Gusunɔ kɑ Bɑbilonin bũu
46
1 Bũu wi bɑ mɔ̀ Bɛli, win dɑm kpeemɔ.
Wi bɑ mɑɑ mɔ̀ Nɛbo, u ǹ mɑɑ do.
Bɑ rɑ rɑɑ nu sɑ̃,
ɑdɑmɑ tɛ̃, nu kuɑ kubɑ ni yɑɑ sɑbenu sɔɔwɑ.
Yɑɑ sɑbe ni, nu mɑɑ wɑsirɑ sɔmu nin sɔ̃.
2 Wee Bɛli kɑ Nɛbo bɑ wɔrukɑ
bɑ dɑm kpɑ sɑnnu sɑnnu.
Bɑ kpɑnɑ bu ben bwɑ̃ɑrokunu fɑɑbɑ ko.
Mɑ yibɛrɛbɑ bɑ nu gurɑ bɑ kɑ doonɑ.
3 Adɑmɑ i mɑn swɑɑ dɑkio,
bɛɛ Isirelibɑ, bɛɛ be i tie,
bɛɛ be nɑ nɛni nɑ nɔɔrimɔ sɑɑ bɛɛn mɑrubun di.
4 Nɑ ǹ kɔsimɔ sere kɑ bɛɛn tɔkɔrɔ.
Ko nɑ n bɛɛ nɔɔrimɔwɑ bɑɑ ì n seri bururɑ.
Ko nɑ n bɛɛ kɔ̃suwɑ.
Nɑ rɑɑ bɛɛ nɔɔri, kon mɑɑ wure n ye ko.
Kpɑ n bɛɛ kɔ̃su n bɛɛ fɑɑbɑ ko.
5 Wɑrɑ i ko kɑ mɑn sweenɑ,
kpɑ i nùn ko nɛn sɑɑrɑ.
Wɑrɑ mɑɑ sɑ̃ɑ nge nɛ. Bũu?
6 Wee bɑ rɑ wurɑ yɑre ben bɔɔrun di,
kpɑ bu sii geesu yĩire kilo sɔɔ,
bu ye kpuro seko wɛ̃ u kɑ bu bwɑ̃ɑroku kuɑ
ge bɑ koo yiirɑ bu sɑ̃.
7 Bɑ̀ n gu seru sɔndi bɑ kɑ dɑ
bɑ yi mi gɑ ko n wɑ̃ɑ,
gɑ ku rɑ kesi gen yii yerun di.
Bɑ̀ n nɔɔgiru suɑ bɑ gu sokɑ,
gɑ ku rɑ wure.
Gɑ ku rɑ mɑɑ bu yɑre nɔni swɑ̃ɑrun di.
Fɑɑbɑ kun mɑɑ tomɑ
8 Bɛɛ durumgibu, i yenibɑ kpuro bwisikuo,
kpɑ i lɑɑkɑri ko ye nɑ kuɑ.
9 I yɑɑyo ye yɑ rɑɑ koorɑ yellu.
Domi nɛnɑ Gusunɔ.
Goo mɑɑ sɑri nge nɛ.
10 Nɑ geruɑ yellun di ye yɑ koo koorɑ.
Nɑ nɛɛ, nɛn himbɑ ye nɑ yi, yɑ koo koorɑ.
Kon mɑɑ nɛn kĩru kpuro yibiɑ.
11 Nɛnɑ nɑ durɔ goo sokɑ
sɑɑ sɔ̃ɔ yɑri yerun di mi n tomɑ.
U koo nɑ nge kɑsɑ u nɛn himbɑ yibiɑ.
Ye nɑ geruɑ, kon ye ko.
Himbɑ ye nɑ yi, kon mɑɑ ye yibiɑ.
12 Tɛ̃ i mɑn swɑɑ dɑkio,
bɛɛ bèn gɔ̃ru gɑ bɔɔbu,
mɑ i tɑmɑɑ nɛn fɑɑbɑ yɑ tomɑ.
13 Kon Yerusɑlɛmu fɑɑbɑ ko,
kpɑ n de Isirelibɑ bu bɛɛrɛ wɑ mi.
Ye wee, yɑ turuku kuɑ,
yɑ ǹ mɑɑ tomɑ.
Yɑ ǹ tɛɛmɔ yu kɑ nɑ.