Nɛɛmi u tɑki kpeesiɑ
5
1 Sɔ̃ɔ teeru, Yuubɑn tɔn durɔbu kɑ ben tɔn kurɔbu bɑ kɑ begibu gɑbu mɔru mɔ̀. 2 Gɑbɑ gerumɔ bɑ mɔ̀, bɛsɛ kɑ bɛsɛn bibu, sɑ dɑbi. Yen sɔ̃, sɑ ɑlikɑmɑn bukɑtɑ mɔ ye sɑ ko di sɑ n kɑ wɑ̃ɑ. 3 Gɑbɑ mɑɑ gerumɔ bɑ mɔ̀, sɑ bɛsɛn gbeɑ kɑ bɛsɛn resɛm gbɑɑnu kɑ mɑm bɛsɛn diɑ tɔrubɑ yiimɔ su kɑ ɑlikɑmɑ wɑ gɔ̃ɔrun sɑɑ. 4 Gɑbɑ mɑɑ gerumɔ bɑ mɔ̀ sɑ gobi bɔkurɑwɑ bɛsɛn gbeɑn dĩɑnu sɔɔ su kɑ wɑ su Bɑbilonin sinɑ bokon wɔ̃ɔ gobi kɔsiɑ. 5 Adɑmɑ bɛsɛ kpuro sɑ sɑ̃ɑwɑ bwese teeru. Bɛsɛn bibu kɑ ben bibu tiɑ yerɑ. Adɑmɑ bɑ sun tilɑsi mɔ̀ su kɑ bɛsɛn bibu yoru kpɛ̃ɛ. Bɛsɛn bii wɔndiɑ dɑbiru tɑ mɑm wɑ̃ɑ yoo te sɔɔ kɔ. Sɑ ǹ mɑɑ kpɛ̃ su gɑ̃ɑnu ko domi wee bɑ bɛsɛn gbeɑ kɑ bɛsɛn resɛm gbɑɑnu tɔrubɑ mwɑ.
6 Sɑnɑm mɛ nɑ ye kpuro nuɑ, kɑ tɔn ben weewee ni bɑ mɔ̀, yerɑ mɔru mɑn mwɑ gem gem. 7 Mɑ nɑ gɔ̃ru doke n bukuro be, kɑ siri kowo be gerusi. Mɑ nɑ be kpuro sokusiɑ bɑ mɛnnɑ. Nɑ bu bikiɑ nɑ nɛɛ, ɑmɔnɑ i kɑ bɛɛn mɛro bisibu gɑ̃ɑnu bɔkurɑmɔ i nim dokemɔ. 8 Mɑ nɑ bu sɔ̃ɔwɑ nɑ nɛɛ, sɑ bɛɛn mɛro bisi be bɑ tii tɔn tukobu dɔre yɑkiɑ kɑ dɑm mɛ sɑ mɔ. Yerɑ bɛɛn tii i mɑɑ bu dɔrɑmɔ bɛɛn tii tiinɛ sɔɔ?
Mɑ bɑ mɑri bɑ ǹ mɑɑ gɑ̃ɑnu wisɑ. 9 Nɑ mɑɑ wure nɑ nɛɛ, ye i mɔ̀ mi, yɑ ǹ wɑ̃. Yɑ weenɛ i n Gusunɔ nɑsie, kpɑ bwese tukunu nu ku sun wɔmɛ. 10 Nɛn tii kɑ nɛn tundo bisibu kɑ nɛn sɔm kowobu sɑ tɔn be gobi kɑ ɑlikɑmɑ bɔkurɑ. Adɑmɑ su bu ye kpuro deriɑ. 11 Ǹ n mɛn nɑ, i doo sɑɑ gisɔn di i ben gbeɑ kɑ ben resɛm gbɑɑnu kɑ ben diɑ ye i tɔrubɑ mwɑ wesiɑ. Kpɑ i mɑɑ ɑre yin tii bu wesiɑ yi i bu mwɑɑri gobi yi i bu bɔkurɑ sɔɔ kɑ ɑlikɑmɑ sɔɔ kɑ tɑm sɔɔ kɑ sere mɑɑ gum sɔɔ.
