Yoobun tɛ̃n wɑ̃ɑru
30
1 Tɛ̃ wee bibu bɑ mɑn yɛ̃ɛmɔ,
bɑ ǹ mɑm nɛn tɔkɔru gɑrɑ,
be, bèn bɑɑbɑbɑ bɑ ǹ turɑ
bu nɛn bɔ̃nu somi bu kɑ nɛn yɑ̃ɑ gɔ̃ɔ kpɑrɑ.
2 Mbɑ bɑ koo rɑɑ kpĩ bu mɑn kuɑ,
be, be bɑ sɑ̃ɑre bɑ gɔɔ dɔɔ.
3 Wee bɑ sɑ̃ɑru kɑ gɔ̃ɔru soore.
Bɑ dɑ gbɑburɔ bu kɑ dĩɑnu kɑsu bu di.
Adɑmɑ gɑ̃ɑnu sɑri mi.
4 Bɑ rɑ dewɑ dɑ̃ɑ kikun bɔkuɔ bu yɑkɔ burɑ ge gɑ bɔru mɔ gɑ n sɑ̃ɑ ben dĩɑnu,
kpɑ bɑ n kiku gɑgun gbini dimɔ.
5 Bɑ rɑ bu girewɑ tɔmbun suunu sɔɔn di,
bɑ n bu nɑɑ swĩi nge gbɛnɔbu.
6 Kpɑ bu dɑ bɑ n wɑ̃ɑ kpee wɔrusɔ kɑ wɔwi sɔɔ,
7 bɑ n wɑ̃ɑ bɑ n tɑɑsinɛ sɑ̃kin suunu sɔɔ,
kpɑ bɑ n kuuki mɔ̀ kikisɔ,
8 bɑ n sɑ̃ɑre nge wiirobu,
ǹ kun mɛ nge be bɑ gɛmɑ bɑ girɑ wuun di.
9 Tɛ̃ wee, ben bibɑ bɑ mɑn yɛ̃ɛmɔ,
bɑ mɑn womusu dokemɔ.
10 Bɑ rɑ mɑn biru kisi yèn sɔ̃ bɑ ǹ kĩ bu mɑn wɑ.
Kpɑ bu mɑn yɑ̃ɑtɑm sie.
11 Domi Gusunɔ u mɑn funɛ wunɑ, u sekuru doke.
Yen sɔ̃nɑ ben goo kun nɛn bɛɛrɛ yɛ̃ bɑɑ fiiko.
12 Tɔn kɔ̃so be, bɑ mɑn seesimɔ.
Bɑ kɑsu bu mɑn tɛ̃kɑ di bu surɑ.
Bɑ swɑɑ kɑsuwɑ bu kɑ mɑn kɑm koosiɑ.
13 Bɑ nɛn swɛɛ bɔɔrɑ.
Bɑ kookɑri mɔ̀ bu kɑ mɑn kɑm koosiɑ,
be, be goo kun somiru wee.
14 Be wee bɑ yɑbɑ mi nɑ kukuɑ.
Mɑ bɑ dumɔ min di bɑ mɑn wɔrimɔ.
15 Mɑ bɛrum mɑn mwɑ,
nɛn bɛɛrɛ yɑ doonɑ nge woo.
Nɛn bɔri yɛndɑ doonɑ nge guru wiru.
16 Tɛ̃, nɑ wɑ̃ɑwɑ gɔɔ sɔɔ.
Nɑ wɑhɑlɑ wɔri nɑ kpɑ.
17 Nɛn kukunu kpuro rɑ n tennɑmɔwɑ wɔ̃kuru.
Nɑ ku rɑ wɛ̃re wɑhɑlɑ yen sɔ̃.
18 Yɑ mɑn sɛ̃ke bɑɑmɑ kɑ dɑm nge yɑberun wĩiru.
19 Wee Gusunɔ u mɑn kpɛ̃ɛ pɔtɔkɔ sɔɔ.
Torom kɑ tuɑ nɑ kɑ weenɛ.
20 Gusunɔ nɛn Yinni, nɑ nun somiru kɑnɑmɔ,
ɑdɑmɑ ɑ ǹ mɑn wisɑ.
Nɑ seewɑ nɑ yɔ̃rɑ wunɛn wuswɑɑɔ ɑdɑmɑ ɑ ǹ nɛn lɑɑkɑri kue.
21 A sɛ̃siɑwɑ,
mɑ ɑ mɑn sɛ̃re kɑ wunɛn dɑm bɑkɑm.
22 Wee ɑ derɑ woo gunɑ yɑ mɑn suɑ yɑ toorimɔ.
23 Domi nɑ yɛ̃ mɑ ɑ kɑ mɑn dɔɔwɑ gɔribun wɑ̃ɑ yerɔ
mi tɔmbu kpuro bɑ koo dɑ.
24 Adɑmɑ kɑ mɛ, bɑɑ tɔnu ù n gɔɔ dɔɔ,
u ǹ nɔmɑ suɑmɔ u fɑɑbɑ kɑnɑ?
Wi u wɑ̃ɑ wɑhɑlɑ sɔɔ u ǹ somiru kɑnɑmɔ?
25 Nɑ ǹ bu swĩiyɛ be wɑ̃ɑrɑ sɛ̃sie?
Nɑ ǹ nuki sɑnkire sɑ̃ɑrobun sɔ̃?
26 Wee nuku dobɑ nɑ rɑ n yĩiyɔ,
ɑdɑmɑ nɔni swɑ̃ɑrɑ nɑ wɑɑmɔ.
Yɑm bururɑmɑ nɑ rɑ n yĩiyɔ,
ɑdɑmɑ yɑm wɔ̃kurɑ nɑ wɑɑmɔ.
27 Nɛn bwɛ̃rɑ ku rɑ kpunɛ
yèn sɔ̃ nɑ kɑ wɑhɑlɑ gɑbirinɑmɔ.
28 Nɑ rɑ n sĩimɔwɑ nuku sɑnkirɑru sɔɔ.
N sɑ̃ɑre sɔ̃ɔ ku rɑ yɑri nɛn mi.
Bɑɑ nɑ̀ n wɑ̃ɑ tɔn wɔru sɔɔ,
nɑ rɑ n somiru kɑnɑmɔwɑ.
29 Nɛn gɔɔ wuri yin sɔ̃,
nɑ kuɑ nge gbeeku bɔ̃ɔ,
ǹ kun mɛ nge tɑɑtɑɑru.
30 Nɛn gɔnɑ tĩrɑ, nɛn wɑsi gberɑmɔ.
31 Tɛ̃ nɛn mɔrɔku gɑ wɑ̃ɑwɑ n kɑ gɔɔ wuri ko.
Kpɑ n nɛn guuru so kɑ be bɑ gɔɔ wuri mɔ̀ sɑnnu.