Nɑtɑni
u Dɑfidi nùn win tɑɑrɛ sɔ̃ɔsi
12
1 Yen biru Yinni Gusunɔ u Nɑtɑni gɔrɑ Dɑfidin mi. Ye u turɑ, mɑ u nùn sɔ̃ɔwɑ u nɛɛ, tɔmbu yiru gɑbɑ bɑ wɑ̃ɑ wuu teu sɔɔ. Turo sɑ̃ɑ gobigii. Turo mɑɑ sɑ̃ɑ sɑ̃ɑro. 2 Ben wi u sɑ̃ɑ gobigii mi, u yɑ̃ɑnu kɑ kɛtɛbɑ mɔ dɑbi dɑbinu. 3 Adɑmɑ sɑ̃ɑro wi, u ǹ gɑ̃ɑnu gɑnu mɔ mɑ n kun mɔ yɑ̃ɑ niu piibu gɑgu ge u dwɑ. U gu nɔɔrimɔ mɑ gɑ kpɛ̃ɑmɔ kɑ win bibu sɑnnu. Dĩɑ ni durɔ wi, u rɑ di, niyɑ u rɑ yɑ̃ɑ buu ge wɛ̃. Kɑɑ te u rɑ kɑ nim nɔ, terɑ u rɑ mɑɑ kɑ gu nim kɛ̃. Kpɑ gɑ n kpĩ win tororu wɔllɔ. U yɑ̃ɑ buu ge mɛɛrɑwɑ nge win bii wɔndiɑ. 4 Sɔ̃ɔ teeru gobigii wi, u sɔɔ wɑ. Ye u kĩ u nùn yɑɑrɛ ko, yerɑ u ǹ wɑ win sɑbe dɑbi te sɔɔ, ye u koo wunɑ u go sere sɑ̃ɑro win yɑ̃ɑ buu teu ge. Gerɑ u mwɑ u kɑ win sɔɔ yɑɑrɛ kuɑ.
5-6 Ye Dɑfidi u gɑri yi nuɑ u kpɑ, yerɑ win mɔru seewɑ gem gem ye durɔ wi, u kuɑ min sɔ̃. Mɑ u Nɑtɑni sɔ̃ɔwɑ u nɛɛ, sere kɑ Yinni Gusunɔn wɑ̃ɑru, n weenɛwɑ durɔ wi, u yɑ̃ɑ buu gen sɑkɑ nnɛ kɔsiɑ kpɑ bu durɔ win tii go. Domi u ǹ sɑ̃ɑro win wɔnwɔndu kue.
7 Mɑ Nɑtɑni u Dɑfidi sɔ̃ɔwɑ u nɛɛ, wunɑ ɑ sɑ̃ɑ nge durɔ wi. Tɛ̃ wee ye Gusunɔ Isirelibɑn Yinni u geruɑ. U nɛɛ, u nun bɑndun gum tɑ̃re ɑ kɑ kuɑ Isirelibɑn sunɔ. Mɑ u nun wɔrɑ Sɔɔlun nɔmɑn di. 8 Yen biru u nun wunɛn yinni Sɔɔlun yɛnu wɛ̃ kɑ win kurɔbu kɑ sere mɑɑ Isirelibɑ kɑ Yudɑbɑn bweseru. Ù kun yɛ̃ mɑ yeni yɑ turɑ u n dɑɑ nun sosie. 9 Ǹ n mɛn nɑ, mbɑn sɔ̃nɑ ɑ win gɑri ɑtɑfiiru kuɑ ɑ kɑ kuɑ ye n sɑ̃ɑ kɔ̃sɑ win nɔni sɔɔ. A derɑ Amɔnibɑ bɑ Uri Hɛti wi go kɑ tɑkobi, mɑ ɑ win kurɔ suɑ ɑ tii koosi. 10 Yen sɔ̃, tɑbu kun mɑɑ kpeemɔ wunɛn yɛnuɔ, domi ɑ nùn gɛmɑ mɑ ɑ Uri Hɛtin kurɔ wɔrɑ ɑ kuɑ wunɛgii. 11 U kpɑm nun sɔ̃ɔmɔ mɑ u koo de kɔ̃sɑ gɑɑ yu se wunɛn bweseru sɔɔn di yu nun deemɑ. Yerɑ u koo de wunɛn bweserun goo u wunɛn kurɔbu suɑ u kɑ kpunɑ wunɛn wuswɑɑɔ sɔ̃ɔ sɔɔ gbɑ̃ɑrɑ. 12 Wunɛ ɑ rɑɑ kɑ Urin kurɔ kpunɑwɑ gbɛnum, ɑdɑmɑ u koo de yɛ̃ro wi, u kɑ wunɛgibu kpunɑ Isirelibɑ kpuron wuswɑɑɔ sɔ̃ɔ sɔɔ.
