TIRERU YIRUSE
TE YOHANU U YORUA
Tɔbiribu
1 Kurɔ wunɛ\f |bYoh II, 1 kurɔ wunɛ|d - Dɑbiru bɑ nɛɛ, Yesun yigbɛru gɑrɑ bɑ kɑ yɑ̃ mini, te bɑ sokɑ kurɔ kɑ win bibu.\F, nɛ wi nɑ sɑ̃ɑ Yesun yigbɛ guro guro, nɑ nun tɔburɑ, wunɛ wi Gusunɔ u gɔsɑ kɑ wunɛn bibu be nɑ kĩ gem sɔɔ. N ǹ mɔ nɛ tɔnɑ nɑ bu kĩ, kɑ be bɑ gem giɑ kpurowɑ, 2 yèn sɔ̃ gem mɛ, mu wɑ̃ɑ bɛsɛn gɔ̃ruɔ, mu ko n mɑɑ kɑ sun wɑ̃ɑ sere kɑ bɑɑdommɑ.
3 Gusunɔ Bɑɑbɑ, kɑ Yesu Kirisi win Bii bu sun durom, kɑ wɔnwɔndu kuɑ, kpɑ bu sun ɑlɑfiɑ wɛ̃ kĩru kɑ gem sɔɔ.
Gem kɑ kĩru
4 Nɛn nukurɑ dorɑ gem gem ye nɑ wɑ wunɛn bibu gɑbɑ sĩimɔ gem sɔɔ nge mɛ Gusunɔ Bɑɑbɑ sun yiire. 5 Tɛ̃, kurɔ wunɛ, ye nɑ nun yoruɑmmɛ, yɑ ǹ sɑ̃ɑ woodɑ kpɑɑ, yɑ sɑ̃ɑwɑ ye sɑ mɔ toren di. Nɑ nun kɑnɑmɔ, su de su kĩɑnɑ. 6 Kĩru tɑ sɑ̃ɑwɑ Gusunɔn woodɑn mɛm nɔɔbu. Yeyɑ woodɑ ye i nuɑ sɑɑ toren di, yè sɔɔ n weenɛ i n sĩimɔ.
7 Dɑbirɑ bɑ yɑrinɛ hɑnduniɑ sɔɔ bɑ tɔmbu swɑɑ nim wiɑmɔ. Bɑ ǹ wure mɑ Yesu Kirisi u nɑ hɑnduniɑ sɔɔ u kuɑ tɔnu. Wi u sɑ̃ɑ nge mɛ, wiyɑ swɑɑ nim wio kɑ Kirisin yibɛrɛ. 8 I tii lɑɑkɑri koowo, kpɑ i ku bɛsɛn sɔmburun ɑre kɔ̃, i de i ten ɑrufɑɑni wɑ.
9 Bɑɑwure wi u ǹ yɔ̃re Kirisin sɔ̃ɔsiru sɔɔ, mɑ u tu sɑrɑri, u ǹ Gusunɔ mɔ. Adɑmɑ wi u yɔ̃ te sɔɔ, u Bɑɑbɑ kɑ mɑɑ Bii mɔ. 10 Goo ù n nɑ bɛɛn mi, mɑ n kun kɑ Kirisin sɔ̃ɔsi te, i ku yɛ̃ro dɑm koosiɑ, i ku mɑɑ nùn domɑru kuɑ. 11 Domi wi u nùn yen gɑɑ kuɑ, u bɔnu mɔ win kom kɔ̃sum sɔɔ.
Gɑri dɑ̃ɑki
12 Bɑɑ mɛ nɑ gɑ̃ɑ dɑbinu mɔ n bɛɛ yoruɑ, nɑ ǹ kĩ n ni kpuro yore tireru sɔɔ. Adɑmɑ nɑ yĩiyɔ n bɛɛ berɑm nɑ, kpɑ n kɑ bɛɛ gɑri ko nɔɔ kɑ nɔɔ kpɑ bɛsɛn nuku dobu bu kɑ yibu.
13 Wunɛn wɔnɔ wi Gusunɔ u mɑɑ gɔsɑ, win bibɑ nun tɔburɑ._