Dɑfidi kɑ Goliɑti
17
1 Yen biru Filisitibɑ bɑ ben tɑbu kowobu mɛnnɑ bɑ tɑbun sɔɔru kuɑ Sokoɔ Yudɑn temɔ. Bɑ ben sɑnsɑni girɑ Efɛsi Dɑmimuɔ, ye yɑ wɑ̃ɑ Soko kɑ Asekɑn bɑɑ sɔɔ. 2 Sɔɔlu kɑ Isirelibɑ ben tii bɑ mɛnnɑ bɑ ben sɑnsɑni girɑ Elɑn wɔwɑ sɔɔ. Miyɑ bɑ tɑbu kpĩ bu kɑ Filisitibɑ wɔri. 3 Filisitibɑ bɑ yɔ̃ wɔwɑ yen berɑ gee, mɑ Isirelibɑ bɑ mɑɑ yɔ̃ yen berɑ giɔ.
4 Tɑbu durɔ goo u yɑrimɑ Filisitibɑn sɑnsɑnin di, u dɑ u yɔ̃rɑ sɑnsɑni yiru yen bɑɑ sɔɔ. Win yĩsirɑ Goliɑti. Gɑtin diyɑ u nɑ. Mɑ win gunum turɑ gɔm soonu nɔɔbɑ tiɑ kɑ bɔnu. 5 U sii gɑndun furɔ doke, kɑ sii gɑndun tɑrɑkpe ye bɑ kuɑ nge swɑ̃ɑ kokosu. Yen bunum mu kuɑ kilo wɑtɑ. 6 U mɑɑ sii gɑndun kɔrɔm doke, mɑ u sii gɑndun yɑɑsɑ bɛki. 7 Yɑɑsɑ yen buru tɑ sɑ̃ɑwɑ nge weson dɛkɑ ye u rɑ beku yɑsɑ tɛ̃ke. Yen bɛm bunum turɑ kilo nɔɔbɑ yirun sɑkɑ. Mɑ tɑbu kowo goo u nùn gbiiye u win tɛrɛru nɛni. 8 Goliɑti wi, u yɔ̃rɑ u gbɑ̃rɑ u Isirelibɑn tɑbu kowobu sɔ̃ɔwɑ u nɛɛ, mbɑn sɔ̃nɑ i yɑrimɑ i tɑbu sĩɑ kpĩ. I ǹ yɛ̃ mɑ nɛ Filisitiwɑ, bɛɛ mɑɑ Sɔɔlun yobu? I goo gɔsio bɛɛn suunu sɔɔ u nɑ u kɑ mɑn sɑnnɑ. 9 Ù n kpĩɑ u mɑn kɑmiɑ u go, nɛn tɔmbu bu ko bɛɛn yobu. Adɑmɑ nɑ̀ n nùn kɑmiɑ nɑ go, bɛɛyɑ ko i ko bɛsɛn yobu, kpɑ i sun sɑ̃. 10 Sɑnnɔwɑ nɑ kĩ gisɔ. I goo wunɑmɑ wi u koo kɑ mɑn sɑnnɑ.
11 Ye Sɔɔlu kɑ Isirelibɑ kpuro bɑ Filisiti win gɑri yi nuɑ, mɑ bɛrum bu mwɑ gem gem.
12 Dɑfidi wee, u sɑ̃ɑwɑ Isɑin bii. Isɑi wi, Efɑrɑtigiiwɑ wi u wɑ̃ɑ Bɛtelehɛmuɔ Yudɑn temɔ. Bii tɔn durɔbu nɔɔbɑ itɑwɑ u mɑrɑ. Sɔɔlun wɑɑti ye sɔɔ, u sɑ̃ɑwɑ durɔ tɔkɔru gem gem. 13 Win bii bukurobu itɑ bɑ Sɔɔlu swĩi bɑ kɑ tɑbu dɑ. Ben yĩsɑ wee, Eliɑbu kɑ Abinɑdɑbu kɑ Sɑmɑ. 14 Sɑnɑm mɛ bɑ wɑ̃ɑ Sɔɔlun sɑnsɑniɔ, win bii dɑ̃ɑko Dɑfidi 15 u rɑ dewɑ Bɛtelehɛmuɔ u kɑ win tundon yɑ̃ɑnu kpɑrɑ kpɑ u gɔsirɑmɑ Sɔɔlun mi.
