Dɑfidi u yinɑ u Sɔɔlu go
24
1 Dɑfidi u seewɑ berɑ min di mɑ u dɑ u kukuɑ Engɛdiɔ. 2 Sɑɑ yè sɔɔ Sɔɔlu u Filisitibɑ nɑɑ swĩi u gɔsirɑmɑ, yerɑ bɑ nùn sɔ̃ɔwɑ bɑ nɛɛ, Dɑfidi u wɑ̃ɑ Engɛdin gbɑburɔ. 3 Mɑ Sɔɔlu u tɔmbu nɔrɔbun subɑ itɑ (3.000) suɑ be bɑ sɑ̃ɑ tɑbu durɔbu Isirelibɑ sɔɔ, bu dɑ sere kpee bɑkɑnun berɑ giɑ mi kpee bɛri yi rɑ n wɑ̃ɑ bu Dɑfidi kɑ win tɔmbu kɑsumɑ. 4 Ye bɑ turɑ yɑ̃ɑnun wɑ̃ɑ yeru gɑrun mi, swɑɑ ye sɔɔ, kpee wɔru gɑgɑ mɑɑ wɑ̃ɑ mi, mɑ Sɔɔlu u duɑ wɔru ge sɔɔ u kɑ swɑɑ swĩibu ko. N deemɑ Dɑfidi kɑ win bwɑ̃ɑbu bɑ wɑ̃ɑ wɔru gen sɔɔwɔ. 5 Mɑ Dɑfidin bwɑ̃ɑbɑ nùn sɔ̃ɔwɑ bɑ nɛɛ, ɑ ǹ wɑ mɑ tɔ̃ɔ te, tɑ turɑ? Te Yinni Gusunɔ u nun burɑ u nɛɛ, u koo nun wunɛn yibɛrɛ nɔmu bɛriɑ kpɑ ɑ nùn kuɑ nge mɛ ɑ kĩ.
Yerɑ Dɑfidi u seewɑ sɛ̃ɛ u Sɔɔlun yɑberun soo burɑ. 6 Yen biruwɑ u nɑndɑ ye u kɑ Sɔɔlun yɑberun soo ge burɑ. 7 Sɑɑ ye sɔɔrɑ Dɑfidi u win bwɑ̃ɑbu sɔ̃ɔwɑ u nɛɛ, Gusunɔ u mɑn yenin bweseru gbɑrɑ bu nɛɛ, nɛnɑ nɑ nɛn yinni nɔmɑ doke wi Yinni Gusunɔ u gɔsɑ u kuɑ sunɔ.
8 Kɑ gɑri yiyɑ Dɑfidi u win bwɑ̃ɑbun lɑɑkɑri kpunɑsiɑ u ǹ kɑ dere bu Sɔɔlu wɔri.
Mɑ Sɔɔlu u seewɑ u yɑrɑ u doonɑ min di. 9 Yen biruwɑ Dɑfidi u yɑrimɑ wɔru gen min di u Sɔɔlu sokɑ u nɛɛ, nɛn yinni, sunɔ.
