Yeezuu danyɩnɔ n sɩra ka ʊ y
7
Bɩ jɛ ʊ bɩ,
Yeezuu cem,
an nɩ bɩmbɩrm Galilee kʊ ʊ,
a n a ŋʊa k'a ta Zidee ʊ y,
bala,
zɩɩfʊrɔ jɩtannɔ wɔɔ y'a kam ma k'a zɛ gər.
2 Bɩ ma bɩ,
zɩɩfʊrɔ cibsa kʊ n n'a birm *buuro cibsa b'a zɔ.
3 A danyɩnɔ wɔɔ n a hɩ m,
ŋ ʊ:
«Ta Zidee ʊ,
k'ɩ karɩndanyɩnɔ wɔɔ n'ɩ zibəəro k'ɩbɩɩ nɩ ŋ bam nɔ wɔɔ yɩ sɔ.
4 Kʊ gʊaa lɛ taa kʊ n n'a dɔ,
a bɩr a zibəə bɩ nyaakʊm darɛ y.
K'ɩbɩɩ nɩ zibəəro barɛ ncɩnaaʊ bɩ,
ɩ hɩnka durnyazannɔ m.»
5 Yeezuu danyɩnɔ wɔɔ mɩŋŋɔɔ n sɩra ka ʊ y.
6 Yeezuu n a hɩ ŋ nɩ,
a ʊ:
«Mɔɔ wakatɩ n a ku cɩna y.
B'awɔɔ wakatɩ m dɔmɩm haay m.
7 Durnya bɩ sɔrɛ awɔɔ nɩ y,
bɩ,
a ɩ sɔm mɔɔ m,
bala,
kʊ mɔɔ n'a zibəə bɩ kasɛtɩ kam,
mɔɔ ʊ,
a bʊnyaa bɩ minto.
8 K'a ta cibsa bɩ ma,
mɔɔ bɩ tarɛ y.
Bala,
mɔɔ wakatɩ n a ku cɩna y.»
9 K'a meer bɩ ba ncɩnaaʊ bɩ,
a gɔɔta Galilee ʊ.
10 K'a danyɩnɔ wɔɔ ta cibsa bɩ ma bɩ,
a zaa sa sɔ,
an a nyaakʊm da,
an nɩ tam,
a lɛ baa kʊ n a dɔ y.
Yeezuu ta buuro cibsa bɩ ma
11 Cibsa bɩ dɔmɩm ʊ,
zɩɩfʊrɔ jɩtannɔ wɔɔ y'a kam Yeezuu ma,
ŋnɩ laaka da,
ŋ ʊ:
«A ɩ ka?»
12 Gʊɔɔ wɔɔ bire ʊ,
ŋ y'a mim dɩndarɛ:
Gɔsɩnnɔ y'a hɩrɛ,
ŋ ʊ:
«Gʊaa mɩŋŋa m.»
Gɔsɩnnɔ ʊ:
«Ŋʊaarzaa m,
bra an n'a bam gʊɔɔ m.»
13 Bɩ,
gʊaa ba ʊ,
an nɩ yɛrɛ,
an n'a mim hɩm garga ra y.
Bala,
ŋ yɩ nyi barɛ a jɩtannɔ wɔɔ m.
14 Kʊ *buuro cibsa bɩ bireyaa a ku bɩ,
Yeezuu ta *Wosocɛ ʊ,
an nɩ hɔ dɩndam gʊɔɔ m.
15 Zɩɩfʊrɔ wɔɔ zɛ kədə,
ŋn'a hɩrɛ,
ŋ ʊ:
«A a ba lɔ an hɔ dɔ,
b'a n karɩnda ba?»
16 Yeezuu n a nyɩ bɔ ŋ nʊ,
a ʊ:
«Mɔɔ hɔdɩndarɛ bɩ n a to mɔɔ zi y.
A to a ʊ Woso k'a mɔɔ nyɔɔ bɩ zi.
17 Kʊ gʊaa lɛ taa k'a Woso hɔɔnhɔ ba,
a y'a dɔm kʊ hɔdɩndarɛ naa do,
k'a to a ʊ Woso zi,
gɛɛ kʊ m mɩŋŋa mim mɔɔ n'a dɩndarɛ.
18 Gʊaa k'a n'a mɩŋŋa mim dɩndam bɩ,
a ka an nawʊrɛ a mɩŋŋa lɛbɔʊrɛ ma.
Bɩ,
gʊaa k'a n'a kam a gʊaa k'a a nyɔɔ bɩ lɛbɔʊrɛ ma bɩ,
bɩ bala n sɩrazaa.
Zambʊ b'a nɔ ʊ y.
19 Moyiisi bɛɛ *lɛrɔ wɔɔ ka awɔɔ ra?
B'awɔɔ gʊaa deem ba ʊ,
an nɩ zum lɛrɔ wɔɔ ʊ y.