16 Sɑɑ ye sɔɔ, Goliɑti wi, u rɑ nɛwɑ Isirelibɑn wuswɑɑɔ bururu kɑ yokɑ u kɑ tii bu sɔ̃ɔsi. Mɛyɑ u kuɑ sere sɔ̃ɔ weeru.
17 Sɔ̃ɔ teeru Isɑi u win bii Dɑfidi sɔ̃ɔwɑ u nɛɛ, ɑ gbere sɔndɑnu sɑɑki tiɑ suo kɑ pɛ̃ɛ wɔku te, kpɑ ɑ kɑ wunɛn mɑɑbu dɑɑwɑ fuuku tɑbu gberɔ. 18 A mɑɑ gɑsɑnu wɔku te suo ɑ ben wuurun wirugii wɛ̃ kpɑ ɑ wɑ nge bɑ̀ n bwɑ̃ɑ do, kpɑ ɑ kɑ gɑ̃ɑnu wurɑmɑ ben min di ni nu koo mɑn sɔ̃ɔsi mɑ ɑ turɑ mi. 19 Bɑ wɑ̃ɑ kɑ Sɔɔlu kɑ Isirelibɑn tɑbu kowobu Elɑn wɔwɑɔ. Miyɑ bɑ tɑbu mɔ̀ kɑ Filisitibɑ.
20 Sisiru buru buru, Dɑfidi u seewɑ u yɑ̃ɑ ni goo nɔmu sɔndiɑ. Mɑ u win sɔmunu suɑ u doonɑ nge mɛ Isɑi u nùn yiire. Ye u turɑ mi, u deemɑ wee, tɑbu kowobɑ yɑrimɑmɔ bɑ tɑbun sɔɔru mɔ̀. Bɑ gbɑmgbɑ soomɔ bɑ kuuki mɔ̀. 21 Isirelibɑ kɑ Filisitibɑ bɑ tɑbu tɛriɑmɔ. 22 Dɑfidi u win sɔmunu sɔbiɑ u yɑ̃nun kɔ̃so nɔmu bɛriɑ, mɑ u dukɑ dɑ tɑbu gberɔ u win mɑɑbu deemɑ u bu tɔburɑ. 23 Sɑnɑm mɛ u kɑ bu gɑri mɔ̀, wee Filisitibɑn tɑbu durɔ Gɑtigii wi bɑ mɔ̀ Goliɑti u kurɑmɑ sɑɑ Filisitibɑn tɑbu sĩɑn di. U win gɑri yi sɑɑrim seewɑ, mɑ Dɑfidi u yi nuɑ. 24 Ye Isirelibɑ bɑ durɔ wi wɑ, be kpuro bɑ bɛrum soorɑ gem gem bɑ duki yɑkikirɑ. 25 Mɑ bɑ mɔ̀, durɔ wi wee, u mɑɑ yɑrimɑ u kɑ sun nɔɔ kɑsu. Wi u kpĩɑ u nùn go, sunɔ u koo yɛ̃ro dukiɑ bɑkɑ wɛ̃, kpɑ u nùn win bii wɔndiɑ kɛ̃ kurɔ. Mɛyɑ yɛ̃ron yɛnugibɑ ko n tii mɔ. Sunɔ kun mɑɑ bu gɑ̃ɑnu bikiɑmɔ.
26 Mɑ Dɑfidi u be bɑ wɑ̃ɑ win bɔkuɔ bikiɑ u nɛɛ, wɑrɑ rɑ n Filisiti, bɑngo sɑrirugii wi, u sere kɑ bɛsɛ Gusunɔn tɑbu kowobu nɔɔ kɑsu. Mbɑ bɑ koo yɛ̃ro wɛ̃ wi u nùn go, mɑ u Isirelibɑ sekuru yɑrɑ.
27 Bɑ nùn sɔ̃ɔwɑ ye bɑ rɑɑ gerunɑmɔ. Bɑ nɛɛ, yeni kɑ yeniwɑ bɑ koo yɛ̃ro wɛ̃ wi u nùn go.
28 Ye Eliɑbu Dɑfidin mɔɔ tɔnwero u nuɑ Dɑfidi u gɑri mɔ̀ kɑ tɔn be, u kɑ nùn mɔru kuɑ u nùn bikiɑ u nɛɛ, wɑrɑ ɑ sere yɑ̃ɑ gɔ̃ɔ piibu ge deriɑ gbɑburɔ. Nɑ wunɛn ɑnɑyisiru yɛ̃ kɑ wunɛn woo bɔbunu. Nɑ yɛ̃ mɑ ɑ nɑ ɑ kɑ tɑbu mɛɛriwɑ.
