Ye yɑ Isirelibɑ kɑrɑnɛ
kɑ Gusunɔ
59
1 I tɑmɑɑ Gusunɔ kun dɑm mɔwɑ
u kɑ bɛɛ fɑɑbɑ ko?
I tɑmɑɑ u ǹ swɑɑ mɔ u kɑ bɛɛn gɑri nɔ?
2 Aɑwo, n ǹ mɛ.
I n yɛ̃ mɑ bɛɛn tiin durum sɔ̃nɑ i kɑrɑnɛ kɑ wi.
Bɛɛn torɑnun sɔ̃nɑ u bɛɛ biru kisi,
mɑ yɑ derɑ u ǹ mɑɑ bɛɛn gere swɑɑ dɑki.
3 Bɛɛn nɔmɑ yɑ yɛm yibɑ, domi i tɔmbu go.
Weesu kɑ gɑri kɔ̃siyɑ yi yɑrimɔ bɛɛn nɔsun di.
4 Weesɑ i rɑ n kɑ bɛɛn berusebu siribu sokumɔ.
Bɛɛn goo ku rɑ kɑ gem siribu de.
Seedɑ weesugiɑ sɔɔrɑ i rɑ n tɑ̃sɑ siri yeru mi.
Kɔ̃sɑ i rɑ bwisiku kpɑ i kom kɔ̃sum ko.
5-6 Bɛɛn himbɑ yɑ sɑ̃ɑwɑ gɑ̃ɑ kɔ̃sunu
nge wɑɑn sɛ̃ɑ.
Bɑ̀ n ye kɔrɑ,
surɔkɔrɑ tɑ rɑ yɑnde yɑri min di.
Wi u ye di u ko n gbimɔwɑ.
Bɛɛn bwisikunu nu sɑ̃ɑwɑ nge nɑrɑn wɛ̃ɛ yi yɑ tɑrimɔ.
N ǹ mɔ yi wɑ̃ɑ yi kɑ gɑ̃ɑ geenu ko,
nge bekuru te tɔnu koo wukiri,
mɑ n kun mɔ yi kɑ gɑ̃ɑnu yinɑ mwɑ.
Nge mɛyɑ bɛɛn nɔmɑ yɑ sɑ̃ɑ,
yɑ wɑ̃ɑwɑ yu kɑ kɔ̃sɑ ko.
7 I rɑ n sɛndewɑ i kɑ kɔ̃sɑ ko,
kpɑ i n nɑɑsu sɑ̃u i kɑ tɔnun yɛm yɑri kɑm.
I rɑ n bwisikumɔwɑ i kɑ tɔmbu kɔ̃sɑ kuɑ,
kpɑ i n tɔmbu dɑm dɔremɔ
i n ben yɑ̃nu gurɑmɔ mi i duɑ kpuro.
8 I ǹ ɑlɑfiɑn swɑɑ yɛ̃.
Bɛɛn sɑnu sɑnusu ku rɑ mɑɑ gem swĩi,
sere swɛɛ yi yi ǹ dɛnde.
Wi u gesi bɛɛn swɛɛ yi mwɑ kpuro,
u ku rɑ bɔri yɛndu wɑ.
Isirelibɑ bɑ ben durum
tuubɑ mɔ̀
9 Isirelibɑ bɑ nɛɛ, bɛsɛn torɑnun sɔ̃nɑ
wunɛ Yinni Gusunɔn fɑɑbɑ yɑ tɛɛmɔ
yèn nɔɔ mwɛɛru ɑ sun kuɑ.
Sɑ yɑm bururɑm mɑrɑ,
ɑdɑmɑ yɑm wɔ̃kuru sɔɔrɑ sɑ sĩimɔ kɑ tɛ̃.
Sɑ mɑrɑ sɔ̃ɔ u yɑri,
ɑdɑmɑ yɑm mu tĩriwɑ sere kɑ gisɔ.
10 Sɑ sĩimɔ sɑ bɑ̃ɑrimɔ
nge wɔ̃ko wi u gɑnɑ bɑbi.
Mɑ sɑ sokikirɑmɔ sɔ̃ɔ sɔɔ
nge wi u wɑ̃ɑ yɑm wɔ̃kuru sɔɔ.
