28
1 Sɑnɑm mɛ sɔɔ, Filisitibɑ bɑ ben tɑbu kowobu mɛnnɑ bu wɑ bu kɑ Isirelibɑ sɑnnɑ. Mɑ Akisi u Dɑfidi sɔ̃ɔwɑ u nɛɛ, ɑ n yɛ̃ kɑm kɑm mɑ kɑɑ kɑ mɑn tɑɑ bini dɑ, wunɛ kɑ wunɛn bwɑ̃ɑbu.
2 Dɑfidi u nɛɛ, geemɑ, yinni. Kɑɑ mɑɑ wɑ ye kon kpĩ n ko.
Akisi u nɛɛ, ǹ n mɛn nɑ, kɑɑ kowɑ nɛn tii tiin kɔ̃so sere kɑ bɑɑdommɑɔ.
Sɔɔlu u bikiɑru dɑ
3 N deemɑ Sɑmuɛli u gu kɔ. Mɑ Isirelibɑ kpuro bɑ win gɔɔ swĩ, bɑ nùn sikuɑ win wuu Rɑmɑɔ. Sɔɔlu u mɑɑ sɔrobu kɑ gɔri sokobu kpuro girɑ tem mɛn di.
4 Yerɑ sɔ̃ɔ teeru Filisitibɑ bɑ mɛnnɑ bɑ ben sɑnsɑni girɑ Sunɛmuɔ. Mɑ Sɔɔlu u Isirelibɑ kpuro mɛnnɑ bɑ mɑɑ ben sɑnsɑni girɑ Giliboɑɔ. 5 Sɑɑ ye Sɔɔlu u Filisitibɑn tɑbu kowo be wɑ u nɑndɑ, win tororɑ kɑrɑ u diirumɔ gem gem. 6 Mɑ u Yinni Gusunɔ kɑnɑ u nùn sɔ̃ɔsi ye u koo ko. Adɑmɑ u ǹ nùn wisɑ dosu sɔɔ, ǹ kun mɛ yɑ̃ku kowon min di, ǹ kun mɛ win sɔmɔ goon min di. 7 Mɑ Sɔɔlu u win bwɑ̃ɑbu sɔ̃ɔwɑ u nɛɛ, i mɑn kurɔ goo kɑsuo wi u rɑ gɔribu soku, kpɑ n dɑ win mi n bikiɑru ko.
Bɑ nùn wisɑ bɑ nɛɛ, kurɔ goo wɑ̃ɑ Ɛndoriɔ wi u rɑ gɔribu soku.
8 Mɑ Sɔɔlu u tii gɔsiɑ u yɑ̃nu kɔsɑ u dɑ kurɔ win mi wɔ̃kuru, kɑ win bwɑ̃ɑbu yiru gɑbu sɑnnu. Ye bɑ turɑ mi, mɑ u nɛɛ, nɑ kĩ ɑ mɑn gɔri goo sokuɑ wìn yĩsiru kon nun sɔ̃.
9 Adɑmɑ kurɔ wi, u nùn wisɑ u nɛɛ, ɑ yɛ̃ sɑ̃ɑ sɑ̃ɑ ye Sɔɔlu u kuɑ, nge mɛ u gɔri sokobu kɑ sɔrobu kpuro girɑ tem mɛn di. Ǹ n mɛn nɑ, mbɑn sɔ̃nɑ ɑ mɑn yinɑ bɛriɑmmɛ bu kɑ mɑn go.
10 Mɑ Sɔɔlu u bɔ̃ruɑ kɑ Yinni Gusunɔn yĩsiru u nɛɛ, sere kɑ Yinni Gusunɔn wɑ̃ɑru, ɑ ǹ wɑhɑlɑ gɑɑ wɑsi gɑri yini sɔɔ.
11 Mɑ kurɔ wi, u Sɔɔlu bikiɑ u nɛɛ, ben weren yɑrowɑ kon nun sokuɑ.
Mɑ u nɛɛ, Sɑmuɛli.
12 Ye kurɔ wi, u Sɑmuɛli wɑ, yerɑ u nɔɔgiru suɑ u nɛɛ, ɑse wunɑ mi, Sɔɔlu? Mbɑn sɔ̃nɑ ɑ mɑn nɔni wɔ̃kuɑ.
13 Mɑ sinɑ boko Sɔɔlu u nɛɛ, ɑ ku bɛrum ko, ɑ mɑn sɔ̃ɔwɔ ye ɑ wɑ.
Kurɔ wi, u nɛɛ, siiniwɑ nɑ wɑ. Yɑ yɑrimɑm wee tem di.
