Zwiidɩ 1

'Bɔgʋʋ

Zwiidɩ

'cɛlɩɛ

Bhälɩwɛlɩɩ

‑Amö Zaakö a ‑daayu Zwiidɩ,

‑amöö glɩnɩɛ Zezwii Kliisɩ a 'yliwʋnyɔɔ,

‑amöö cɛlɩɛ dɛ'ɛ 'bɔgʋ nɩ.

A 'wuë abhʋa ‑glɛɛ Lagɔ dlɩ 'wʋ,

abhʋa ɔ ‑sɛɛ ‑lɛ a 'kä ɔ ‑nʋä glɩnɩ,

abhʋa Zezwii Kliisɩ ‑kʋä 'wʋʋ,

abhʋa n cɛlɩɛ dɛ'ɛ 'wʋ.

2 Lagɔ,

sɛ ɔ kää a ngäzɩdlɩ,

sɛ a ‑gälɔɔɔ dlɩ 'wʋ tenyii,

ɔ nɩ tulananyɩ 'kwädlɩ ‑sɩbhä 'ylimö,

a dila zɛmö 'kä ‑pälɛpälɛ ‑wʋ.

Nɩkpaa ‑wa 'cɩaa yiowɛlɩɩ

3 Na dlɩsɛkäwanyɩ,

'pʋpʋɛɛ ‑a ‑gbɔɔ 'wʋʋ,

n yɩbhä a n 'kanyɩ 'wʋ 'cɛlɩ n 'kanyɩ ɛ wɛlɩɩ dlɩ ‑gömö ‑sɛsɛnɩ.

‑Maa 'pʋpʋɛ 'la a wɛlɩɩ wa kɩ Lagɔ ɔ ‑nʋa 'wuë yɔwʋ tɩ 'wë,

‑mimii 'nɩɛ nimï ‑gä zaa,

yɩ kä tenyii dɛsɛ n 'kanyɩ ‑sɩkaa a'bhë 'wʋ 'cɛlɩ,

n 'kanyɩ 'dɩ 'nyɛ nɩɩ,

a nɩ 'tɛmanɩ 'yli yɔwʋ a 'kɩ 'wʋ gwɩ.

4 Ɛ'ɛ ‑bhö nyɩasɛ,

‑maa nɩkpa a ‑muë ‑waa 'zʋä Lagɔ 'klʋkpa 'möö,

wa yɛ ylʋsɛ ‑mä a jijo'wʋ plɛ.

Sɛɛ Lagɔ kää nɩkpɛ a ngäzɩdlɩ a wɛlɩɩ,

'mö wa cɩcɛɛ 'mö.

Wa lɛ naa,

sɛɛ Lagɔ kää nɩkpɛ a ngäzɩdlɩ a za,

‑lizoku a kii 'wuë nɩkpɛ yɩbhää,

ɔ bhɛnɩ ɔ 'kɩ nʋ.

Wa ‑kä sa'a 'zʋ dɔ'wʋ ‑wʋʋ,

Zezwii Kliisɩ ‑ɔ glɩnɩɛ ɔ 'yize ‑aa 'bhidɩba ‑ɔ 'kämanɩnyɩɛ ‑gömöö,

'mö wa panɩɛ ‑gömö.

Sɛɛ Lagɔ 'kʋää gbʋ köbha a wɛlɩɩ,

wa kɩ a ‑pa ‑mä Lagɔbɔgʋʋ 'mö 'cɛlɩ.

5 ‑Atʋayuënyɩ,

wɛlɩɩ n 'kää dɛ'ɛ bhïlaa,

a ‑yii 'kɩ.

‑Sɩbhä yɩ ‑wʋ 'mö,

‑maa n yɩbhä n 'kanyɩ ligba nɩɩ,

Yizlaɛlɩ 'a ngëyii 'mö a ‑nʋa,

mä wa ‑wʋ a‑a Ezipötɩ,

Lagɔ mɔɔ ‑sʋä a‑a ‑mä.

‑Maa ɔ ‑sʋää ‑mä 'wëë,

wa gla'mö a ‑mumuë,

wa'aa'a 'yɩbhä wa 'kɔ dlɩ 'tɛɛnɩ,

zaa 'n ɔ yuëë 'yli bhɩa.

6 Lagɔzuzuku ‑mimii,

a nɩ 'pänɩmö'ɛ yɩ wɛlɩɩ dlɩ kɛ.

