Dɑfidi u Sɔɔlu deri
u ǹ nùn go
26
1 Yenibɑn biruwɑ Sifugibu bɑ dɑ Gibeɑɔ bɑ Sɔɔlu sɔ̃ɔwɑ bɑ nɛɛ, Dɑfidi u wɑ̃ɑ u kukuɑ Hɑkilɑn guurɔ gbɑburu mi gɑ̃ɑnu ku rɑ kpin deedeeru.
2 Mɑ Sɔɔlu u seewɑ u dɑ gbɑburu mi, kɑ tɑbu durɔ dɑmgibu nɔrɔbun subɑ itɑ (3.000) u kɑ Dɑfidi kɑsu. 3 Ye u turɑ mi, yerɑ u win sɑnsɑni girɑ Hɑkilɑn guurɔ, swɑɑn bɔkuɔ. N deemɑ Dɑfidin tii u wɑ̃ɑ gbɑburu mi. 4 Ye u nuɑ Sɔɔlu u nùn kɑsu mɛ, yerɑ u tɔmbu gɔrɑ bu dɑ bu mɛɛri ù n tunumɑ. Mɑ tɔn be, bɑ dɑ. Yen biru bɑ gɔsirɑmɑ bɑ nɛɛ, Sɔɔlu u wɑ̃ɑ mi kɑm kɑm. 5 Yerɑ Dɑfidin tii u seewɑ u nɑ mi Sɔɔlu u win sɑnsɑni gire. U wɑ mi Sɔɔlu kɑ win tɑbu sunɔ Abinɛɛ, Nɛrin bii, bɑ rɑ kpunɛ. Sɔɔlu u rɑ kpunɛwɑ sɑnsɑnin suunu sɔɔ kpɑ tɑbu kowo be bɑ tie bɑ n kpĩ bɑ n kɑ nùn sikerenɛ.
6 Mɑ Dɑfidi u nɑ u Akimɛlɛki Hɛti kɑ Abisɑi bikiɑ u nɛɛ, bɛɛn wɑrɑ koo kɑ mɑn dɑ Sɔɔlun sɑnsɑniɔ.
Mɑ Abisɑi u nɛɛ, kon kɑ nun dɑ. N deemɑ Abisɑi wi, u sɑ̃ɑwɑ Yoɑbun mɔɔ. Ben mɛron yĩsirɑ Seruyɑ.
7 Yerɑ Dɑfidi kɑ Abisɑi wi, bɑ seewɑ wɔ̃kuru bɑ dɑ Sɔɔlun sɑnsɑniɔ bɑ deemɑ wee, u kpĩ u do sɑnsɑni yen suunu sɔɔ, u win yɑɑsɑ gire win wiru giɑ. Mɑ Abinɛɛ kɑ tɑbu kowo be bɑ tie bɑ kpĩ bɑ kɑ nùn sikerenɛ. 8 Abisɑi u Dɑfidi sɔ̃ɔwɑ u nɛɛ, ɑ ǹ wɑ mɑ Gusunɔ u nun wunɛn yibɛrɛbɑ nɔmu bɛriɑ? Yen sɔ̃, ɑ de n Sɔɔlu nɛn yɑɑsɑ sɔku nɔn teeru n kɑ tem mɛnnɑ n derisi mi.
9 Adɑmɑ Dɑfidi u Abisɑi sɔ̃ɔwɑ u nɛɛ, ɑ ku nùn go. Domi wɑrɑ u koo wi Yinni Gusunɔ u gɔsɑ go, kpɑ Gusunɔ u yɛ̃ro deri u kun nùn ye kɔsie. 10 Dɑfidi u mɑɑ nɛɛ, sere kɑ Yinni Gusunɔn wɑ̃ɑru nɑ yɛ̃ mɑ win tii u koo nùn go tɑbu gberɔ, ǹ kun mɛ win gɔɔn tɔ̃ru tɑ̀ n turɑ. 11 Gusunɔ u mɑn bere bu nɛɛ, nɛnɑ nɑ wi u gɔsɑ nɔmu doke nɑ go. Yen sɔ̃, ɑ de su win yɑɑsɑ ye yɑ wɑ̃ɑ win wirɔ mi suɑ kɑ win nim bwɑ̃ɑru kpɑ su kɑ doonɑ.
12 Mɑ Dɑfidi u yɑɑsɑ ye suɑ kɑ nim bwɑ̃ɑ te, mɑ bɑ doonɑ. Goo kun mɑɑ seewe u sere bu wɑ, domi Gusunɔwɑ u bu dom mɔn bɑkɑru kpɛ̃ɛ. 13 Mɑ u besirɑ u yɔɔwɑ guu ten bee tiɑ ye yɑ kɑ Sɔɔlun sɑnsɑni dɛsire. 14 Yerɑ u nɔɔgiru suɑ sɑnsɑni mi giɑ kɑ dɑm u nɛɛ, Abinɛɛ, Nɛrin bii, ɑ ǹ wurɑmɔ?