29 Dɑfidi u wisɑ u nɛɛ, mbɑ n kuɑ. Bɑɑ gɑri nɑ ǹ kpɛ̃ n bikiɑ?
30 Mɑ u nùn biru kisi u dɑ u goo gɑri bikiɑ. Yerɑ bɑ nùn wisɑ nge mɛ gbiikobɑ rɑɑ geruɑ.
31 Be bɑ nuɑ ye Dɑfidi u geruɑ, yerɑ bɑ dɑ bɑ Sɔɔlu sɑɑriɑ. Mɑ Sɔɔlu u Dɑfidi sokusiɑ. 32 Dɑfidi u Sɔɔlu sɔ̃ɔwɑ u nɛɛ, ɑ ku de goon tororu tu kɑrɑ Filisiti win sɔ̃, yinni, kon dɑ n kɑ nùn sɑnnɑ.
33 Sɔɔlu u nɛɛ, ɑ ǹ kpɛ̃ ɑ susi Filisiti win mi, ɑ sere kɑ nùn sɑnnɑ. Domi wunɛ bii piibuwɑ ginɑ. Durɔ wi, u mɑɑ sɑ̃ɑwɑ tɑbu durɔ sɑɑ win ɑluwɑɑsirun di.
34 Mɑ Dɑfidi u Sɔɔlu sɔ̃ɔwɑ u nɛɛ, nɑ rɑɑ sɑ̃ɑwɑ nɛn tundon yɑ̃ɑ kpɑro. Gbee sunɔ, ǹ kun mɛ yɑɑ kɔ̃sɑ gɑɑ yɑ̀ n nɑ yɑ yɑ̃ɑ teeru mwɑ yɑ̃ɑ gɔ̃ɔ sɔɔ, 35 nɑ rɑ ye nɑɑ girewɑ kpɑ n ye so n yɑ̃ɑ te wɔrɑ yen nɔɔn di. Yɑ̀ n mɑn sĩiremɑ yen nɔɔ gbiniyɑ nɑ rɑ nɛnɛ n kɑ ye so n go. 36 Yinni nɑ yɑɑ kɔ̃si goore. Nge mɛyɑ kon mɑɑ Filisiti bɑngo sɑrirugii wini go nge yen tiɑ, domi u Gusunɔn tɑbu kowobu nɔɔ kɑsu. 37 Yinni Gusunɔ wi u mɑn wɔrɑ sɑɑ gbee sunɔ kɑ yɑɑ kɔ̃sɑ yen min di u koo mɑɑ mɑn wɔrɑ Filisiti win nɔmɑn di.
Mɑ Sɔɔlu u nɛɛ, ɑ doo kpɑ Yinni Gusunɔ u nun yɔ̃re.
38 Mɑ Sɔɔlu u win tiin tɑbu yɑ̃nu kpuro suɑ u Dɑfidi sebusiɑ. Niyɑ tɑrɑkpe kɑ sii gɑndun furɔ, 39 kɑ tɑkobi. Yen biruwɑ Dɑfidi u kookɑri kuɑ u kɑ sĩ, domi u ǹ yen dɔɔnɛ mɔ. Adɑmɑ u Sɔɔlu sɔ̃ɔwɑ u nɛɛ, nɑ ǹ kpɛ̃ n kɑ yenibɑ kpuro sĩ, domi nɑ ǹ yen dɔɔnɛ mɔ.
Mɑ u ye potɑ u yi. 40 Yerɑ u win dɛkɑ suɑ u dɑ u kpee gori nɔɔbu dɔburɑ dɑɑrɔ u yi doke win kpɑrɑ bɔɔrɔ mɑ u win kpurɑntɛɛru suɑ u susi Filisiti win mi.
41 Sɑɑ ye sɔɔ, Filisiti wi, u win tɛrɛ nɛnɔ gbiisie bɑ kɑ susimɔ bɑ dɔɔ Dɑfidin mi. 42 Ye Filisiti wi, u Dɑfidi mɛɛrɑ tii, u wɑ mɑ ɑluwɑɑsi kpɛmbuwɑ, tɔn swɑ̃ɑ durɔ burɔ, yerɑ u nùn gɛmɑ. 43 Mɑ u nùn sɔ̃ɔwɑ u nɛɛ, nɛ bɔ̃ɔwɑ ɑ kɑ sere dɛki suɑmɑ ɑ mɑn kɑsu? Yerɑ u Dɑfidi bɔ̃rusi kɑ win bũnun yĩsiru. 44 Mɑ u nɛɛ, ɑ susimɑ, kon de gunɔsu kɑ gbeeku yɛɛ yu wunɛn yɑɑ di.
