Lagɔ 'a ngäzɩdlɩkäkʋʋ nɩkpaa wʋ sɛɛ 'nyinyloli 'mö
6
Yɩ 'wuë a dɔ'wʋ,
sɛ'ɛ yɩ sɛ bhä zɛmö nɩɩ,
a‑a nɩ nʋa'a 'nyinyloli 'yize,
nzɩɩ Lagɔ 'a ngäzɩdlɩkäkʋʋ 'käa tenyii zumanɩ ‑a?
2 N'nn,
ɛ'ɛ ‑bhö sa'a ma 'lɩlɩlɩ.
‑Maa 'nyinylolii a nʋnʋ dɔ'wʋ ‑a 'kä ‑bhɩɛ ‑gäzɩ,
zaa ‑aaa'a ‑kä ‑a 'kä yɩ libho ‑kä.
3‑4 A ‑yi sɛ nɩɩ,
‑a 'wuë,
sɛ wa wɔlʋnyɩɛ 'wlu a‑a yiɛ Zezwii Kliisɩ a ‑nʋä 'zʋ,
‑a 'kɔ 'kwädlɩ 'wʋ ‑glɛɛ,
sɛ'ɛ ‑sɩbhä sɛɛ zɛmö nɩɩ,
‑zlɩ Zezwii 'kunɩɛ ‑lɛ su 'klʋ 'n wa yoo zizaa,
‑a'a bhla'mö a ‑wʋwʋsɛzokwëa,
ma‑a 'kumöä 'gämö 'n a yiɛ 'zizoomö.
‑Maa Kliisɩ a dɩba Lagɔ,
'ɔ 'ghïlinɔ 'kɔdʋʋ 'mö,
sɛ ɔ gälɔɔ 'n ɔ yoo glu ‑sɛɛ,
sɛ ‑bhʋlʋ ‑kpɔ 'la ‑sɩbhä ɔ nyɩanyɩɛ zɩkpalele ‑a 'kä nɩkpalili a sɛ nɛmö.
5 Zaa,
‑a ‑nyɔɔ 'sɔ,
a‑a ‑kä 'gämö 'kunɩɩ,
‑a ‑nyɔɔ 'sɔ,
‑a yi'ɛ 'gämö glu 'wlʋnɩ.
6 Nza n gbää nɩɩ,
dɛɛ ‑aaa a ‑bhlɛ Zezwii 'wʋ ‑glɛɛ,
‑lɛ a 'saa ‑a glɩnɩ a‑a 'wuë,
‑zlɩ Zezwii 'kunɩɛ ‑lɛ su 'klʋʋ,
ɔ ‑nyɩɩ 'sɔ,
'n wa yiɛ 'gämö 'kunɩ,
‑lɛ a dɔ'wʋ,
‑a'a ‑wʋwʋsɛzokwëa 'wuë ma‑a bhɩɛɛ da'a 'yli,
nzɩɩ ‑a tɩa'a 'nyinyloli a göwa glɩnɩ.
7 ‑Ɔ yɛɛ 'kuu,
'nyinyloli 'nɔa'a ‑gömö 'kämanɩ.
8 Sɛ'ɛ n gbää nɩɩ,
‑a ‑nyɛ Kliisɩ 'sɔ,
a‑a ‑yiɛ 'gämö 'kunɩ zaa,
‑a kɩ dlɩ 'wʋ nɩɩ,
‑a ‑nyɔɔ 'sɔ,
‑a yi 'gämö ‑bhölɩnɩ.
9 ‑A 'wuë,
‑a ‑yi sɛ nɩɩ,
Zezwii,
ɔ 'kuä,
Lagɔ ‑sɔɔ glu 'wëë,
ɔ 'naa 'käa'a 'wʋ 'sɔ 'kwädlɩkwädlɩnɩ 'kunɩ,
'kwie 'nɔa'a ‑gömö bhɛnɩ 'lɩlɩlɩ.
