Filisitibɑ bɑ kpɑkoro te wesiɑ
6
1 Yinni Gusunɔn woodɑn kpɑkororɑ wɑ̃ɑwɑ Filisitibɑn temɔ suru nɔɔbɑ yiru. 2 Mɑ Filisitibɑ bɑ ben yɑ̃ku kowobu kɑ ben sɔrobu sokɑ bɑ bu bikiɑ bɑ nɛɛ, ɑmɔnɑ sɑ ko kɑ Yinni Gusunɔn woodɑn kpɑkoro te ko. I sun sɔ̃ɔwɔ nge mɛ sɑ ko koosinɑ su kɑ tu wesiɑ Isirelibɑn mi.
3 Mɑ bɑ bu sɔ̃ɔwɑ bɑ nɛɛ, ì n Isirelibɑn Yinnin kpɑkoro te wesiɑmɔ, i ku rɑ tu wesiɑ kɑm dirum, ɑdɑmɑ bɑɑ ǹ n mɛren nɑ, i suuru kɑnɑbun kɛ̃nu wɛ̃ɛyɔ, i kɑ bɛkurɑ, kpɑ i giɑ yèn sɔ̃ u bɛɛ nɔmu doke sere kɑ tɛ̃.
4 Mɑ Filisitibɑ bɑ nɛɛ, kɛ̃ɛ nirɑ̀ sɑ ko wɛ̃ su kɑ suuru kɑnɑ.
Mɑ bɑ bu sɔ̃ɔwɑ bɑ nɛɛ, i bwisinun weenɑsinu koowo wɑsi nɔɔbu kɑ mɑɑ gunɔnun weenɑsinu wɑsi nɔɔbu, ye kpuro kɑ wurɑ, nge mɛ bɛɛ Filisitibɑn sinɑmbɑ geeru nɛ, yèn sɔ̃ bɑrɑ tee terɑ tɑ bɛɛ mwɑ kɑ bɛɛn sinɑmbu. 5 Yen sɔ̃nɑ i ko i bwisinun weenɑsinu ko kɑ gunɔ ni nu tem sɑnkumɔn weenɑsinu, kpɑ i Isirelibɑn Yinni bɛɛrɛ wɛ̃. Sɔrɔkudo u koo win nɔmɑn bunum kɑwɑ u bɛɛ wɑhɑlɑ wunɑri bɛɛ kɑ bɛɛn bũnu kɑ bɛɛn tem min di. 6 Ǹ n mɛn nɑ, i ku bɛɛn gɔ̃ru bɔbiɑsiɑ nge mɛ Egibitigibu kɑ ben sunɔ bɑ kuɑ. I yɑɑyo nge mɛ Gusunɔ u bu kuɑ sɑnɑm mɛ bɑ ǹ Isirelibɑ yɔ̃su bɑ doonɛ. 7 Yen sɔ̃, i nɑɑ kɛkɛ kpɑɑ koowo tɛ̃, kpɑ i nɑɑ mɛrobu tɑmɑ yiru yi yi binu bom kɛ̃mɔ yi bɑ kun sugu dokere kpɑ i yi sɔri kɛkɛ ye sɔɔ, kpɑ i kɑ yin binu dɑ yɛnuɔ. 8 Kpɑ i Yinni Gusunɔn kpɑkoro te suɑ i sɔndi kɛkɛ ye sɔɔ, kpɑ i wurɑn yɑbu ye i nùn kuɑ mi suɑ i doke kpɑkororu gɑru sɔɔ i yi teɔnɔn bɔkuɔ, kpɑ i nɛɛ yi yɔ̃su yi doonɑ kɑ yin tii. 9 Sɑnɑm mɛ yi doonɔ, i n yi mɛɛrɑ. Yì n dɔɔ Bɛti Semɛsi giɑ Isirelibɑn tem nɔɔ burɑ yerɔ, i n yɛ̃ mɑ Yinni Gusunɔwɑ u sun kɔ̃sɑ yeni kuɑ. Adɑmɑ yì kun kue mɛ, sɑnɑm mɛyɑ i ko i giɑ mɑ n ǹ win nɔmɑ yɑ sun so, yɑ yen nɑɑru nɑwɑ.
10 Mɑ durɔ be, bɑ kuɑ mɛ. Bɑ nɑɑ mɛrobu yiru ye kɑsu bɑ yi sɔri nɑɑ kɛkɛ ye sɔɔ, mɑ bɑ yin binu kɛnusi yɛnuɔ. 11 Mɑ bɑ kɑ Yinni Gusunɔn kpɑkoro te nɑ bɑ yi kɛkɛ ye sɔɔ, kɑ kpɑkoro tè sɔɔ bwisinu kɑ gunɔnun weenɑsinu wɑ̃ɑ mi.
