TIRERU ITASE
TE YOHANU U YORUA
Tɔbiribu
1 Gɑyusi, wunɛ wi nɑ kĩ kɑ gem, nɛ wi nɑ sɑ̃ɑ Yesun yigbɛ guro guro, nɛnɑ nɑ nun tɔburɑ.
2 Nɛn kĩnɑsi nɑ kɑnɑmɔ ɑ n kuurɑmɔ gɑ̃ɑnu bɑɑnire sɔɔ, kpɑ wunɛn wɑsi yi n bwɑ̃ɑ do nge mɛ wunɛn hunde yɑ sɑ̃ɑ. 3 Nɛn nukurɑ dorɑ too too sɑnɑm mɛ nɑɑnɛ dokeobu gɑbɑ nɑ, mɑ bɑ seedɑ di nge mɛ gem mu wɑ̃ɑ wunɛ sɔɔ, kɑ nge mɛ ɑ sĩimɔ gem mɛ sɔɔ. 4 Nuku dobu gɑbu sɑri bi bu kere n nɔ nɛn bibɑ sĩimɔ gem sɔɔ.
Wɑɑsu kowobun
dɑm koosiɑbu
5 Nɛn kĩnɑsi, nɑɑnɛ dokeon komɑ ɑ mɔ̀ sɑnɑm mɛ ɑ nɑɑnɛ dokeobu nɔɔrimɔ, n ku mɑm ko be bɑ sɑ̃ɑ sɔbu. 6 Bɑ wunɛn kĩrun seedɑ dimɔ Yesun yigbɛrun wuswɑɑɔ. A de ɑ n dɑ bu kusenu kue ben sɑnum sɔɔ nge mɛ n weenɛ Gusunɔgii u ko. 7 Domi Yinnin yĩsirun sɔ̃nɑ bɑ doonɑ, bɑ ǹ gɑ̃ɑnu mwɛ nɑɑnɛ doke sɑrirugibun mi. 8 Yen sɔ̃, bɛsɛrɑ n weenɛ su tɔn ben bweseru somi, kpɑ bɛsɛn tii sɑ n bɔnu mɔ kɑ be, gem kpɑrɑbu sɔɔ.
Diotɛfu kɑ Demɛtiru
9 Nɑ Yesun yigbɛru tire piibu gɑgu yoruɑ, ɑdɑmɑ Diotɛfu, wi u kĩ u n sɑ̃ɑ ben gbiikoo u ǹ nɛn gɑri wure. 10 Yen sɔ̃nɑ nɑ̀ n nɑ, kon gere dɑɑ ye u mɔ̀ u kɑ sun gɑri kɔ̃si mɑnimɔ. N ǹ ye tɔnɑ, u ku rɑ mɑɑ nɑɑnɛ dokeobu dɑm koosie. Be bɑ mɑɑ kĩ bu bu dɑm koosiɑ, u rɑ bu yinɑriwɑ, kpɑ u bu girɑ sɑɑ Yesun yigbɛrun di.
11 Nɛn kĩnɑsi ɑ ku kom kɔ̃sum sɑɑri mɑ n kun mɔ kom gem. Wi u geɑ mɔ̀ u sɑ̃ɑwɑ Gusunɔgii, ɑdɑmɑ wi u kɔ̃sɑ mɔ̀ u ǹ Gusunɔ yɛ̃wɑ.
12 Demɛtiru u seedɑ geɑ mɔ bɑɑwure kpuron mi, kɑ mɑɑ gem tiin wuswɑɑɔ. Bɛsɛn tii sɑ nùn seedɑ diiyɑmmɛ, ɑ mɑɑ yɛ̃ mɑ bɛsɛn seedɑ sɑ̃ɑwɑ gem.
Tɔbiri dɑ̃ɑkibu
13 Nɑ gɑ̃ɑ dɑbinu mɔ n kɑ nun yoruɑ, ɑdɑmɑ nɑ ǹ kĩ n ni kpuro yore tireru sɔɔ. 14 Nɑ yĩiyɔ sɑ ko wɑɑnɑ ǹ n sosi, kpɑ su gɑri ko nɔɔ kɑ nɔɔ.
15 Alɑfiɑ yɑ n wɑ̃ɑ kɑ wunɛ.
Wunɛn bɔrɔbɑ kpuro bɑ nun tɔburɑ. A mɑɑ mɑn bɛsɛn bɔrɔbɑ tɔbirio tiɑ tiɑ._