साकोङ्छ़ङ
११
हान साकोङ्छ़ङ मुमानिओ निनाम्हाङ्आ म़हिप्ताओ अ़नुछ्या आन्कान तोक्तुम निकिना अ़छ़ङ मुमा,
खोन्कि आन्कान अ़खान्मिन्ओ य़ङ्ओ अ़नुछ्याओ सोम्कुवा मुमा ओ।
२ ओ साकोङ्छ़ङ्लाम्पाङा आराङ्ओ म़नाचि निनाम्हाङ्आ ऩङानुयाङ्सा म़लोउचि।
३ साकोङ्छ़ङ्लाम्पा आन्कान तुप्तुम झारा हेन्खामा निनाम्हाङ्ओ अ़चुय़ङ्लाम्पा मुया।
खोन्कि ओ म़दात्याङ्ओचि अ़दात्निनिन्ओ य़ङ्दाङ्का मुया।
४ साकोङ्छ़ङ्लाम्पा हाबिल्आ कयिन्दाङ्का अ़नुवाक हेन्खोक्वा निनाम्हाङ प़।
साकोङ्छ़ङ्लाम्पाङा हाबिल साम्योक्मि काइसा,
देकिनालो खोसोओ अ़हेन्खोक्वा निनाम्हाङ्आ ऩङाअ़नुसा।
खोन्कि खो सुवादानुछाङ साकोङ्छ़ङ्ओ अ़मात्ऩङ्लाम्पा खो हान्छाङ चेप्याङ।
५ साकोङ्छ़ङ्लाम्पा मान्स़माङ हनोक निनाम्मादु थेन्ताखात्ता,
खोन्कि खो खात्निछाङ मान्धित,
देकिनालो निनाम्हाङ्आ खो अ़थेन्ताखात्ता।
खो थेन्माखात्मा बुया खोसाआ निनाम्हाङ अ़ऩङानुसुओ य़ङ साम्कालिन्आ खालुसु।
६ साकोङ्छ़ङ मान्मुमाङ निनाम्हाङ्ओ अ़चुऩङानुमा अ़ऱन्मिन।
देकिनालो साङ निनाम्हाङ्ओ अ़चुच़क्दा ता,
खोसाआ निनाम्हाङ म़युङ्याङ खोन्कि खोक्को कालाम्चि खोक्कोसाआ सिरिफा म़प़चि निकिना अ़नुछ्या साकोङ्छ़ङ मुमादोत।
७ मान्लियुक्ताओ य़ङ्ओ अ़तुक्वादा निनाम्हाङ्आ चाप्चेत्तुहिदा नोआआ साकोङ्छ़ङ्लाम्पा मो य़ङ काङ्सा खोन्कि अ़खिम्लुम्पा वाधुप्दाङ्का लेन्मा निम्पाङ अ़क्तात तोक्पो वाप्तेला मु।
मोवात्नि नोआआ हेन्खामादाओ म़नाचि लाहि पाक्तुचिकि निनाम्हाङ्दाङ्का ताओ साम्योक्मि साकोङ्छ़ङ्लाम्पा तोक्तु।
८ साकोङ्छ़ङ्लाम्पा अब्राहाम लोमावा चुवा,
खोन्कि खारानि लोवाओदात्नि खारा।
मो युङ्खा आदेङ खोसाआ पाङ्यिवा तोक्मा दोराङाओ।
खादात्नि खाराङाओ मो मान्सिन्दोङुनुछाङ खो खारा।
९ साकोङ्छ़ङ्लाम्पा खो अ़क्छा प़न्था काकोन्वा मान्सिन्माय़ङ्ओ हिप्माय़ङओ हेन्कोप्दा तित्खिम ख़न्तुकि याआ।
इसहाक खोन्कि याकुब्आछाङ मो हिप्माय़ङ्ङा अ़तोक्ताचुकि मो हेन्कोप्दा युङाचि।
१० अब्राहाम्आ ओ मु,
देकिनालो निनाम्हाङ्आ मित्चिऩङ अ़मुवाओ खोन्कि अ़धुन युङ्युङ्ओ छ़ङ्दा मुमाय़ङ सहरा खोसाआ हुङुङु।
११ साराआछाङ अ़न्नुनु खोक्मा लिसाकि छा दाप्मा मान्ऱकादा लिसायुङ्सानुछाङ साकोङ्छ़ङ्लाम्पाङा छा दाप्मा रुवा।
देकिनालो निनाम्हाङ्आ अ़मुवाओ हिप्माय़ङ अ़ताला निकिना खो साकोङ्छ़ङ मुवायुङ्सा।