12 Mɑ bɑ mɑn wisɑ bɑ nɛɛ, sɑ ko ye wesiɑ. Sɑ ǹ mɑɑ bu gɑ̃ɑnu mwɑɑrimɔ. Sɑ ko kowɑ nge mɛ ɑ geruɑ.
N deemɑ nɑ yɑ̃ku kowobu sokusiɑ. Ben wuswɑɑɔrɑ bɑ nɔɔ mwɛɛ ni kuɑ kɑ bɔ̃ri. 13 Yen biru nɑ nɛn yɑberu nɛnuɑ nɑ kpɑrɑ mɑ nɑ nɛɛ, wi u kun win nɔɔ mwɛɛru yibie, Gusunɔ u yɛ̃ro kpɑro nge mɛsum kpɑ u yɛ̃ro yɑrɑ win yɛnun di. U de yɛ̃ron dukiɑ yu doonɑ kpɑ u yɔ̃rɑ nɔm dirɑ.
Mɑ be kpuro bɑ wurɑ bɑ nɛɛ, ɑmi, n yɛ̃ro koowo mɛsum.
Mɑ be kpuro bɑ Yinni Gusunɔ siɑrɑ. Yen biru bɑ ben nɔɔ mwɛɛ ni yibiɑ.
14 Sɑɑ sinɑ boko Aɑtɑsɛsin bɑndun wɔ̃ɔ yɛndun diyɑ u mɑn kuɑ Yudɑbɑn kpɑro sere n kɑ girɑri win bɑndun wɔ̃ɔ tɛnɑ kɑ yiru. N kuɑwɑ mi wɔ̃ɔ wɔkurɑ yiru. Sɑɑ ye kpuro sɔɔ, nɛ kɑ nɛn mɛro bisibu sɑ ǹ tem yɛ̃rorun gɑ̃ɑnu mwɑɑre. 15 Adɑmɑ n sere tunumɑ mi, kpɑro be bɑ rɑɑ wɑ̃ɑ mi, bɑ rɑ tɔmbu wɔ̃ɔ gobi burewɑ n kpɑ̃ kpɑ bu bu dĩɑnu mwɑɑri kɑ tɑm kɑ sere mɑɑ sii geesun gobi weeru. Yen biru, ben sɔm kowobu bɑ rɑ n tɔmbu dɑm dɔremɔwɑ. Adɑmɑ nɛ, nɑ ǹ kue mɛ, yèn sɔ̃ nɑ Gusunɔ nɑsie. 16 Bɛsɛn tiiwɑ sɑ sɔmburu kuɑ sɑ kɑ gbɑ̃rɑ te sɔnwɑ. Sɑ ǹ mɑɑ gberu gɑru dwɑ bɛsɛn tiin sɔ̃. Nɛn sɔm kowobu kpurowɑ bɑ kɑ mɑn sɔmbu te kuɑ. 17 Kɑ mɛ, Yuubɑ kɑ ben wirugibu be bɑ rɑ di nɛn yɛnuɔ, bɑ sɑ̃ɑwɑ wunɑɑ weeru kɑ wɔkuru kɑ sere mɑɑ sɔɔ be sɑ rɑ wɑ tem tukum di. 18 Tɔ̃ɔ bɑɑtere nɑɑ nɑ rɑ de bu go kɑ yɑ̃ɑnu nɔɔbɑ tiɑ ni nu geɑ sɑ̃ɑ kɑ sere mɑɑ gue. Yen biru sɔ̃ɔ wɔkuru kɑ sɔ̃ɔ wɔkurɑ, bɑ rɑ kɑ mɑn tɑm nɑɑwɛ. Kɑ mɛ, ye kpuro sɔɔ, nɑ ǹ tɔmbu tem yɛ̃rorun gɑ̃ɑnu bikiɑre. Domi ben ye bɑ mɔ̀ yɑ kpɑ̃ kɔ.
19 Yinni Gusunɔ, ɑ mɑn yɑɑyo ye nɑ tɔn be kuɑn sɔ̃, kpɑ ɑ kɑ mɑn nɔnu geu mɛɛri.