Kristazibəəzannɔ mim
4
A a ga m,
kʊ gʊɔɔ n a dɔ ŋ ʊ,
mɔɔ kan Apolɔs kɩ bɩ,
Krista zibəənyɩnɔ m wɔɔ m,
Woso n a minno k'a ŋ nyaakʊm da biisi bɩ da wɔɔ wɔ ʊ,
kʊ wɔɔ n ŋ dɩnda gʊɔɔ m.
2 Kʊ n hɔ da gʊaa wɔ ʊ k'a n dɩga a mim ma,
hɔ kʊ n'a kam ma k'a zaa bɩ n a ba kɛɛrɛ bɩ,
sɩrabarɛ m.
3 Bɩ kʊ mɔɔ nɩ,
hɔsɩ bɛɛ m kan mɔɔ kɩ k'awɔɔ mɔɔ dʊdɔ yar,
gɛɛ gʊɔɔ vantɔɔ mɔɔ dʊdɔ yar y.
Mɔɔ bɩr m mɩŋŋa dʊdɔ yarlɛ m zim sɔ y.
4 Sɩra m,
mɔɔ n kʊrɔma yɩ m heer ʊ an nɩ mɔɔ kɔrɛ y,
bɩ naa bɛɛ n'a hɩnkarɛ a ʊ,
mim ba mɔɔ ma wa.
Gʊaa k'a nɩ mɔɔ dʊdɔ kam bɩ,
Zuuba m.
5 Bɩ minto bɩ,
a bɩ lɛɛ ka a gɔsɩ dʊdɔ ka y,
k'a to kʊ Zuuba n a bɔ an bʊr,
k'a b'a bɔ an bʊr,
a hɔ gaam hɔ k'a nyaakʊm da monsigə ʊ ra,
an bɔ hɔ haay kʊ gʊɔɔ n ta ŋ nɩ a nɔ ʊ rɔ wɔɔ m garga ra.
Maam bɩ,
Woso y'a lɛ bɔm gʊaa biyəə ʊ,
amba a a ga m bɩ m.
Korɛntɩ zannɔ mɩŋŋabusure mim
6 M danyɩnɔ,
awɔɔ daahan tɔ ma m,
mɔɔ n naa dɩnda,
m makra sa Apolɔs kan mɔɔ kɩ ma,
k'awɔɔ n wɔɔ hɔbaa sa,
a b'a mɩŋŋɔɔ busu a cem hɔ kʊ n y'a gʊrsɩra ba Wosoci b'ʊ bɩ han y.
Awɔɔ gɔsɩ bɩ yo gʊaa vanta ma k'a a mɩŋŋa busu,
a gʊaa vanta gore bɔ ʊ y.
7 Bala,
gʊaa ra,
nka y'a ka ɩbɩɩ m lɛ da ɩ muno nɩ?
Bɔ ɩbɩɩ yɩ ɩ zim k'a ka bɛɛ n y'a ʊ ɩbɩɩ ʊ?
Bɩ k'a ka n y'a ʊ ɩbɩɩ ʊ,
bɔ m,
ɩ n'ɩ mɩŋŋa busurɛ ɩ ʊ,
a yɩ ɩ ʊ ɩ zim nɩ?
8 Ʊn'hʊʊn…,
awɔɔ ɩ hɔ haay m kaka an bʊrbɔ,
hɔnyɩzannɔ n'awɔɔ m,
awɔɔ a ba cinno,
bɩ cinno bɛɛ m wɔɔ nɩ y.
A ŋʊa mɔɔ nawʊm k'awɔɔ n'a ba cinno paan…rɔ,
kʊ wɔɔ m nyɩnta cinno sɔ kan awɔɔ kɩ.
9 Mɔɔ hɔɔndarɛ nɔ ʊ,
wɔɔ kʊ wɔɔ m kristazibəəzannɔ wɔɔ,
Woso bɩ,
wɔɔ da ʊ gʊaa haay jɛ ʊ,
gʊɔɔ nɩ dɩgam wɔɔ ma.
Bɔ wɔɔ ʊ kʊ ʊ kan gʊɔɔ kʊ n yɩ ŋ dʊdɔ yar n nɩ tarɛ ŋ nɩ k'a yaa ŋ zɩnzɛ rɔ kɩ.
Ɩ ʊ wɔɔ nyɔɔ n y'a ʊ saa,
am hɔɔnɩbɩɩrɔ hɔ bɩ m durnya haay mɩm ʊ,
malɛɛkarɔ nɩ dɩgam wɔɔ ma,
gʊɔɔ nɩ dɩgam wɔɔ ma sɔ.
10 Hɔɔzannɔ n wɔɔ m,
Krista kʊ wɔɔ n'a pa dam bɩ minto.