Bɑɑ mɛ sɑ bwɑ̃ɑ do,
bɛsɛ kɑ gonu sɑ kuɑ tiɑ.
11 Sɑ gbɑ̃rɑmɔ nge yɑɑ gɔbɑ,
mɑ sɑ sumɔ nge kpɑrukonu.
Yinni Gusunɔ, sɑ mɑrɑ ɑ sun yɑkiɑ,
ɑdɑmɑ wunɛn fɑɑbɑ yɑ kɑ sun tondɑ.
N ǹ koore su ye wɑ.
12 Domi bɛsɛn torɑnu kpɛ̃ɑ wunɛn wuswɑɑɔ,
mɑ bɛsɛn durum yɑ bɛsɛn dɑɑ sɔ̃ɔsimɔ.
Sɑ bɛsɛn torɑnu yɛ̃ ni nu sun wɑ̃ɑsi.
13 Sɑ kuɑ tɑɑrɛgibu kɑ nɑɑnɛ sɑrirugibu
wunɛ Yinni Gusunɔn mi.
Sɑ nun deri wunɛ wi ɑ sɑ̃ɑ bɛsɛn Yinni,
mɑ sɑ nun seesi,
sɑ tɔmbu dɑm dɔre.
Bwisiku weesuginɑ nu rɑ n yibɑ bɛsɛn gɔ̃rusɔ.
14 Yerɑ n derɑ gem kun kɑ mɑɑ wɑ̃ɑ bɛsɛn suunu sɔɔ,
mɑ fɑɑbɑ yɑ kɑ sun tondɑ.
Gem mu ku rɑ mɑɑ sɔ̃ɔsire mi tɔmbɑ mɛnnɛ.
Sɑ rɑ mu tɛɛsiwɑ.
15 Gem mu kpɑ.
Wi u mɑɑ kɔ̃sɑ suurimɔ
bɑ rɑ nùn wɔriwɑ bu win yɑ̃nu gurɑ.
Yinni Gusunɔ
u koo tɔmbu sɛɛyɑsiɑ
Ye Yinni Gusunɔ u wɑ mɑ gem kun mɑɑ wɑ̃ɑ,
yɑ ǹ kɑ nùn nɑɑwɛ.
16 Mɑ u biti kuɑ, yèn sɔ̃ goo kun yen gɑri mɔ̀.
Yen sɔ̃nɑ win tii u gɔ̃ru doke u win dɑm sɔ̃ɔsi.
Mɑ u tɑ̃sɑ win gem sɔɔ,
17 u mu sebuɑ nge tɑrɑkpe,
mɑ u fɑɑbɑ doke wirɔ nge sii furɔ kɔkɔru.
U mɔru kɔsiɑbu sebuɑ nge yɑberu,
mɑ u tii nisinu wukiri nge gurumusuru.
18 U koo bɑɑwure siri
nge mɛ̀n nɔɔ win kookoosu nɛ,
kpɑ u kɑ win yibɛrɛbɑ mɔru ko,
bɑɑ be bɑ kɑ nùn tomɑ,
19 kpɑ bu win yĩsiru nɑsiɑ
kpɑ win yiiko yu sɔ̃ɔsirɑ
sɑɑ sɔ̃ɔ yɑri yerun di
n kɑ dɑ sɔ̃ɔ duu yerɔ.
Sɑnɑm mɛ yibɛrɛbɑ bɑ koo nɑ nge dɑɑ bɑkɑrun nim,
Yinni Gusunɔn Hunde u koo bu girɑ bu doonɑ.
20 Fɑɑbɑ kowo u koo nɑ Yerusɑlɛmun sɔ̃,
kɑ sere mɑɑ Isirelibɑ be bɑ gɔ̃ru gɔsiɑn sɔ̃.
Yinni Gusunɔwɑ u yeni geruɑ.
21 U mɑɑ nɛɛ, win ɑrukɑwɑni wee, ye u kɑ bu bɔkumɔ. Win Hunde u ko n wɑ̃ɑwɑ be sɔɔ, kpɑ u win gɑri doke ben nɔsɔ. Yin gɛɛ kun doonɔ ben nɔsun di, sere n kɑ dɑ ben bibun bibun nɔsɔ, sɑɑ tɛ̃n di sere kɑ bɑɑdommɑɔ. Wi, Yinni Gusunɔwɑ u yeni geruɑ.