Mɑ Sɔɔlu u sĩirɑ u mɛɛrimɑ biruɔ. Yerɑ Dɑfidi u yiirɑ u wuswɑɑ tem girɑri u nùn bɛɛrɛ wɛ̃. 10 Mɑ u Sɔɔlu sɔ̃ɔwɑ u nɛɛ, mbɑn sɔ̃nɑ ɑ kɑ tɔmbun gɑri nɔɔmɔ be bɑ mɔ̀, wunɛn kɔ̃sɑ nɑ kɑsu. 11 Wee, wunɛn tiin nɔni wɑ gisɔ mɑ Yinni Gusunɔ u mɑn nun nɔmu bɛriɑ kpee wɔru ge sɔɔ. Bɑ nɛɛ, n nun goowo, ɑdɑmɑ nɑ nun deri. Nɑ nɛɛ, nɑ ǹ nɛn yinni, wi Yinni Gusunɔ u gɔsɑ u kuɑ sunɔ nɔmu dokemɔ. 12 Kɑ yen de kpuro ɑ mɛɛrio. Wee, nɑ wunɛn yɑberun sukum nɛni. Nge mɛ nɑ kɑ yɑbe ten soo burɑ mi, nɑ ǹ kɑ nun go, n weenɛ ɑ giɑ mɑ nɑ ǹ sɑ̃ɑ mɛm nɔɔ sɑri. Nɛn kookoosu sɔɔ, kɔ̃sɑ gɑɑ mɑɑ sɑri, ǹ kun mɛ torɑru gɑru wunɛn sɔ̃. Adɑmɑ wunɛ wee, ɑ mɑn nɑɑ swĩi ɑ go. 13 Yen sɔ̃, Yinni Gusunɔwɑ u koo sun siriɑ nɛ kɑ wunɛ. Kpɑ u nun ye ɑ mɑn kuɑn dibu kɔsiɑ. Adɑmɑ nɛn nɔmɑ kun nun bɑbɑmɔ. 14 Nge mɛ bɑ rɑ gere bu nɛɛ, dɑɑ kɔ̃sɑ yɑ rɑ nɛwɑ tɔn kɔ̃son min di. Yen sɔ̃nɑ nɛn nɔmu gɑ ǹ nun bɑbɑmɔ. 15 Weren sɔ̃nɑ wunɛ Isirelibɑn sunɔ ɑ yɑrimɑ. Wɑrɑ ɑ nɑɑ gire. Nɛ wi nɑ sɑ̃ɑ nge bɔ̃ɔ goru? Ǹ kun mɛ nge goo dɛ̃ɛ? 16 Yinni Gusunɔwɑ u sɑ̃ɑ siri kowo. Ù n bɛsɛn gɑri wɛ̃ɛrɑ, u koo sun siriɑ, nɛ kɑ wunɛ. Kpɑ u kɑ mɑn yinɑ u mɑn wɔrɑ wunɛn nɔmɑn di.
17 Ye Dɑfidi u Sɔɔlu gɑri yi sɔ̃ɔwɑ u kpɑ, yerɑ Sɔɔlu u nɛɛ, ǹ n mɛn nɑ, wunɛn nɔɔwɑ mi, Dɑfidi nɛn bii?
Mɑ Sɔɔlu u nɔɔgiru suɑ u wurɑ kuɑ. 18 U Dɑfidi sɔ̃ɔwɑ u nɛɛ, ɑ mɑn gem kere. Domi ɑ mɑn geɑ kuɑ, mɑ nɑ nun kɔ̃sɑ dibu kɔsiɑ. 19 Wee, ɑ mɑn sɔ̃ɔsi gisɔ geɑ ye ɑ mɑn kuɑ. Yinni Gusunɔ u rɑɑ mɑn doke wunɛn nɔmuɔ. A ǹ mɑɑ mɑn go. 20 Domi tɔnu u ku rɑ win yibɛrɛ nɔmɑ turi kpɑ u nun yɔ̃su u doonɑ kɑ ɑlɑfiɑ. Yen sɔ̃nɑ Yinni Gusunɔ u koo nun geɑ dibu kɔsiɑ ye ɑ mɑn kuɑ minin sɔ̃. 21 Tɛ̃ nɑ yɛ̃ kɑm kɑm mɑ kɑɑ ko sunɔ kpɑ Isirelibɑn bɑndu tɑ n dɑm mɔ wunɛn nɔmɑɔ. 22 Yen sɔ̃, ɑ bɔ̃ruo tɛ̃ kɑ Yinni Gusunɔn yĩsiru mɑ ɑ ǹ nɛn bibun bweseru kpuro goomɔ nɛn biru, kpɑ bu nɛn yĩsiru duɑri nɛn bɑɑbɑn bweseru sɔɔ.
23 Mɑ Dɑfidi u Sɔɔlun gɑri yi wurɑ kɑ bɔ̃ri u nɛɛ, u ǹ bu goomɔ. Yen biru Sɔɔlu u dɑ yɛnuɔ. Adɑmɑ Dɑfidi kɑ win bwɑ̃ɑbu bɑ gɔsirɑ bɑ wurɑ ben kuku yerɔ.