Ghlɔɔmö a ‑nʋa 5

Zezwii Kliisɩ a za ‑a ‑nyɛ Lagɔ 'sɔ ‑a yɛ wamanɩ

‑Sɩbhä a za n gbää nɩɩ,

Lagɔ,

sɛ ‑a 'tɛɛnɔɔ dlɩ a za,

ɔ ‑kanyɩ 'mözlɔnɩwa 'wʋ 'zʋa 'wë.

‑Alowli Zezwii Kliisɩ a za,

‑a ‑nyɔɔ 'sɔ,

‑a yɛ wamanɩ.

2 Kliisɩ mɔɔ kää 'nglɩ 'n Lagɔ yiɛ ‑a'a dlɩ'wʋkänɔɔ a za ‑aa ngäzɩdlɩ 'pä,

'n ‑aa dilaa ‑nyɔlʋä ‑mä ngäzɩdlɩ 'la 'mö.

‑Yɩ kää 'nglɩ 'n 'mäna lɩbhanyɩɛ miɛ nɩɩ,

‑aa dilaa 'tɛɛ 'wʋ nɩɩ,

'ylɩ ‑bhlʋ 'mö,

‑a yi Lagɔ 'a 'ghïlinɔɔ 'ylɩmö.

3 ‑A yi 'zwɩ 'kädɛ a'bhë zi ‑kë,

'mäna lɩbhanyɩ 'yize.

Ɛ'ɛ ‑bhö nyɩasɛ,

‑maa zwɩ 'la mɛɛ 'kää 'nglɩ ‑kä,

‑aa dila 'kä nyɔnʋ ‑mä dlɩ'wʋkänɔɔ 'mö.

4 ‑Mä dlɩ a nyɔlanylʋ 'mö,

‑mä Lagɔ a dlɩ'wʋkänɔ 'yɩnoo 'ylɩmö.

Sɛ ‑a kää Lagɔ dlɩ 'wʋ ‑kä 'ylɩmö yoo,

dlɩ'wʋtɛɛnɔ ‑a ghlɩɛ.

5 Dlɩ'wʋtɛɛnɔɔ 'nɩ nʋ ‑zɩ nɩkpɛ ylʋ.

Ɛ'ɛ ‑bhö nyɩasɛ,

‑maa 'Wugɔmʋʋ 'Wlɩlɩ Lagɔ zʋʋnyɩɛ ‑gömöö,

mɔɔ zʋä ‑mä ‑aa dilaa zɛmö Lagɔ 'a ‑wawʋʋ.

6 Sɛ'ɛ n gbää nɩɩ,

dɛ ‑aaa 'zʋsɛ ‑kä,

Lagɔ,

'n 'ɔ 'tɛnyɩ a ‑tɛnyɩɩ yiɛ ghlɛ,

'n Kliisɩ yiɛ ‑abhʋa 'nyinyolinʋwaa a 'wlumö 'ku.

7 'Lɩlɩlɩ a dɔ'wʋ,

nɩkpɛ yi 'mö zlɔnɩ ‑kë,

wa 'kä 'wʋ nglu wa 'kä ɔ 'wlumö 'ku a dɔ'wʋ,

'mö yɩ 'tɛɛ.

‑Kamä,

nɩkpɛ a ‑mɔɔ nʋä ‑li a ‑li a 'wlumö,

nɩkpɛ ‑mɔmɔɔ bhɛnɩ ɔ 'kä ‑mä dlɩ 'zʋ ɔ 'kä 'ku.

8 ‑Maa Kliisɩ ɔbhlɩ,

‑mä ‑a'a 'nyinylolii 'mö,

‑a ‑wʋ a ‑bhlɛ ‑mä,

'n ɔ yiɛ ‑aa 'wlumö 'ku.

Sɛɛ Lagɔ ‑wanyɩɛ tenyii,

sa'a ‑sɩbhä ɔ tulanɩnyɩɛ ‑sɩbhä 'ylimö.

9 Zezwii Kliisɩ,

'ɔ sɛ ɔ 'kuä da'a 'n 'ɔ dluu yiɛ ‑aa 'wlumö kwlii,

‑sɩbhä ma‑a kää 'nglɩ a‑a yiɛ 'mö zlɔmanɩ Lagɔ a 'yila 'klʋ a dɔ'wʋ.