10 Zezwii Kliisɩ 'kuä da'aa,
'nyinyloli a za ɔ 'kuä.
‑Sɩkaa a dɔ'wʋ,
Lagɔ a 'yize a za ɔ ‑bhölɩa'aa cuu.
11 Zaa,
a nɩ kɩ dlɩ 'wʋ nɩɩ,
'a sɛ a ‑glɛɛ Zezwii Kliisɩ 'wʋ a za,
'nyinylolii a nʋnʋ dɔ'wʋ,
‑gäzɩ a sɛ a ‑wʋä,
Lagɔ a 'yize a za a ‑bhölɩa'aa.
12 'A kpökpaa,
'ylibhɩɛla a glɩnɩɛ zaa,
a nɩ tɩ 'wʋ nglu,
'nyinyloli nɩ ta ‑gömö 'kämanɩ,
‑li a 'tʋzokwëa 'a kpökpaa yɩbhää,
a nɩ ti nʋ.
13 'A nɩ tɩ 'a kpökpaa yɔwʋ a nɩma 'wʋ 'libhï,
a nɩ ti ‑li a kii 'wuë ‑yɩɩɛ 'mö zlɔnɩ 'mö nʋnɩ.
‑Maa a 'nyɛ anyɩ Lagɔ yowʋ,
abhʋa 'ku a‑a 'wë,
abhʋa ‑bhölɩ a‑a ‑sɩkaa,
a 'nyɛ 'a kpökpaa yɔwʋ a nɩmaa Lagɔ yowʋ,
ɔ 'kɩ 'wʋ 'libhï nzɩɩ a 'kä ‑lii ‑yɩ zlɔnɩɛ 'mö nʋ.
14 Nza n nʋä nɩɩ,
'nyinyloli 'nɩa'a bhɛnɩ yɩ 'kanyɩ ‑gömö 'kämanɩ,
ɛ'ɛ ‑bhö nyɩasɛ,
‑maa gböö mɩɩ 'nanyɩa'a ‑sɩkaa ‑su,
‑maa Lagɔ 'a ngäzɩdlɩkäkʋʋ mʋʋ ‑soanyɩɛ.
‑Aaa'a ‑sɩkaa 'nyinyloli a göwa glɩnɩ
15 Zaa,
n ‑kä sa'a nʋʋ,
sɛ'ɛ yɩ sɛ bhä zɛmö nɩɩ,
Lagɔ 'a Gböö mɩɩ ‑nɩnyɩa'a ‑su,
‑maa 'ɔ ngäzɩdlɩkäkʋʋ mʋʋ ‑sunyɩɛ zaa,
‑a nɩ nʋa'a 'nyinyloli 'yize,
sa'a yɩ sɛ bhä zɛmö ‑a?
N'nn,
ɛ'ɛ ‑bhö sa'a ma 'lɩlɩlɩ.
16 A'bhï a ‑yi sɛ nɩɩ,
‑n ‑kä nɩkpɛ a gïyi glɩnɩɩ,
‑lɛ a nɩkpɛ 'la,
‑n kä ‑n 'kɔ 'klʋkpamö zʋ klɩpaa.
Zaa,
'nyinylolinʋnwɛɛ ‑nyɛ Lagɔ a 'klʋkpamözʋzwɛɛ 'sɔ,
yɩ gla'mö,
‑n kä ‑n 'kä ‑bhlʋ ‑lɛ ‑sɛ.
'Nyinylolinʋnwɛɛ,
mö ‑n ‑kä ‑lɛ ‑sɛɛ,
yli ‑n 'kää bhɩɛ,
Lagɔ a 'klʋkpamözʋzwɛɛ,
mö ‑n ‑kä ‑lɛ ‑sɛɛ,
ɔ 'yila 'klʋ a dɔ'wʋ ‑n yi 'mö zlɔmanɩ.