45 Dɑfidi wi, u Filisiti wi sɔ̃ɔwɑ u nɛɛ, wunɛ wee ɑ kɑ mɑn sɑnnɔ wee kɑ tɑkobi kɑ yɑɑsɑ kɑ sɑkɑ. Adɑmɑ nɛ, nɑ kɑ nun sɑnnɔ weewɑ kɑ Gusunɔ wɔllu kɑ tem Yinnin yĩsiru, wi u mɑɑ sɑ̃ɑ Isirelibɑn tɑbu kowobun Yinni wi ɑ nɔɔ kɑsu. 46 Gisɔ Yinni Gusunɔ u koo mɑn nun nɔmu bɛriɑ. Kon nun so n surɑ kpɑ n wunɛn wiru burɑ. Gisɔ kon Filisitibɑn tɑbu kowobun gonu gunɔsu kɑ gbeeku yɛɛ wɛ̃ yi di. Kpɑ hɑnduniɑgibu kpuro bu giɑ mɑ Gusunɔ Isirelibɑn Yinni u dɑm mɔ. 47 Be bɑ wɑ̃ɑ mini kpuro bɑ koo wɑ mɑ Yinni Gusunɔ kun tɑkobi kɑ yɑɑsɑn bukɑtɑ mɔ u kɑ tɔnu fɑɑbɑ ko. Domi wiyɑ u rɑ tɑbu di. U koo sun bɛɛ nɔmu bɛriɑ.
48 Sɑɑ ye Filisiti wi, u susimɔ u kɑ Dɑfidi wɔri, sɑɑ yerɑ Dɑfidin tii u mɑɑ dukɑ dɔɔ Filisitibɑn tɑbu sĩɑɔ u kɑ nùn yinnɑ. 49 Mɑ u win nɔmu kpɛ̃ɛ kpɑrɑ bɔɔ te sɔɔ u kperu wunɑ u bɛri win kpurɑntɛɛru sɔɔ. Mɑ u Filisiti wi kpee te kɑrɑ tɑ dɑ tɑ numɑ win sirikɑnɑɔ mɑ u wɔrumɑ u kibɑri.
50 Kpurɑntɛɛrun kpee teerɑ Dɑfidi u kɑ Filisiti wi kɑmiɑ. Ye u nùn surɑ bɑɑ tɑkobi u ǹ nɛni.
51 Mɑ u dukɑ dɑ u durɔ win tɑkobi womɑ yen kɑrɑrun di u kɑ nùn go u wiru burɑ. Ye Filisitibɑ bɑ wɑ mɑ ben tɑbu durɔ wi, u gu, yerɑ bɑ duki yɑrinɑ. 52 Yerɑ Isirelibɑn tɑbu durɔbu kɑ Yudɑbɑ bɑ seewɑ bɑ Filisitibɑ fɛɛrisi kɑ tɑbun wurenu bɑ bu girɑ sere Gɑti kɑ Ekoronin kɔnnɔwɔ, mɑ Filisitibɑn gonu wɔrukɑ Sɑɑrɑimun swɑɑɔ sere kɑ Gɑtiɔ n kɑ girɑri Ekoroniɔ.
53 Mɑ Isirelibɑ bɑ gɔsirɑmɑ bɑ Filisitibɑn sɑnsɑni wɔri bɑ ben yɑ̃nu gurɑ. 54 Yen biru Dɑfidi u Goliɑtin wiru suɑ u kɑ dɑ Yerusɑlɛmuɔ. Adɑmɑ ye yɑ sɑ̃ɑ Goliɑtin tɑbu yɑ̃nu kpuro u ni yiwɑ win tiin kurɔ.
Yonɑtɑm
u kɑ Dɑfidi bɔrɔnu kuɑ
55 Sɑɑ ye Sɔɔlu u Dɑfidi wɑ u dɔɔ u kɑ Filisiti wi sɑnnɑ, yerɑ u win tɑbu sunɔ Abinɛɛ bikiɑ u nɛɛ, Abinɛɛ, weren biiwɑ bii durɔbu geni.
Abinɛɛ u wisɑ u nɛɛ, sere kɑ wunɛn wɑ̃ɑru, nɑ ǹ yɛ̃.
56 Mɑ sunɔ u nɛɛ, ɑ bikio kpɑ ɑ nɔ ǹ n weren biin nɑ.
57 Ye Dɑfidi u Filisiti wi go u kpɑ u win wiru burɑ u nɛni u kɑ wee, yerɑ Abinɛɛ u kɑ nùn dɑ Sɔɔlun mi. 58 Sɔɔlu u nùn bikiɑ u nɛɛ, bii wunɛ, weren biiwɑ wunɛ.
Dɑfidi u nɛɛ, Isɑi, wunɛn bɔ̃ɔ wi u wɑ̃ɑ Bɛtelehɛmuɔ, wiyɑ u mɑn mɑrɑ.