‑Sɩbhä a za,

‑a ‑yi sɛ nɩɩ,

sɛ yɩ 'nɩa'a 'mö ‑wʋ ‑kë,

Lagɔ 'a ‑zijle 'kädaa,

Zezwii a za,

‑a yea ngli 'pʋ.

10 Sɛ'ɛ n gbää nɩɩ,

dɛ ‑a glɩnɩ a‑a ‑bhlɛ Lagɔ a ‑gblɩwaa,

Lagɔ 'a Yuu ‑bhlʋ ‑kpɔ,

'ɔ 'kwiea a 'nglɩ 'mö,

‑a ‑nyɛ Lagɔ 'sɔ a‑a yiɛ wamanɩ.

‑Maa Zezwii Kliisɩ 'a sɛ ɔ 'kuä da'a ‑aa 'wlumöö,

‑sɩbhä ‑kä zɩ'ɛ 'nglɩ ‑kä,

a‑a ‑nyɛ Lagɔ ‑kä ‑wanɩɩ,

sɛɛ Lagɔ ‑sɔɔɔ glu 'n ɔ ‑bhölɩa'aa 'kwädlɩnɩɩ,

‑sɩbhä yi'ɛ 'nglɩ ‑kä ‑a yi 'pʋ.

11 ‑Abhʋaa ‑nyɛ Lagɔ wamanɩɛ sa'a ‑Alowli Zezwii Kliisɩ a za‑a,

Zezwii mɔɔ kä'ɛɛ 'nglɩ n ‑a tɛkpɔnɩɛ Lagɔ 'mö,

wamanɔ 'la a za.

Adaa ‑nyɛ Kliisɩ 'sɔ a wɛlɩɩ

12 Nɩkpɛ ‑bhlʋ ‑kpöö,

Adaa,

mɔɔ ‑lɛmöä mä'ä 'pɩwʋ 'nyinylolinʋnwɛ.

'Nyinylolinʋnwɛ 'la,

mɛɛ ‑lɛmö'ɛɛ ɛbhlɩ 'kwie.

Ɛ za nɩkpaa 'wuë kuä.

Ɛ'ɛ ‑bhö nyɩasɛ,

‑maa wa 'wuë 'nyinyloli wa nʋä.

13 'Tɛnyɩ 'mö Lagɔ 'nɩ a ‑bhlɛ 'ɔ Gböö Moyizɩ yowʋ 'nyɛɛ,

'nyinyloli a gbʋ 'nɩ a nɩkpa ‑gömö ‑wʋ.

14 ‑Maa ‑sɩbhä yɩ ‑wʋ 'mö,

tɛɛnɩ Adaa 'a 'tɛnyɩɩ 'wʋ ‑këë ‑n 'kä Moyizɩ 'a 'tɛnyɩɩ 'wʋ ghlɛ,

kwiea ma‑a 'kämanɩ a‑a nɩkpa ‑gömö.

Nɩkpa a ‑muë 'nɩ a‑a Adaa a'bhë a saa 'klʋkpamö ‑sɛmö,

'kwie 'kämanɩmuë a ‑gömö.

Adaa,

Zezwii ‑ɔ 'kä a‑a yii,

ɔ ‑dɩdlana ɔ glɩnɩɛ.

15 Adaa 'a 'nyinylolii,

yɩ ‑nyɛ Lagɔ 'a 'fʋ a 'nyɛnyɛluu 'sɔ,

yɩ'ɩɛ ‑bhëgabhëganɩ.

‑Tiamö,

nɩkpɛ ‑bhlʋ ‑kpɔ Adaa,

'ɔ 'klʋkpamösɛsʋʋ mʋʋ ‑lɛmöä nɩkpa 'wuë 'kwie 'wʋ.

‑Maa nɩkpɛ ‑bhlʋ ‑kpɔ Zezwii Kliisɩ,

sɛɛ Lagɔ pää ɔ za nɩkpa 'wuë a ngäzɩ dlɩɩ,

‑sɩbhä 'nɩɛ yɛkanɩyi ‑kä.

16 Sɛ'ɛ n gbää nɩɩ,

Adaa,

'ɔ ‑lizokuu ɔ nʋä,

ɔ 'yize 'mö yɩ 'nɩɛ gbʋ ghïla.