Bɔ minto,
an n'a kam mɔɔ garɛ ma?»
20 Gʊɔɔ wɔɔ n a nyɩ bɔ ʊ,
ŋ ʊ:
«Zinə nɩ kan ɩbɩɩ kɩ!
Nka y'a hɩ,
a ʊ,
k'a ɩbɩɩ zɛ?»
21 Yeezuu a hɩ ŋ nɩ,
a ʊ:
«Zibəə deem mɔɔ ba *sabaa hinni ʊ,
awɔɔ n zɛ kədə haay!
22 Moyiisi *lɛ ka awɔɔ ʊ,
k'a gʊɔɔ gasʊ baŋŋʊ ʊ.
A to a ʊ awɔɔ yaabɔɔ zi Moyiisi mɩŋŋa bɛɛ bʊr nɩ y.
Bɩ,
k'a a da sabaa hinni ma,
awɔɔ y'a bam.
23 Bɩ,
k'a ɩ yɩrɛ ɩ ʊ,
kʊ gʊaa gasʊ baŋŋʊ ʊ sabaa hinni ʊ,
an bɔ Moyiisi lɛrɔ wɔɔ la nɩ,
bɔ minto m,
awɔɔ heer nɩ busum kan mɔɔ kɩ gʊaa kʊ mɔɔ waa haay sabaa hinni ʊ bɩ ma?
24 A bɩ hɔ k'awɔɔ n'a yɩm mɩm ʊ bɩ dʊdɔ ka bala y,
k'a dʊdɔ ka kan sɩra kɩ.»
25 Zerizalɛm gʊɔɔ y'a hɩrɛ,
ŋ ʊ:
«Gʊaa kʊ ŋ n'a kam ma k'a mee bɔ ʊ bɩ bɛɛ m naa ra?
26 Ba an nɩ meer bam ŋn'a mam na,
bɩ ŋ bɩr hɔsɩ hɩm nɩ y!
Wɔɔ tara bɩ lɛɛzannɔ wɔɔ,
a dɔ ŋ y'a ʊ paan…,
ŋ ʊ,
*Krista m gɛ?
27 Wɔɔ gʊaa naa do tojɩ dɔ,
kʊ *Krista bɩ bʊr,
gɔsɩ b'a tojɩ dɔrɛ y.»
28 Yeezuu k'a nɩ hɔ dɩndam Wosocɛ ʊ b'ʊ b'a hɩ,
a ʊ:
«Awɔɔ mɔɔ dɔ!
Awɔɔ mɔɔ tojɩ dɔ.
Bɩ,
mɔɔ n bʊr m zi nɩ y.
Sɩrazaa m Zɩ k'a mɔɔ nyɔɔ bɩ m.
B'awɔɔ n bɩ zaa dɔ y.
29 Mɔɔ mɩŋŋa a dɔ,
m to mɔɔ ʊ zi,
a ɩ mɔɔ nyɔɔ.»
30 Ŋ n'a kam ma k'a nyasʊ,
bɩ gʊaa ba ʊ,
an a wɔ da ma y.
Bala,
a wakatɩ n a ku cɩna y.
31 Gʊɔɔ nyɩnta zamaa bɩ bire ʊ,
ŋnɩ sɩra ka ʊ,
ŋn'a hɩrɛ,
ŋ ʊ:
«Kʊ *Krista bɩ bʊr,
a hoserlo barɛ an lɛ da naa n a ba rɔ wɔɔ ra gɛ?»
32 Kukur kʊ n n'a bam Yeezuu minto gʊɔɔ wɔɔ bire ʊ bɩ,
*farizɛɛnrɔ wɔɔ a ma.
A m bɩ,
*wosocɛmannɩbənno jɩtannɔ kan farizɛɛnrɔ kɩ n Wosocɛ dɔmazannɔ nyɔɔ kʊ ŋ n'aa a nyasʊ.
33 Yeezuu n a hɩ,
a ʊ:
«Mɔɔ gɔɔtam kan awɔɔ kɩ dɔmɩm poore nɔ ʊ,
kʊ m bɩ m bɔ,
m ta Zɩ k'a mɔɔ nyɔɔ bɩ zi.
34 Awɔɔ zɛm b'a ka mɔɔ ma,
b'awɔɔ bɩ mɔɔ yɩrɛ y.
Bala,
bɩncɛ kʊ mɔɔ nɩ taŋ ʊ bɩ,
awɔɔ b'a dam ma a bʊr b'ʊ y.»
35 Bɩ jɛ ʊ bɩ,
zɩɩfʊrɔ wɔɔ y'a hɩm kʊ m,
ŋ ʊ:
«Ta awɔɔ nawʊm ka,
wɔɔ b'ʊ yarɛ ʊ a yɩ?
Ta awɔɔ nawʊm gʊɔɔ kʊ ŋ hɩsɩga da ŋn'a war kʊ ma kan grɛkkɩrɔ kɩ rɔ wɔɔ zi ra?
