हेन्खामादाओ निनाम्हाङ लोङ्खा
९
बुयाओ य़ङ्छ़ङ्दा निनाम्हाङ ब़क्खाओ य़ङ्हुप खोन्कि हेन्खामादा सेङ्याङ्ओ निनाम्हाङ ब़क्खा याआङा।
२ अ़क्तात तित्खिम मुवायुङ्सा।
मो तित्खिम्दा ह्वा खोप याआङा।
मो खोप्चिदाओ बुदाओ खोप सेङ्याङ्ओ खोप्नि लोवाङा।
मोदा कुपि,
तेबला खोन्कि म़सेङ्साओ पेम्पाक्चि म़युङ्सायुङ्सा।
३ मो ह्वा खोप्ओ अ़चुकाप्दा अ़क्तात थेम्खातित क़ङ्सायुङ्सा।
मोसोओ अ़देङ्लिप्पा तोक्पो सेङ्याङ्ओ खोप्नि लोवाङा।
४ मोदा हाराक्वाओ धुपा पाक्खा खोन्कि अ़दुङ-अ़कोङ्लिप्पा हाराक्वाआ स़प्ताओ य़ङ्छ़ङ्ओ सन्दुका याआङा।
सन्दुकाहुत्दा मन्ना पाआओ हाराक्वाओ ब़,
अ़छ़क्वा पाक्तुओ हारुन्ओ अ़तोप्मा खोन्कि दस्कातात लोमाय़ङ्चि म़छाप्ताङाओ ह्वातात थेप्पुचिवा लुङ्चि याआङाचि।
५ य़ङ्छ़ङ सन्दुका दुङ्दा निनाम्हाङ मोदा म़युङ्याङ्निओ खाङ्मुमा ह़वाङ साम्स़रिओ निनाम्हाङ काफाचि याआङाचि।
मोचिओ अ़चुलाप्चिआ य़ङ्छ़ङ सन्दुका अ़थेम्ताङाचु,
मोदा मुलो काब़क्पा ताकि निनाम्हाङ्एदा हेवाचि लेत्लुवाङा।
मेन ओ य़ङ्ओ अ़तुक्वादा ओन्ग़रि आन्कान्का अ़स़वा खालुमा अ़ऱन्मिन्का।
६ हान ओ य़ङ्चि म़तोङ्साचिआकि काब़क्पाचि बुदाओ खोप यावायोक मुखादा ब़क्मा काचि मुसि अ़धुन म़वाङाङा।
७ मेन थेम्खातित्ओ अ़देङ्दाओ खोप्दा मुलो काब़क्पा ओन्ङा अ़क दोङ्दा अ़क्दु वाङाङा।
ह़ मात्द़ङ देम्खाछाङ मान्वाङ्याङ।
खोन्कि मो ह़ खोसोओ निम्पाङ खोन्कि म़नाचि मान्सिन्माङ अ़मुवाओ अ़चुहेवाचिओ निम्पाङ अ़पुवाङा।a
८ ओ य़ङ लाम्पाङा सेङ्लावाआ खाङ्अ़मु: देम्खातारि बुयाओ सेङ्याङ्ओ खोप युङ्युङ,
मोन्तारि तोक्पो सेङ्याङ्ओ खोप्हुत्दा वाङ्खा लाम अ़होत्निन।b
९ ओ ना आइमित्ओ ग़रिओ निम्पाङ अ़क्तात अ़मात्ऩङ ओ।
ओसाआ ओ खाङ्मुसु,
प़माय़ङ छुक्दाम खोन्कि हेन्खोक्वाचिआ काब़क्चिओ छेन्खाताया सेङ्मा अ़ऱन।
१० मो चामायु,
दुङ्मायु खोन्कि अ़खाला-खालाओ सेङ्मान्चिन च़माथाङ्माचि बुङ्खालिप्पाओ य़ङ्हुप ओन्ङा ओ।
ओवाको बुयाओ य़ङ्हुप्चि अ़ऩङ्वा य़ङ्हुप अ़तानिन्तारि ओन्ङा अ़काचि याक।
ख्रिस्तओ अ़चुह़
११ मेन ख्रिस्त आइमित साऱङ म़ताचिआओ अ़नुवाक य़ङ्चिओ मुलो काब़क्पा म़लिसा।
खोक्को निनाम्मादुओ च़लोक तोक्पो खोन्कि अ़च़क़ल़क तित्खिम्दा म़खारा।
मो छुक्आ मुमाय़ङ्ओ माआङ खोन्कि ओ मुन्माय़ङ हेन्खामाओ अ़धाङ माआङ।
१२ मेनेत्पा माङ्लो बोयोङ्ओ अ़ह़आ माआङ,
मेन आप्पिओ अ़चुह़आ आन्कान अ़धुन्ओ निम्पाङ लेइसि अ़क्धुवा तोक्पो सेङ्याङ्ओ खोप्हुत्दा खोक्को म़वाङा।
१३ मेनेत्पा खोन्कि बोयोङ्चिओ अ़चुह़ खोन्कि बाछिओ अ़थाबुत म़नाचिएदा थोत्हिदा अ़चुच़माथाङ्मावा म़नाचिओ अ़चुपोक्चि अ़सेङ्निनिन्ओदाङ्का सेङ।
१४ ओ अ़छ़ङ य़ङ ओनालो,