'Yɩ 'kämanɔɔ Lagɔ 'nyɩ a‑a,

'mö yɩ fälanɩɛ 'ylimö,

'yɩ bhlii ɔ 'zwi a‑a 'mö 'n yɩ yiɛ ‑gömö panɩ.

Nza,

Lagɔ 'libhiɛ 'wʋ,

mää guylukwëa ‑wʋä,

'n ɔ yiɛ ‑mä ‑jie 'mö 'pä,

yɩ 'kä ‑bhlɛ ‑mä ‑wʋ ‑këë,

Lagɔ 'a ‑zijle 'kädaa a zlɩɩ 'kä ghlɛ.

7 Sodɔɔmö a ‑glɔɔ mu,

Gomɔɔlʋ a ‑glɔɔ mu,

'n yɩ ‑kʋkʋ yɔwʋ a ‑gwlɩɩ,

a nɩ 'pämöä 'yɛ ‑ka yɩ da dlɩ.

‑Gwlɩ 'la 'mö a nɩkpaa,

zuzuku 'la a saa,

‑sɩbhä 'wa nʋ a‑a ‑lizokuu ‑yɩɩɛ nɩkpɛnʋsɛ a'bhë ‑wʋ.

Miɛ nɩɩ,

'kwlɛ 'mö wa ‑dɩ a‑a wa ‑nyɛ Lagɔzuzuku^a 'kä sɛ pö.

‑Sɩbhä a za,

‑kosu ‑wʋ 'naa 'kää 'kwädlɩ 'ngïmoo,

‑mä wʋ 'mö,

‑mä wa ‑wʋä.

'Wa ‑lizokuu a 'pɛna ‑a ‑kanyɩɛ 'nɛmanɩɩ,

ma‑a da'a.

8 ‑Maa a yɩɛ,

nɩkpa 'la ‑wa plɛɛ ‑mä a jijo'wʋʋ,

‑lizoku 'la 'wuë,

'mö wa nʋmöä.

'Wa ‑lii wa sɛɛ 'wlumö mɩɩ kää 'nglɩ 'n wa pälaa wanyɩ fɩ.

‑Alowli Lagɔ 'a 'kämanɔɔ 'mö wa fälanɩɛ 'ylimö.

Lagɔzuzukuu ‑yɩ kää 'nglɩ ‑gömö,

yɩ dɛ wa bhïlaa wɛlɩzoku.

9 Lagɔzuzukwë 'kädaa Misɛɛlɩ,

a'aa sa'a zʋ.

‑Zlɩ Moyizɩ 'kuä,

Misɛɛlɩ ‑nyɛ Sataa 'sɔ 'n wa yiɛ ɔ ‑gäzɛ 'tʋtɔ.

Wa ‑wɛɛɛ 'tʋtɔ dɔ'wʋʋ,

Misɛɛlɩ 'nɩɛ Saata wɛlɩzoku bhïlanɩ,

‑maa sɛ ɔ gbänɔɔ ‑sɩbhä ma‑a nɩɩ:

«‑Alowli Lagɔ mɔɔ nɩ köbhamö gbʋ.»

10 ‑Maa nɩkpa 'la wabhlɩ,

'saa wa'aa ‑yii a dɛ wa bhïlaa wɛlɩzoku.

'Saa wa yiɛ,

mɩɩ kää 'nglɩ 'n wa bhɩɛ 'yli,

miɛ nɩɩ,

nɩma a sɛ wa'aa 'wlumö ‑kä zaa,

'saa 'wa kpökpaa yɩbhää cuu,

'mö wa nʋä.

11 Kplee 'kʋää köbhä.

Ɛ'ɛ ‑bhö nyɩasɛ,

‑maa Kayɛɛ 'a ‑gbuduu 'mö wa bhliɛ da'a.

Bhla'mö a Lagɔnɩkpɛ Balaamö,

moni a tʋ ‑sɛ a‑a Lagɔ 'a 'yioo 'wʋʋ,

ɔ saa ‑sɩbhä wa 'zʋä.

Bhla'mö a nɩkpɛɛ Kolee a saa,

'wa 'klʋkpamösɛsʋʋ a za,

'yli wa 'kää bhɩɛ.

