2 Zaa 1

'Sɔnabɔgʋʋ

Zaa

'cɛlɩɛ

Bhälɩwɛlɩɩ

‑Amö 'yukugänɩnyɔɔ,

‑nmö nglɔɔ^a,

‑nmö Lagɔ ‑sɛɛ ‑lɛ,

‑n ‑nyɛ ‑na'a yuëa^b 'sɔ,

abhʋa n cɛlɩɛ dɛ'ɛ 'wʋ.

‑Tiamö dlɩ wʋ a ‑gälaa tenyii.

Na 'yize ‑amöö 'nanyɩɛ ‑wa,

‑maa nɩkpaa 'wuë ‑wa ‑yiɛ Lagɔ 'a ‑tiamö a wɛlɩɩ,

wa ‑wamanyɩ.

2 Ɛ'ɛ ‑bhö nyɩasɛ,

‑maa Lagɔ 'a ‑tiamö 'a wɛlɩɩ mɩɩ ‑wʋnyɩɛ dila zɛmö,

mɩɩ ‑kanyɩɛ 'kwädlɩ ‑su.

3 ‑Aa dɩba Lagɔ,

ɔ ‑nyɛ 'ɔ Yuu Zezwii Kliisɩ 'sɔ,

wa yi ‑aa ngäzɩdlɩ 'pä,

'pʋpʋɛ ‑nyɛ 'nyupälɩɩ 'sɔ ‑yɩ 'bhöönuëë 'möö,

yɩ ‑yinyɩ 'wʋ ghlɛ.

‑Lɛ a dɔ'wʋ Lagɔ 'a ‑tiamö a wɛlɩɩ ‑nyɛ 'ɔ ‑wawʋʋ 'sɔ,

‑a 'naa 'kɩ 'kwädlɩ kɛ'mö ‑sɛ.

Lagɔ 'a ‑tiamö a wɛlɩɩ ‑nyɛ ‑wawʋʋ 'sɔ

4 ‑Na'a yuëa gla'mö a ‑mumuë,

sɛ wa ‑gänɩɛ sasɛ Lagɔ 'a ‑tiamö a wɛlɩɩ,

n 'yɩɛ ‑sɩbhä 'ylɩmöö,

'mäna lɩbhaaa tenyii.

‑Aa dɩba Lagɔ,

sɛ ɔ gbää ‑a nɩ nɛmöö,

‑sɩbhä wa nɛmöä da'a.

5 Zaa,

‑a'bhida,

wɛlɩɩ ‑yɩ nʋä nɩɩ:

‑A nɩ ‑wawanɩ,

'zwi 'klʋkpamö.

Wɛlɩlili n ‑nɩmöä dɛ'ɛ 'nyɛ,

‑maa wɛlɩɩ ‑n 'nʋ a‑a tɛkädɔ'wʋʋ,

'mö n ligbanɩmöä dɛ'ɛ 'wʋ.

6 ‑Wawʋʋ muä nɩɩ,

'zʋ Lagɔ 'a wɛlɩɩ 'klʋkpamö.

Wɛlɩ 'la,

sɛ'ɛ yɩ nʋä nɩɩ,

‑mä ‑a'a nɛmönɛmösaa 'wuë 'mö,

‑wawʋ mʋʋ nɩ ‑sunyɩ.

Dɩɩ wa zʋʋnyɩ a‑a ‑pa 'wʋ 'möö,

miɛ da'a.

A nɩ 'nɛmanɩ duladulawaa 'wʋ

7 Nyɩasɛ n'n‑ä ‑sɩbhä nʋ,

‑maa duladulawa a ‑bɛ,

wa yɛ mä'ä 'pɩwʋ mlɩmanɩ.

Nɩkpa 'la,

wɛlɩkïbhëa ‑a nʋä nɩɩ,

Zezwii Kliisɩ,

‑aa sɛ a nɩkpɛ ɔ 'zʋä,

'mö wa kpɛnɩɛ 'mö.

A nɩ yɩbhlɩnɩ sɛ nɩɩ,

yionyɔ 'kɔdɔɔ,

wa laa ‑ɔ ‑gblɩ Kliisɩ,

mɔɔ 'wlʋnɩɛ da'a 'yli.

8 Zaa,

a nɩ 'nɛmanɩ anyɩ 'wʋ,

a tɩa Lagɔ 'a wɛlɩɩ a dɔ'wʋ 'fʋ yɔlɔ,

‑lii 'wuë a 'kä a‑a 'a yɔlɔyʋlʋʋ a 'ylimö ghlɩɩ,

a tia 'mö bɔ.

9 Sɛ'ɛ n gbää nɩɩ,

Kliisɩ 'a wɛlɩɩ wa 'cɩanyɩɛ,

sɛ yɩ gbää,

‑ɔ 'ni ‑sɩbhä ‑gänɩ,

‑ɔ ‑kɩɩ 'ɔ käböwɛlɩ ‑gömö 'zʋʋ,

ɔ ‑nyɛ Lagɔ 'nɩɛ 'wʋ ‑wʋnɩ.

‑Maa ‑ɔ ‑kɩɩ ‑sɩbhä ‑gänɩ,

ɔbhlɩ,

mɔɔ ‑nyɛ Dɩbaa ‑wʋnɩɛ 'wʋ,

mɔɔ ‑nyɛ Yuu ‑wʋnɩmöä 'gämö 'wʋ.

10 Zaa nɩkpɛ a ‑mɔɔ ‑kä ‑mä 'a mä'a yi,

wɛlɩ 'la,

ɔ ‑kɩɩ 'mö cɩcɛ,

ɔ ‑kaanyɩ käböwɛlɩ 'nyɛɛ,

‑sɩbhä a nɩkpɛ 'la,

a nɩ to päla,

a nɩ to kätɩkpa a'bhë kä'mö 'ngwa.

11 Ɛ'ɛ ‑bhö nyɩasɛ,

‑maa sa'a a nɩkpɛ,

‑n ‑kɔɔ bhälɩɩ,

'ɔ ‑lizokuu ɔ nʋä da'aa,

mö ‑n nglunɩɛ.

'Gbëbhlenɩwɛlɩɩ

12 N kä wɛlɩ ‑mimii a ‑bɛ 'mlɩ,

n 'kanyi 'nyɛ.

N'n‑ä 'yɩbhä n 'kɩ 'bɔgʋ 'mö 'cɛlɩ.

‑Maa n yɩbhä n 'kä na'bhë ‑mä 'a mä'a yi,

n 'kanyɩ ngli 'dɩ 'nyɛnɩ.

‑Lɛ a dɔ'wʋ ‑a 'wuë,

‑mä ‑a'a dilaa zɛmö,

'mäna yi ‑mä ‑wʋ tenyii.

13 ‑Na nglʋdaayu Lagɔ ‑sɛɛ ‑lɛ,

'ɔ yuëa lɛ wa bhälanyɩ.