ख्रिस्तओ अ़चुह़आ देम च़लोक आन्छेन्खाताया हेवा काचिचिदाङ्का सेङ,
खोन्ओसा आन्कान अ़ह़ङ निनाम्हाङ ब़क्मा ऱम।
देकिनालो खोक्कोसाआ अ़धुन्ओ लावाओ सावाआ आप्पि अ़च़क़ल़क हेन्खोक्वा म़लिसाकि निनाम्हाङ अ़पुवालावा।
१५ खोन्ओसा खोक्को निनाम्हाङ खोन्कि म़नाओ अ़चुरादाओ अ़ऩङ्वा य़ङ्छ़ङ कातुम म़मुयाङ।
मोवात्नि म़बुत्तुचिओचिआ निनाम्हाङ्आ म़हिप्तुचिओ अ़धुन्ओ आसिखाचि तोक्मा अ़ऱ।
देकिनालो बुयाओ य़ङ्छ़ङ्दा मोचिआ अ़फिसाओ हेवाओ दन्दादाङ्का फोङ्सि येसु म़सुवाचिआयुङ्सा।
१६ मिन्माछाप्लावा साङ्आ मुओ,
मो कामु सुवादायुङ्साओ खाङ्मुमादोत।
१७ खो स़दाकि ओन्ङा मिन्माछाप्लावा काचिदा पाक्मा ऱम,
मिन्माछाप्लावा काप़ ह़ङ्याङ्ओन मो काचिदा पाक्मा अ़ऱन्मिन।
१८ खोन्ओसा बुयाओ हिप्माय़ङ्छाङ साक्स़ङ्ओ अ़ह़ मात्द़ङ काचिदा पाक्मा मान्ऱ।
१९ निनाम्हाङ्य़ङ खाकालु मोसाआ य़ङ्हुप्ओ लोमाय़ङ झारा म़नाचि खाएत्तुचिउचि खोन्किना खोसाआ पित छाचि खोन्कि मेनेत्पाचिओ अ़चुह़ चाक्वादा होलुकि हालापाक्पाक्ओ भेराओ अ़मुवा खोन्कि हिसप्ओ अ़खाङ वालुम्तुकि य़ङ्हुप छाप्लाखादा खोन्कि झारा म़नाचिएदा रेप्तुचि।
२० खोन्किना खोसाआ ओवात्नि लोचि,
“निनाम्हाङ्आ खानानिन्एनान अ़मुवाओ य़ङ्छ़ङ ओ ह़आ अ़छ़ङ मु।”
२१ मोवात्निङा खोसाआ सेङाङाओ तित्खिम्दा खोन्कि ब़क्मादा याङ्मायु झारा खाम्माचिदा ह़ रेप्तु।
२२ अ़नुछ्या य़ङ्हुप य़ङ्याङ्वा ह़आ आप्फात झारा सेङ्सु,
खोन्कि ह़ सोन्कि ओन्ङा हेवा लेत।
२३ मोवात्नि निनाम्मादुओ अ़नुछ्याओ य़ङ्चिओ अ़मात्ऩङ सायाम्पोक हेन्खोक्वालाम्पा सेङ्मा दोराङानालो,
निनाम्मादुओ अ़नुछ्याओ य़ङ्चि सेङ्मा च़लोक अ़नुवाक हेन्खोक्वा दोरा।
२४ ख्रिस्त म़नाओ अ़छुक्आ मुमाय़ङ सेङ्याङ्ओदा मान्वाङ्चि।
मो अ़नुछ्या निनाम्मादुओ अ़मात्ऩङ ओन्ङा ओ।
मेन खोक्को निनाम्मादुङा म़वाङा,
खोन्कि खोक्को आन्लिप्पादा निनाम्हाङ्ओ अ़चुबुदा म़खारायुङ्सा।
२५ मुलो काब़क्पा अ़दोङ्खिन्तुम साक्स़ङ्चिओ अ़ह़ खुयुकि तोक्पो सेङ्याङ्ओ हुत्दा वाङ।
मेन येसुआ खोक्को आप्पि अ़दु-अ़दु हेन्खोक्वा प़सि म़वाङाओ माआङ।
२६ माङ्नालोना हेन्खामाओ अ़पुङ्चिपुक्दाङ्काङा खोक्कोसाआ अ़दु-अ़दु अ़चाअ़त्मा आङ्मादोराओ।
मेन ओ जुगाओ अ़देङ्दा खोक्कोसोओङा अ़चुहेन्खोक्वालाम्पा हेवा चुम्खाइसि खोक्को अ़धुन्ओ निम्पाङ अ़क्धुवा खाङ्म़मुसान्युङ्सान्चिन।
२७ देत्नि म़नाचि अ़क्दु स़माङादोत,
खोन्कि आदेङ निनाम्हाङ्आ छ़ङ म़छेन्तुचि,
२८ मोवात्नि ख्रिस्त्छाङ ब़द्धेकापाङ्सोओ अ़चुहेवा चुम्खाइसि अ़क्दु हेन्खोक्वा म़लिसा,
खोन्कि खोक्को ह्वादुओदु हेवा चुम्खाइसि माआङ,
मेन अ़चुऩङानुयाङ्सा खोक्को काहुङ्चि लेइसिओ निम्पाङ खाङ्म़मुनान्चिन।