Iesu mopakauriꞌ hadua to paluꞌ
2
Bahangapai alona hangko ionoꞌ,
Iesu mesuleꞌ wopiꞌi lao i wánuá Kapenau.
Tebámbári miꞌi kaꞌárána Iesu i lalu támbi.
2 Onoꞌ miꞌi haneꞌi handaꞌ tauna to haweꞌ,
álána bukeꞌ ntepuꞌuheꞌ i lalu támbi iti.
Mogalo riꞌi babaꞌ támbi iti bukeꞌ woꞌo tauna.
Tempó iti,
Iesu mopahaweꞌáheꞌ ngkóráꞌna Pueꞌ Ala.
3 TangaꞌNa molaluita,
haweꞌmoheꞌ iba tauna mokowaꞌ rángáraꞌ to paluꞌ,
4 agáiáná tiꞌara ara ráráraꞌ lao mohungkuki Iesu láwiꞌ támbi iti bukeꞌ ntepuꞌu tauna.
Onoꞌ miꞌi haneꞌi rapengkáheka lao i atuꞌ támbi,
rahóngká atuꞌna to ara i wongkona Iesu,
haneꞌi topaluꞌ iti raulu noꞌu hante paturuána.
5 Kanaitána Iesu kamaróhóna pepoináláiraꞌ,
Ia molaluita miꞌi i topaluꞌ iti,
Nauliꞌ,
“ÁnáꞌKuꞌ,
teámpungi miꞌi dósámu.”
6 Araheꞌ woꞌo bahangapa guru agama toIahudiꞌ to mehoda i lalu támbi iti,
rauliꞌ i laluraꞌ,
7 “Pebáiꞌ ntepuꞌu tauna deꞌe molaluita noꞌonoꞌ!
Ia mopahibali kuasaꞌNa hai Pueꞌ Ala.
Tiꞌara ara hadua tauna to peisá moámpungi dósá,
bateꞌna peá Pueꞌ Ala.”a
8 Agáiáná naisá miꞌi Iesu apa to ara i laluraꞌ,b
onoꞌ miꞌi haneꞌi Nahángáꞌáheꞌ,
“Moapa riꞌi haneꞌi noꞌonoꞌ riꞌi pekirimi?
9 Umbána to magampaꞌ rauliꞌ i topaluꞌ deꞌe,
‘Teámpungi miꞌi dósámu,’
ba ‘Pearó,
nulóló miꞌi aleꞌmu,
haneꞌi molumaomokoꞌ’.
10 Agáiáná deꞌe-deꞌe ina Kupatongawaꞌákou kaꞌárána kuasaꞌna Ánáꞌ Mánusiác moámpungi dósá i duniáꞌ.”
Hangko ionoꞌ,
molaluita miꞌi Iesu i topaluꞌ iti,
11 Nauliꞌ,
“Mearómokoꞌ!
Nulóló miꞌi aleꞌmu hai mesuleꞌmokoꞌ lao i támbimu!”
12 Mearó mpuꞌu miꞌi topaluꞌ iti,
molóló aleꞌna,
hai molumao lao i rawa i lindoꞌraꞌ tauna to handaꞌ.
Karaitána tauna to handaꞌ apa to pewaliꞌ iti,
tingkáráꞌheꞌ upu-upu hai motóiáheꞌ Pueꞌ Ala,
rauliꞌ,
“Tiꞌara mani hangkani taita to nodeꞌe!”
Iesu mokióꞌ Lewi (Matiu) toperóróꞌ ásele, mewaliꞌ topeguruNa
13 Roo onoꞌ,
lao wopiꞌi Iesu hai topeguruNaheꞌ i wiwi rano Galilea.
Handaꞌ ntepuꞌu tauna haweꞌ i Hia,
hai Napaturoꞌheꞌ.
14 Tangaꞌna Iesu molumao,
Ia moita hadua tauna to rahangaꞌ Lewi ánáꞌna Alapeu.d
Lewi iti mehoda i kantóróna moróróꞌ ásele.e
Nahángáꞌá Iesu,
“Meuláꞌmokoꞌ i Kódóꞌ!”
Kásáliu meángkáꞌ haneꞌi meuláꞌ i Iesu.
15 Roo onoꞌ,
Iesu hai topeguruNa mandeꞌheꞌ i támbina Lewi.
Araheꞌ woꞌo handaꞌ toperóróꞌ ásele hai tauna ntániꞌna to mandeꞌ hingkakani hai hira.
Tauna iti rarekeꞌheꞌ tauna to tiꞌara maroꞌa,
hai handaꞌheꞌ to meuláꞌ i Iesu.
16 Araheꞌ ionoꞌ bahangapa guru agama to mouláꞌ paturoꞌraꞌ toParisi.f
Karaitána guru agama iti Iesu mandeꞌ hingkakani hai tauna to tiꞌara maroꞌa,
mekuneꞌheꞌ i topeguruNa,
rauliꞌ,
“Moapa riꞌi haneꞌi gurumi mandeꞌ hingkakani hai toperóróꞌ ásele hai tauna to tiꞌara maroꞌa?”g
17 Nahádi Iesu pekuneꞌraꞌ iti,
onoꞌ miꞌi haneꞌi Nahángáꞌáheꞌ,
“Tauna to tiꞌara maduꞌa,
tiꞌara paraluu mampeliꞌ sando,
ngkáliꞌna riꞌi tauna to maduꞌa to mampeliꞌ sando.