14 Sɔɔlu u nɛɛ, mbɑ yɑ kɑ weenɛ.
U nɛɛ, durɔ tɔkɔrɑ yɑ kɑ weenɛ, tɑ kumbooro sebuɑ tɑ yɑrim wee.
Mɑ Sɔɔlu u giɑ mɑ Sɑmuɛliwɑ. Mɑ u yiirɑ u wuswɑɑ tem girɑri u nùn bɛɛrɛ wɛ̃. 15 Sɑmuɛli u Sɔɔlu sɔ̃ɔwɑ u nɛɛ, mbɑn sɔ̃nɑ ɑ mɑn bɑɑsi kɑ wunɛn soku te.
Sɔɔlu u nɛɛ, nɔni swɑ̃ɑ bɑkɑrɑ tɑ mɑn deemɑ domi Filisitibɑ bɑ kɑ mɑn tɑbu mɔ̀. Gusunɔ u mɑɑ mɑn deri. U ku rɑ mɑɑ mɑn wisi sɑɑ win sɔmɔbun min di, ǹ kun mɛ dosu sɔɔ. Yen sɔ̃nɑ nɑ nɑ n nun soku kpɑ ɑ mɑn sɔ̃ɔsi ye kon ko.
16 Sɑmuɛli u nɛɛ, mɑ ɑ yɛ̃ Yinni Gusunɔ u nun deri u kuɑ wunɛn yibɛrɛ, mbɑn sɔ̃nɑ ɑ mɑn bikiɑmɔ ye kɑɑ ko. 17 U kuɑ ye u rɑɑ geruɑ sɑɑ nɛn min di. U wunɛn bɑndu wɔrɑ u Dɑfidi wɛ̃, 18 yèn sɔ̃ ɑ ǹ win gɑri mɛm nɔɔwɛ, mɑ ɑ yinɑ ɑ Amɑlɛkibɑ win mɔru kpuro kɔsiɑ. 19 U koo wunɛ kɑ Isirelibɑ Filisitibɑ nɔmu bɛriɑ. Siɑ wunɛ kɑ wunɛn bii tɔn durɔbu i ko mɑn deemɑ mini. Kpɑ Yinni Gusunɔ u Isirelibɑn tɑbu kowobu Filisitibɑ nɔmu bɛriɑ.
20 Mii mii Sɔɔlu u wɔrumɑ birem nge wi u gu. Bɛrum nùn mwɑ gem gem Sɑmuɛlin gɑri yin sɔ̃. U ǹ mɑɑ dɑm mɔ tɔ̃ɔ te sɔɔ, domi u ǹ di sɔ̃ɔ sɔɔn di sere n kɑ kuɑ wɔ̃kuru. 21 Ye kurɔ wi, u nɑ Sɔɔlun mi, u wɑ mɑ u bɛrum soore mɑ u nɛɛ, wee, yinni, nɑ wunɛn gɑri mɛm nɔɔwɑ. Nɑ nɛn wɑ̃ɑru sɑrɑɑ kuɑ, nɑ kuɑ ye ɑ mɑn yiire. 22 Yen sɔ̃, nɑ nun kɑnɑmɔ, ɑ nɛn gɑri nɔɔwɔ. Wee kon nun dĩɑnu fiiko yiiyɑ. A de ɑ nu di kpɑ ɑ dɑm wɑ ɑ kɑ swɑɑ wɔri.
23 Adɑmɑ Sɔɔlu u yinɑ u nɛɛ, nɑ ǹ dimɔ. Yerɑ win bwɑ̃ɑbu kɑ kurɔ wi, bɑ nùn suuru kɑnɑ. Mɑ u ben gere wurɑ u seewɑ tem di u sinɑ kpin yerɔ. 24 N deemɑ kurɔ wi, u nɑɑ kpɛmɑ gɑɑ mɔ ye yɑ geɑ sɑ̃ɑ mɑ u kuɑ bɑrɑ bɑrɑ u ye go u sɑwɑ. U mɑɑ som suɑ u burɑ u kɑ pɛ̃ɛ kuɑ, u ǹ seeyɑtiɑ doke. 25 U kɑ ye Sɔɔlu kɑ win bwɑ̃ɑbu nɑɑwɑ bɑ di. Ye bɑ di bɑ kpɑ, mɑ bɑ seewɑ bɑ doonɑ wɔ̃ku te.