‑Maa mɩɩ kää 'nglɩ 'n 'nyinylolii yiɛ mä'ä 'pɩwʋ zumanɩ tenyii,

'n nɩkpaa 'wuë käa'aa yɩ za gbʋ ‑gömö Lagɔ a 'yila 'klʋ a dɔ'wʋ.

‑Maa Zezwii Kliisɩ,

ɔ 'yize a za,

Lagɔ yi 'wa 'nyinylolii 'kɔkɔmlɛ 'la a gbʋʋ 'yi 'tatinɩ ɔ yuëë 'mözlɔnɩwa 'mö 'wʋ 'libhï.

17 Nɩkpɛ ‑bhlʋ a 'nyinylolii a za 'kwie ‑wʋä nɩkpa 'wuë ‑gömö.

Mɛ 'kä zi'e nɩkpaa 'kɔkɔmlɛ ‑wanyɩɩ dɛ Lagɔ 'pää ngäzɩdlɩ tenyii,

'n ɔ yuëë 'mözlɔnɩwa 'wʋ 'zʋa ‑mä Zezwii Kliisɩ ‑bhlʋ ‑kpɔ 'möö,

mʋa 'naa 'kä bhä 'pɩwʋ mää 'na 'kää 'yli bhɩɛ ghlɩ ‑a?

18 Zaa,

‑sɩbhä ‑a 'yɩɛ da'a 'ylɩmö nɩɩ,

nɩkpɛ ‑bhlʋ,

'ɔ 'nyinylolii,

mɩɩ ‑kää 'nglɩ 'n Lagɔ yiɛ nɩkpa 'wuë gbʋ köbha.

Sɛ ‑bhʋlʋ ‑kpɔ 'la,

'saa zlɔnɩɛ 'mö Lagɔ a 'yila 'klʋ a dɔ'wʋʋ,

nɩkpɛ ‑bhlʋ,

Zezwii Kliisɩ,

‑ɔ nwiɛ a za,

Lagɔ libhïä nɩkpa 'wuë 'mözlɔnɩwa 'mö 'wʋ 'n wa ghlɩɛ ‑tiamö a ‑bhölɩbhölɛ.

19 Nɩkpɛ ‑bhlʋ ‑kpöö,

'ɔ 'klʋkpamösɛsʋʋ,

mʋʋ kää 'nglɩ 'n nɩkpa 'wuë zʋä 'nyinylolinʋwa.

Sɛ ‑bhʋlʋ ‑kpɔ 'la,

‑sɩbhä nɩkpɛ ‑bhlʋ a 'klʋkpamözʋzwɛ,

ɛ kä'ɛ 'nglɩ 'n nɩkpa 'wuë zlɔmanɩɛ 'mö Lagɔ a 'yila 'klʋ.

20 Miɛ da'a,

‑maa Lagɔ,

'ɔ Gböö yiɛ,

sɛɛ 'nyinylolii ‑zuä tenyii 'n ‑sɩbhä yiɛ 'ylɩmö 'yoo.

‑Maa dɛɛ 'nyinylolii zumanɩɛ tenyii 'n yɩ yiɛ 'nyli 'mluu,

Lagɔ 'a ngäzɩdlɩpäpʋʋ,

‑lɛ wʋ zumanɩɛ tenyii tenyii 'n wʋ yiɛ 'wlu 'plɩ.

21 Zaa,

sɛɛ 'nyinylolii a 'mötɛɛnɔɔ 'kämanɩ a‑a 'pɩwʋ ‑gömöö,

'n wʋ yi a‑a kwiea ‑lɛmöö,

‑sɩbhä Lagɔ 'a ngäzɩdlɩpäpʋʋ 'kämanɩɛ 'pɩwʋ ‑gömö 'n wʋ 'zʋanyɩɛ nɩkpa a ‑muë zlɔnɩ 'mö 'wʋ,

nzɩɩ 'pɩwʋ mää 'naa 'kää 'yli bhɩɛ,

‑a 'kä ‑mä ghlɩ.

‑Li 'la 'wuë,

‑Alowli Zezwii Kliisɩ a bɔɔmö a za Lagɔ nyɩanyiɛ.