12 A ‑kä 'wlu 'yɩbhä a 'kä ‑wanɩwanɩsɛ 'wʋ linɩɩ,

nɩkpa 'la ‑wa ‑waanyɩ jijo'wʋ ‑wʋʋ,

'wa sɛ wa'aa Lagɔ a nganɔ ku 'mö ‑kä,

sɛ wa pää wa 'kä wa 'yize lʋ a gbʋ dlɩ 'wʋʋ,

‑sɩbhä zʋ 'wʋ a ‑bhöä.

'Nyizakwë a ‑ma ‑a köbhä 'ylimö 'wë ‑aa lɩbhä,

‑a 'plɩ a saa,

‑sɩbhä wa ‑wʋä.

Swi a ‑mi ‑yɩnyɩɩ tlʋtlʋtɛnyɩ yɛ ghlɛ 'wë ‑yɩɩ tlʋ,

‑yɩɩ kpïla glu ‑kä,

‑yɩ ku‑u'ɛ 'kɩ 'lɩlɩlɩ,

yɩ saa,

‑sɩbhä wa ‑wʋmö'ɛɛ.

13 Sɛɛ gïnyɛ a ‑gbɔkwälɩ a 'pïpïli wlʋ'ɛ 'ylii,

‑sɩbhä 'wa zʋ'wʋbhölii bhliɛ zɩkpa.

‑Zɛlɩ a ‑mi ‑yɩɩa'a'ɛ ‑gba ‑kä,

‑yɩ ziɛ saa 'wuë 'möö,

yɩ saa,

‑sɩbhä wa ‑wʋä.

‑Sɩbhä wa 'kää ‑wʋ ‑këë,

nzɩɩ dɛ ‑bhlʋ dɛɛ yuluä tititii,

Lagɔ 'kʋä 'ylɩ ‑bhlʋ 'mö ‑lɛ 'pä wa 'käa'a 'kwädlɩkwädlɩnɩ ‑lɛ ‑wʋ.

14 Enɔɔkö,

tɛɛnɩ Adaa 'wʋ,

nɩkpaa gwälɩgwälɩnɩɛ ‑këë a ‑ɔ glɩnɩɛ ‑zɩkpa a ngbi'sɔnaa a dɩbaa,

sɛ'ɛ ɔ gbä a‑a ‑pa sa'a a nɩkpa 'la a dɛ nɩɩ:

«A ‑pʋnɩ 'yukwli,

‑Alowli Lagɔ,

ɔ ‑nyɛ 'ɔ zuzukuu yi yi,

yɩ 'kɔkɔmlɛ,

yɩ'ɩɛ zɛlɩzɛlɩsɛ ‑wʋ,

15 nzɩɩ ɔ 'kä 'bhlɩbhëa 'wuë ‑zijli tu.

Nɩkpaa 'wuë,

‑waaa 'yɩbhää wa 'kɔ 'klʋkpamö 'zʋʋ,

'wa 'klʋkpamösɛsʋʋ 'mö a ‑lizokuu 'wuë wa nʋä,

wɛlɩzokuu 'wuë wa bhïlaa ɔ dɛɛ,

ɔ 'kʋä yɩ za gbʋ köbha.»

16 Sa'a a nɩkpa 'la,

sɛ yɩ yi 'kwädlɩ 'mö ‑wʋ oo,

wa'aa ‑wa 'yize.

Wa kä 'kwädlɩ 'kïbhë wa 'ka ‑lɛ zʋ.

‑Lizokuu 'wuë 'wa dilaa yɩbhää,

'mö wa nʋä.

Bhabhasɛ wa bhïlaa.

Nɩkpa wa lɩbhää ylʋ ngli wa 'kʋäa ‑lu 'mö ‑sɛ a za.

Sɛ'ɛ Zwiidɩ 'zʋä Zezwii a ‑nʋa 'dɩ 'mö

17 ‑Maa abhʋa abhlɩ,

abhʋaa ‑kaaa dlɩsɛɛ,

'dɩ 'mö n zʋanyɩɛ dɛ'ɛ nɩɩ:

Wɛlɩɩ ‑Alowli Zezwii Kliisɩ 'a tietiewaa 'nyanyɩ a‑a ‑pa 'wʋ nɩɩ,

yɩ yi 'yli 'wlʋnɩɩ,

a nɩ tia 'wʋ dlʋ.

18 Sɛ'ɛ wa gbä a‑a nɩɩ,

'pɩwʋ a 'ylibhɩɛdaa ‑kä ghlɛɛ yii,

nɩkpa ‑mumuë yi 'yli 'wlʋ.

