Matie 13

Glʋglʋnyɔɔ a ninea

(Maakö 4.1‑9; Lwiikö 8.4‑8)

‑Lɛ a zlɩ 'la ‑bhʋlʋ ‑kpɔ 'mö,

Zezwii 'bhööä ‑mä 'ligbë 'möö,

'n ɔ yiɛ ‑mä 'nyu 'kɔdʋʋ yɔwʋ mö.

‑Mä 'kïke 'wlu,

'n ɔ yiɛ ‑mä sɛ glɩ,

ɔ 'kä nɩkpa Lagɔwɛlɩɩ 'nyɛ.

2 'N nɩkpa 'kɔkɔmlɛ yoo yɔwʋ 'wlu 'titanɩ pluplu.

Nɩkpa a zunɔɔ a za,

'n Zezwii yiɛ 'gɔlʋ 'mö ‑gbälɛ,

'n ɔ yiɛ ‑mä sɛ glɩ.

Ɔ ‑wʋ ‑mä gɔlʋʋ 'mö,

‑lɛ 'nyu 'klʋ,

'n nɩkpaa suä ‑lɛ 'nyunuë 'wʋ.

3 'Nini 'mö ɔ 'cɩanuëë Lagɔwɛlɩ a ‑bɛ.

Ɔ lɛ naa:

«A ‑pʋnɩ 'yukwli.

Glʋglʋnyɔ ‑bhlʋ mɔɔ möä ‑mä 'ɔ 'lagblɛɛ 'mö lile 'mlɩɛ.^a

4 Ɔ ‑wʋ 'mlɩ dɔ'wʋ,

'n lileyʋ ‑mumuu yiɛ ‑mä 'lagblɛɛ a 'yioo 'wʋ bhlinɩ.

'N zɩɩ yiɛ yi,

'n yɩ yuä li.

5 'N yʋ ‑mumuu yi'ɛɛ ‑lɛ kpayi 'klʋ bhlinɩ,

daanyɩ dʋdʋʋ 'nɩɛ 'mö 'tuunɩ,

'n wʋ yiɛ ‑pa mi.

6 ‑Maa ylʋʋ 'pʋä cuu,

'n wʋ yiɛ ‑gbɔkwälɩɩ 'wʋ sianɩ,

'n yɩ yiɛ yɛ,

yɩ'ɩɛ kpïla glu ‑kä a za.

7 'N yʋ ‑mumuu yi'ɛɛ ‑mä ‑dɛglaswi a ‑duvï jijo'wʋ bhlinɩ.

‑Duvïï tɛpɔnɩɛ 'wʋʋ,

'n yɩ yiɛ lile a ‑gbɔkwälɩɩ 'wlu 'mö ‑gbïli,

'n yɩ yiɛ 'ku.

8 ‑Maa yʋ ‑mumuu bhlinɩ'ɛ ‑lɛ dʋdʋ a ‑dʋdʋ 'wʋ,

'n wʋ yiɛ 'pʋ,

'n wʋ yiɛ fötɩ.

'Gwla ‑bhlʋ kä 'yʋ a gwlɩ ngbï 'yli,

‑mämaa kä 'yʋ a gwlɩ ta 'yli,

‑mämaa kä 'yʋ a glʋ ‑bhlʋ 'yɛya kʋgbä 'yli.

9 Zaa,

‑ɔ ‑kä 'yukwïla 'wlu ‑kä,

ɔ nɩ 'nʋa ‑bhlɛ.»

Sɛ yɩ ‑wʋä 'mö 'n Zezwii bhïlanɩɛ 'nini 'möö

(Maakö 4.10‑12; Lwiikö 8.9‑10)

10 Zezwii 'pää nine 'la 'wëë,

'n 'ɔ ‑gänɩwaa yoo yɔwʋ 'dio,

wa lɛ naa:

«‑N ‑kä nɩkpaa Lagɔwɛlɩɩ 'nyɛ dɔ'wʋ ‑wʋʋ,

'nini a 'yize ‑n pää,

nɩɩ sɛ yɩ ‑wʋ ɔ 'mö 'nɩ?»

11 Ɔ lɛ naa:

«Abhʋa abhlɩ,

Lagɔ sʋlʋnanyɩ 'ɔ 'pɩwʋ mä ɔ 'kämanɩɛ a wɛlɩɩ ‑yɩ ziza‑a a zɛmö.

‑Maa ‑muë'la wabhlɩ,

ɔ 'nuënyɩɛ zɛmö sʋlʋnɩ.

