I puló Malta
28
Kahaweꞌkiꞌ upu-upu i lorena,
hangko kiꞌisá riꞌi puló iti ia miꞌi puló Malta.a
2 Maroꞌa ntepuꞌu laluraꞌ pueꞌ wánuá iti i kaiꞌ.
Ratarimaꞌangkaiꞌ mpakaroꞌa,
rapopatueꞌáꞌangkaiꞌ api kipenenei,
láwiꞌ mantepuꞌu miꞌi keudá hai melengiꞌ.
3 I tempó iti,
Paulu lao mekau hai nawoli i wongko api.
Iaperái mesupaꞌ hambaꞌa lelótó to mobisa hangko i lalu kau,
láwiꞌ maꞌámuꞌ nalálá api.
Lelótó iti motilóꞌ taena.
4 Karaitána pueꞌ wánuá lelótó iti mengkalantió i taena Paulu,
rauliꞌ miꞌi,
“Tauna iti bateꞌna to mepapate!
Peita,
kehapiꞌ tiꞌara molámbiꞌ rugiꞌ i tahiꞌ,
agáiáná Ánitu Topobutusi tiꞌara mopatodáhi tueꞌ!”
5 Agáiáná Paulu mopimpirá peá lelótó iti i lalu api hai tiꞌaranto moapa-apa.
6 Rauliꞌ ripaꞌi pueꞌ wánuá,
ina kámbá miꞌi taena,
ba hangkaꞌ-hangkaꞌ perái ina madungká hai mate.
Marue rapegiá,
mole tiꞌaranto woꞌo mewaliꞌ,
onoꞌ miꞌi haneꞌi tebáliki miꞌi pekiriraꞌ,
hai rauliꞌ,
“Paulu iti hadua ánitu!”
7 Tiꞌara karaoꞌ hangko ionoꞌ,
ara halimboꞌ hinoe.
Hinoe iti,
hinoena Pubiliu,
mágáuꞌ i puló iti.
Ánti kamaroꞌana laluna,
nakióꞌangkaiꞌ lao i támbina,
hai napotorareangkaiꞌ tálu alona kamaruena.
8 I tempó iti,
umána Pubiliu tiꞌara nalalu,
malengiꞌ hai mahái taꞌina.
Onoꞌ haneꞌi lao miꞌi Paulu i lintuꞌna,
mopágá wátána,
napekakaeá,
hai kásáliu nalalu.
9 Hangko onoꞌ,
upu-upu tauna to maduꞌa i puló iti laoheꞌ membiáꞌ tulungi i Paulu,
hai upu-upuheꞌ napakauriꞌ.
10 Ánti pepomahileraꞌ tauna iti,
handaꞌ to rabábehi moádáiangkaiꞌ,
hai i kapohuꞌkiꞌ,
rapoweꞌiangkaiꞌ mampopengaa to kiparaluu.
Hangko i Malta haweꞌ i Roma
11 Tálu miꞌi wulána toroꞌangkaiꞌ i puló Malta,
haneꞌi pohuꞌangkaiꞌ hangko ionoꞌ.
Mengkaheꞌangkaiꞌ i duanga tahiꞌ to hangko i kótá Alesandaria.
Duanga tahiꞌ iti marue miꞌi mengkaroo i puló iti mampegiá kaliuna tempó lengiꞌ.
Hangaꞌna duanga tahiꞌ iti,
“Ánitu Toporopaꞌ”.b
12 Mehupeꞌangkaiꞌ i kótá Sirakusa,
hai hambengiangkaiꞌ tálu alona ionoꞌ.
13 Hangko ionoꞌ,
kipaliliu miꞌi poduangangkiꞌ menánáꞌ haweꞌ i kótá Regiu.
Kahalona,
wui to maroꞌa mewui hangko tándáꞌ i wóiꞌ,
hai kahalona wopiꞌi,
mendáuluangkaiꞌ hangko i duanga tahiꞌ i kótá Putioli i tampoꞌ Italia.
14 Ionoꞌ,
kipohidupaꞌá bahangapa halalu hampepepoináláingkiꞌ.
Rawáwáháꞌangkaiꞌ lao i támbiraꞌ hai rapotorareangkaiꞌ haminggu kamaruena.
Hangko ionoꞌ,
molumaoangkaiꞌ lao i Roma.
15 I tangaꞌ rárá maniangkaiꞌ,
halalu hampepepoináláingkiꞌ to i Roma mohádiheꞌ kaꞌina haweꞌkiꞌ,
onoꞌ miꞌi haneꞌi laoheꞌ medupaꞌ i Pobaluꞌ-baluꞌá Apiu hai i Támbi Pehupeꞌá to Tálu.
I pohidupaꞌkiꞌ iti,
Paulu motóiá Pueꞌ Ala,
hai lindó laluna.
Paulu i Roma
16 Kahaweꞌkiꞌ i Roma,
Paulu rapaliu toroꞌ haduduána i hambuaꞌ támbi,
agáiáná hangaa-ngaa nakámpái oaꞌ hadua surudadoꞌ.
17 Liu miꞌi tálu alona,
Paulu mokióꞌmoheꞌ totosaeraꞌ toIahudiꞌ bona rapohidupaꞌá.