12 Mɑ nɛɛ yi, yi yɑnde doonɑ Bɛti Semɛsin swɑɑɔ tururu. Yi sumɔ yi kɑ swɑɑ ye swĩi, yi dɔɔ sɔru sɔrum mɛ, yi ǹ gɑm gɛre. Mɑ Filisitibɑn sinɑmbɑ yi swĩi dɑndɑnkuru bɑ kɑ dɔɔ sere Bɛti Semɛsiɔ, Isirelibɑn tem nɔɔ burɑ yerɔ. 13 N deemɑ Bɛti Semɛsigibu bɑ ben ɑlikɑmɑ gɛ̃ɛmɔ wɔwɑɔ. Ye bɑ nɔni seeyɑ, yerɑ bɑ woodɑn kpɑkoro te wɑ, mɑ bɑ nuku dobu wɔri.
14-15 Mɑ nɑɑ kɛkɛ ye, yɑ duɑ Yosue Bɛti Semɛsigiin gberɔ, yɑ yɔ̃rɑ mi. Wee kpee bɑkɑru gɑrɑ wɑ̃ɑ mi. Mɑ Lefibɑ bɑ nɑ bɑ Yinni Gusunɔn woodɑn kpɑkoro te suɑ kɛkɛ yen di kɑ sere mɑɑ kpɑkoro te tɑ wurɑn yɑbu yebɑ mɔ, mɑ bɑ ye kpuro yi kpee bɑkɑ ten wɔllɔ. Mɑ bɑ kɛkɛ yen dɑ̃ɑ bɛsukɑ bɑ kɑ nɑɑ mɛro be Yinni Gusunɔ yɑ̃ku dɔ̃ɔ mwɑɑrɑrugiru kuɑ. Mɑ bɑ mɑɑ siɑrɑbun yɑ̃kunu kuɑ dɔmɑ te. 16 Ye Filisitibɑn sinɑmbu nɔɔbu be, bɑ wɑ mɛ, yerɑ bɑ gɔsirɑ Ekoroniɔ dɔmɑ te.
17 Bwisinun weenɑsii ni Filisitibɑ bɑ kuɑ kɑ wurɑ bɑ Yinni Gusunɔ wɛ̃ ben durum sɔ̃, bɑ nu kuɑwɑ wuu sinin sɔ̃, Asidɔdu kɑ Gɑsɑ kɑ Asikɑloni kɑ Gɑti kɑ mɑɑ Ekoroni. 18 Gunɔnun weenɑsii ni bɑ kuɑ kɑ wurɑ, nin geerɑ mɑɑ kuɑwɑ nge mɛ Filisitibɑn sinɑmbu nɔɔbu yen wusu nɛ si su gbɑ̃rɑru mɔ kɑ si su kun mɔ. Kpee bɑkɑ tèn wɔllɔ bɑ kpɑkoro te yi, tɑ wɑ̃ɑwɑ Yosue Bɛti Semɛsigiin gberɔ, tɑ sɑ̃ɑ seedɑ sere kɑ gisɔn gisɔ.
19 Yinni Gusunɔ u mɑɑ Bɛti Semɛsigibu gɑbu go domi bɑ win kpɑkoro ten sɔɔwɔ mɛɛrɑ. Be u go mi, ben geerɑ kuɑwɑ tɔnu wɑtɑ kɑ wɔkuru. Mɑ be bɑ tie bɑ nɔɔgiru suɑ bɑ gɔɔ swĩ yèn sɔ̃ Yinni Gusunɔ u ben dɑbinu go.
20 Mɑ Bɛti Semɛsigibu bɑ nɛɛ, wɑrɑ u koo yɔ̃rɑ Yinni Gusunɔn wuswɑɑɔ, domi u dɛɛre. Nge weren miyɑ kpɑkoro te, tɑ koo dɑ tɑ̀ n yɑrɑ bɛsɛn min di.
21 Mɑ bɑ sɔmɔbu gɔrɑ Yɑrimun wuugibun mi, bɑ nɛɛ, Filisitibɑ bɑ kɑ Yinni Gusunɔn woodɑn kpɑkoro te wurɑmɑ mini. I nɑ i tu suɑ i kɑ dɑ bɛɛn mi.