Bɑ Dɑfidigibu sekuru doke
(I mɑɑ mɛɛrio Bɑndun Gɑri I, 19:1-5)
10
1 Yenibɑ kpuron biru, Amɔnibɑn sunɔ u kpunɑ u gu, mɑ win bii Hɑnuni u gɔnɑ kɔsire kuɑ. 2 Yerɑ Dɑfidi u nɛɛ, kon Hɑnuni durom kuɑwɑ nge mɛ win tundo Nɑkɑsi u rɑɑ mɑn kuɑ. Mɑ u win bwɑ̃ɑbu gɔrɑ bu dɑ bu kɑ nùn nukuru yɛmiɑsiɑ win tundon gɔɔn sɔ̃. Ye bwɑ̃ɑ be, bɑ turɑ mi, 3 yerɑ Hɑnunin sinɑ ɑsɑkpɔbu bɑ nùn sɔ̃ɔwɑ bɑ nɛɛ, ɑ tɑmɑɑ Dɑfidin bwɑ̃ɑ be, bɑ nɑwɑ bu kɑ wunɛn tundo bɛɛrɛ wɛ̃? A ǹ yɛ̃ bɑ nɑwɑ bu kɑ bɛsɛn wuun sɑriɑ giɑ, kpɑ bu gu wɔrimɑ bu mwɑ?
4 Yerɑ Hɑnuni u Dɑfidin bwɑ̃ɑ be mwɛɛrɑ, u ben tobunu kɔnɑ beri berikɑ u sukum deri. Mɑ u ben yɑbenu bɔtirɑ ben tɑɑnun deedeerun di. Yen biru u bu girɑ bɑ doonɑ. 5 Yerɑ gɑbɑ dɑ bɑ ye Dɑfidi sɔ̃ɔwɑ. Mɑ u tɔmbu seeyɑ bu nɑ bu bu sennɔ ko kpɑ bu bu sɔ̃ bu ginɑ sinɔ Yerikoɔ sere ben tobunu nù n kpiɑ. Domi bɑ wɑ̃ɑwɑ seku bɑkɑru sɔɔ.
Dɑfidi u Sirigibu kɑ Amɔnibɑ kɑmiɑ
(I mɑɑ mɛɛrio Bɑndun Gɑri I, 19:6-19)
6 Ye Amɔnibɑ bɑ wɑ mɑ Dɑfidin wɛ̃rɑ woo duɑ ben sɔ̃, yerɑ bɑ tɑbu durɔbu nɔrɔbun subɑ yɛndu (20.000) kɑnɑ Sirigibun min di. Tɑbu kowo ben wusɑ, Bɛti Rehɔbu kɑ Sobɑ. Mɑ bɑ tɔmbu nɔrɔbu (1.000) wɑ Mɑɑkɑn sinɑ bokon min di. Sobɑgibun min di mɑɑ tɔmbu nɔrɔbun subɑ wɔkurɑ yiru (12.000). 7 Ye Dɑfidi u nuɑ mɛsum, yerɑ u bu Yoɑbu kɑ win tɑbu durɔbu sure bɑ bu wɔri. 8 Mɑ Amɔni be, bɑ yɑrɑ bɑ ben tɑbu sĩɑ kpĩ ben wuun gbɑ̃rɑrun kɔnnɔwɔ. Adɑmɑ Sirigii be bɑ nɑ Sobɑ kɑ Bɛti Rehɔbun di, kɑ Tobugibu kɑ Mɑɑkɑgibu, bɑ dɑ bɑ wɑ̃ɑwɑ nɛnɛm yɑkɑsɔ. 9 Ye Yoɑbu u wɑ mɑ bɑ koo bu wɔrimɑwɑ biru kɑ wuswɑɑn di, yerɑ u tɑbu yɛ̃robu gɔsɑ Isirelibɑ sɔɔ, bu kɑ dɑ bu Sirigibu wɔri. 10 Be bɑ mɑɑ tie u nɛɛ win wɔnɔ Abisɑi u bu kpɑro, bu kɑ dɑ bu Amɔnibɑ wɔri. 11 U win wɔnɔ wi sɔ̃ɔwɑ u nɛɛ, Sirigibu bɑ̀ n mɑn dɑm kerɑ, ɑ nɑ ɑ mɑn somi. Amɔnibɑ bɑ̀ n mɑɑ nun dɑm kerɑ kon nɑ n nun somi. 12 A de ɑ n wɔrugɔru mɔ, kpɑ su sɑnnɑ kɑ hɑniɑ bɛsɛn tɔmbu kɑ wuu si Yinni Gusunɔ u sun wɛ̃n sɔ̃, kpɑ win tii u sun kuɑ nge mɛ u kĩ.
13 Yoɑbu kɑ win tɑbu kowobu bɑ seewɑ bɑ dɑ bu kɑ Sirigii be wɔri, mɑ Sirigii be, bɑ duki yɑkikirɑ. 14 Ye Amɔnibɑ bɑ wɑ mɑ Sirigibu bɑ duki yɑkikirɑ, yerɑ ben tii bɑ mɑɑ yɑkikirɑ Abisɑin wuswɑɑn di, bɑ wɔri wuuɔ. Yen biru Yoɑbu u gɔsirɑ u wurɑ Yerusɑlɛmuɔ.
15 Ye Sirigii be, bɑ wɑ mɑ Isirelibɑ bɑ bu kɑmiɑwɑ, yerɑ bɑ wure bɑ mɑɑ ben tɑbu kowobu mɛnnɑ. 16 Mɑ Hɑdɑdesɛɛ u gɔrɑ bu Sirigii be bɑ wɑ̃ɑ dɑɑ te bɑ mɔ̀ Efɑrɑtin guruɔ sokumɑ. Yerɑ bɑ mɛnnɑ bɑ nɑ Helɑmuɔ. Sobɑki Hɑdɑdesɛɛn tɑbu sunɔwɑ u bu kpɑre. 17 Yerɑ bɑ Dɑfidi ye sɔ̃ɔwɑ. Mɑ u Isirelibɑ mɛnnɑ, bɑ Yuudɛni tɔburɑ bɑ nɑ Helɑmuɔ. Sɑɑ ye sɔɔrɑ Sirigibu bɑ sɔɔru kuɑ bɑ Isirelibɑ wɔri bɑ kɑ bu tɑbu kuɑ. 18 Adɑmɑ bɑ bu kpɑnɑ bɑ duki suɑ. Mɑ Isirelibɑ bɑ ben tɔmbu nɑtɑ kɑ wunɔbu (700) go be bɑ tɑbu kɛkɛbɑ kpɑre sɔɔ, kɑ mɑɑsɔbu nɔrɔbun subɑ weeru (40.000). Mɑ bɑ ben tɑbu sunɔ Sobɑki mɛɛrɑ kuɑ. Miyɑ u gu.
19 Sinɑm be bɑ rɑɑ Hɑdɑdesɛɛ sɑ̃ɑmɔ mi, bɑ wɑ mɑ Isirelibɑ bɑ nùn kɑmiɑ. Yerɑ bɑ kɑ Isireli be dorɑ mɑ bɑ Dɑfidi sɑ̃wɑ. Sɑɑ yen dɔmɑ ten di, Sirigibu bɑ ǹ mɑɑ wure bu Amɔnibɑ somiru dɑ.