Mɑ Abinɛɛ u nùn wisɑ u nɛɛ, wunɑ were ɑ kɑ sinɑ boko wɔkisimɔ.
15 Mɑ Dɑfidi u Abinɛɛ wisɑ u nɛɛ, ɑ ǹ tɔn durɔ ro? Tɑbu durɔ wɑrɑ u kɑ nun nɛ Isireliɔ. Mbɑn sɔ̃nɑ ɑ ǹ wunɛn yinni sinɑ boko kɔ̃su. Domi wee, goo u nɑ u kɑ nùn go. 16 Ye ɑ kuɑ mi, yɑ ǹ wɑ̃. Sere kɑ Yinni Gusunɔn wɑ̃ɑru n weenɛwɑ bu bɛɛ kpuro go, yèn sɔ̃ i ǹ bɛɛn yinni sinɑ boko kɔ̃su, wi Yinni Gusunɔ u gɔsɑ. A mɛɛrio tɛ̃ win wiru giɑ. Mɑnɑ win yɑɑsɑ kɑ win nim bwɑ̃ɑrɑ wɑ̃ɑ.
17 Yerɑ Sɔɔlu u Dɑfidin nɔɔ giɑ. Mɑ u nɛɛ, Dɑfidi, nɛn bii, wunɛn nɔɔwɑ mi?
Mɑ Dɑfidi u nùn wisɑ u nɛɛ, yinni sinɑ boko, nɛnɑ mi.
18 Mɑ u mɑɑ nùn sɔ̃ɔwɑ u nɛɛ, mbɑn sɔ̃nɑ ɑ mɑn nɑɑ gire sere kɑ tɛ̃. Mbɑ nɑ nun kuɑ. Mbɑ nɑ torɑ. 19 Yinni sinɑ boko, ɑ mɑn swɑɑ dɑkio. Ǹ n Yinni Gusunɔn nɑ u nun bɔriɑmɔ ɑ kɑ mɑn go, u nɛn yɑ̃kuru mɔɔ, kpɑ win bwɛ̃rɑ yu kpunɑ su dorɑ. Adɑmɑ ǹ n tɔmbun nɑ, Yinni Gusunɔ u bu bɔ̃rusio domi bɑ mɑn girewɑ n kɑ yɑri tem minin di mɛ u win tɔmbu wɛ̃ kpɑ n dɑ n bũnu sɑ̃. 20 Domi wee wunɛ Sɔɔlu, Isirelibɑn sinɑ boko, ɑ mɑn kɑsu ɑ go nge goo dɛ̃ɛ, ǹ kun mɛ nge kusu guuru wɔllɔ. Adɑmɑ Gusunɔ u ku de n gbi tem tukumɔ mi ko nɑ n kɑ nùn tomɑ.
21 Sɔɔlu u Dɑfidi wisɑ u nɛɛ, nɛn bii, nɑ gɔbɑ kuɑwɑ. A wurɑmɑ yɛnuɔ. Nɑ ǹ mɑɑ nun kɔ̃sɑ kuɑmmɛ. Domi gisɔ nɛn wɑ̃ɑru tɑ sɑ̃ɑwɑ gɑ̃ɑ bɑkɑnu wunɛn nɔni sɔɔ. Wee nɑ kuɑ nge wiiro, nɑ torɑ too.
22 Yerɑ Dɑfidi u nɛɛ, sinɑ boko, wunɛn yɑɑsɑ wee. A de wunɛn ɑluwɑɑsi turo u nɑ u ye mwɑ. 23 Kpɑ Yinni Gusunɔ wi u sɑ̃ɑ gemgii kɑ bɔrɔkini u bɑɑwure kɔsie ye u kuɑ. Wee, u mɑn nun nɔmɑ bɛriɑ gisɔ, ɑdɑmɑ nɑ ǹ wure n nun nɔmɑ doke wunɛ wi u gɔsɑ u kuɑ sunɔ. 24 Nge mɛ nɑ wunɛn wɑ̃ɑru gɑrisi gɑ̃ɑ bɑkɑnu gisɔ, nge mɛyɑ Yinni Gusunɔ u mɑɑ nɛgiru gɑrisi. Wiyɑ u koo mɑɑ mɑn yɑrɑ sɑɑ nuku sɑnkirɑnu kpuron di.
25 Mɑ Sɔɔlu u Dɑfidi sɔ̃ɔwɑ u nɛɛ, Gusunɔ u nun domɑru kuɑ, nɛn bii. Wunɛn ye ɑ niɑ sɑ̃ɑ kpuro yɑ koo koorɑwɑ.
Yen biru Dɑfidi u swɑɑ wɔri u doonɑ. Mɑ Sɔɔlu u mɑɑ gɔsirɑ u dɑ win yɛnuɔ.