma,
an a jaan bɩ sa.
K'a naa ba,
a n mimbʊnyaa ba y,
kʊ ŋ nɩ kʊ sa.
37 Bɩ gʊaa k'a a hɔɔn da,
an hɔɔn bɔ ʊ a zim,
bɩ pakra bɛɛ m kan kɩ,
an a da a mɩŋŋa lɛtaama ma,
an a cɩnta a heer ʊ a zim,
a ʊ,
a bɩ lʊ sarɛ y,
a a ba mɩŋŋa.
38 Ncɩnaaʊ bɩ,
gʊaa k'a nyɩmbʊɛɛrɛ sa bɩ,
a a ba mɩŋŋa,
bɩ gʊaa k'a n a sa bɩ,
a a ba mɩŋŋa an lɛ da.
39 Kʊ lʊ zim ta ʊ,
gɔɔta a nawʊm an bɩr gʊaa bɩ do lʊ tee…,
gʊaa bɩ mɩsɩrbaa tɛkka ma.
Bɩ,
k'a zim bɩ bɩ ga,
a a so a mɩŋŋa ʊ kɛɛrɛ,
a a da ma,
an bɔ an gʊaa vanta sa,
bɩ kristagʊaa an n'a sam bala.
40 Bɩ,
mɔɔ hɔɔndarɛ nɔ ʊ,
k'a gɔɔta a n a ya an zim sa,
a heer nyɔɔrɛ an lɛ da,
mɔɔ sɩra ka mɔɔ ʊ,
Woso Ɛspri ɩ kan mɔɔ kɩ sɔ,
bɩ minto bɩ,
k'a mɔɔ meerbaa bɩ si.