Wa yeanyɩ nɛpɔ,

wa'aa wa 'kä 'klʋkpa ‑kä,

‑lizokuu 'wa dilaa yɩbhää 'mö wa 'kää nʋ.

19 A yɩɛ,

‑lɛ a nɩkpa 'la mʋa lɛmöä 'lʋlwɛɛ,

mɛɛ sɛnɩɛ Zezwii a ‑nʋa 'ylimö.

'Wa ‑wʋwʋsɛzokwëa ma‑a ‑suëë,

‑maa Lagɔ 'a 'Wugɔmʋʋ mɔɔ 'nuëë ‑su.

20 ‑Maa abhʋa abhlɩ,

abhʋaa ‑kaaa dlɩsɛɛ,

a nɩ 'päpänɩ swɩ nyɛmʋ 'mö,

wɛlɩɩ ‑yɩ 'bhöönɩɛ ‑mä Lagɔ a'bhë kä'mö,

a ngluä 'wʋʋ,

a 'kä ‑mä yɩ 'mö a dɔ'wʋ 'yukusɛ mö 'yize.

A nɩ bhibhee 'kwädlɩ Lagɔ 'Wugɔmʋʋ 'Wlɩlɩ 'a 'mötɛɛnɔɔ 'mö.

21 Lagɔ 'a ‑wawʋʋ,

mʋʋ nɩ ‑soanyɩ 'kwädlɩ.

‑Alowli Zezwii Kliisɩ 'a ngäzɩdlɩɩ,

'mö a nɩ 'tɛɛnɩ dlɩ ‑këë,

ɔ 'kanyɩ 'pɩwʋ mää 'naa 'kää 'yli bhɩɛ 'nyɛ.

22 A gla'mö a ‑nʋä ‑mumuë,

wa gʋgɔa'aa Lagɔ 'a wɛlɩɩ 'mö a dɔ'wʋʋ,

a nɩ kä wa ngäzɩdlɩ,

23 a 'kä sɛ tɛlɩ,

‑kosuu wa ‑wʋä da'a 'mö mö dɔ'wʋ,

a 'kʋänyɩ ngli ‑sɛ,

wa 'kä 'pʋ.

‑Mumuë ‑wʋ'ɛ wabhlɩ ‑lɛ.

A ‑kä'ɛ wa ngäzɩdlɩ ‑kää,

yɩ nɛnɩ,

‑maa 'nyinylolii 'wa ‑wʋwʋsɛzokwëa kwʋää 'möö,

a nɩ ti ‑wa 'lɩlɩlɩ.

A nɩ 'nɛmanɩ 'gämö anyɩ 'wʋ,

wa tanyia 'pïlanɩmö.

A nɩ 'ghlimanɩ Lagɔ a 'nglɩ

24 ‑Aa dɩba Lagɔ mɔɔ bhɛnɩɛ ɔ 'kanyɩ 'wʋ ‑kʋ 'n ‑bɛ 'naa 'kanyɩɛ 'ɔ 'yioo 'wʋ ‑sɛ.

Ɔ 'yize mɔɔ 'kää 'nglɩ ‑kä,

'n a 'naa 'kää ‑maa yɔwʋ ‑kä 'lɩlɩlɩ,

'n a 'kää 'ylɩ ‑bhlʋ 'mö ‑lɛ ɔ 'yila 'klʋ ghlɛ,

'n a 'kää 'ɔ 'ghïlinɔɔ 'ylɩmö,

nzɩɩ 'mäna 'kanyɩ tenyii 'wlu 'mänanɩ.

25 Ɔ 'yize mɔ ‑lɛ Lagɔ,

mɔ ‑lɛ ‑aa Puënyɔ.

‑Alowli Zezwii Kliisɩ 'mö ɔ ghlɛnɩɛ 'mö 'n ɔ ‑yinyɩɛ puë.

Ɔ 'yize,

'ɔ nglɩɩ mɩɩ 'ghïliɛ,

ɔ 'yize mɔɔ 'tɛɛ 'mö,

mɔɔ 'kämanɩɛ ‑lii 'wuë ‑gömö.

Tɛɛnɩ ‑mä bhlagɔgɔ'mö ‑këë zɩ'ɛ,

sa'a yɩ ‑wʋä 'yize 'n ‑sɩbhä yɩ 'kää 'kwädlɩkwädlɩnɩ ‑wʋ.

'Ɔ nglɩɩ,

yɩ nɩ 'ghlimanɩ.

‑Amɛɛ!