I kahaweꞌraꞌ,
nahángáꞌáheꞌ,
“Halalu-halalu,
tiꞌaranto ara salaꞌkuꞌ i halaluntaꞌ toIahudiꞌ,
hai tiꞌaraꞌaꞌ woꞌo moliungi ádá toioruntaꞌ.
Agáiáná kehapiꞌ noꞌonoꞌ,
rahakaꞌ peaꞌ tadulakoraꞌ toIahudiꞌ i Ierusale hai rahuhuꞌaꞌ i topopárentá toRoma.
18 Kárá-kárángkuꞌ rapáresáꞌ topopárentá Roma,
hai rapoinao peá rakábáháꞌaꞌ,
láwiꞌ tongawaꞌ miꞌi katiꞌárána ara salaꞌkuꞌ to hintotoꞌ rahukuáꞌaꞌ mate.
19 Agáiáná araheꞌ toIahudiꞌ hangko i Ierusale to tiꞌara mampokana kaꞌina rakábáhángkuꞌ,
onoꞌ miꞌi haneꞌi kupembiáꞌ bona kárá-kárángkuꞌ rabuáꞌ i Datu Mahile i Roma,
agáiáná tiꞌara ara tunggáiángkuꞌ mosalaꞌiheꞌ hangka toIahudiꞌkuꞌ.
20 Kukióꞌkou mai mampohidupaꞌáꞌaꞌ láwiꞌ kupoinao kupolaluitaꞌákou kana i Datu Topehómpóꞌ to rapegiá toSáráeliꞌ.
Ratakaꞌaꞌ hai rante deꞌe,
láwiꞌ kupoinálái ntepuꞌu kahaweꞌna miꞌi Datu Topehómpóꞌ iti.”
21 Rahániki toIahudiꞌ iti,
rauliꞌ,
“Tiꞌara ara sura hangko i tadulakontaꞌ i tampoꞌ Iudá mokana i hio.
Hai tiꞌara woꞌo ara hadua tauna hangko ionoꞌ to mai moánti bámbári ba mampolaluita kakadakemu.
22 Kiundeꞌ ntepuꞌu mampehádingi noumbá pepoináláimu iti,
láwiꞌ kiꞌisá iumbá-umbá peá tauna mosapuáka paturoꞌ to nupeuláꞌi.”
23 Roo onoꞌ,
rapakanótó miꞌi toIahudiꞌ tempó kaꞌina hidupaꞌraꞌ wopiꞌi hai Paulu.
Haweꞌ miꞌi tempó to rapakanótó,
handaꞌ ntepuꞌu tauna hirámpu i katoroꞌána Paulu.
Mantepuꞌu mepulo haweꞌ kalumbaꞌ,
Paulu mopahaweꞌáheꞌ kana i popárentána Pueꞌ Ala,
hai mobásá hangko i sura to naukiꞌ Musa hai suraraꞌ nabiꞌ-nabiꞌ,
napakanótóáheꞌ kaheánána Iesu bona mepoináláiheꞌ i Hia.
24 Araheꞌ to mampoinálái laluitana,
araheꞌ woꞌo to tiꞌara mampoinálái.
25 Ánti posisalaꞌna polámbiꞌraꞌ,
onoꞌ miꞌi haneꞌi pohuꞌheꞌ,
agáiáná hangko tiꞌara maniheꞌ mogááꞌ-gááꞌ,
nahángáꞌáꞌáheꞌ Paulu,
“Toꞌu laluitana Inao to Magasaꞌ i toioruntaꞌ hangkoia,
to Napahaweꞌ moliu nabiꞌ Iesaia to manguliꞌ node:
26 Nauliꞌ Pueꞌ Ala:
‘Laomokoꞌ i tauna deꞌe,
nupahaweꞌ node:
Ina nihádi,
agáiáná tiꞌara ina niꞌisá lempóna apa to nihádi.
Ina niꞌita,
agáiáná tiꞌara ina niꞌisá apa to mewaliꞌ,
27 láwiꞌ matuꞌa miꞌi lalumi,
talingami makápá,
hai mátámi bilo.
Ane tiꞌara noꞌonoꞌ,
ina niꞌita hai mátámi,
ina nihádi hai talingami,
hai ina nipakanótó lalumi,
haneꞌikou mesuleꞌ i Kódóꞌ,
bona Kubáliki lalumi.’ ”c (Iesaia 6:9-10)
28 Roo onoꞌ,
nauliꞌ wopiꞌi Paulu i totosaeraꞌ toIahudiꞌ,
“Onoꞌ miꞌi haneꞌi hangaa-ngaa niꞌisá halalu-halalu,
Ngkóráꞌ Marasa mokana i katehómpóꞌ to hangko i Pueꞌ Ala rabámbáriámoheꞌ woꞌo tauna to tiꞌara toIahudiꞌ,
hai hira riꞌi to motarima bámbári iti!” [
29 Karoona Paulu molaluita noꞌonoꞌ,
pohuꞌmoheꞌ toIahudiꞌ hai mombehániꞌ-hániꞌheꞌ oaꞌ mokana i paturoꞌna Paulu.]d