इस किताबरे बारे मां जानकारी
इस दुनियाई मां ज़ेत्री भी किताबां आन, तैन सेब्भन मरां ई किताब जादे खास आए। इसेरी वजा ई आए कि इना मैनू केरि आम गल्लां नईं बल्के इन परमेशरेरू वचन आए। परमेशरे किछ लोकन इन सब गल्लां लिखनेरे लेइ ज़ोवं, ज़ैना तै चातो थियो। इस किताबरी सैरी गल्लां सच़ आन। ई परमेशरेरी किताब आए। परमेशरेरी इस किताबी जो बाइबल ज़ोतन। बाइबल दूई हिस्सन मां बंटोरी आए। इस किताबरे पेइले हिस्से जो पुरानो नियम ज़ोतन, ते दुइयोवं हिस्से जो नंव्वो नियम ज़ोतन। ज़ै किताब तुश्शे हथ्थे मां आए, एस नंव्वो नियम आए। पुराने नियमेरी किताब असन ज़ोतीए कि परमेशरे केन्च़रे दुनिया बनाई ते मैनू बनाए। ते मैने केन्च़रे परमेशरेरो हुक्म ट्लोड़ोरो थियो। हुक्म न मन्नेरे वजाई सेइं मौत सेब्भी लोकन मां आई। ई किताब असन इन भी ज़ोतीए कि लोकन मौती करां बच़ानेरे लेइ परमेशरे केन्च़रे योजना बनाई। परमेशरे अब्राहम नंव्वेरो मैनू च़ुनो ते तैस सेइं अक करार कियो कि अब्राहम बड़े कौमां केरो बाजी भोलो, ते तैसेरे ज़िरिये परमेशर पूरी दुनियाई बरकत देलो। परमेशरे अब्राहमेरी खानदानी अपने लोकां केरे रूपे मां च़ुनी ते तैन लोकन जो यहूदी ज़ोतन। पुराने नियमेरी किताबां असन इन भी ज़ोतन कि बड़े पेइले परमेशरे मूसे सिनाई पहाड़े पुड़ अपने हुक्म दित्तोरे थिये, ताके लोकन पतो च़ले कि परमेशरेरे नज़री मां कुन रोड़ू ते कुन बुरू आए। पुरानो नियम असन इन भी ज़ोते कि बड़े पेइले परमेशरेरे लोक केन्च़रे बलिदान केरते थिये, ताके परमेशर तैन केरे पाप माफ़ केरे। पुराने नियमेरी किताबन मां तैना गल्लां भी लिखोरिन ज़ैना नेबेईं सन्देश दित्तोरेन। इन असन ज़ोते कि परमेशरे वादो कियोरो थियो कि तै एक्की मुक्ति देनेबाले भेज़ेलो, ते लोकां केरे लेइ रोड़ू बन्नेरे लेइ बत खोल्लेलो। नव्वें नियमेरी ई किताब असन यीशुएरे ज़िन्दगरे बारे मां ज़ोतीए, ज़ै सैरी लोकां केरो मुक्ति देनेबालो आए। इस यीशुएरो वादो परमेशरे बड़े पेइलो कियोरो थियो। ई किताब असन तेरहो ज़ेरो बर्ताव केरनो भी शिखालतीए, ज़ैस सेइं सेब्भी लोकां केरो फैइदो भोए, ज़ैना यीशु पत्ती च़लतन। परमेशरे ज़ैन ज्ञान इश्शे लेइ बांदू कियोरू तैन इस किताबी मां आए। ज़ैन लोकेईं ई किताब भड्लाई भाषाई मां अनुवाद कियोरी, तैनेईं ई सन्देश ठीक तेन्च़रे अनुवाद केरनेरी कोशिश कियोरी ज़ेन्च़रे भड्लाई भाषाई बाले लोक अपनी भाषा ज़ोतन। तैन लोकेईं अनुवाद केरते वक्त तैन गल्लां केरू ध्यान रखोरू आए, कि ज़ैखन भड्लाई भाषा ज़ोनेबाले लोक इस किताबी पढ़न, त तैन समझ़ एज्जे, ठीक तेन्च़रे, ज़ेन्च़रे सेब्भना ज़ैस भाषाई मां पेइले ई किताब लिखोरी थी। अस प्रार्थना केरतम कि परमेशरेरो आत्मा तैन सेब्भी लोकन इस सन्देश समझ़नेरी मद्दत केरे ज़ैना इस किताबी पढ़तन। ते नंव्वी ज़िन्दगी ज़ींन ज़ै परमेशरेरे तरफां आए, ज़ेसेरे बारे मां ई किताब ज़ोतीए।