Gɛɛ,
ta an nawʊm k'a yaa hɔ dɩnda grɛkkɩrɔ m na?
36 Hɔ k'a hɩ naa jɩ lɛ taa k'a hɩ,
a ʊ lɔ:
Awɔɔ y'a kam mɔɔ ma,
b'awɔɔ bɩ mɔɔ yɩrɛ y,
bɩ bɩncɛ kʊ mɔɔ nɩ taŋ ʊ bɩ,
awɔɔ b'a dam ma,
a bʊr ʊ y?»
Mɩsɩrbaa hi kɔyaarɔ
37 Cibsa bɩ nyarɛ ma bɩ,
dɔmɩm niŋŋə k'an dɔmɩm gʊta bɩ,
Yeezuu jɩm brama,
an a leer busu,
an n'a hɩrɛ,
a ʊ:
«Gʊaa kʊ mɩsɩ n'a zɛm k'an bʊr mɔɔ zi,
an bɩ hi mi.
38 Gʊaa k'a sɩra ka mɔɔ ʊ bɩ,
mɩsɩrbaa hi kɔyaarɔ y'a tom zi,
amba *Wosoci a hɩ bɩ m.»
39 *Sɛnt-Ɛspri kʊ gʊɔɔ kʊ ŋ nɩ sɩra kaŋ ʊ rɔ wɔɔ n'a yɩm bɩ mim an n'a hɩm.
Kʊ sɩra nɩ,
Yeezuu k'a n lɛbɔʊrɛ yɩ cɩna bɩ,
Sɛnt-Ɛspri n bʊr cɩna y.
40 Gʊɔɔ kʊ ŋ nyɩnta,
ŋn'a tʊr ka Yeezuu meerbaa bɩ ma gʊɔɔ cir bɩ bire ʊ rɔ wɔɔ,
gɔsɩnnɔ y'a hɩrɛ,
ŋ ʊ:
«Sɩra m,
ba wosolɛsinnɩsorazaa bɩ n na.»
41 Gɔsɩnnɔ y'a hɩrɛ,
ŋ ʊ:
«*Krista bɩ n naa.»
Gɔsɩnnɔ a ya,
ŋn'a hɩrɛ,
ŋ ʊ:
«Krista y'a dam ma,
an a to Galilee kʊ ʊ ra?
42 Wosoci n a hɩ,
a ʊ,
‹bɔ an nawʊm Davɩd do nɔ ʊ›,
b'a to an nawʊm tara poore kʊ Davɩd yɩ ʊ,
ŋn'a birm Betelehɛm b'ʊ ra?»
43 Naa do y'a ka,
gʊɔɔ wɔɔ n a gʊngʊ a minto.
44 Ŋ gʊɔɔ gɔsɩnnɔ a ŋʊa k'a nyasʊ,
bɩ gɔsɩ n a wɔ da ma y.
45 Wosocɛ dɔmazannɔ wɔɔ n a bɔ,
ŋnɩ bʊr wosocɛmannɩbənno jɩtannɔ wɔɔ zi kan *farizɛɛnrɔ wɔɔ kɩ.
Brɔɔ nɩ ŋ lar,
ŋ ʊ:
«Bɔ m awɔɔ n bʊr nɩ?»
46 Wosocɛ dɔmazannɔ wɔɔ n a nyɩ bɔ ʊ,
ŋ ʊ:
«Gʊaa ba ʊ an meer kʊ gʊaa naa do a ba bɩ lɔɔ ba y.»
47 Farizɛɛnrɔ wɔɔ n a hɩ ŋ nɩ,
ŋ ʊ:
«A to awɔɔ ʊ,
an awɔɔ hɔɔn da a zi ra?
48 Jɩtannɔ wɔɔ kan farizɛɛnrɔ wɔɔ kɩ barla bɩ,
gʊaa deem taan… ta ʊ,
an a mim si ra?
49 Bɩ,
gʊaa cir naa do n *lɛrɔ wɔɔ dɔ y.
Ŋ barka ba ʊ y!»
50 Nikodɛm k'a nyɩnta an ta Yeezuu zi bɩ nyɩnta kan ŋ kɩ,
an a hɩ,
a ʊ:
51 «N n gʊaa dʊdɔ yar bɩ n n'a meerbaa ma kan hɔ k'a ba bɩ kɩ y.
Wɔɔ lɛrɔ wɔɔ n bɩ hɩ ra?»
52 Ŋ n a nyɩ bɔ ʊ,
ŋ ʊ:
«Ɩ to ɩbɩɩ ʊ Galilee ʊ sɔ ra?
Bɩ,
ɩ ka mɩŋŋa,
ɩbɩɩ bɩ *wosolɛsinnɩsorazaa yɩrɛ an bɩr Galilee gʊaa y.»