16
«Naa haay hɩ mɔɔ ʊ awɔɔ m,
k'awɔɔ b'a gəm zɛ y.
2 Ŋ larɛ awɔɔ ra *sokʊmacɛrɔ ʊ.
Dɔmɩm ta ʊ an nɩ zɛm,
gʊaa k'a n'awɔɔ zɛm gər bɩ y'a hɔɔn darɛ a ʊ,
mannɩ a ba,
a ka Woso ʊ.
3 Ŋ y'a barɛ awɔɔ m ncɩnaaʊ,
bala,
ŋ n Zɩ dɔ,
ŋ n mɔɔ dɔ sɔ y.
4 Naa hɩ mɔɔ ʊ awɔɔ m,
kʊ wakatɩ bɩ bɩ bʊr,
k'a hɔ kʊ mɔɔ hɩ awɔɔ m bɩ tɔ da a nɔ ʊ.»
Sɛnt-Ɛspri zibəə
«Mɔɔ n lɛɛ ka m a hɩ awɔɔ m a sɩŋŋɩda ʊ y,
bala,
mɔɔ nyɩnta kan awɔɔ kɩ.
5 Bɩ naa ma bɩ,
ta mɔɔ nawʊm Zɩ k'a mɔɔ nyɔɔ bɩ zi,
b'awɔɔ bire ʊ bɩ,
gʊaa ba ʊ,
an nɩ mɔɔ larm,
a ʊ:
ta ɩ nawʊm ka?
6 Kʊ mɔɔ hɩ awɔɔ m bɩ minto y'a ka,
awɔɔ heer n a zar.
7 Sɩra mɔɔ hɩ awɔɔ m.
Awɔɔ daahan minto y'a ka,
mɔɔ nɩ tarɛ.
Bɩ,
kʊ mɔɔ n doo,
Daahanzaa bɩ bɩ zɛrɛ awɔɔ zi y.
Bɩ kʊ mɔɔ doo,
mɔɔ y'a nyɔɔrɛ awɔɔ m.
8 K'a mɩŋŋa bɩ bʊr,
a mimbʊnyaa,
tɩrgabaa kan dʊdɔkarɛ kɩ,
kʊ ŋ lʊnlɔ,
a y'a hɩnkam durnyazannɔ m.
9 Mimbʊnyaa bɩncɛ ʊ,
ŋ n sɩra ka mɔɔ ʊ y.
10 Tɩrgabaa bɩncɛ ʊ,
ta mɔɔ nawʊrɛ m Zɩ zi,
b'awɔɔ b'a yarɛ a mɔɔ yɩ y.
11 Dʊdɔkarɛ bɩncɛ ʊ,
n durnya cir bɩ dʊdɔ ka.»
12 «Hɔ gʊta ta ʊ mɔɔ n n'a hɩrɛ awɔɔ m,
b'awɔɔ b'a dam ma,
a ŋ si naa ma y.
13 Kʊ sɩra *Ɛspri bɩ bɩ bʊr,
a y'awɔɔ dam sɩra haay zaa ra,
bala,
a bɛɛ n n'a mɩŋŋa meer barɛ y,
bɩ,
a hɔ k'a n'a mam bɩ hɩrɛ,
a hɔ k'a nɩ zɛm bɩ dɩndarɛ awɔɔ m.
14 A y'a lɛ bɔm mɔɔ ʊ,
bala,
a hɔ k'a nɩ mɔɔ ʊ bɩ sire,
an a hɩ awɔɔ m.
15 Hɔ haay kʊ mɔɔ Zɩ n tam bɩ,
mɔɔ hɔ m.
Bɩ y'a ka,
mɔɔ n a hɩ,
mɔɔ ʊ,
a hɔ kʊ mɔɔ n n'a hɩm bɩ hɩrɛ awɔɔ m.»
Heerzar y'a bam heernyɔɔ
16 «A gɔɔta poore,
awɔɔ b'a yarɛ a mɔɔ yɩ mɩm ʊ y,
bɩ k'a yɩ poore sɔ,
awɔɔ mɔɔ yɩm.»
17 A karɩndanyɩnɔ gɔsɩnnɔ y'a hɩm kʊ m,
ŋ ʊ:
«Bɔ a a ŋʊa k'a hɩ wɔɔ nɩ?
A gɔɔta poore awɔɔ b'a yarɛ a mɔɔ yɩ a mɩm ʊ y,
b'a gɔɔta poore awɔɔ mɔɔ yɩrɛ,
gɛɛ,
ta mɔɔ nawʊrɛ,
m Zɩ zi?»
18 Ŋ n a hɩrɛ,
ŋ ʊ:
«Poore naa do jɩ lɛ taa k'a hɩ,
a ʊ lɔ?
Wɔɔ bɩr hɔ k'a n'a hɩm bɩ jɩ dɔrɛ y!»