१२ अब्राहाम छातोक्मा मान्ऱकादा अ़न्नुनु खोक्पा लिसाओनुछाङ अ़क्छा म़नादाङ्का नाम्छ़ऱदुओ साङ्केन्माचि ओन्तेकाङा खोन्कि धियाङ्वामाओ अ़केम्दाओ खिप्मा अ़ऱन्मिन्ओ लुङ्च़क़य़क ओन्तेकाङा छाचि पुक्तुचि।
१३ ओ झारा म़नाचि निनाम्हाङ्आ प़नानिन निकिना म़हिप्तुचिओ य़ङ मान्तोक्माङ निनाम्हाङ साकोङ्छ़ङ मुयाङ्सा म़सुवादा।
खोन्नुछाङ निनाम्हाङ्आ म़हिप्तुचिओ य़ङ मोचिआ अ़थायाङ्काङा अ़खाकि अ़चुऩङानुवा।
मोवात्नि मोचिआ खोचि ओ हेन्खामादा तावाङ्चि खोन्कि काहुलुक्चि म़मित्तान्चिन।a
१४ ओवाको य़ङ काय़ङ म़नाचिआ अ़चुओ आप्पिओ निम्पाङ अ़क्तात हेन्कोप अ़लाम्याङ्ओ य़ङ छेङ्छेङ्छेङ्वा मुयाङ।
१५ खाक्को हेन्कोप्दाङ्का मोचि म़लोन्ताओ,
मोचिआ मो हेन्कोप्ओ अ़तुक्वादा म़मिनाओदे मोचिआ लामाखात्मा अ़वाखाम तोक्मा अ़रुवाओ।
१६ मेन मोचिआ अ़क्तात च़लोक अ़नुवाक हेन्कोप निनाम्मादुओ खिम अ़लामाङा।
खोन्ओसा निनाम्हाङ मोचिओ अ़चुनिनाम्हाङ्नि लोलुमा अ़चुलेजो अ़कात्निन।
खोन्कि खोक्कोसाआ मोचिओ निकिना अ़क्तात सहरा म़चुम्सुप़युङ्सुचि।
१७ निनाम्हाङ्आ अब्राहाम अ़चिन्ताखाहिदा खोसाआ साकोङ्छ़ङ्लाम्पा अ़क्छा ओन्ङा ओ अ़छा इसहाक हेन्खोक्वा प़सि चुम्सान्चिन।
१८ निनाम्हाङ्आ इसहाक्ओ अ़तुक्वादा ओवात्नि खो अ़हिप्ता,
“इसहाक्लाम्पाङा आम्छाचिओ अ़चुऩङ युङ।”
१९ निनाम्हाङ्आ म़नाचि म़सुवादाओदाङ्काछाङ लामाखोन्मालोन्मा म़ऱचि निकिना अब्राहाम मिना,
खोन्कि अब्राहाम्आ इसहाक सुवादाओदाङ्का लासिन्तोक्तिन्वा लिसा।
२० निनाम्हाङ्एदा सोम्कुवा मुयाङ्सा हिप्माय़ङ य़ङ अ़ताला निकिना साकोङ्छ़ङ्लाम्पा इसहाक्आ याकुब खोन्कि एसाब माय़ङ्ओ अ़तुक्वादा आसिखा प़चि।
२१ याकुब्आ अ़स़मादामा बुया अ़तोप्मालिओ अ़चोम्दा बोम्सान्चिन्कि निनाम्हाङ ब़क्तु,
खोन्कि योसेफ्ओ ह़वाङ अ़छाचि साकोङ्छ़ङ्लाम्पा आसिखा प़चि।b
२२ साकोङ्छ़ङ्लाम्पा योसेफ्आ स़मादामा बुया इस्राएलिचिआ मिस्र छित्मादामाओ अ़तुक्वादा खालुसु।
खोन्कि लोचि देम्खा खानानिन ओ हेन्कोप त़छिरुम्दाम,
मोग़रि अ़ङ्य़वाचिछाङ खात्तानुम्च़म।c
२३ निनाम्हाङ्य़ङ खाकालु मोसा लिसाहिदा खोसोओ अ़मा-अ़पाचिआ खो खान्नुवाङाओ अ़खाचु,
खोन्कि साकोङ्छ़ङ्लाम्पा सुम्कादोङ्वात्तारि खो अ़कुम्सायुङ्साचु,
खोन्कि हाङ्ओ अ़य़ङ्दा मोचि मान्क़चि।d
२४ सावाछा लिसाकि साकोङ्छ़ङ्लाम्पा निनाम्हाङ्य़ङ खाकालु मोसा मिस्रदाओ हाङ फारोओ अ़मेत्छाछा छाओ अ़छानि लोलुमा छुन्ता।
२५ मोसाआ अ़क ग़रि हेवादा ऩङानुयाङ्सा युङ्मादाङ्का निनाम्हाङ्ओ अ़चुम़नाचिएनान तिम्माछ़न्मादा छुक्मा छेन्तु।
