1 Zaa 1

Tɛkäbɔgʋʋ

Zaa

'cɛlɩɛ

Wɛlɩ ‑ɔ nyɛ ‑tiamö a ‑bhölɩbhölɛ

1

Wa laa Wɛlɩ,

‑ɔ nyɛ ‑tiamö a ‑bhölɩbhölɛ,

ɔ dɩ ‑a nyanyɩɛ.

'Pɩwʋ a tɛɛnɩdɛ,

ɔ ‑bhölɩ a ɔbhlɩ.

‑A'bhï,

'ɔ bhïlawɛlɩɩ,

‑a 'nwi,

‑a 'yɩnɔ ‑a'a yilaa 'mö 'ylɩmö,

a‑a yoo 'yli köbha,

‑a'a kätɩkpöö zo kɛ.

2 ‑Ɔ glɩnɩɛ ‑tiamö a ‑bhölɩbhölɛ mɔɔ 'wlʋnɩɛ mä'ä ‑aa jijo'wʋ 'yli,

a‑a yoo 'ylɩmö.

‑Mä ɔ ‑wʋ a‑a ‑aa dɩba Lagɔ yɔwʋ.

‑Maa ɔ yiɛ,

'pɩwʋ mää 'naa 'kää 'yli bhɩɛ ma‑a 'wlʋnɩɛ da'a 'yli.

Pɩwʋ 'la a wɛlɩɩ,

mö ‑a zʋä kɛ ‑gömö nɩɩ,

‑tiawɛlɩɛ,

mö ‑a nyanyɩɛ.

3 Sɛ'ɛ n gbää nɩɩ,

'saa ‑a 'yɩɛ 'ylɩmö,

'saa ‑a 'nʋä,

yɩ dɩ ‑a 'nyɛmanyɩɛ,

nzɩɩ sɛ ‑a glɩnɩɛ Lagɔ a ‑nʋä,

a 'kä ‑sɩbhä ɔ ‑nʋä 'zʋmö.

‑Lɛ a dɔ'wʋ,

‑a 'wuë,

‑a ‑nyɛ ‑aa dɩba Lagɔ 'sɔ,

'ɔ Yuu Zezwii Kliisɩ kökä,

‑a yi 'gämö 'wʋ ‑wʋnɩ.

4 Zaa,

'bɔgʋ nɩ mö ‑a cɛlanyɩɛ 'wʋ,

nzɩɩ ‑a 'wuë 'mäna ‑kanyɩ 'wlu 'mänanɩ.

A‑a 'nɩ nɛmönɩ ‑mä ‑gägäzlɩɩ 'mö

5 Sɛɛ Zezwii Kliisɩ nyɩanyɩɛ 'dɩɩ,

‑sɩbhä ‑a nyanyɩɛ dɛ'ɛ 'dɩ nɩɩ:

Lagɔ,

‑gägäzlɩɩ ɔ glɩnɩɛ,

ɔ'ɔɔ 'yuylukwë 'mö ‑kä 'lɩlɩlɩ.

6 Zaa,

‑a ‑kä nɩɩ Lagɔ mö ‑a ‑nyɛɛ ‑wʋnɩ 'wʋ nʋʋ,

a‑a ‑kä'ɛ ‑mä 'yuylukwë 'mö nɛmöö,

widɩsɛwa ‑a glɩnɩɛ,

‑aaa gbëaa 'mö ‑kä.

7 ‑Maa,

a‑a ‑kä ‑mä ‑gägäzlɩɩ 'mö nɛmöö,

Lagɔ,

‑gägäzlɩɩ ɔ glɩnɩɛ zaa,

ɔ Yowli Zezwii 'a dluu ‑wʋ kwliɛ a za,

‑a'a 'nyinylolii a gbʋʋ ‑yinyɩ ‑gömö 'bhöö,

‑a yi 'wʋ ‑wʋnɩ.

8 ‑A ‑kä nɩɩ ‑aaa ‑lizoku nʋ,

gbʋ ‑nɩnyɩɛ ‑gömö ‑wʋ nʋʋ,

‑anyɩ ‑a dulaa,

‑aaa gbëaa ngli kä.

9 ‑Maa,

a‑a 'nɩ ‑a'a 'nyinylolii ziza,

‑a ‑kä yɩ 'bï ‑sɛɛ,

Lagɔ,

ɔ'ɔɔ yio ngli ‑kä,

‑kpöö 'wʋ ɔ ‑wʋä zaa,

ɔ yi ‑a'a 'nyinylolii a gbʋʋ 'yi 'tatinɩ,

ɔ 'yila 'klʋ a dɔ'wʋ ‑a yi 'wlɩlɩ plɛ.

10 ‑A ‑kä nɩɩ ‑aaa 'nyinyloli nʋ 'lɩlɩlɩ nʋʋ,

‑lɛ a dɔ'wʋ,

Lagɔ,

widɩsɛnyɔ mö ‑a libhoo 'wʋ,

'ɔ wɛlɩɩ ‑nɩnyɩɛ dlɩ zɛmö ‑wʋ.