12 Ɛ'ɛ ‑bhö nyɩasɛ,

‑maa wa lɛ naa:

‑Ɔ kää ‑bɛ 'mö wa nyɛɛ,

'n 'ɔ 'saa ɔ kää zumanɩɛ tenyii.

Ɔ kää 'tikïyiee,

'ɔ 'tikïyie 'la,

'mö wa sɔɔ kä'mö.

13 Nza n 'nyɛnuëë 'nini 'mö 'dɩ.

Nɩkpa 'la,

'wa yilaa lɩ,

‑maa wa'aa ‑lu 'wʋ yɩlɩ.

Wa kä 'yukwïla 'wlu,

‑maa wa'a 'nʋ,

wa'a 'nwi 'mö.

14‑15 Lagɔ a 'möbhïlanɩnyɔ Ezayii,

sɛ'ɛ ɔ gbä a‑a bhla'mö wa dɛ nɩɩ,

Lagɔ lɛ naa:

A yi ‑ngö ‑kë,

a 'naa 'kä 'mö 'nʋ.

'A yilaa yi 'fʋ lɩ,

maa a 'naa 'kä ‑lu 'ylɩmö.

Ɛ'ɛ ‑bhö nyɩasɛ,

‑maa,

'na ngëyii n ‑sɛɛ ‑lɛ 'mö a nɩkpa nɩ,

wa yɛ 'wa dilaa 'mö 'tumanɩ,

'na wɛlɩɩ tuëa dila zɛmö plɛ.

Wa yɛ 'yukwïla 'wʋ 'su,

wa tɩa 'na wɛlɩɩ 'mö 'nʋ.

Wa yɛ 'yila 'wʋ ngämö,

wa tɩa ‑lu 'ylɩmö.

Wa'aa 'yɩbhä wa 'kä ligba,

wa ‑kaa yɩbhlɩnɩ,

n tuëa puë a za.^b

Sɛɛ Ezayii gbä a‑a da'a wa dɛ,

‑sɩbhä ‑maa 'wlʋnɩɛ dɛ'ɛ 'yli.

16 ‑Maa abhʋa abhlɩ,

'a yilaa yɩlɩ sɛ,

'a yukwïlaa ‑ngö zaa,

'a ‑jɔlʋ!

17 Nyɩasɛ n'n‑ä ‑sɩbhä gbä,

‑maa Lagɔ 'a bhla'mö a 'möbhïlanɩwa a ‑bɛ,

'n Lagɔnɩkpa ‑mumuë a ‑bɛ 'yɛ,

'saa a yɩɛ dɛ'ɛ 'ylɩmöö,

wa 'yɩbhä a wa 'kʋ 'ylɩmö,

‑maa wa 'nuä 'ylɩmö.

Wɛlɩɩ a nʋä dɛ'ɛ,

wa 'yɩbhä a wa 'kɩ 'nʋ,

‑maa wa 'niɛ 'nʋ.

Glʋglʋnyɔ a ninea sɛ'ɛ a sɛɛ zɛmö

(Maakö 4.13‑20; Lwiikö 8.11‑15)

18 Zaa,

a ‑pʋnɩ 'yukwli,

glʋglʋnyɔɔ a ninea,

sɛ a sɛɛ zɛmöö,

n 'kanyɩ ‑sɩbhä sʋlʋnɩ.

19 ‑Wa ‑pʋnɩɛ 'Pɩwʋ mää Lagɔ 'kämanɩɛ a wɛlɩɩ 'yukwli,

‑waa 'nwiɛ 'möö,

‑lɛ 'yio 'wʋ dɛɛ lileyʋʋ bhlinɩɛ,

‑lɛ wa ‑nyɛ 'wlʋnɩɛ.

Wa ‑kä Lagɔwɛlɩɩ 'nʋ 'wëë,

'n Sataa yiɛ,

'n ɔ sʋänyɩɛ dila zɛmö 'lɩlɩlɩ.

20 Kpayidʋdʋ 'klʋ dɛɛ lileyʋ ‑mumuu bhlinɩɛ 'n wʋ 'nɩɛ 'pʋʋ,

‑mumuë ‑nyɛ ‑lɛ 'wlʋnɩ.

Wa ‑kä Lagɔwɛlɩɩ 'nʋ cuu,

'mänasɛ wa ngwliɛ 'wʋ,

21 ‑maa wa 'niɛ sasɛ dila zɛmö 'zʋ.

