थेसलोनिकिचि पावल्आ छाप्तुओ ह्वातात्ओतात छाप्लावा
छाप्लाखाओ अ़सिन्खा
थेसलोनिकेदाओ साम्भुङ्दा ख्रिस्त म़लाताओ अ़तुक्वादा दुम म़छ़राङा। ओ दुम्छ़न्मा पोन्याङ्सा खाराकि मोदा ब़द्धे पोप्तुखाइसुचि। ख्रिस्त तामा ग़रिना बुयाङा लिसाचिआ निकिना मोचि साकोङ्छ़ङ म़मुवाङा। पावल्आ मोचिओ ओवाको अ़चुसाकोङ्छ़ङ्ओ अ़तुक्वादा दुम क़प्याङ्सा ओ ह्वातात्ओतात छाप्लावा छाप्तु। छाप्लावादा खोसाआ ख्रिस्त लामातामा बुया खोसोओ अ़देङ्सालाप्पादा फित्चि कामु “साम्योक्मि य़ङ्हुप काभुङ्खान” अ़कोङ्दुम सिन्मा अ़ऱन्मिन्ओ म़नाओ लाम तित्मादा मान्साम्योक्मि खोन्कि अ़अ़त्पा काचिचि अ़न्नुनु म़पोन निकिना नुलोक खालुसु।
पावल्आ ओ छाप्लावा काखिप्चि दियाको दुखा खोन्कि अ़चाअ़त्मादानुछाङ आन्साकोङ्छ़ङ्दा ओह्यात्नि-मोह्यात्नि मान्लिमाङ युङ्मादोत। आन्ह़ङ्खालाम्ओ निकि खोसोओ अ़यावाचि म़चुवावा च़मादोत। खोन्किना अ़नुवाक काचि अ़क्सुसुवा मुमायुङ्मादोत्नि लोचि।
थुत्मेत्लो अ़तुक्वा ऩङ
अ़सिन्खा १:१-२
चोन्मा खोन्कि कान्माय़ङ्छाप १:३-१२
ख्रिस्तओ अ़लामातामाओ अ़तुक्वादा यायोक २:१-१७
ख्रिस्तियान च़माथाङ्माओ निकिना यायोक ३:१-१५
अ़चिन्मा ३:१६-१८