२६ मिस्र हेन्कोप्दाओ चासुम्छेन्बिदाङ्का ख्रिस्तओ निम्पाङ सुङ्लुमा मोसाआ तोक्पो अ़लुङ्ओ चासुम्छेन्बिनि मित्तु।
देकिनालो ओ खोसाआ सिरिफादात्नि खा।
२७ हाङ्ओ अ़माइसुङ्दा मान्क़माङ साकोङ्छ़ङ्लाम्पा खोसाआ मिस्र हेन्कोप छिरुदो।
देकिनालो खोसाआ अ़दात्निन्ओ निनाम्हाङ खान्वात्नि खो लामान्चिन छुन्ता।e
२८ साकोङ्छ़ङ्लाम्पा खोसाआ काक्माखात्मा चानुचाओ च़माथाङ्मावा चुवा।
कुम्पा म़लिसाओ छाचि कासेत निनाम्हाङ काफाआ मोचि अ़सेरुन्चिन्ने निकिना मोसाआ सायाम्पोक्चिओ अ़चुह़आ लाप्तिखोप्चिदा रेप्मेत्तुचि।f
२९ साकोङ्छ़ङ्लाम्पा हाङ्साङाओ बाखादा कोलिन्वा मोचिआ हालापाक्वा धियाङ्वामा अ़धेरा।
मेन मिस्रिचि मोवात्नि च़मा म़लामाहिदा मोचि वाम़लुम्तासुवा।g
३० साकोङ्छ़ङ्लाम्पा सात्कालेन्तारि यरिहोदाओ कुदारि अ़ऱत्ताचिआकिना मो तिया।h
३१ काचान्चामा राहाब्ओ अ़साकोङ्छ़ङ्आङा चिवा कामुचि नुलोक साऩङ्वा मेत्तुचिओसा लोमान्तेत्चिएनान मान्सेत।i
३२ ओदाङ्का च़लोक अ़ङ्का य़ङ्मादोत कि?
गिदोन,
बाराक,
सिमसोन,
यिप्ता,
दाउद,
समुएल खोन्कि निनाम्हाङ्य़ङ खाकालुचिओ अ़चुतुक्वादा य़ङ्मायुङ्मा अ़ङ्ग़रि मात्द़ङ।j
३३ खोचिओ अ़चुसाकोङ्छ़ङ्लाम्पा हेन्कोप्चिदा म़छोसा,
तोङालो छ़ङ म़छेन्ताकि म़हिप्तुचिओचि म़तोक्तुचि।
मोचिआ धिनाराचिओ अ़चुदोचि म़ह़सुप़चि।k
३४ मिलाप्चिआ मोचि ह़त्मा मान्ऱदोचि।l
खोन्कि अ़चुङेङ्चिओ अ़चुबान्छोन्ओ अ़हादाङ्का म़फुङ्सा।
मोचि मान्ऱकादा म़मुवाङानुछाङ काऱ म़लिसा।
मोचि ङेन्दा सावापोरिओ म़मुवाङा खोन्कि निहेन्कोप्दाओ रात्खामिचि म़ऱसुखाइसुचि।
३५ मेत्छामाचिआ अ़चुओ साकोङ्छ़ङ्लाम्पा म़सुवादाओ अ़चुओ म़नाचि ह़ङ्म़ङ्दा म़खोन्तालोन्ताओ म़तोक्तुचि।
नि खा-खाक्कोचिआ फोङ्माय़ङ ऩङाअ़छिरा खोन्कि च़लोक अ़नुवाक ह़ङ्म़ङ तोक्मा निम्पाङ अ़चाअ़त्मा अ़आङ्ता।m
३६ खा-खाक्कोचि म़सुङ्तुचि,
य़हुप म़पाक्तुचिकि म़छ़सुचि खोन्कि छेक्खादा म़छेक्तुचि।
३७ मोचि लुङ्आ म़वेरुसेरुचि।
मोचि आरिआ म़हेक्तुसेरुचि।
मोचि बान्छोन्आ म़धेरुसेरुचि।
भेरा खोन्कि मेनेत्चिओ अ़चुहोक्वाचि म़हुम्सा खोन्कि मान्तोक्कादा म़लिसा,
म़ल़क्तुचि खोन्कि अ़त्लो म़मुचि खोन्कि मोचि ओह्यात्नि-मोह्यात्नि म़कोलालुक्ता।
३८ मोचि लेक्लेक्लेक्वाओचिदा खोन्कि भ़ऱचिदा हुमालुक्मादोरा,
खोन्कि मोचि बुक्ताङ्चि खोन्कि बाखादाओ हुत्चिदा युङ्मालुक्मादोरा।
हेन्खामा मोचिओ निम्पाङ खान्तुचिओ मान्मुयाङ।