Zaa,

wa ‑kʋä yɩ za 'klɩ 'yɩa,

wa ‑kä'ɛ yɔlɔylʋ 'mö ‑wʋʋ,

yi wa 'tatiniɛ cuu.

22 ‑Mumuë ‑nyɛ dʋdʋ ‑wʋ kää ‑dɛgla 'wʋ 'wlʋnɩ'ɛ wabhlɩ.

Wa nʋ Lagɔwɛlɩɩ 'wë,

‑maa mä'ä 'pɩwʋ a dlɩpäpʋʋ ‑nyɛ wʋlʋnɔɔ a tʋʋ 'sɔ,

mɩɩ 'mänanɩɛ Lagɔwɛlɩɩ wa 'zʋ a‑a dlɩ zɛmö 'wlu.

‑Sɩbhä a za yɩ'ɩ tlʋa'a 'bhï.

23 ‑Maa nɩkpa ‑mumuë ‑wʋ ‑lɛ.

Mʋa ‑kä Lagɔwɛlɩɩ 'nʋʋ,

mʋa ‑pʋniɛ sasɛ 'yukwli 'n wa nwiɛ 'mö.

‑Sɩbhä a nɩkpaa,

mʋa ‑nyɛ dʋdʋ a ‑dʋdʋʋ 'wlʋnɩɛ,

dɛɛ lileyʋʋ bhlinɩɛ 'n wʋ yiɛ 'pʋ,

'n 'gwla ‑bhlʋ kää 'yʋ a gwlɩ ngbï 'yli,

'n gwla ‑mämaa kää 'yʋ a gwlɩ ta 'yli,

'n ‑mämaa kä'ɛɛ 'yʋ a glʋ ‑bhlʋ 'yʋ kʋgbä 'yli.»

‑Putukwëzokwëa a ninea

24 'N Zezwii yi'ɛɛ nine ‑mämaa 'pä,

ɔ lɛ naa:

«Sɛɛ nɩkpɛ glʋ'ɛ ‑mä ɔ 'lagblɛ 'mö lileyʋ a ‑lileyʋʋ,

‑sɩbhä 'pɩwʋ mää Lagɔ 'kämanɩɛ ‑wʋä.

25 Sabʋsɛ nɩkpa 'wuë ngämö,

'n 'lagblɛlowlii 'a ‑gblɩnyɔɔ yiɛ ‑mä 'lagblɛ 'mö mö.

Ɔ ghlɛɛ ‑mä,

‑mä lilea jijo'wʋ,

'n ɔ yiɛ ‑mä ‑putukwëzokwëa glʋ,

'n ɔ yiɛ 'wlu sɩbhä.

26 Lilea 'wlʋä,

a ‑wʋ fötɩ dɔ'wʋ,

'n ‑putukwëzokwëa yiɛ 'wlʋmö.

27 Lagblɛlowlii a libhonʋwaa 'yɩɛ ‑putukwëzokwëa 'ylɩmöö,

'n wa yoo ‑mä ghlɩ,

wa lɛ naa:

‑Atʋ,

‑mä ‑na'a 'lagblɛɛ 'mö lileyʋ a ‑lileyʋʋ ‑n glʋ a yɩ ‑mä nɩɩ,

sɛ yɩ ‑wʋ bhä'ɛ 'mö,

'n ‑putukwëzokwë ‑wʋ ‑mä 'nɩ?

28 Ɔ lɛ naa:

'A!

Na ‑gblɩnyɔɔ 'zʋä sa'aa.

Wa lɛ:

Zaa,

‑n yɩbhä bhä ‑a nɩ mö,

‑a 'kä ‑mä ‑putukwëzokwëa sɛ ‑a?

29 Ɔ lɛ naa:

N'nn!

a ‑kaa ‑sɩkaa ‑mä ‑sɛɛ,

lile a'bhë 'mö a 'kää glʋ ‑sɛmö.

30 Zaa,

a nɩ 'tatinaa ‑bhlɛ yi,

‑putukwëzokwëa ‑nyɛ lilea 'sɔ 'kä 'gämö 'pʋnɩ.

‑Maa ‑dɩdɩtɛnyɩ ‑kä ghlɛɛ,

n yi ‑dɩdɩwaa 'dɩ 'nyɛ nɩɩ,

wa nɩ ‑dɩ ‑putu gwë wa 'kʋ bhägöbhägö 'mö sɛ gwa,

wa 'kʋ sia 'wë,

wa 'kä bhäla lilea ‑dɩ,

wa 'ka ‑mä 'na gbʋʋ 'wʋ zʋ.»