17 ‑Sɩbhä a za,
n bhälɩ a za Lagɔ tenyii,
ɛ'ɛ ‑bhö nyɩasɛ,
‑maa abhʋaa glɩnɩ a‑a bhla'mö 'nyinylolii a göwaa,
‑sɩkaa a dɔ'wʋ,
Lagɔ 'a ‑tiamö a wɛlɩɩ wa 'nyanyɩɛ,
a yɛ 'a dila 'wuë zɛmö yɩ 'klʋkpamözʋzwɛɛ ‑lɛ ‑sɛ.
18 'Nyinyloli a 'mötɛɛnɔɔ,
wʋ 'nanyɩa'a ‑gömö bhɛnɩ,
‑maa Lagɔ a göwa a glɩnɩa'aa ‑sɩkaa,
'saa zlɔnɩɛ 'möö,
a 'kʋ nʋ.
19 N ‑kaanyɩ göwa 'wʋ pälɩɩ,
nɩkpɛsɛ n bhïlaa,
nzɩɩ a 'kɩa sasɛ 'mö 'nʋ.
Sɛ'ɛ n gbää nɩɩ,
bhla'mö a dɔ'wʋ,
sɛɛ gïyi ‑wʋ'ɛ ɔ 'bhidɩba 'ylii,
‑sɩbhä a libhïä 'a kpökpaa yɔwʋ a nɩma 'wuë 'wʋ,
'n a nʋä ‑lizoku a kii 'wuë.
‑Sɩbhä a za a yɛ Lagɔ a 'klʋkpamösɛwa a 'yize 'zʋ.
‑Sɩkaa a dɔ'wʋ,
a nɩ ‑wʋ göwa a sɛ Lagɔ 'yli,
'saa zlɔnɩɛ 'mö 'kanyɩ ‑su 'tɩɩ,
'a ‑wʋwʋsaa 'wuë 'kä Lagɔsɛ ‑wʋ.
20 Dɛ a glɩnɩ a‑a ‑bhlɛ 'nyinylolii a göwaa,
'saa zlɔnɩɛ 'mö a nʋnʋ dɔ'wʋ,
a gbʋ 'nɩɛ a ‑mä ‑wʋ.
21 ‑Lɛ a 'tɛnyɩ 'la,
'saa a ghlɩnɛɛ bhä 'mö 'nɩ?
‑Lii 'wuë,
a nʋnɩɛ ‑mä,
'zʋ 'wʋ yɩ bhëanyɩa'a ‑sɩkaa.
Ɛ'ɛ ‑bhö nyɩasɛ,
‑maa yɩ nʋnʋwaa,
'wa 'wlusɛnɩdaa ma‑a nɩɩ,
'yli wa bhɩɛɛ.
22 ‑Maa ‑sɩkaa a dɔ'wʋ,
a yɛ 'bhidɩbalolo ghlɩ,
'nyinyloli a libho a'aa'a nʋ,
‑maa Lagɔ a'bhë,
ɔ 'yize mɔɔ glɩnɩɛ a 'bhidɩba cuu,
mɔɔ ‑soanyɩɛ,
mɩɩ kää 'nglɩ,
'a ‑wʋwʋsaa 'wuë,
'n ‑sɩbhä ‑wʋa'aa Lagɔsɛ.
Yɩ 'wuë a 'wlusɛnɩdaa ma‑a nɩɩ,
'pɩwʋ mää 'naa 'kää 'yli bhɩɛ,
‑mä a 'kää ghlɩ.
23 Sɛ'ɛ n gbää nɩɩ,
nɩkpɛ ‑kä 'nyinyloli a libho ‑kää,
'ɔ 'pɛnaa ɔ ghlɩɛ,
ma‑a nɩɩ 'yli ɔ 'kää bhɩɛ 'lɩlɩlɩ.
‑Maa Lagɔ 'a 'fʋ a 'nyɛnyɛlu ɔ nyɛɛ nɩkpaa ‑Alowli Zezwii Kliisɩ a 'nglɩ 'möö,
mʋʋ glɩnɩɛ 'pɩwʋ mää 'naa 'kää 'yli bhɩɛ.