Gusunɔ u koo toro nùn win torɑrun ɑre wɛ̃
8
1 Bilidɑ Suɑgii u gɑri geruɑ u nɛɛ,
2 sere sɑɑ yerɑ̀ kɑɑ gɑri sɑɑri nini mɑri.
Wunɛn gɑri yi, yi dɑm mɔ nge woo bɔkɔ.
3 A tɑmɑɑ Gusunɔ Dɑm kpurogii u rɑ gem gɔsie weesu?
4 A n yɛ̃ mɑ wunɛn bibu bɑ Gusunɔ torɑriwɑ,
yen sɔ̃nɑ u bu ten ɑre wɛ̃.
5 Adɑmɑ wunɛ, ɑ̀ n Gusunɔ Dɑm kpurogii kɑsu,
mɑ ɑ win durom bikiɑ,
6 mɑ u ǹ tɑɑrɛ gɑɑ wɑ wunɛ sɔɔ,
sɑɑ yerɑ u koo nun nɔɔri,
kpɑ u nun nuku dobu wesiɑ nge mɛ wunɛn gem mu nɛ.
7 Kpɑ wunɛn tɛ̃n wɑ̃ɑru tu wɛ̃rɑ
tu yellugiru kerɑ.
8 Tɛ̃, ɑ bikio be bɑ sun gbiiyen mi,
kpɑ ɑ lɑɑkɑri ko ɑ wɑ wɑhɑlɑ ye ben sikɑdobɑ bɑ kuɑ.
9 Bɛsɛ, sɑ sɑ̃ɑwɑ be bɑ mɑrɑ gin tee te, sɑ ǹ gɑ̃ɑnu yɛ̃.
Bɛsɛn wɑ̃ɑru tɑ sɑ̃ɑwɑ nge sɑɑru hɑnduniɑ yeni sɔɔ.
10 Adɑmɑ ɑ de bu nun keu ko.
Kpɑ ɑ swɑɑ dɑki ye bɑ koo nun sɔ̃.
11 Gbĩi yi koo kpi mi dɑɑrɑ kun wɑ̃ɑ?
Nɑɑ yɑri yi koo kpi mi nim sɑri?
12 Yì n nim biɑ, bɑɑ bɑ̀ kun yi bure
yi rɑ gberewɑ fuuku n kere yɑkɑ si su tie.
13 Nge mɛyɑ be bɑ Gusunɔ duɑri bɑ koo ko,
kpɑ tɔn kɔ̃sobun yĩiyɔbu bu kɑm ko.
14 Ben yĩiyɔbu bu koo nɔru ko,
kpɑ yè sɔɔ bɑ tɑ̃sɑ yu ko nge nɑrɑn wɛ̃ɛ.
15 Bɑ̀ n ben dirun gɑnɑ nɛnuɑ, yɑ koo diiriwɑ.
Bɑ̀ n ye tɑ̃sɑ, kpɑ yu wɔri.
16 Bɑ ko n sɑ̃ɑwɑ nge dɑ̃ɑ beku te tɑ yɔ̃ sɔ̃ɔ sɔɔ,
mɑ ten kɑ̃ɑsi tɛriɑ mi bɑ tu duurɑ.
17 Tɑ rɑ ten gbini gire kpenun sɔɔwɔ,
kpɑ gbini yi, yi bɔsu yi wɑ ye n wɑ̃ɑ mi.
18 Bɑ̀ n tu wukɑ min di,
kpɑ yɑm mi, mu tu siki mu nɛɛ, mu ǹ dɑɑ tu yɛ̃.
19 Kpɑ gɑru tu kpi ten ɑyerɔ.
Nge mɛyɑ tɔn kɔ̃sobun nuku dobu bu ko n sɑ̃ɑ.
20 Gusunɔ u ku rɑ gemgii biru kisi.
Mɛyɑ u ku rɑ mɑɑ tɔn kɔ̃so somi.
21 U koo de ɑ yɛ̃ɛri,
kpɑ ɑ nuku dobun kuuki ko.
22 Wunɛn yibɛrɛbɑ bɑ koo sekuru wɑ,
kpɑ tɔn kɔ̃sobun yɛnu gu gbi.