13 Mɑ Dɑfidi u Nɑtɑni sɔ̃ɔwɑ u nɛɛ, nɛn torɑ te, tɑ kpɑ̃ te nɑ Yinni Gusunɔ kuɑ.
Nɑtɑni u nùn wisɑ u nɛɛ, Yinni Gusunɔ u mɑɑ nun wunɛn durum suuru kuɑ. A ǹ mɑɑ gbimɔ. 14 Adɑmɑ ye ɑ kuɑ mi, yɑ derɑ Yinni Gusunɔn yibɛrɛbɑ bɑ win yĩsiru gɑri kɑm gerusi. Yen sɔ̃, u koo de bii wi kurɔ wi, u kɑ nun mɑrɑ mi, u gbi. 15 Ye Nɑtɑni u gɑri yi geruɑ u kpɑ, u gɔsirɑ u dɑ win yɛnuɔ.
Dɑfidin biin gɔɔ
Yen biru Yinni Gusunɔ u derɑ bii wi Dɑfidi u kɑ Urin kurɔ Bɑti Sebɑ mɑrɑ u bɑrɑ gem gem. 16 Yerɑ Dɑfidi u Gusunɔ kɑnɑru wɔri u nɔɔ bɔkuɑ bii win sɔ̃. Mɑ u duɑ dirɔ u kpunɑ temɔ wɔ̃ku giriru. 17 Win bwɑ̃ɑbun guro gurobu bɑ nùn suuru kɑnɑ u kɑ se tem sɔɔn di, ɑdɑmɑ u yinɑ. Mɛyɑ u mɑɑ yinɑ u gɑ̃ɑnu di. 18 Ye n kuɑ sɔ̃ɔ nɔɔbɑ yiruse, yerɑ bii wi, u gu. Mɑ Dɑfidin bwɑ̃ɑ be, bɑ bɛrum bɑrɑ bu nùn sɔ̃. Domi bɑ nɛɛ, u ǹ sun swɑɑ dɑki nuku sɑnkirɑnun sɔ̃ sɑnɑm mɛ bii wi, u bɑrɔ. Amɔnɑ sɑ ko koosinɑ tɛ̃ su kɑ nùn bii win gɔɔ sɔ̃ kpɑ sɑ kun kɑ win nuki sɑnkɑ sɑ sosi. 19 Sɑnɑm mɛ Dɑfidi u wɑ win bwɑ̃ɑbu bɑ gunnu gunnu gɑri mɔ̀, u giɑ mɑ bii wi, u guwɑ. Mɑ u bu bikiɑ u nɛɛ, bii wi, u guwɑ?
Bɑ nùn wisɑ bɑ nɛɛ, oo, u gu.
20 Sɑɑ yerɑ Dɑfidi u seewɑ tem di u dɑ u woburɑ u win yɑ̃nu kɔsɑ, mɑ u tii turɑre yɛ̃kɑ u dɑ Yinni Gusunɔn sɑ̃ɑ yerɔ u nùn sɑ̃wɑ. Yen biru u gɔsirɑmɑ yɛnuɔ u dĩɑnu bikiɑ. Mɑ bɑ nùn wɛ̃ u di. 21 Mɑ win bwɑ̃ɑbu bɑ nùn bikiɑ bɑ nɛɛ, yinni, mbɑ wunɛn kookoo sin tubusiɑnu. Domi sɑnɑm mɛ bii wi, u wɑsi, ɑ nɔɔ bɔkuɑ mɑ ɑ swĩ. Adɑmɑ tɛ̃ ye u gu, mɑ ɑ seewɑ ɑ di.
