Gbre wáraga bɨ
Pétero
eké ní
Ledre gɨ ro gbre bụ́kụ bɨ Pétero ní
Pétero eké ledre ba zɨ́ ngíti géyị ꞌyị ga bɨ ꞌbɨ Kɨ́résịto ní gɨ zɨ́a ówo go kɨ́dí nɨyí go ógụ úfu née ꞌdíya. Ili úku zɨ́ ꞌyị ga bɨ ꞌbɨ Kɨ́résịto ní idínɨ́ kpá fú ndị́sị méngị ledre ga bɨ nɨ óto Lomo zɨ́a ídíne kɨ́ rokinyi ní. Uku zɨ́ye kɨ́dí ledre ga bɨ yée kɨ́ ngíti géyị ꞌyị e yée owoyemenɨ́ gɨ zɨ́ Kɨ́résịto zɨ́ye ꞌdódo a zɨ́ye ní, ndanɨ́ ótoómo a wá. Zɨ́a énzị komoyé kɨ́dí idínɨ́ bándá royé gɨ zɨ́a ngíti géyị ꞌyị ṛánga olụ́nɨ́ go sɨmɨ kanị́sa káa bɨ nɨyí londo yée ke. ꞌYị ṛanga ga gére née ndịsịnɨ́ lóndo ꞌyị e zɨ́ye ndị́sịyé méngị bɨsinyí ledre, kpá káa bɨ nɨyí óto komoyé gɨ ro ledre mɨndáꞌbaógụ Kɨ́résịto karanée ke. Pétero ya zɨ́ye ní, maꞌdíi Kɨ́résịto nɨ ndáꞌbaógụ zɨ́ Lomo sínyiónzó kuṛú do sogo káṇgá ba zɨ́a nda ótoógụ mɨkánda a bɨ lúyú ledre ndaá lolụ sɨmɨ a wá ní.