Yasuu'a tooyat hooy yakiya
16
1 Tusabti har'ii,
Maryam Majdaleenaawwa,
Maryam Yaaguubiit tuundeewwa,
Saaloomaatwa Yasuu'i kehii iid'ani jillaay alyaat shakwiint dilba ahaa iifiin.
2 Tehadti umb'i fajir tuuyin talawaa tiidihoob,
bataah umiimashii dehaay eeyaan.
3 Usalaliib bataah <<W'awi ibidhdhigil aab dehoon gwanshiish?>>
taktakee dehaay imsiyoodaayna.
4 Idwilni eeyaanihoob,
w'awi ibidhdhigil umiimashii kwaaleela rhiyaan.
5 Oodi tehooy shuumiyaan.
Gaalhoob umaygwadii dehaay adhami oor eera halaak akwaay s'ee rhiyaan.
Taam'a irkwiin.
6 Been oodoor w'oor bateeyooh dehaay,
<<Baarikwiina!
Yasuu'a Annaasiraay usallabamiyaab tehariwna.
Baruuh tooy kiiyhaay,
yakiya!
Bariiyooh umiimash shibibna.
Oon oomhiin astoobsaa iifi shibibna.
7 Laakiin bataak giigaana,
tikwiriyaatoohwa Butrooswa <Baruuh suurookna Jaliili hadiit giigiya eefi.
Beentooy rhi tiyadna,
beet toona suur sooyi hookna.>
diina!>>
idi.
8 Umiimashii fooree ifir'ana,
winneet mirkwaayii katatiyaana aree ajjabsiyaan.
Mikwaayii gaal han naat sooyaat kiikeen.
9 Yasuu'a tehad fajir yakiyanihoob,
been asarama jin hooy fir'aa iifiyeet Maryam Magdaleenaay dehaay lawiya.
10 Batuuh giigtaayt y'araweeh winneet gadaba waawiin soota.
11 Yasuu'a dhhanii rhitaneet toona dehaay hadiidta.
Laakiin baraah een ibhali haay aamanaab kiikeen.
12 Malya Yasuu'a maloob tikwiriyaatii hay'aat weenaatii umingaayiib dehaay lawiya.
13 Aan baraah y'agarniit eeraw sooyaaneek han aamanaab kiikeen.
Yasuu'a tikwiriyaatii dehaay lawiya
14 Malya Yasuu'a tikwiriya itamna gwir dehaay lawiya.
Baraah been oodoor m'ariit tamiina.
Yasuu'a bareeh winneet imooyaay,
<<Shalik iimaaniibaana,
akra girmaayaana,
oodehay aneeb uyaki har'ii rhiyaab aamanaab kitteena.
15 Oodehay kassooh beena,
usakana udaayiib sooyaana!
16 Uutak aamaniit itoomiis iidhhan indi,
aamanaab baakaay aree ituurib indi.
17 Y'aamaneen alaamaat dehaay laween.
Aniib oosmii eejin ifar'ana,
gayi bhali hadiideen.
18 Baraah ikwakwara y'ayeesooh y'abikna.
Sim gw'eeneek han naat kiiweer.
Y'ayeeh oodehay oolhaanaay kehii daaseeneek isin'iirna.>>
idi.
Yasuu'a teebiri y'agar