Suyeyii wa laa mutaadɩ a ninea

(Maakö 4.30‑34; Lwiikö 13.18‑21)

31 'N Zezwii yi'ɛɛ nine ‑mämaa 'pä,

ɔ lɛ naa:

«'Pɩwʋ mää Lagɔ 'kämanɩɛ ‑mä ‑bhɩɛ suyeyikee wa laa mutaadɩ nɩkpɛ glʋ ‑mä ɔ 'lagblɛ 'mö.

32 Suyeyike 'la,

ɔ 'tikëtikëyi,

ɔ sɛ a 'tikëyi 'nɩɛ ‑bhölɩ.

‑Maa nɩkpɛ ‑kɔɔ 'wʋ 'libhï,

ɔ ‑kɔɔ ‑mä 'ɔ 'lagblɛɛ 'mö glʋ,

ɔ ‑kä 'wlʋʋ,

ɔ su 'bhʋɔmanɩ 'wʋ ‑këë,

wʋ zi ‑mä 'lagblɛ 'mö a glʋglʋlii 'wuë 'wʋ.

'N 'zɩ 'sɩbhänuä 'wlu.»

Levii a ninea

33 'N Zezwii yi'ɛɛ nine ‑mämaa 'pä.

Ɔ lɛ naa:

«Sɛɛ 'nglɔ zʋ'ɛ falinɩ a ‑bɛ 'bëë 'kädaa 'mö 'n ɔ pä'ɛ ‑mä levii a 'tikïyiee,

‑sɩbhä 'pɩwʋ mää Lagɔ 'kämanɩɛ ‑wʋä.

Ɔ ‑kä levii 'la a 'tikïyie ‑mä falinɩ 'mö zʋ ɔ ‑kɔɔnyɩ plɛtanɩɩ,

levii 'tikïyie 'la a za,

falinɩ 'wuë,

'plu ɛ 'kää 'plu.»

'Nini 'mö Zezwii 'nyɛnɩɛ 'kwädlɩ nɩkpa a ‑bʋbʋ Lagɔwɛlɩɩ

(Maakö 4.33‑34)

34 Ɔ'ɔ 'nyʋä 'fʋ Lagɔwɛlɩ 'n ɛ 'nɩ ‑bhö nini möö.

35 Nyɩasɛ yɩ'ɩɛ ‑sɩbhä ‑wʋ,

‑maa sɛɛ Lagɔ a bhla'mö a 'möbhïlanɩnyɔɔ gbä a‑a,

‑sɩbhä ma‑a 'wlʋnɩɛ da'a 'yli.

Sɛ'ɛ ɔ gbä a‑a nɩɩ:

'Nini 'mö n 'kʋää 'dɩ 'nyɛnɩ.

Tɛɛnɩ ‑mä 'pɩwʋ a tɛɛnɩdɛ,

wɛlɩɩ,

‑yɩ ziza‑a a‑a 'kwädlɩɩ,

n 'kʋänyɩ 'kɛ 'klʋ kälɩnɩ.^c

Zezwii yɛ ‑putukwëzokwëa a ninea zɛmö ‑sɛ

36 Zezwii 'pää nini 'la 'wëë,

'n ɔ yiɛ nɩkpa a ‑bʋbʋ yɔwʋ 'bhöö 'n ɔ yiɛ 'ligbë 'mö mö.

Ɔ ghlɛɛ ‑mää,

'n 'ɔ ‑gänɩwaa yoo yɔwʋ 'dio,

wa lɛ naa:

«‑Atʋ,

'lagblɛ 'mö a ‑putukwëzokwëa a ninea,

‑n 'pä'ɛ ‑sɩkaaa,

sɛ a sɛ bhä zɛmö 'nɩ?»

37 Ɔ lɛ naa:

«Sɛ'ɛ a sɛɛ zɛmö nɩɩ:

Nɩkpɛ a 'Yu,

mɔɔ lilea a glʋglʋnyɔɔ mɔɔ.

38 Mä'ä 'pɩwʋ ma‑a 'lagblɛɛ mɛ.

Nɩkpaa ‑wa ngluä 'wʋ Lagɔ 'kʋä ‑gömö 'kämanɩɩ,

mʋaa lilea ‑a ‑glʋä ‑mä 'lagblɛ 'mö ma.

‑Muë ngluä 'wʋ 'kpʋkpʋnyɔ Sataa 'kʋä ‑gömö 'kämanɩɩ,

mʋaa ‑putukwëzokwëa ma.