TiꞌaraꞌAꞌ mai mokióꞌ tauna to mampekiri maroꞌa bábehiáraꞌ,
agáiáná maiAꞌ mokióꞌ tauna to moisá kamadósáraꞌ,
bona menosoꞌheꞌ.”
ToParisi mosalaꞌiheꞌ topeguruna Iesu láwiꞌ tiꞌaraheꞌ mopuasaꞌ
18 Hangkani tempó,
topeguruna Iohane Toperiu hai toParisi tangaꞌraꞌ mopuasaꞌ.
Araheꞌ tauna to lao mekuneꞌ i Iesu,
rauliꞌ,
“Topeguruna Iohane Toperiu pakaheꞌ mopuasaꞌ.
Noꞌonoꞌ woꞌo topegururaꞌ toParisi.
Mewaliꞌ,
moapa riꞌi haneꞌi topeguruMu tiꞌaraheꞌ mopuasaꞌ?”
19 Iesu mohánikiheꞌ moliu ngkóráꞌ pándiriꞌ deꞌe,
Nauliꞌ,
“Tauna to i posusaꞌá petauna,
ba mopuasaꞌheꞌ i tempóna tobaleilo to ratauna ara mani i oloꞌraꞌ?
Tiꞌara.
20 Agáiáná ina haweꞌ tempóna,
tobaleilo to ratauna iti ina raꞌala hangko i oloꞌraꞌ.
I tempó iti riꞌi hangko ina mopuasaꞌraheꞌ.”h
Paturoꞌ to woꞌu tiꞌara peisá ragalo hai paturoꞌ to sae
21 Roo onoꞌ,
Iesu mopahaweꞌ wopiꞌi ngkóráꞌ pándiriꞌ to rompákáꞌ,
Nauliꞌ,
“Tiꞌara ara hadua tauna to motámpelei badu to sae hai báná to woꞌu,
láwiꞌ báná to woꞌu iti ina mengkuruꞌ duuꞌna mohepaꞌ badu to sae iti,
álána mantámbái riꞌi kamahepaꞌna.
22 Noꞌonoꞌ woꞌo,
tiꞌara ara tauna to mokándó anggoroꞌ to woꞌu i pemboliái to sae láwiꞌ matuꞌa miꞌi.
Anggoroꞌ to woꞌu ina háwóá duuꞌna mahepaꞌ pemboliá to sae iti hai ina mabubu anggoroꞌna.
Mewaliꞌ,
anggoroꞌ to woꞌu hangaa-ngaa rakándó i pemboliá to woꞌu.”j
ToParisi mosalaꞌiheꞌ topeguruna Iesu láwiꞌ mobágóꞌheꞌ i alo penómbáꞌá
23 Hangkani tempó i alo penómbáꞌá,
Iesu hai topeguruNa melempóheꞌ i hamboloꞌ hinoe.
Tangaꞌraꞌ moliu i hinoe iti,
topeguruNa mopudókiheꞌ wuaꞌ bailoꞌ hai raꞌandeꞌ.
24 ToParisi to ara ionoꞌ mekuneꞌheꞌ i Iesu,
rauliꞌ,
“Moapa riꞌi haneꞌi topeguruMu moliungiheꞌ áturá ágámántaꞌ?
Mobágóꞌheꞌ i alo penómbáꞌá,
láwiꞌ mopudókiheꞌ wuaꞌ bailoꞌ!”k
25 Nauliꞌ Iesu,
“Tiꞌara paꞌi nibásá i Ngkóráꞌna Pueꞌ apa to rabábehi Datu Daudiꞌ hai rángánaheꞌ hangkoia i tempóraꞌ marimi?l
26 I tempóna Abiata mewaliꞌ Tadulako Menómbá Mahile,
mesuaꞌ miꞌi Daudiꞌ i lalu bambaruꞌ penómbáꞌá,
haneꞌi mandeꞌ rótiꞌ to rapopenómbá i Pueꞌ Ala,m
haneꞌi nagáláꞌ-gáláꞌáheꞌ woꞌo rángána.
Mouláꞌ ádá ágámántaꞌ,
tadulako-takulako menómbá peá to peisá moandeꞌ rótiꞌ iti,
{agáiáná kehapiꞌ noꞌonoꞌ,
bábehiána Daudiꞌ iti tiꞌara rasalaꞌi}.”
27 Hangko ionoꞌ,
nauliꞌ wopiꞌi Iesu,
“Pueꞌ Ala tiꞌara mopaꞌara alo penómbáꞌá bona mopakapári tauna {hai áturá-áturá to matimi},
ngkáliꞌna riꞌi Napaꞌara alo penómbáꞌá bona motulungi tauna.n
28 Mewaliꞌ Ánáꞌ Mánusiá makuasaꞌ mopakanótó apa to peisá rabábehi i alo penómbáꞌá.”o