B'awɔɔ,
mindɔrɛzannɔ n'awɔɔ m k'awɔɔ a zɛ kʊ ra kan Krista kɩ bɩ tɔ ma.
Paŋŋawarzannɔ n wɔɔ m,
awɔɔ m paŋŋazannɔ,
n y'awɔɔ gore daŋ ʊ,
bɩ n yɩ wɔɔ gore bɔŋ ʊ.
11 A n ta an wakatɩ naa do ku naa,
wɔɔ gɔɔta ʊ nɩ fɩr yɩm,
nɔ m kan mɩsɩ kɩ m,
huu jɩra wɔɔ ma,
gʊɔɔ ɩ fɩr kam wɔɔ ma,
wɔɔ ba ʊ mɩŋŋɔɔ har nɩ y,
lɛɛ wɔɔ n'a sam tee….
12 Zi wɔɔ n'a bam kɔɔkɔɔ k'ʊ lɛɛmaa hɔ yɩ,
ʊ a bɩ.
Kʊ gʊɔɔ wɔɔ sʊnsɔ wʊ,
bɩ wɔɔ ŋ barka da ʊ.
Kʊ gʊɔɔ ɩ fɩr kam wɔɔ ma,
bɩ wɔɔ yɛ fɩryɩrɛ bɩ ma.
13 Kʊ gʊɔɔ y'a bʊnyaa hɩm wɔɔ ma,
bɩ wɔɔ meerbaa nyɩnta ba kan ŋ kɩ.
Kan a her kɩ naa,
n gɔɔta n nɩ dɩgam wɔɔ ma ɩ ʊ,
durnya gumə m wɔɔ m,
ɩ ʊ,
durnya dintim m wɔɔ m.
Lɛ kʊ Pol n ta m
14 Mɔɔ n hɔ kʊ mɔɔ gʊrsɩra ba naa ʊ naa ba,
kʊ m awɔɔ da nyannɩ ʊ y.
A ba mɔɔ ʊ,
kʊ m awɔɔ bɔ zaa ʊ,
bala,
mɔɔ nyɩnɔ n'awɔɔ m,
m n'awɔɔ ŋʊam.
15 Baa k'awɔɔ karɩnsaambɔɔ yɩ tisi-tisi Krista nɔ ʊ,
awɔɔ zɩ bɩ hɔka y,
a deem.
Mɔɔ n'awɔɔ zɩ,
bala,
mɔɔ ɩ lɛɛ ka m lemim nyɩnta bɩ pa da awɔɔ m,
awɔɔ n sɩra ka Yeezuu Krista ʊ.
16 Naa minto bɩ,
awɔɔ dʊndɔ mɔɔ nawʊm,
k'a mɔɔ hɔbaa sa.
17 Mɔɔ lɛ taa k'awɔɔ n mɔɔ hɔbaa sa,
bɩ minto m,
mɔɔ n Timote nyɔɔ awɔɔ ma,
k'an bɩ mɩsɩrbaa kʊ mɔɔ n'a bam Krista zuure nɔ ʊ bɩ zaarɔ tɔ da awɔɔ nɔ ʊ,
amba mɔɔ n'a dɩndam lɛɛ haay ʊ,
kristagʊɔɔ sokʊmarɔ haay m bɩ m.
K'a dɔ a ʊ,
Timote bɩ mɔɔ nyɩ m am awɔɔ hɔ bɩ m sɔ,
mɔɔ n'a ŋʊam,
an a kʊsɩ mɔɔ ma.
18 Awɔɔ gʊɔɔ gɔsɩnnɔ a mɩŋŋɔɔ busu,
ŋn'a gɩngarɛ ŋ ʊ,
mɔɔ bɩ zɛm bɩ bʊr awɔɔ zi b'ʊ y.
19 Bɩ,
kʊ Zuuba yɛ,
mɔɔ zɛrɛ awɔɔ zi b'ʊ zɔɔ,
bɩ mɩŋŋabusurezannɔ wɔɔ meerbaarɔ bɛɛ mɔɔ nɩ m kam ma kʊ m a ma y,
bɩ,
m ka mɔɔ nawʊm ma kʊ m a dɔ kʊ ŋ yɩ paŋŋa m gɛ.
20 Bala,
Woso cirbəə bɩ,
meerbaarɔ mim bɛɛ y,
zi paŋŋazaa k'a n'a bam bɩ mim m.
21 N kara awɔɔ lɛ n taa?
Awɔɔ lɛ n taa kʊ mɔɔ n bʊr a zi bara m m wɔ ʊ kʊ m nyaa ba kan a kɩ gɛɛ,
kʊ m bʊr a zi ŋʊarɛ m kan nyɩntabaa kɩ nɩ?