39 Sataa,

mɔɔ 'lagblɛlowlii a ‑gblɩnyɔɔ mɔ,

mɔɔ glʋä ‑putukwëzokwëa.

'Pɩwʋ a 'ylibhɩɛzlɩɩ,

mɛɛ 'lagblɛɛ a ‑dɩdɩtɛnyɩɩ mɛ.

Lagɔzuzukuu miɛ lilea a ‑dɩdɩwaa muë.

40 Sa'a sɛ wa ‑kä ‑putukwëzokwëa gwë ‑dɩ 'wë 'n wa siaa,

'pɩwʋ ‑kä 'yli bhɩɛɛ yii,

‑sɩbhä yɩ 'kää 'wʋ 'plɩ.

41 Nɩkpɛ a 'Yu,

'ɔ Lagɔzuzukuu 'mö ɔ 'kää tie,

nɩkpa 'wuë ‑wa kää 'nglɩ 'n wa 'bhɩa nʋä 'nyinylolii,

‑wa nʋ'ɛɛ wa'bhï 'nyinylolii,

wa 'wuë,

Lagɔzuzukuu 'kʋä ‑mä Lagɔ a ‑nʋa jijo'wʋ ‑sɛ,

42 ‑mä ‑kosu 'kɔdʋʋ 'mö,

yɩ 'kʋä ‑mä 'pä.

‑Mä wa 'kää 'klʋ 'slunɩ,

wa 'kä ‑mä 'winɩ.

43 ‑Maa nɩkpa 'wuë,

Lagɔ a 'yila 'klʋ a dɔ'wʋ ‑wa zlɔnɩɛ 'möö,

'pɩwʋ mää wa dɩba Lagɔ 'kämanɩɛ,

mʋa 'kää ‑mä 'ylʋväla a sɛ lɩnɩ.

Zaa,

‑ɔ ‑kä 'yukwïla 'wlu ‑kä ɔ nɩ 'nʋa ‑bhlɛ.

Lɩɩ ‑yɩ ziza‑a a ninea

44 Sɛɛ nɩkpɛ vu'ɛ lɩ 'a ‑lokwli ‑ɛ ziza‑a 'lagblɛ 'mö zɛmöö,

‑sɩbhä 'pɩwʋ mää Lagɔ 'kämanɩɛ ‑wʋä.

Ɔ ‑kɛɛ zɛmö ‑vuu,

käbödɛ ɔ zizee.

Ɔ 'wuë 'mäna 'n ɔ 'kää mö,

ɔ 'saa ɔ kä a‑a 'wuë ɔ 'kʋ 'pɛlʋ 'pä,

ɔ 'kä yi ɔ 'käa'a 'lagblɛɛ a'bhë pɩa ɔ kɛ kälɩ.

'Nglɩmökpɩɩ a ninea

45 Sɛɛ 'pɛlʋpänyɔ tɛlɩ'ɛ 'nglɩmökpɩ sɛ,

‑sɩbhä 'pɩwʋ mää Lagɔ 'kämanɩɛ ‑wʋä.

46 Ɔ ‑kä kpiyi a ‑mɛ nɛnɩɛ,

‑ɛ 'tɛɛ tenyii 'pɛlʋ 'wʋ ghlɩɩ,

mö ɔ möä 'n ɔ pää 'ɔ 'saa ɔ kää 'wuë 'pɛlʋ,

ɔ 'kä yi ɔ 'kä 'nglɩmökpiyi 'la pɩa.

‑Dɛdaa a ninea

47 Sɛ wa pä'ɛ ‑dɛda 'nyu 'mö 'n zibhï a kii 'wuë plɛ'ɛ ‑mä a 'möö,

‑sɩbhä 'pɩwʋ mää Lagɔ 'kämanɩɛ ‑wʋä.

48 ‑Dɛdapäwaa ‑kaa ‑mä 'nyu 'mö 'pä,

'n a ‑kä zibhï 'wʋ yiee,

jli wa jilaa 'n wa ‑nyaa möä ‑mä 'kïkë 'wlu,

'n wa glɩɛ sɛ,

'n wa gbäzɩɛ zibhï 'mö.

‑Yɩ nɛnɩɛ,

'n wa zwiɛ 'bïï 'mö 'n wa pää 'zokuu 'klwɛ 'mö.

49 'Pɩwʋ ‑kä 'yli bhɩɛɛ yii,

‑sɩbhä yɩ 'kää 'wʋ 'plɩ.

