Gbɑburu 27

Tubi ye tɔn kurɔbɑ ko n mɔ

¹ Selofɑdi, wi u sɑ̃ɑ Hefɛɛ kɑ Gɑlɑdi kɑ Mɑkiri kɑ Mɑnɑsen sikɑdobu Yosɛfun bweseru sɔɔ, u bii tɔn kurɔbu nɔɔbu mɑrɑ. Berɑ Mɑlɑ kɑ Nɔɑ kɑ Hogulɑ kɑ Milikɑ kɑ Tirisɑ ² mɑ be, bɑ nɑ Mɔwisi kɑ yɑ̃ku kowo Eleɑsɑɑn mi, kɑ wirugibun mi kɑ sere Isirelibɑ kpuron mi Yinni Gusunɔn sɑ̃ɑ yerun kɔnnɔwɔ bɑ nɛɛ, ³ bɛsɛn tundo u guwɑ gbɑburɔ. U#ǹ wɑ̃ɑ Koren bibun wuuru sɔɔ be bɑ Yinni Gusunɔ seesi. U guwɑ win tii tiin torɑnun sɔ̃. Adɑmɑ u#ǹ bii tɔn durɔ mɔ. ⁴ N weenɛ bu win bwese kɛrɑ deri yèn sɔ̃ u#ǹ bii tɔn durɔ mɔ? I sun tem wɛ̃ɛyɔ bɛsɛn tundon mɑɑbu kɑ wɔnɔbun suunu sɔɔ.

⁵ Mɑ Mɔwisi u Yinni Gusunɔ kɑnɑ ben gɑri yin sɔ̃. ⁶ Mɑ Yinni Gusunɔ u nùn wisɑ u nɛɛ. ⁷ Selofɑdin bii be, bɑ gem mɔ. A bu tem wɛ̃ɛyɔ mɛ ben tundo u ko n dɑɑ mɔ. Kɑɑ bu mu wɛ̃wɑ ben tundon mɑɑbu kɑ wɔnɔbun suunu sɔɔ. ⁸ Yen biru, kpɑ ɑ Isirelibɑ sɔ̃ ɑ nɛɛ, goo ù n gu mɑ u#ǹ bii tɔn durɔ mɔ, win bii tɔn kurɔwɑ u koo win ɑrumɑni suɑ u tubi di. ⁹ Ù kun mɑɑ bii tɔn kurɔ mɔ, win mɑɑbu kɑ wɔnɔbɑ bɑ koo win ɑrumɑni suɑ bu tubi di. ¹⁰ Ù kun mɑɑ mɑɑbu kɑ wɔnɔbu mɔ, win tundon mɑɑbu kɑ wɔnɔbɑ bɑ koo win ɑrumɑni suɑ bu tubi di. ¹¹ Win tundo ù kun mɑɑ mɑɑbu kɑ wɔnɔbu mɔ, win mɛro bisi wi u fɛ̃ɛ fɛ̃ɛ bo wiyɑ u koo win ɑrumɑni tubi di. Yeni yɑ ko n sɑ̃ɑwɑ woodɑ Isirelibɑ sɔɔ nge mɛ nɛ, Yinni Gusunɔ nɑ ye Mɔwisi wɛ̃.

Yinni Gusunɔ u Yosue gɔsɑ

u kɑ ko Mɔwisin kɔsire

¹² Yinni Gusunɔ u Mɔwisi sɔ̃ɔwɑ u nɛɛ, ɑ yɔɔwo Abɑrimun guu tenin wii kpiirɔ, kpɑ ɑ nɔni seeyɑ ɑ tem mɛ mɛɛri mɛ kon Isirelibɑ wɛ̃. ¹³ Yen biru, kpɑ ɑ kpunɑ ɑ gbi nge mɛ wunɛn mɔɔ Aroni u gu. ¹⁴ Domi i#ǹ woodɑbɑ mɛm nɔɔwɛ Sinin gbɑburɔ, sɑnɑm mɛ Isirelibɑ bɑ mɑn seesi. I#ǹ mɑɑ mɑn bɛɛrɛ wɛ̃ ben wuswɑɑɔ sɑnɑm mɛ bɑ nim kɑnɑmɔ. Yerɑ n derɑ nɑ Mɛribɑn nim mɛ sokɑ Sɑnnɔn nim Kɑdɛsiɔ, Sinin gbɑburɔ.

¹⁵ Mɑ Mɔwisi u Yinni Gusunɔ sɔ̃ɔwɑ u nɛɛ, ^16-17 Yinni Gusunɔ, wunɛ wi ɑ tɑkɑ koorɑ kpuro hunde wɛ̃, ɑ goo gɔsio, ɑ nùn ko wirugii wi u koo kpĩ u wunɛn tɔmbu kpɑrɑ kpɑ bɑ kun kɑ sɑ̃ɑ nge yɑ̃ɑ ni nu#ǹ kpɑro mɔ.

¹⁸ Mɑ Yinni Gusunɔ u Mɔwisi wisɑ u nɛɛ, Yosue Nunin bii wee, wì sɔɔ nɛn Hunde u yibɑ. A nùn suo kpɑ ɑ nùn nɔmɑ sɔndi. ¹⁹ Kɑɑ kɑ nùn dɑwɑ yɑ̃ku kowo Eleɑsɑɑn wuswɑɑɔ, kpɑ ɑ nùn ko wunɛn kɔsire Isirelibɑ kpuron nɔni biru. ²⁰ A nùn wunɛn yiikon bɔnu wɛ̃ɛyɔ kpɑ Isirelibɑ kpuro bu nùn mɛm nɔɔwɑ. ²¹ Yɑ̃ku kowo Eleɑsɑɑwɑ u ko n dɑ wɑ kpɑ Eleɑsɑɑ u mɑn kɑnɑ win sɔ̃ kɑ woro te bɑ rɑ ko kɑ urimu. Win gɑriyɑ Yosue kɑ Isirelibɑ kpuro bɑ ko n dɑ kɑ sɔmburu ko.

²² Mɑ Mɔwisi u kuɑ ye Yinni Gusunɔ u nùn sɔ̃ɔwɑ. U Yosue suɑ mɑ u kɑ nùn dɑ yɑ̃ku kowo Eleɑsɑɑn wuswɑɑɔ Isirelibɑ kpuron nɔni biru. ²³ Mɑ u nùn nɔmɑ sɔndi u nùn kuɑ win kɔsire nge mɛ Yinni Gusunɔ u nùn sɔ̃ɔwɑ.