Wáraga zɨ́ ꞌyị ga bɨ
Ébere
ní
Ledre gɨ ro bụ́kụ bɨ Ébere ní
ꞌYị bɨ eké bụ́kụ bɨ Ébere ba ꞌyị ówo a ndaá. Tɨ́ lá nɨ mɨówoné bɨlámáne ngíti manda ꞌbɨ ꞌyị ga bɨ ꞌbɨ Kɨ́résịto ní, sɨmɨ sịndị́ kadra máa née nɨ kɨ́ rokoꞌbụ zɨ́ne sɨmɨ kanị́sa eké ledre née ne zɨ́ ꞌyị ga bɨ sɨmɨ kanị́sa ní. Née sịndị́ kadra bɨ kóo Páwulo ndịsị éké ledre e kɨ́ kása yée sɨmɨ kanị́sa e ní. ꞌYị née eké bụ́kụ ba zɨ́ ngíti géyị Yụ́da ga bɨ ṇguṇgunɨ́ ledre Kɨ́résịto go, ngíti géyị ꞌyị e nɨyí go ndị́sị lóndo yée gɨ ro zɨ́ye ótoómo ledre Yésụ bɨ ṇguṇgunɨ́ ní.
Bụ́kụ ba uku ledre kɨ́ngaya zɨ́ ꞌyị ga bɨ ṇguṇgunɨ́ ledre Yésụ go ní kɨ́dí Yésụ nɨ ꞌyị bɨ kɨ́ ledrené owóowó zɨ́ ꞌyị ga bɨ ṇguṇgunɨ́ ledre ené go ní. Uku kpá kɨ́dí Yésụ nɨ Owụ́ ꞌbɨ Lomo, rokoꞌbụ ené romo do rokoꞌbụ maláyika ga bɨ Yụ́da e ndịsịnɨ́ ṇgúṇgu ledreyé ní. Rokoꞌbụ Yésụ romo do rokoꞌbụ nébị ga kóo ꞌdesị́ ní, romo kpá do rokoꞌbụ Mụ́sa bɨ iꞌbíogụ lorụ ga bɨ ꞌbɨ Lomo zɨ́ Yụ́da e ní. Uku kpá kɨ́dí ledre Yésụ owó romo do ꞌyị ꞌdáná éyị́ ga bɨ ꞌbɨ Yụ́da e ní mbá gɨ zɨ́a luyú ené ledre kú wá, zɨ́a íꞌbí roné káa do mbigí éyị́ ꞌdáná gɨ ro lúyú ledre ꞌbɨ ꞌyịmaꞌdí e za mbá kɨ́ꞌdí kéṛị́ za fí.
Bụ́kụ ba uku odụ ledre kɨ́dí mɨngburoko bulúndu Yụ́da ga kóo ꞌdesị́ bɨ ledre gɨ royé nɨ mɨékéne sɨmɨ kuṛú lorụ ꞌbɨ Lomo ní, ótonɨ́ kóo Lomo zɨ́a ídíne kɨ́ rokinyi gɨ zɨ́a bɨ ṇguṇgunɨ́ ledre ené ní. Kɨ́dí ꞌyị ga bɨ ꞌbɨ Kɨ́résịto ní idínɨ́ kpá fú ndị́sị ṇgúṇgu ledre ꞌbɨ Lomo ndanɨ́ ótoómo lị́gị ledre ga bɨ Yésụ mengị yée ní kɨ́ yée ga bɨ ndịsị ꞌdódo a ní wá.