Lagɔzuzukuu mɩɩ 'kää yi yɩ 'kä ‑li a ‑lii a nʋwaa ‑nyɛ 'zoku a nʋwaa 'sɔ 'ylimö ‑sɛnɩ.

50 'Zoku a nʋwaa,

‑mä ‑kosu 'kɔdʋʋ 'mö,

yɩ 'kʋä ‑mä 'pä.

‑Mä wa 'kää 'klʋ 'slunɩ,

wa 'kä ‑mä 'winɩ.»

51 Zezwii bhïlaa wɛlɩ 'la 'wuë 'wëë,

'n ɔ yiɛ 'ɔ ‑gänɩwaa nimï 'yɩbhä,

ɔ lɛ naa:

«Wɛlɩ 'la 'wuë n bhïlaa da'a,

a 'nwi bhä 'mö?»

Wa lɛ naa:

«Nn,

‑a 'nwi 'mö.»

52 Ɔ lɛ naa:

«‑Aa!

Yɩ ‑gä kɛ,

‑maa Moyizɩ 'a Gböö a 'cɩanyɔɔ ‑ɔ 'cɩɛɛ sasɛ 'pɩwʋ mää Lagɔ 'kämanɩɛ a wɛlɩɩ,

‑ɔ ngwliɛ 'gämö 'wʋʋ,

ɔ 'kä ‑bhɩɛ ‑gligbë'wʋwʋnyɔ.

Ɔ ‑kä ‑mä 'ɔ wʋlʋnɔɔ ‑sɛɛ,

ɔ sɛ ‑mä 'gɔgwɩ,

ɔ sɛ'ɛ ‑mä 'lilili.»

Nazalɛɛtɩ a ‑nʋa 'nɩɛ Zezwii dlɩ 'wʋ ‑kä

(Maakö 6.1‑6; Lwiikö 4.16‑30)

53 Zezwii 'pää nini 'la 'wëë,

'n ɔ yiɛ 'wʋ ‑sɔ 'n ɔ yiɛ mö,

54 ‑mä ɔ 'bhele Nazalɛɛtɩ,

'n ɔ yiɛ ‑mä ghlɛ.

‑Mä a Lagɔbudu 'mö,

'n ɔ yiɛ ‑mä nɩkpa Lagɔwɛlɩɩ 'cɩanɩ.

‑Mä a nɩkpa 'wuë ‑wa ‑pʋnɔɔ 'yukwlii,

'n ngli yuëë yɛ 'n wa 'yɩbhäyɩbhänɩɛ nimï nɩɩ:

«'Ɔɔ!

Dɛ ɔ ‑sɛ bhä sa'a 'nɛɛnɔ?

Zaa,

zɩzɛ 'wuë ɔ pää,

‑ɔ nyɔ bhä 'mötɛɛnɔ 'n ɔ pɛ bhä 'nɩ?

55 ‑Maa ɛ'ɛ ‑bhö ɔ da'a switɛlɩnyɔ nɩ a yowli mɔ ‑a?

Ɔ ‑da 'mö wa 'nɩɛ bhä'ɛ Malii laa?

Zaakö mɔ,

Zɩzɛɛfʋ^d mɔ,

Simɔɔ mɔ 'n Zwiidɩ,

mʋa 'nɩɛ bhä'ɛ ɔ ‑daayuë glɩnɩ?

56 Ɔ nglʋdaayuë 'nɩɛ bhä'ɛ mä'ä glɔ 'mö ‑wʋmö.

‑A yoo yɩ 'tɩɩ nɩɩ,

dɛ ɔ sɛ bhä sa'a ‑lii 'wuë 'nɩ?»

57 Ki 'la 'wuë mɩɩ kää 'nglɩ,

nza wa 'nɔɔ dlɩ 'wʋ ‑kä.

‑Sɩbhä a za ɔ 'nyʋää 'dɩ nɩɩ:

«Lagɔ a 'möbhïlanɩnyɔ,

saa 'wuë,

wa zo,

‑maa ‑mä ɔ 'bhele a ‑nʋa ‑nyɛ 'ɔ ‑kosuu yɔwʋ a 'sɔ mʋa 'nɩ zoo.»

58 ‑Maa ‑mä ɔ 'bhele a ‑nʋa,

sɛ wa 'nɔɔ dlɩ 'wʋ ‑kä a za,

ɔ'ɔɔ ‑mä zɩzɛ a ‑bɛ ‑bhɛnɩ.