22 U bu wisɑ u nɛɛ, sɑɑ ye bii wi, u wɑsi, nɑ nɔɔ bɔkuɑ nɑ swĩ, domi nɑ ǹ yɛ̃ Yinni Gusunɔ ù n koo nɛn wɔnwɔndu wɑ kpɑ u bii wi bɛkiɑ. 23 Adɑmɑ tɛ̃ u gu. Mbɑn sɔ̃nɑ ko nɑ n mɑɑ nɔɔ bɔkuɑ. Kon kpĩ n nùn seeyɑ gɔrin di? Nɛnɑ kon dɑ n nùn deemɑ mi u wɑ̃ɑ. N ǹ mɑɑ wi, u koo wurɑmɑ nɛn mi.
Sɑlomɔɔn mɑrubu
24 Yen biru Dɑfidi u dɑ u win kurɔ Bɑti Sebɑ nukuru yɛmiɑsiɑ, mɑ u kɑ nùn mɛnnɑ. Kurɔ wi, u gurɑ suɑ u mɑrɑ bii tɔn durɔ. Mɑ Dɑfidi u nùn yĩsiru kɑ̃ Sɑlomɔɔ. Yinni Gusunɔ u bii wi kĩɑ gem gem. 25 Mɑ u win sɔmɔ Nɑtɑni gɔrɑ u mɑɑ nùn yĩsiru gɑru kɛ̃ te bɑ mɔ̀ Yedidiɑ. Yen tubusiɑnɑ, wi Yinni Gusunɔ u kĩ.
Dɑfidi u Rɑbɑ mwɑ
(I mɑɑ mɛɛrio Bɑndun Gɑri I, 20:1-3)
26 Sɑɑ ye sɔɔrɑ Yoɑbu u Amɔnibɑn wuu ge bɑ mɔ̀ Rɑbɑ wɔri u gen wɔɔ berɑ mwɑ mi ben sinɑ boko u rɑ n wɑ̃ɑ. 27 Yerɑ u Dɑfidi sɔmɔbu gɔriɑ u nɛɛ, wee, nɑ Rɑbɑn berɑ mi nim mu wɑ̃ɑ mwɑ kɔ. 28 Yen sɔ̃, ɑ tɔn be bɑ tie mɛnnɔ kpɑ i nɑ i wuu ge mwɑ mɑm mɑm. Domi nɑ ǹ kĩ bu nɛɛ, nɛ Yoɑbuwɑ nɑ gu mwɑ. 29 Yerɑ Dɑfidi u tɔn be kpuro mɛnnɑ, mɑ bɑ dɑ bɑ Rɑbɑ wɔri bɑ ye mwɑ. 30 Mɑ u wuu min sunɔn furɔ wurɑguu mwɑ. Gen bunum mu sɑ̃ɑwɑ kilo tɛnɑ kɑ nnɛ. Bɑ gu kpee gobiginu gore. Mɑ bɑ gu suɑ bɑ Dɑfidi dokeɑ wirɔ. Yen biru u kɑ gu dɑ Yerusɑlɛmuɔ. Yen dɔmɑ te, dukiɑ bɑkɑ Dɑfidi u gurɑ. 31 Mɑ u Rɑbɑn tɔn be bɑ tie yoo sɔmɑ koosiɑ. Ben gɑbɑ dɑ̃ɑ bɔɔrimɔ kɑ gbɛ̃ɛ, gɑbu kɑ sii, gɑbɑ tem gbemɔ kɑ dɑ̃kuru, mɑ gɑbɑ birikibɑ mɔ̀. Nge mɛyɑ u Amɔnibɑn wusu kpuron tɔmbu yoo sɔmɑ kpɛ̃ɛ. Yen biru u gɔsirɑmɑ Yerusɑlɛmuɔ kɑ win tɔmbu kpuro.