19 Yeezuu k'a a dɔ a ʊ,
karɩndanyɩnɔ wɔɔ lɛ taa k'a a lar bɩ,
a a hɩ ŋ nɩ,
a ʊ:
«Laaka awɔɔ n'a dam kʊ han k'a mɔɔ mim bɩ jɩ dɔ ra?
A gɔɔta poore awɔɔ b'a yarɛ a mɔɔ yɩ a mɩm ʊ y,
poore awɔɔ mɔɔ yɩrɛ.
20 Sɩra paan… mɔɔ n'a hɩrɛ awɔɔ m,
awɔɔ nyi karɛ,
a zee da,
durnyazannɔ n bɩr a heer nyɔɔm.
Awɔɔ heer y'a zarm,
b'awɔɔ heerzar y'a bam heernyɔɔ.
21 Kʊ lʊ ɩ nyɩ yɩrɛ,
a ɩ busum ma,
a dɔmɩm k'a ku bɩ minto.
Bɩ k'a nyɩ bɩ yɩ,
a fɩr yɩrɛ bɩ tɔ bɔ a nɔ ʊ.
Heernyɔɔ gʊta ɩ kan kɩ k'a nyɩ yɩ durnya ʊ bɩ minto.
22 Bɩ minto y'a ka,
awɔɔ nɩ heerzar nɔ ʊ naa ma,
bɩ mɔɔ yɩ m yarɛ,
m awɔɔ yɩ heernyɔɔ nɔ ʊ,
bɩ,
heernyɔɔ bɩ do,
gʊaa b'a dam ma,
an a zar y.
23 Ncɩnaaʊ,
dɔmɩm bɩ do ʊ,
awɔɔ b'a yarɛ a mɔɔ lar hɔsɩ minto y.
Sɩra paan… mɔɔ n'a hɩrɛ awɔɔ m,
k'awɔɔ hɔ yɛ mɔɔ Zɩ han mɔɔ tɔ ma,
a y'a karɛ awɔɔ ʊ.
24 A n ta,
an dɩɩtaa ku,
awɔɔ n hɔsɩ yɛ mɔɔ tɔ ma y.
K'a hɔ yɛ,
a y'a yɩrɛ,
k'awɔɔ heernyɔɔ bɩ n bɩr mɩŋŋa paan….»
Yeezuu bʊr durnya ra
25 «Naa haay hɩ mɔɔ ʊ awɔɔ m *hɔbɔkʊrɛnoom m,
bɩ wakatɩ ɩ zɛm mɔɔ bɩ m yarɛ,
m meer ba kan awɔɔ kɩ ncɩnaaʊ y.
Mɔɔ Zɩ bɩ mim hɩrɛ awɔɔ m paan….
26 Hinni bɩ do ʊ bɩ,
awɔɔ hɔ yɛm mɔɔ tɔ ma,
bɩ mɔɔ n a hɩ awɔɔ m,
mɔɔ ʊ,
mɔɔ yaa dam Zɩ m awɔɔ tɔ ma y.
27 Bala,
Zɩ b'awɔɔ ŋʊa.
K'awɔɔ mɔɔ ŋʊa,
a si sɔ,
a ʊ,
m to mɔɔ ʊ Woso zi bɩ minto.
28 M to mɔɔ ʊ Zɩ zi,
m bʊr durnya ʊ.
Bɩ naa ma bɩ,
bɔ mɔɔ nawʊm durnya ʊ,
m n nɩ tam Zɩ zi.»
29 A karɩndanyɩnɔ wɔɔ n a hɩ m,
ŋ ʊ:
«Ba ɩbɩɩ nɩ meer bam paan… kɛɛrɛ ɩ wɔ saa hɔbɔkʊrɛnoom darɛ haay ma na.
30 Kɛɛrɛ naa,
wɔɔ dɔ wɔɔ ʊ ɩbɩɩ hɔ haay dɔ,
ɩbɩɩ lɛ baa kʊ gʊaa n ɩ lar y.
Bɩ y'a ka,
wɔɔ n a dɔ mɩŋŋa wɔɔ ʊ,
ɩ to ɩbɩɩ ʊ Woso zi.»
31 Yeezuu n a nyɩ bɔ ŋ nʊ,
a ʊ:
«Dɩɩtaa awɔɔ bɔkarɛ an n'a hɩrɛ a ʊ,
awɔɔ sɩra ka kɛɛrɛ ra?
32 Ba wakatɩ n nɩ zɛm na,
b'a lee ku kɛɛrɛ,
awɔɔ hɩsɩga dam,
gʊaa biyəə n bɩr tarɛ a lɛ a lɛ,
a mɔɔ to m deem.
Bɩ mɔɔ bɩ m deem nɩ y,
Zɩ ɩ kan mɔɔ kɩ.
33 Naa hɩ mɔɔ ʊ awɔɔ m k'a laafɩɩ yɩ mɔɔ zi.
Awɔɔ ɩ fɩryɩrɛ nɔ ʊ durnya naa do nɔ ʊ.
Bɩ k'a heer ba kookoo,
mɔɔ bʊr durnya ra.»