Woso ɩ wɔɔ yɔm mimbʊnyaa lɔmbaa nɔ ʊ a cicirzɛrɛ tɔ ma
6
Bɔ wɔɔ k'ʊ a hɩ kɛɛrɛ?
Ʊ gɔɔta ʊ bɩr mimbʊnyaa bam,
kʊ Woso cicirzɛrɛ n a da ra gɛ?
2 Ayy…,
fɩɩga!
Kʊ mimbʊnyaa mim bɩncɛ nɩ,
gəəno m wɔɔ m,
wɔɔ y'a bam lɔ kɛɛrɛ k'ʊ mɩsɩrbaa ba mimbʊnyaa nɔ ʊ?
3 Awɔɔ n a dɔ a ʊ,
batɛm kʊ wɔɔ si bɩ,
ʊ ba wɔɔ ʊ deem kan Krista Yeezuu kɩ a garɛ bɩ nɔ ʊ ra?
4 Batɛm bɩ sire nɔ ʊ bɩ,
wɔɔ bir n y'a ʊ kan kɩ a zɛ bɩ nɔ ʊ,
k'an bɩr yɩrɛ ɩ ʊ,
kʊ Krista a mɩm bɔ ʊ gəəno bire ʊ Zɩ paŋŋa m bɩ,
maam sɔ bɩ,
kʊ wɔɔ n mɩsɩrbaa daa ba.
5 Bala,
ʊ ba kʊ wɔɔ ʊ deem kan kɩ a zɛ nɔ ʊ bɩ,
wɔɔ y'ʊ bam deem kan kɩ sɔ a mɩmbɔʊrɛ nɔ ʊ.
6 Ʊ a dɔ mɩŋŋa,
ʊ ʊ,
mɩsɩrbaa kʊ wɔɔ n ta m biisi bɩ,
n y'a wɔ gɔdarkʊra ma kan Krista kɩ.
Kʊ mimbʊnyaa k'a nɩ wɔɔ ʊ bɩ paŋŋa n a da,
k'ʊ bɩ nyɩnta mimbʊnyaa lɔnnɔ dɔ y.
7 Denter m,
gʊaa k'a ga bɩ,
mimbʊnyaa paŋŋa ba zi dɔ y.
8 Bala,
kʊ wɔɔ ga kan Krista kɩ bɩ,
wɔɔ sɩra ka,
ʊ ʊ,
ʊ mɩsɩrbaa bam kan kɩ sɔ.
9 Bala,
Krista k'a a mɩm bɔ ʊ gəəno bire ʊ bɩ,
a bɩ gam dɔ y,
zɛ paŋŋa ba zi dɔ y.
10 Krista ga gallɛm deem,
an a gʊ kʊ ma kan mimbʊnyaa kɩ,
dɔmɩm haay minto.
Dɩɩtaa naa,
a mɩsɩr,
bɩ mɩsɩrbaa bɩ ba a nawʊm Woso tɔ ma.
11 Awɔɔ sɔ,
k'a dɔ a ʊ,
awɔɔ gɩnga,
a a gʊ kʊ ma kan mimbʊnyaa kɩ,
bɩ awɔɔ ɩ mɩsɩrbaa bam kɛɛrɛ Woso tɔ ma,
Yeezuu Krista zɛkʊra nɔ ʊ.
12 A b'a ya,
a ka kʊ mimbʊnyaa n a so a mɛ k'a nɩ zɛm bɩ ga b'ʊ y,
a yaa a ka awɔɔ n zu a mɛsim lɛtaamarɔ ʊ.
13 A b'a mɛ vəŋŋəro sa,
a ŋ ka mimbʊnyaa ʊ,
k'an ŋ sa an ŋ ba a zibəə mɔr y.
Awɔɔ n'a bam bɩ,
k'a mɩŋŋɔɔ sa a ka Woso ʊ,
a mɩm awɔɔ bɔ ʊ gəəno bire ʊ,
k'a mɛ vəŋŋəro wɔɔ sa,
a ŋ ba zi mɩŋŋa barɛ mɔr.
