Mhay duurana
18
01 Tuuyiin nab'at tiiktiyi door,
Ibraahiim Maamar yhindi eegwidaana geeb,
ugawiyooh suurii s'ee Ukwaasana dehaay lawiya.
02 Ibraahiim asa ishbibihoob mhay da dawil mhiin ingadiin rhiya.
Eenda rhiyanihoob,
udheefaay yakiyaayt bareeh y'ashish.
Baruuh eenda suurii ingad whaashiib n'ati kuuramiya.
03 Ibraahiim <<Anaa Seednaay,
ukishiyaayook baahasama!
04 Ani yam haay y'atookna,
malya baraak iragadaayeekna tishagwidhna,
oon whindi whii fiinteena.
05 M'ariit tamteeneet haay y'atookna,
daayiib gabiit iibaabteena.
Oont'a baraak ukishiyaayookna dehaay y'aabaana.>>
idi.
Baraah <<Winneet daayiitu!
Baruuk tindiyeet toona daayiib tikwikwa.>>
idiin.
06 Aflaay Ibraahiim willa oogaw shuumiyaayt Saaraay dehaay,
<<Ashshigii!
Mhay abaar y'iini b'uuk yaksii,
hathikiit hadhiib shagaamii!>>
idi.
07 Malyaab ish'aayeeh ookiik willa dhaabiyaayt lagaab winneet dhhaab hooy waasiya.
Ulaga ishiishboobi kishiyaab gaal waliikiya.
08 Malya baruuh y'amnaayeeh hamiit aatwa,
aat l'aatwa lagaayt shaat takwaaytwa yhii.
Baraah tamiinihoob,
baruuh whindi whii bareeyooh dar ingid.
09 Baraah <<Tutakatuuk Saara naad teefi?>>
idiiniit raatiyaan.
Baruuh <<Beentooy,
ugawiib teefi.>>
idi.
10 Y'iibaabkinaayeeb gaal <<Whawil t'a yiiniib oon oodoor agari y'aa hook andi.
Been oodoor Saara tutakatuuk oor ifaar tindi.>>
idi.
Saara bariiyooh har'ii tiifi,
ugawi yafiib s'aa ibhali tisnaakir.
11 Ibraahiimwa Saaraabwa shaawti eegrimaaba,
Saara uufraay hooy hasamiya,
had'aaniit shaawti tifiirt kitti.
12 Oont'a Saara ugarooyyooh akraab tifaayidaayt,
<<Oont'a ani eegrimt afarriit kaaki,
utaki han had'aaniibu,
teen tifirha d'amsi andi?>>
tidi.
13 Malya W'ankwana Ibraahiimii dehaay,
<<Saara naanhooy tifaayid teefi?
<Ani t'a eegrimt akatiyeek sidik oor iid'a andi?>
tidii teefi.>>
idi.
14 Ukwaasanaay deha akraana teefi han?
Oodoor isuur waadiyaayaneeb whawil t'a y'iiniib dehookna it'igir andi,
Saara beenhoob oor ifaar tindi.
15 Saara tirkwi,
masi tigwaasir <<Ani faaydaat kaaki.>>
tidi.
Baruuh laakiin <<Awooh,
tifaayidi.>>
idi.
1 Ibraahiim Sadoomee dehaay siileeliya
16 Aanda giigtiib imarnihoob,
Sadoom n'ati ishbibna.
Ibraahiim han imooraam geeb hiireeriya.
17 Malya W'ankwana ugarooyooh deha,
<<Ani iid'a andiyeet toona Ibraahiim sooyi andi.
18 Ibraahiim sidik gwidaabwa akra dehaywa iikti indi,
kassaah yhash aree bariisooh baarakami iyadna.
19 Barooh ani waasaabu.
Baruuh han oofraayoohwa indhiwaayeehwa bariiyooh har'ii aniib usalal mityaayi indi.
Baraah oosdikwa tudaayiinaay shagaameen ikatiin.
W'ankwana han Ibraahiimi geeb id'iyeeb ugalad iikwasi indi.>>
idi.
20 Malya W'ankwana <<Ibraahiim,
Sadoomwa Gamooraaywa uudehay kastooh tumaagnaay shagaameen diyee amaasiw.
21 Ani hoogi andi,
baraah sidik maagt shagaameeneeb biikaayneeb iishibib andi.
Sidik biikaayeek aree ani akteen.>>
idi.
22 Aanda Sadoom beeti itarna.
Ibraahiim laakiin W'ankwanaay geeb imhi.
23 Ibraahiim bariiyooh dehaay idwil eeyaayt,
<<W'ankwanaay,
baruuk oodehay ooshiboob w'amaagnaay geeb kwidhsi tindiya han?
24 Ay tamuun dehay shiboot shagaameen tumadiinaatiib eefeeneek kak iiwari tindiya?
Een han toomaag shagaameen udehayi geeb kwidhsi tindiya han hooy waasi tindiya?
25 Awooh toon toona baruuk iikwasi kitdiya,
oodehay ooshiboob oomaagnaay geeb idaar kitdiya.
Toobuuti gaadiiwwa tudaayiinaay sakiiniibwa barookwa.>>
idi.
26 Ukwaasana <<Ay tamuun dehay shiboot daayeen tumadiina Sadoom hooy amarriyeek,
oomhiin kassooh bareeyooh jillaay ishidhhin andi.>>
idi.
27 Masi Ibraahiim hadiidiya,
<<Ani naati kina kaaki oon ifathfath t'iiteebi.
W'ankwanaayu baruuk afooyaheeb,
afreeb sakanaayt bak hadiidan.
28 Uudehay uushibu tumadiinaatiib eefeeb fadhig tamuunwa ayib ikatiineek,
tumadiina kastooh kwidhsi tindiya han?>>
idi.
W'ankwana <<Fadhig tamuunwa ayib daayi dehay tumadiinaatiib amarriyeek,
tumadiina kastooh kwidhsi kaadi.>>
idi.
29 Ibraahiim shaawti bhaliiya,
<<Fadhig tamuun aabhat tumadiina hooy eefeeneek aree?>>
idi.
Baruuh <<Ifadhig tamuuni jillaay een han iiwari kaadi.>>
idi.
30 Malya Ibraahiim <<W'ankwanaay baahasaaya,
ani bhaliitiib aharriiw.
Mhay tamuun aabhat hooy itmariineek aree naan iikati tindi?>>
idi.
Baruuh <<Mhay tamuun hooy eefeeneek,
een han iiwari kaadi.>>
idi.
31 Ibraahiim aree <<Ani barook bak araataniyee dehaay whaggiib kaabari,
laakiin tagwuugw dehay eebhat hooy marriyeek naan iiwari tindiya?>>
idi.
Baruuh <<Itagwuugwi jillaay een han kwidhsi kaadi.>>
idi.
32 Ibraahiim masi <<Ukwaasana baahasaaya,
laakiin ani oont'a gaal door bhaliiya andi.
Tamin beentooy itmariineek naan iikati tindi?>>
idi.
Baruuh <<Itamni jillaay tumadiina kwidhsi kaadi.>>
idi.
33 W'ankwana Ibraahiim infaraadiit har'ii giigiya.
Ibraahiim han ugawooh beeti y'agar.