3 Zaa 1

Tanabɔgʋʋ

Zaa

'cɛlɩɛ

Bhälɩwɛlɩɩ

‑Amö 'yukugänɩnyɔɔ,

‑nmö na dlɩsɛkänyɔ Gayusɩ,

‑nmöö ‑glaaa dlɩ 'wʋ tenyii‑i,

‑nmö n cɛlɩɛ dɛ'ɛ 'wʋ.

Zaa yɛ Gayusɩ bhɩzɩ

2 'Tua,

‑ayo!

‑Na'a sɛ ‑n ‑gänɩɛ Lagɔ 'a wɛlɩɩ,

‑sɩbhä ‑gä kɛ.

N bhibhee Lagɔ nɩɩ,

‑na'a kpökpaa nɩ ‑gämö ‑sɩbhä kɛ.

3 ‑A 'bhɩa Lagɔgänɩwa ‑mumuë mʋa 'bhööä ‑mä ‑na'a mä'a,

mʋa nyɩaaa 'dɩ nɩɩ,

Lagɔ 'a ‑tiamö a wɛlɩɩ 'mö a dɔ'wʋ dɛ ‑n kää sɛ,

‑n kä ‑lɛ sɛ 'yize,

sɛ yɩ gbää,

‑n nɛmö 'kwädlɩ ‑sɩbhä.

Wa nyɩaaa ‑sɩbhä 'dɩɩ,

'mänaa lɩbhaaa tenyii.

4 ‑Wa 'zʋä Lagɔ 'a ‑tiamö a wɛlɩɩ a za na 'yuëë,

n ‑kä 'nʋ nɩɩ,

wa ‑gënii sasɛɛ,

miɛ 'na 'mäna 'wuë ma‑a.

5 'Tua,

‑na 'bhɩa Lagɔgänɩwaa,

wa yi lɛgäwa a'bhë glɩnɩ oo,

‑na'a sɛ ‑n 'zʋnɩmuëë sasɛ 'ylii,

‑sɩbhä nɛnɩ a nɛnɩɛ tenyii.

6 Wa gla'mö a ‑mumuë,

wa yiɛ mä'ää,

sɛɛ ‑n tulanuëë ‑na'a ‑wawʋʋ 'ylimö a 'tɩtɩ,

'mö wa ‑sɛnɩɛ ‑lɛ Zezwii a ‑nʋa a ‑zɩkpa a 'yila 'klʋ.

N bhiamö,

nɩkpa 'la,

sɛɛ ‑n 'kʋä 'wʋ yi 'n yɩ 'kää Lagɔ dlɩ yɔwʋ nɛnɩɩ,

yuë ‑sɩbhä 'wʋ,

mä wa ‑wʋä mö dɔ'wʋʋ,

wa 'käa 'yukusɛ mö.

7 Wa 'kä Zezwii Kliisɩ 'a nglɩɩ saa 'wuë biaa,

nza wa möä ‑mä lɛga 'mö.

Wa ‑wʋä mö dɔ'wʋʋ,

‑waaa Zezwii a ‑nʋä glɩnɩɩ,

wa 'nuëë ‑lu zɛla.

8 ‑Sɩbhä a za n gbää nɩɩ,

‑abhʋa Zezwii a ‑nʋa,

‑a kä ‑a 'kä ‑sɩbhä a nɩkpa 'wʋ yi.

‑A ‑kä ‑sɩbhä 'zʋʋ,

Lagɔ 'a ‑tiamö a wɛlɩɩ a biabialibhoo,

mö ‑a nʋmöä da'a.

'Yukugänɩnyɔzokwë

9 N yɛ Zezwii a ‑nʋa a ‑zɩkpaa ‑a ‑wʋä ‑mä 'a mä'a 'bɔgʋ 'wʋ 'pä.

‑Maa Diotlɛfʋ,

ɔnyɩ ɔ libhïä a gla'mö a dɔ'wʋ 'kɔdɔ 'mö 'wʋ zaa,

ɔ'ɔɔ 'yɩbhä ɔ 'kä 'na wɛlɩɩ 'yukwli ‑pʋnɩ.

10 ‑Sɩbhä a za,

n ‑kä yii,

'ɔ ‑lizokuu 'wuë ɔ nʋä,

‑a yi yɩ 'kïbhï 'ylɩmö.

Wɛlɩzoku ɔ bhïlaa ‑aa dɛ.

Sa'a a 'yize ɔ'ɔɔ zʋ.

‑Maa nɩkpaa ‑wa yiɛ ‑mä 'a mä'a Lagɔ 'a wɛlɩɩ biaaa,

ɔ'ɔ pölʋä.

‑Mumuë ‑wa yɩbhää wabhlɩ wa 'kʋä pälaa,

ɔ lɛ wa nɩ tuë päla,

'n ɔ sʋää ‑mä Zezwii a ‑nʋa ‑zɩkpa 'mö.

11 'Tua,

‑wa nʋä ‑lizokuu,

tuëa manɩ.

‑Maa ‑wa nʋä ‑li a ‑lii,

'wa gbäpöö mö ‑n nɩ ‑gänɩ.

‑Ɔ nʋä ‑li a ‑lii,

Lagɔ a ‑nɔ ɔ glɩnɩɛ.

‑Maa ‑ɔ nʋä ‑lizokuu,

ɔ'ɔɔ Lagɔ ‑yi.

12 ‑Aa ‑daayu Demetliusɩ ɔbhlɩ,

nɩkpaa 'wuë sɛ ɔ 'dɩ a dɩ.

'Ɔ sɛ ɔ ‑gänɩɛ sasɛ Lagɔ 'a ‑tiamö a wɛlɩɩ,

‑sɩbhä ma‑a tulanɩɛ 'ylimö nɩɩ,

ɔ ‑gä kɛ.

‑Abhʋaa ‑wʋä mä'ää,

‑a ‑sɛmö ɔ 'dɩ a dɩ.

‑Na'bhë,

‑n ‑yi sɛ nɩɩ,

sɛ ‑a gbää nɩkpɛ a dɛɛ,

‑tiawɛlɩɛ.

'Gbëbhlenɩwɛlɩɩ

13 N ‑kä wɛlɩ ‑mimii a ‑bɛ 'mlɩ,

n ‑kami 'nyɛ,

‑maa n'n‑ä 'yɩbhä n 'kɩ 'bɔgʋ 'mö 'cɛlɩ.

14 Ɛ'ɛ ‑bhö nyɩasɛ ‑maa na'bhë,

ɛ ‑bhɩɛ n ‑yimöa'a ‑pa 'ylɩmöä yi.

N ‑kä yii,

n ‑kamö ngli 'dɩ 'nyɛnɩ.

15 'Tɩɩglɩglɛ nɩ ghälamö 'wʋ.

‑Na 'tuawa ‑wa ‑wʋä mä'ää,

wa lɛ wa bhälɩmö.

‑Aa 'tuawa ‑wa ‑wʋä ‑mä,

'nyʋä bhʋlʋbhlʋ 'dɩ nɩɩ,

n bhäluë.