14 Mimbʊnyaa bɛɛ y'a so awɔɔ ʊ dɔ y,
bala,
awɔɔ ba lɛ nɔ ʊ y,
Woso barka nɔ awɔɔ n ta ʊ.
Woso zibəənyɩnɔ m wɔɔ m
15 Naa jɩ m bɔ nɩ?
Kʊ lɛ bɛɛ y'a so wɔɔ ʊ dɔ,
bɩ Woso barka wɔɔ n'a nɔ ʊ bɩ,
wɔɔ y'a nam bɩ lɛ m,
k'ʊ mimbʊnyaa ba ra?
Ayy…,
fɩɩga!
16 Awɔɔ n a dɔ a ʊ,
k'awɔɔ a mɩŋŋa sa,
a ka gʊaa ʊ k'a zu a hɔɔnhɔ ʊ,
gʊaa k'awɔɔ nɩ zure a hɔɔnhɔ ʊ bɩ lɔnnɔ n'awɔɔ m na?
A ɩ yɩrɛ ɩ ʊ,
kʊ mimbʊnyaa lɔnnɔ n'awɔɔ nɩ,
bɩ mimbʊnyaa a ka awɔɔ n gɩnga,
gɛɛ kʊ Woso hɔɔnhɔ awɔɔ nɩ zuŋ ʊ,
bɩ Woso mɩsɩrbaa k'an tɩrga ka awɔɔ ʊ.
17 Bɩ,
ʊ Woso barka da.
Nyɩnta k'awɔɔ ʊ biisi mimbʊnyaa lɔnnɔ rɔ wɔɔ,
awɔɔ bɩ zu hɔdɩndarɛ kʊ ŋ y'a dɩnda awɔɔ m b'ʊ kan a heer kɩ haay.
18 Awɔɔ yɔ kʊ n y'a ʊ mimbʊnyaa wɔ ʊ bɩ,
awɔɔ a ba tɩrgabaa lɔnnɔ.
19 Makrarɔ yaargarɛrɔ mɔɔ ŋ sa meerbaa bɩ nɔ ʊ,
k'awɔɔ n hɔ kʊ mɔɔ n'a hɩm bɩ jɩ ma,
bala,
awɔɔ bɩr a dam ma,
an nɩ minno wɔɔ jɩ marɛ y.
Amba awɔɔ nyɩnta biisi,
a a mɩŋŋɔɔ ba dintim kan zibʊnyaa do haay kɩ zibəə lɔnnɔ,
a a ba Woso bɩsɩkamazannɔ bɩ,
kɛɛrɛ naa,
k'a mɩŋŋɔɔ ba tɩrgabaa zibəə lɔnnɔ,
k'a mɩsɩrbaa mɩŋŋa ba Woso mɩm m.
20 Nyɩnta k'awɔɔ ʊ mimbʊnyaa lɔnnɔ rɔ wɔɔ,
tɩrgabaa zibəə mim n nyɩnta awɔɔ ma y.
21 Bɔ awɔɔ yɩ,
zibəəro wɔɔ duro nɔ ʊ?
Ŋ nyannɩ ta awɔɔ m her,
bala,
ŋ nyambʊrlɛ bɩ,
zɛ m.
22 Bɩ kɛɛrɛ naa,
n y'awɔɔ yɔ mimbʊnyaa wɔ ʊ,
a a ba Woso lɔnnɔ,
hɔ k'awɔɔ n'a yɩrɛ a nɔ ʊ bɩ,
mɩsɩrbaa k'a Woso nɔ yɩ m,
a nyambʊrlɛ bɩ,
mɩsɩrbaa k'a nyarɛ ba ʊ bɩ yɩrɛ m.
23 Bala,
mimbʊnyaa yawʊra bɩ,
zɛ m,
bɩ ganwʊrɛ kʊ Woso n'a kam nɩbɩr bɩ,
mɩsɩrbaa k'a nyarɛ ba ʊ bɩ m,
wɔɔ Zuuba Yeezuu Krista zɛkʊra nɔ ʊ.